Bay Rogon ni Ngad Fithed Boch Ban’en Ngak Got, Fa?

BAY boch e girdi’ ni yad ma lemnag nde fel’ ni ngan fith e deer ngak Got. Ya yad ma lemnag ni faan gad ra fith ko mang fan ni ke rin’ Got boch ban’en, ma aram e gad be darifannag. Me gur, aram rogon ni ga ma lemnag, fa?

Faanra aram rogon e tafinay rom, ma sana ga ra gin ngay ni ku bay boch e girdi’ nib fel’ kakrom ni kar fithed boch ban’en ngak Got. Mu lemnag e pi deer ni kar fithed:

Job ni be’ nib yul’yul’ e fith ni gaar: “Mang ni ma tay Got e girdi’ ni kireb ni dab ra m’ad, ngu ur pilibthirgad ma be fel’ rogorad?”—Job 21:7, BT.

Habakkuk nreb e profet nib yul’yul’ e fith ni gaar: “Ere mang ni kam th’ab gulungam kar pired ni yad be thang e pogofan rok e girdi’ ni kab gel e mat’aw rorad ngorad?”—Habakkuk 1:13.

Jesus Kristus e fith ni gaar: “Got rog, Got rog, mang fan ni kam n’igeg?”—Matthew 27:46.

Faan ga ra beeg e pi thin nu Bible ni bay nga m’on ara nga tomur ko pi deer ni ke fith Job, nge Habakkuk, nge Jesus mab tamilang nde puwan’ Jehovah * Got ni bochan e pi deer ney ni kar fithed. Ma susun ndab ni gin ko n’en ni rin’. Ya ku taareb rogon ni be pi’ Got athamgil nga lanin’dad ni ngad ninged e ayuw ngak ni nge gamaneg e tin nib t’uf ko dowef rodad ya nge par nib fel’. Mab m’agan’ ngay ni nge fulweg taban e n’en ni kad ninged ngak. (Matthew 6:11, 33) Ma kub m’agan’ ngay ni nge pi’ e fonow ni nge fal’eg e tafinay rodad nge lanin’dad ni nge par nib fel’. (Filippi 4:6, 7) Aram fan ni yog Jesus ngak pi gachalpen ni gaar: “Mu ninged, me yog ngomed.” (Matthew 7:7) Ere, n’en ni be micheg e re thin rok Jesus ney e be yip’ fan nrayog ni ngad ninged ban’en ni bay rogon ko pi n’en nib t’uf ko par rodad nib muun ngay e fulweg ko deer rodad nib ga’ fan.

Faanra mab e kanawo’ ngom, ma bin ngan ko pi deer ney e ga baadag ni ngam fith ngak Got?

● Bay fan e yafas rog, fa?

● Mang e ra buch u nap’an nra gum’?

● Mang fan ni ke pageg Got ni nggu gafgow?

Bochan ni “urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor”, ma susun nra ayuwegem ni ngam pirieg e fulweg riy ko Thin rok u Bible. (2 Timothy 3:16) Mu lemnag e n’en ni ke k’aring boch e girdi’ ni ngar fithed e pi deer ni kad weliyed ko som’on nge rogon e fulweg ni ke pi’ e Bible.

[Boch e thin nra tamilangnag murung’agen]