Rogon ni kan fanay fare bugithin ni “michan’” u Bible e be yip’ fan ban’en nrayog ni ngan pagan’uy ngay, ni bochan ni bay e mich riy. Ya be’ nib michan’ ngak Got e ba pagan’ ngak nra lebguy gubin ban’en ni Ke micheg.

Rogon e par rok Moses e dag nib ga’ fan u wan’ e pi n’en ni micheg Got ngak. (Genesis 22:15-18) Rayog rok ni nge par u Egypt nib fel’ rogon e par rok, machane ke “adag ni nge un ngak girdien Got ko gafgow ko bin ni nge felfelan’ nib ngoch nap’an ni be ngongliy e denen.” (Hebrews 11:25) Ere gur, re nem ni ke dugliy e ban’en nde fal’eg i lemnag nib fel’ rogon, ma ra boch nga m’on ma ra kalngan’ riy? Danga’, ya be yog e Bible ni Moses e “gowa ke guy fare Got ndab ni guy nga owchey.” (Hebrews 11:27) Pi n’en ni dugliy Moses ni bochan e michan’ rok ngak Got e yan ni tomur, ma dariy ban’en ni ke kalngan’ riy.

I gay Moses rogon ni nge gelnag e michan’ rok yugu boch e girdi’. Ni bod u nap’an ni lemnag piyu Israel ni aram e kan kolrad, ya yad bay u mathilin fapi salthaw rok Farao nge fare Red Sea ma dakuriy e gin nga ranod ngay. Ma aram e kar lemnaged ni ngan li’rad, ere kar weniggad ngak Jehovah nge Moses u fithik’ e meyor ni ngan ayuwegrad. Ere, mang e ra rin’ Moses?

Ma dabisiy ni dawori tamilang u wan’ Moses nra ruw raba’nag Got fare Red Sea, ya nge yag ni nge thap piyu Israel nga barba’. Machane, ba pagan’ Moses ni bay ban’en nra rin’ Got ni nge ayuweg e girdi’ Rok. Maku baadag ngki pagan’ piyu Israel ngak Got ni bod ir. Ya be yog e Bible ni gaar: “Me gaar Moses ngak e girdi’, “Dab mu rusgad! Mu pagedan’med, mi gimed guy e n’en ni bayi rin’ Somol nge fasegmed e daba’.” (Exodus 14:13) Gur, i ayuweg Moses e girdi’ nu Israel ni nge gel e michan’ rorad? Arrogon, ya rogon ni weliy e Bible murung’agen e michan’ rok Moses nge piyu Israel e gaar: “Michan’ rok piyu Israel ngak Got e ir e ayuweg piyu Israel ngar th’abed fa gi day ni ka nog e Red Sea ngay ni gowa yad be yan u daken e binaw.” (Hebrews 11:29) Ere, gathi kemus ni yigoo Moses e ke yib angin e michan’ rok ngak, ya kub muun e piin ni yad be gay rogon ni ngar filed ban’en ko n’en ni i rin’.

Rayog ni ngad folwokgad rok Moses, ma gad mel’eg boch ban’en ni be m’ug riy nib mich u wan’dad e pi n’en ni ke micheg Got ni fan ngodad. Ni bod rogon ni ke micheg Got ngodad nra pi’ e tin nib t’uf ko par rodad ni faan gad ra mon’eg e pigpig rodad ngak. (Matthew 6:33) Riyul’ nib mo’maw’ e re n’ey ni bochan nib ga’ ni gathi ireray e n’en ni be rin’ urngin e girdi’. Machane, faan gad ra athamgil nrogon nrayog rodad ni ngad momnaged e par rodad, ma gad tiyan’dad ko pigpig ngak Jehovah, ma rayog ni nge pagan’dad ngak nra pi’ e tin nib t’uf ko par rodad.Ya micheg ngodad ni gaar: ‘Ri dab gu pagmed; ma ri dab gu n’igmed.’​—Hebrews 13:5.

Ku gad ma athamgil ni ngad ayuweged yugu boch e girdi’ ni nge gel e michan’ rorad. Ni bod rogon e piin gallabthir ni yad ba gonop e yad manang ni yugu aram rogon nib mo’maw’ ngorad ni ngar ayuweged e bitir ni nge gel e michan’ rorad, machane yad ma rin’ ya ban’en nib milfan ngorad. Nap’an nra ilal e bitir, mab t’uf ni ngar nanged nriyul’ ni bay Got, ma ir e bay rogon ni nge yog ko mang e ba mat’aw nge mang e de mat’aw. Ma piin gallabthir e ba milfan ngorad ni ngar micheged ngak e bitir rorad ni nge tamilang u wan’rad ni faanra yad ra dugliy ni ngar folgad rok Got, ma ireram e bin th’abi fel’ e kanawo’. (Isaiah 48:17, 18) Piin gallabthir e yad ma pi’ reb e tow’ath nib ga’ fan ngak pi fakrad u nap’an ni yad ra ayuwegrad ni nge gel e michan’ rorad ngak Got ‘ni ba’, ma ra tow’athnag e piin ni yad be gayiy.’​—Hebrews 11:6.