1, 2. (a) Mang nib ga’ fan u wan’dad reb e fager nib yul’yul’ ma ma n’ag fan e kireb? (b) Mang boch e deer ni gad ra weliy e fulweg riy ko re article ney?

 UW ROGON e bin riyul’ e fager? Reb e walag nib pin ni Ashley fithingan e yog ni bin riyul’ e fager e ir be’ ni ma ayuwegem ma ma n’ag fan e pi oloboch ni kam rin’. Gad gubin ni gad baadag e fager ni aram rogon, nreb e fager nrayog ni nge pagan’dad ngak ma gad ba t’uf rok.​—Prov. 17:17.

² Jehovah e aram e bin th’abi yul’yul’ e fager nra yag ngodad maku ma n’ag fan e kireb. I weliy fare psalmist murung’agen ni gaar: “Gur e gab gol ngomad ma ga ma n’ag fan u wun’um e kireb romad, ma gubin e piin yad ma meybil ngom e yad ba sug ko fare t’ufeg rom ni dabi mus.” (Ps. 86:5, BT) Uw rogon be’ nib yul’yul’ ma ma n’ag fan e kireb? Uw rogon ni ma dag Jehovah e gal fel’ngin ney? Ma uw rogon nrayog ni ngad folwokgad rok? Gad ra nang e fulweg ko pi deer ney ma ra gel feni t’uf Jehovah rodad ni ir e bin th’abi fel’ e Fager rodad. Re n’ey e ku ra ayuwegdad ni ngari fel’ e tha’ u thildad pi walagdad.​—1 John 4:7, 8. 

3. Uw rogon be’ nib yul’yul’?

³ Be’ nib yul’yul’ e ma yul’yul’ ko piin nib t’uf rok. Ma dag ni yad ba t’uf rok u daken e ayuw ni ma pi’ ngorad. Gathi kemus ni ma rin’ e re n’ey ko ngiyal’ nib mom ni nge rin’ riy, ya ku ma rin’ ko ngiyal’ nib mo’maw’. Be yog e Bible ni Jehovah e ir be’ nib “yul’yul’ ma der ma ban.” Ere, dariy be’ nib yul’yul’ ni bod feni yul’yul’ Jehovah.​—Deut. 32:4.

4, 5. (a) Uw rogon ni ma dag Jehovah ni ir be’ nib yul’yul’? (b) Mang fan nrayog ni nge yib e athamgil nga lanin’dad ni faan gad ra lemnag rogon feni yul’yul’ Jehovah?

⁴ Uw rogon ni ma dag Jehovah ni ir be’ nib yul’yul’? Gubin ngiyal’ ni ma ayuweg e pi tapigpig rok ni yad ba yul’yul’.  David ni Pilung ni ir bagayad e pi tapigpig ney e i pining e sorok ngak Jehovah ni bochan e i par nib yul’yul’ ngak. (Mu beeg e 2 Samuel 22:26.) Nap’an ni yib e skeng ngak David, ma i par Jehovah nib yul’yul’ ngak ni bochan e i pow’iy ma be ayuweg ndabi buch ban’en rok. (2 Sam. 22:1) Ke guy David ko pi n’en ni i buch rok, ni Jehovah e gathi kemus nib yul’yul’ ko thin ni ma yog ya kub yul’yul’ u rogon ni ma ayuweg e pi tapigpig rok. Mang fan nib yul’yul’ Jehovah ngak David? Ya bochan nib yul’yul’ David ngak. Ma t’ufeg Jehovah e pi tapigpig rok ni yad ba yul’yul’, ma ma yul’yul’ ngak e piin ni yad ba yul’yul’ ngak.​—Prov. 2:6-8.

⁵ Nap’an ni gad ra lemnag rogon feni yul’yul’ Jehovah ngak e pi tapigpig rok ma ma pi’ e athamgil nga lanin’dad. Reb e walag ni Reed fithingan e ke yog nri baadag ni ma beeg murung’agen rogon ni i ayuweg Jehovah David u fithik’ e pi magawon rok. I weliy ni gaar: “Mus ko ngiyal’ ni i mil David rok Saul ma be par u lan e yiy, ma gubin ngiyal’ ni i ayuweg Jehovah. Re n’ey e ma pi’ e athamgil nga lanin’ug, ya be puguran ngog ndemtrug gelngin e magawon nra yib ngog, ma faan gu ra par ni gub yul’yul’ ngak Jehovah ma gubin ngiyal’ nra ayuwegeg.” Dabisiy ni aram rogon ni ga ma lemnag.​—Rom. 8:38, 39.

