Bay Be’ ni Ma Rung’ag e Meybil?

“Kafram e ke maruwaran’ug ko bay e Got fa dariy. Machane, yu ngiyal’ e gu ma meybil ngak. De mudugil u wan’ug ko bay be’ ni be motoyil ko meybil rog. Machane, riyul’ ni gu ma athapeg ni bay be’ ni be motoyil ngog. Dariy e felfelan’ rog ma dariy fan e yafas rog. Kafram e gu ma tatamdag ni nge mich Got u wan’ug ya gu ma lemnag ni goo girdi’ nib war lanin’rad e ra mich Got u wan’rad.”​—PATRICIA, * IRELAND.

KAAM lem ni bod Patricia? Ga ma meybil ni yugu aram rogon ni be maruwaran’um ko bay e Got, fa dariy? Faanra aram rogon ma gathi goo gur. Mu lemnag e pi thin ni baaray.

◼ Nap’an ni kan fith ngak 2,200 e girdi’ u Ngalis ma kemus ni 22 e pasent e ke mich u wan’rad ni bay e Got ni ke sunmiy e fayleng ma ma motoyil ko meybil. Machane, bay 55 e pasent ko pi girdi’ nem ni yad ma meybil ngak Got yu ngiyal’.

◼ Nap’an ni kan fith ngak 10,000 e girdi’ u boch e nam ma be m’ug riy ni piin ni yad be yog ndariy e Got e bay 30 e pasent u fithik’rad ni yad ma meybil.

Mang Fan ni Be Maruwaran’rad?

Be’ nu Ngalis ni Allan fithingan e gaar: “Kafram e gu ma yog nde mich Got u wan’ug ya kug lemnag ni kan sunmiy e teliw ni fan ni nge gagiyegnag laniyan’ e girdi’, maku yad be fanay ni nge yog boch e salpiy ngorad. Maku ku gog ni faanra bay e Got ma susun ndabi yoor e ngongol nde mat’aw. Machane, yu ngiyal’ e gu ma par nga but’ ni gu be non nga ‘ban’en.’ Gu ma fitheg ni ma lungug, ‘Uw rogon, ma gu bay u roy?’”

Gubin e girdi’ ni be maruwaran’rad ko bay e Got fa dariy, maku yad be lemnag ni sana dariy be’ ni ma fulweg taban e meybil rorad, ma susun bay fan ni ke sum e lem rorad ni aram rogon. Ba ga’ ni bochan e dan fulweg e pi deer rorad ni baaray:

◼ Bay e En ni ke Sunmiy urngin ban’en, fa?

◼ Mang fan nib ga’ ni teliw e ma k’aring e kireb?

◼ Mang fan ni ke pag Got e gafgow?

Faan ga ra nang e fulweg ko pi deer ney, ma ra mich u wan’um ni bay e Got ni ma motoyil ko meybil rom, fa?

[Footnote]