Mu Fil Ban’en ko Thin Rok Got

Ra Pi’ Got Reb e Am Nra Gagiyegnag e Fayleng ni Polo’, Fa?

Re article ney e be weliy boch e deer ni kaam fith ma be dag ko uw e rayog ni ngam pirieg e fulweg riy u Bible. Pi Mich Rok Jehovah e yad ra felfelan’ ni ngar tamilangnaged e pi fulweg ney ngom.

1. Mang fan nib t’uf reb e am ni nge gagiyegnag e fayleng ni polo’?

Girdi’ u ga’ngin yang e fayleng e yad ma mada’nag e gafgow e ngiyal’ ney. U boch e nam e bay e girdi’ riy ni yad ba gafgow, maku yima laniyan’ ngorad. Maku boor e girdi’ u boch e nam ni boor ban’en rorad ko n’en nriyul’ nib t’uf ko par rorad. Ere, ba t’uf reb e am nrayog ni nge f’oth e tin nib t’uf ko girdi’ u ga’ngin yang e fayleng ni taareb rogon.—Mu beeg e Eklesiastes 4:1; 8:9.

2. Mini’ e rayog ni ngan pagan’uy ngak ni nge gagiyegnag e fayleng ni polo’?

Bochan ndariy be’ nrayog rok ni nge gagiyeg nib fel’ rogon, ma aram fan nib mo’maw’ ni ngan pirieg be’ nrayog rok ni nge gagiyegnag e fayleng ni polo’. Dariy taa be’ nrayog ni nge fel’ u wan’ boor e girdi’. Maku mini’ e rayog rok ni nge gel ko ngongol ni sasaliyeb u nap’an ni kan par nga reb e liw nib tolang? Yira lemnag ni taa be’ e nge gagiyegnag e fayleng ni polo’ mab gel e marus riy.—Mu beeg e Proverbs 29:2, BT; Jeremiah 10:23, BT.

Ke mel’eg Got Fak ni aram Jesus ni nge gagiyegnag e fayleng ni manemus. (Luke 1:32, 33) Manang Jesus rarogon e par u fayleng. Ya, nap’an ni immoy u fayleng ma i golnag e m’ar, mi i fil boch ban’en ngak e piin nib sobut’an’rad, miki tay e tayim ni fan ko piin bitir. (Mark 1:40-42; 6:34; 10:13-16) Ere, dabisiy ni ir e ba fel’ ni nge Gagiyeg.—Mu beeg e John 1:14.

 3. Ba t’uf rodad reb e am ni nge gagiyegnag e fayleng ni polo’, fa?

Ke mel’eg Got Fak ni bay u tharmiy ni nge gagiyegnag e fayleng. (Daniel 7:13, 14) Bod rogon reb e girdi’ ni be gagiyeg u fayleng nrayog rok ni nge gagiyegnag gubin e binaw ni bay u tan pa’ ni yugu aram rogon ni dar par u rom. Ere, taareb rogon ngak Jesus nrayog rok ni nge gagiyegnag e fayleng ni polo’ ni yugu aram rogon ni be par u tharmiy.—Mu beeg e Matthew 8:5-9, 13.

Ere, ra m’agan’ gubin e girdi’ ngay ni nge Gagiyeg Jesus, fa? Danga’. Ya kemus ni piin nib t’uf rorad e tin nib mat’aw e ra fel’ u wan’rad e gagiyeg nra tay. Jehovah ni ir e ke mel’eg Jesus ni ir be’ ni ma dag e t’ufeg mab mat’aw ni nge Gagiyegnagdad e ra chuweg gubin e piin ni dubrad e gagiyeg nra tay.—Mu beeg e Matthew 25:31-33, 46.

4. Mang e ra rin’ e en nra Gagiyegnag e fayleng ni polo’?

Be kunuy Jesus e piin nib sobut’an’rad u ga’ngin yang e fayleng, ma be fil ngorad rogon kanawoen e t’ufeg rok Got, ni bod rogon be’ ni ma gafaliy e saf ni be kunuyrad nga taabang. (John 10:16; 13:34) Pi girdi’ nem ni kan kunuyrad e yad be ayuweg Jesus nge rogon e gagiyeg ni be tay. (Psalm 72:8; Matthew 4:19, 20) Yad be maruwel u taabang ni ngar weliyed ngak gubin e girdi’ u ga’ngin yang e fayleng ni ke Pilung Jesus.—Mu beeg e Matthew 24:14.

Dabki n’uw nap’an me fanay Jesus gelngin nib pilung, ni nge chuweg e ngongol ko sasaliyeb ko pi am u fithik’ e girdi’ u fayleng i yan. Ke mel’eg boch e piin ni yad ba yul’yul’ ni yad ma folwok rok ni ngar manged boch e pilung u tharmiy ni ngar gagiyegniged e fayleng ni polo’. (Daniel 2:44; 7:27) Gagiyeg nra tay Jesus e ra ayuweg gubin e girdi’ u fayleng i yan ni ngar nanged murung’agen Jehovah, ma ra sulweg fare paradis nga rogon ko som’on u nap’an ni sunumeg e girdi’.—Mu beeg e Isaiah 11:3, 9; Matthew 19:28.

Faanra ga baadag ngam nang boch murung’agen, mag guy e guruy ni 8 ko re ke babyor ney ni ke fal’eg e Pi Mich Rok Jehovah.