6. Ku mang boch e kanawo’ ni ma dag Jehovah riy ni ir be’ nib yul’yul’? Uw rogon nra yib angin e re n’ey ko pi tapigpig rok?

⁶ Ku mang boch e kanawo’ ni ma dag Jehovah riy ni ir be’ nib yul’yul’? Reb e kanawo’ e aram e gubin ngiyal’ ni ma fol Jehovah ko pi kenggin e motochiyel ni ke ngongliy. (Isa. 46:4) Pi n’en ni ma dugliy e gubin nib puluw ko pi kenggin e motochiyel rok, ma pi kenggin e motochiyel rok e der ma thil. (Mal. 3:6) Ku reb e kanawo’ ni ma dag Jehovah riy ni ir be’ nib yul’yul’ e aram e gubin ngiyal’ ni ma rin’ e pi n’en ni ke micheg nra rin’. (Isa. 55:11) Bochan nib yul’yul’ Jehovah, ma ma yib angin ko pi tapigpig rok. Ni uw rogon? Nap’an ni gad ra athamgil ni ngad folgad ko pi motochiyel rok Jehovah, ma rayog ni nge pagan’dad nra tow’athnagdad ni bod rogon ni ke micheg nra rin’.​—Isa. 48:17, 18.

7. Mang reb e kanawo’ nrayog ni ngam yul’yul’ riy ni bod rogon Jehovah?

 ⁷ Uw rogon ni ngad yul’yul’gad ni bod rogon Jehovah? Reb e kanawo’ e aram e ngad rin’ed boch ban’en nib fel’ ni fan ngak e piin ni ke yib e magawon ngorad. (Prov. 3:27) Ga manang reb e walag ni ke meewar laniyan’ ni bochan e m’ar rok, ara togopuluw ni yibe tay ngak u tabinaw, ara bochan e pi meewar rok? Rayog ni ngam pi’ e athamgil nga laniyan’ u daken e “thin nib manigil.” (Zek. 1:13, BT) * Nap’an ni ga ra rin’ e re n’ey, ma aram e ga be dag ni gur reb e fager ni gab yul’yul’ ma ‘ka ba gel fanam yul’yul’ ngak e walag.’​—Prov. 18:24, BT.

8. Uw rogon ni ngad yul’yul’gad ko en mabgol rodad?

⁸ Ku bay boch e kanawo’ nrayog ni ngad yul’yul’gad riy ngak e piin ni yad ba t’uf rodad. Bod ni faanra gad ba mabgol, ma thingar da yul’yul’gad ngak e en mabgol rodad. (Prov. 5:15-18) Ere, gathi kemus ni ngad guyed rogon ndab da pared be’ ni gathi mabgol rodad, ya ku thingar dab da rin’ed ban’en nra k’aringdad ni ngad uned ngak be’ ni gathi mabgol rodad. (Matt. 5:28) Kub t’uf ni nge m’ug ni gad ba yul’yul’ ngak pi walagdad ni aram e dab u dogned boch ban’en nib kireb u murung’agrad ara boch ban’en nde riyul’. Ku dab ud motoyilgad ko piin ni yad ma weliy boch ban’en ni aram rogon.​—Prov. 12:18.

9, 10. (a) Mini’ e en th’abi ga’ fan ni ngad yul’yul’gad ngak? (b) Gubin ngiyal’ nib mom ni ngaud folgad rok Jehovah, fa? Mu weliy rogon.

⁹ Jehovah e ir e en th’abi ga’ fan ni ngad yul’yul’gad ngak. Uw rogon ni ngad rin’ed e re n’ey?  Thingari t’uf rodad e pi n’en nib t’uf rok Jehovah ma gad fanenikay e pi n’en ni ma fanenikay. Thingari puluw e ngongol rodad ko n’en nib m’agan’ Jehovah ngay. (Mu beeg e Psalm 97:10.) Faanra ud gayed rogon ni nge puluw e lem rodad ko lem rok Jehovah, ma ra mom ni ngad folgad rok.​—Ps. 119:104.

¹⁰ Riyul’ ni gathi gubin ngiyal’ mab mom ni ngad folgad rok Jehovah. Yu ngiyal’ e ba t’uf ni ngad gayed rogon ni ngad yul’yul’gad ngak. Bod ni sana bay reb e walag nib pin ni baadag ni nge un ko mabgol. Machane dawori pirieg reb e walag nib fel’ ni ngar mabgolgow. (1 Kor. 7:39) Ere, sana be gay e girdi’ u tabon e maruwel rok be’ ni nge fel’ e thin rorow. Ma sana ke kireban’ e re walag nem ni bochan e dariy be’ ni nga i weliy laniyan’ ngak. Machane, ke dugliy u wan’ ndabi un ngak be’ ara leay be’ nder ma pigpig ngak Got ni bochan e baadag ni nge par nib yul’yul’ ngak Jehovah. Pi Kristiano ni yad bod e re walag ney e ba fel’ ni ngan folwok rorad. Ra tow’athnag Jehovah e piin ni yad be pigpig ngak u fithik’ e yul’yul’ ni ki mada’ ko ngiyal’ nib mo’maw’.​—Heb. 11:6.

11. Uw rogon be’ ni ma n’ag fan e kireb?

¹¹ Uw rogon be’ ni ma n’ag fan e kireb? Be’ ni ma n’ag fan e kireb e der ma par nib damumuw ngak boch e girdi’ ni bochan e kar rin’ed ban’en nib kireb ngak. Re n’ey e gathi be yip’ fan nib m’agan’ ko n’en ni kar rin’ed ara be par ni gowa dariy ban’en ni ke buch. Ya be yip’ fan ni ke dugliy u wan’ ndabi par nib damumuw. Reb i fel’ngin Jehovah nrib manigil e aram e ma n’ag fan e kireb. Be yog e Bible ni Jehovah e ‘ma n’ag fan u wan’ e kireb’ rok e piin ni kar kalgadngan’rad.​—Ps. 86:5.

12. (a) Uw rogon ni ma n’ag Jehovah fan e kireb? (b) Mang e yip’ Peter fan u nap’an ni yog nrayog ni ngan “chuweg” e denen rok be’?

¹² Uw rogon ni ma n’ag Jehovah fan e kireb? Be yog e Bible ni ma “gur ni nge n’ag fan ban’en u wan’.” Re n’ey e be yip’ fan ni nap’an nra n’ag fan e kireb ma ma n’ag fan ni gubin ma dabki lemnag. (Isa. 55:7) Uw rogon ni kad nanged ni ma n’ag Jehovah fan e denen ni gubin? Am lemnag e n’en ni kan micheg ko Acts 3:19. (Mu beeg.) Ke yog apostal Peter ni faanra riyul’ ni ke kal be’  ngan’ ma aram e ke kireban’ ko kireb ni ke rin’. Uw rogon nra n’ag Jehovah fan e kireb ni ke rin’ be’? I yog Peter ni thingari “kol ngan’” facha’ me “pi’ keru’” ko denen ni ke rin’. Be’ nriyul’ ni ke kalngan’ e ke dugliy u wan’ ndab ki sul u daken e denen ni ke rin’. (2 Kor. 7:10, 11) Ngemu’, me pi’ keru’ ko kireb rok ni aram e nge tal i rin’ e kireb me rin’ e tin nib m’agan’ Got ngay. Faanra rin’ ni aray rogon, ma aram e yira “chuweg” e denen rok. Ra ngan chuweg ban’en ma be yip’ fan ni ngan thangthang nge chuw. Ere, nap’an nra n’ag Jehovah fan e kireb rok be’, ma bod ni ke thangthang ke chuw. Ma n’ag Jehovah fan e denen ni gubin.​—Heb. 10:22; 1 John 1:7.

13. Mang e gad be fil u murung’agen Jehovah ko fapi thin ni be gaar, “bay gu n’ag fan e denen rorad u wan’ug”?

¹³ Uw rogon ni kad nanged nnap’an nra n’ag Jehovah fan e denen rodad ma dabki lemnag? Gad ra nang rogon ni ma n’ag Jehovah fan e denen ko n’en ni yog ngak Jeremiah u reb e yiiy ni murung’agen e pi Kristiano ni kan dugliyrad. (Mu beeg e Jeremiah 31:34.) I yog Jehovah ni gaar: “Bay gu n’ag fan e denen rorad u wan’ug ma dab ku gu lemnag e kireb ni kar ngongliyed.” Ere, nap’an nra n’ag Jehovah fan e denen ni kad rin’ed, ma der ma par ni be lemnag ni bochan e nga i puguran ngodad ara nga i gechignagdad, ya ma n’ag fan ma dabki lemnag.​—Rom. 4:7, 8. 

14. Mang fan nrayog ni nge fel’ lanin’dad u nap’an ni gad ra fal’eg i lemnag rogon ni ma n’ag Jehovah fan e denen rodad? Mu weliy ban’en ni ke buch.

¹⁴ Rayog ni nge fel’ lanin’dad u nap’an ni gad ra fal’eg i lemnag rogon ni ma n’ag Jehovah fan e denen rodad. Ngad weliyed murung’agen reb e walag nib pin ni nga dogned ni Elaine fithingan. Immoy ba ngiyal’ nni tharbog ko ulung. Me boch e duw nga tomuren, ma aram me sul ko ulung. Yugu aram rogon ma ke yog Elaine nder mich u wan’ nriyul’ ni ke n’ag Jehovah fan e kireb ni ke rin’. Ke lemnag ni gathi rib t’uf rok Jehovah ni bod feni t’uf boch e walag rok. Machane, ke fel’ laniyan’ u nap’an ni ke fal’eg i lemnag rogon ni be weliy e Bible murung’agen rogon ni ma n’ag Jehovah fan e kireb. Bod ni, ke beeg nnap’an nra n’ag Jehovah fan e kireb ku be’, ma bod ni ke maluknag Jehovah e denen rok faanem ke chuw ma ke beech bayay. Ere dariy rogon ni ngaud lemnaged ni gad ba kireb ni bochan e n’en ni kad rin’ed. * Ki yog Elaine ni gaar: “Kug nang nda i riyul’ u wan’ug nrayog rok Jehovah ni nge n’ag fan e denen rog, ma ug lemnag ndabi chuw e pi n’ey u wan’ug. Gu manang nra munmun me chuw e pi n’ey u wan’ug, machane chiney e kug thamiy nrayog ni nge chugur e tha’ u thilmow Jehovah, ma gowa kug baud.” Riyul’ ni fare Got ni gad ma pigpig ngak e ir reb e Got ni ma t’ufegey ma ma n’ag fan e kireb!​—Ps. 103:9.

15. Uw rogon ni ngad folwokgad rok Jehovah u rogon ni ma n’ag fan e kireb?

¹⁵ Rayog ni ngad folwokgad rok Jehovah ni aram e ngaud n’aged fan e kireb ni ke rin’ boch e girdi’ ngodad. (Mu beeg e Luke 17:3, 4.) Dab mu pagtalin ni nap’an nra n’ag Jehovah fan e denen rodad ma der ma par nga i lemnag e n’en ni kad rin’ed. Ere, nap’an ni gad ra n’ag fan e kireb ni ke rin’ be’ ngodad, maku thingar dab da pared ni gad be lemnag ara da pugeduran ngorad boch nga m’on.

16. (a) Mang e be yip’ fan ni ngad n’aged fan e kireb ni ke rin’ be’ ngodad? Mang e der yip’ fan? (b) Mang e thingar da rin’ed ni faanra gad baadag ni nge n’ag Jehovah fan e kireb rodad?

 ¹⁶ Ra ngad n’aged fan e kireb ni ke rin’ be’ ma gathi be yip’ fan ni gad baadag e n’en ni ke rin’ ara gad baadag ni ngaun rin’ boch ban’en ndubdad. Ya be yip’ fan ni kad dugliyed ndab da pared ni gad ba damumuw ngak facha’. Thingar dab da paged talin ni faanra gad baadag ni nge n’ag Jehovah fan e kireb rodad ma thingar kud n’aged fan e kireb ni ke rin’ be’ ngodad. (Matt.  6:14, 15) Manang Jehovah ni “gadad e fiyath.” Maku manang ndawor da flontgad. (Ps. 103:14) Ere, nap’an nra yog be’ ban’en ara rin’ ban’en nib kireb ngodad ma susun ndab da paged talin ni ku er rogon ir ndawori flont, ere susun ni ngad n’aged fan e kireb ni ke rin’.​—Efe. 4:32; Kol. 3:13.

17. Mang e ra ayuwegem ni ngam n’ag fan e kireb ni ke rin’ be’ ngom?

 ¹⁷ Riyul’ ni yu ngiyal’ e ba mo’maw’ ni ngad n’aged fan e kireb ni ke rin’ be’ ngodad. Mus ngak boch e Kristiano ni kan dugliyrad u nap’an Paul, ma kub t’uf e ayuw rorad ya nge yag nra pithiged e magawon u thilrad. (Fil. 4:2) Ere, faanra ke rin’ reb e walag ban’en ni ke kireban’um ngay, ma mang e ra ayuwegem ni ngam n’ag fan e kireb ni ke rin’? Am lemnag e n’en ni buch rok Job. Immoy dalip e fager rok ni Elifaz, nge Bildad, nge Zofar fithingrad. Pi fager rok nem e susun ni ngar pied e athamgil nga laniyan’. Machane, ka rogned e thin nib kireb ngak mi yad yog ni bay boch ban’en nib kireb ni ke rin’. Kari kireban’ Job. (Job 10:1; 19:2) Tomur riy me yog Jehovah ngak e pi pumoon nem nib kireb e n’en ni kar rin’ed, ma susun ni nga ranod ngak Job ngar pied e maligach ni fan ko denen rorad. (Job 42:7-9) Machane, ku bay ban’en ni yog Jehovah ngak Job ni nge rin’. Mang e re n’em? I yog ngak Job ni nge yibilayrad. Ma aram e n’en ni rin’ Job, ma aram me tow’athnag Jehovah. (Mu beeg e Job 42:10, 12, 16, 17.) Mang e rayog ni ngam fil ko re n’ey? Faan ga ra yibilay be’ ni ke rin’ ban’en ngom ni ke kireban’um ngay, ma ra ayuwegem ni nge dab kum par ni gab damumuw ngak.

18, 19. Mang e gad baadag ni ngaud rin’ed?

¹⁸ Kad felfelan’gad ni kad filed murung’agen boch i fel’ngin Jehovah. Kad filed ni ir be’ nib mom ni ngan non ngak, ma taareb rogon urngin e girdi’ u wan’, mab gol, mab sumunguy, mab yul’yul’, ma ma n’ag fan e kireb. Riyul’ ni ka boor fel’ngin Jehovah nrayog ni ngad filed. Rayog ni ngad felfelan’gad ni ngad filed murung’agen ndariy n’umngin nap’an. (Ekl. 3:11) Ba m’agan’dad ko n’en ni yog apostal Paul ni gaar: “Ri ba ga’ e flaab rok Got! Ma rib toar e gonop rok nge llowan’ rok!” Rayog ni nga dogned e re n’ey u murung’agen e t’ufeg rok Got nge fa nel’ i fel’ngin ni kad weliyed murung’agen ko pi article ney.​—Rom. 11:33.

¹⁹ Ere, ngaud filed murung’agen pi fel’ngin Jehovah, mu ud fal’eged i lemnag, ma gad be folwok riy. (Efe. 5:1) Angin nra yib riy e ra gel feni t’uf Jehovah rodad, ma ra chugur e tha’ u thildad, maku ra puluw u wan’dad e n’en ni yog fare psalmist ni gaar: “Gag e kari felan’ug, ya gu be par u tooben Got.”​—Psalm 73:28.