GAD be par u ba ngiyal’ ni kari mo’maw’ e par riy. (2 Tim. 3:1-5) Gubin e rran ni yibe skengnag e t’ufeg nge yul’yul’ rodad ngak Jehovah nge pi motochiyel rok nib mat’aw. Manang Jesus nra taw ko ngiyal’ ney, ma ra mo’maw’ e par, ere aram fan ni micheg ngak pi gachalpen nra i pi’ e pi n’en nib t’uf rorad nra ayuwegrad ni ngar athamgilgad nge mada’ ko tomur. (Matt. 24:3, 13; 28:20) Ere ke mel’eg ba tapigpig nib yul’yul’ ni nga i “pi’ garad ko ngiyal’ ni yima pi’ riy” ya nge yag nra pired ni yad ba gel.​—Matt. 24:45, 46.

Kan dugliy fare tapigpig nib yul’yul’ ko duw ni 1919. Ka aram nap’an i yib ni bokum milyon e “tin ni ka bay e tapigpig” ni yad be yib ko ulung rok Got u ga’ngin yang e fayleng ni ngan pi’ e tin nib t’uf rorad ni fan ko tirok Got ban’en. (Matt. 24:14; Rev. 22:17) Machane, gathi gubin mit e thin ni kan pilyeg e pi babyor rodad ngay, ma gathi gubin e girdi’ nrayog ni ngar guyed e pi n’ey ni kan tay nga computer. Bod ni, boor e walag e dabiyog ni ngar guyed fapi video ara ra beeged fapi article ni bay ko jw.org. Ere gur, re n’ey e be yip’ fan ni bay boch e walag nder yag ngorad e tin nib t’uf rorad ni fan ko tirok Got ban’en? Ra ngad nanged e fulweg ko re deer ney, ma som’on e ngad weliyed aningeg e deer nib ga’ fan.

Nap’an ni guy Satan rogon ni nge waliy Jesus ni nge pilyeg e malang nge ngal’ ni flowa, me fulweg Jesus ni gaar: “Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.” (Matt. 4:3, 4) Bay e thin rok Jehovah u Bible. (2 Pet. 1:20, 21) Ere, Bible e aram e n’en nth’abi ga’ fan ni bay ko pi n’en ni ma pi’ Jehovah ni nge ayuwegdad ko tirok Got ban’en.​—2 Tim. 3:16, 17.

Ke fal’eg e ulung rok Jehovah fare Bible ni New World Translation of the Holy Scriptures. Mab pag 120 mit e thin ni kan pilyeg ngay ni boch e ba polo’ ma boch e yu yang riy, ma gubin e duw ni ku yibe pilyeg e re ke Bible ney nga boch e thin nib beech. Ma gathi kemus ni yigoo re ke Bible ney, ya ku boor ken e Bible ni kun pilyeg nga bokum biyu’ mit e thin. Re n’ey e ba puluw ko n’en nib m’agan’ Jehovah ngay ni “ir e ba adag urngin e girdi’ ni ngar thapgad ngak ma ngar nanged e tin nib riyul’.” (1 Tim. 2:3, 4) Ma bochan ni “dariy ban’en nrayog ni ngan mithag rok Got,” ma aram fan nrayog ni nge pagan’dad nra pow’iy e “piin ni kar pirieged u lanin’rad ni kar gafgowgad ndabisiy ni nge yog Got ngorad” ni ngar bad ko ulung rok me pi’ e tin nib t’uf rorad ni fan ko tirok Got ban’en.​—Heb. 4:13; Matt. 5:3, 6; John 6:44; 10:14.

Ra nge gel e michan’ rok be’, ma gathi kemus ni nge beeg e Bible. Ya thingari guy rogon ni nge nang fan e n’en ni be beeg me fol riy. (Jas. 1:22-25) Ireray e n’en nib t’uf ni nge rin’ fare moon nu Ethiopia. Nap’an ni guy Filip e re moon nem ni be beeg e Thin rok Got, me fith ngak ni gaar: “Mog, ga be nang fan e pi n’ir ni ga be beeg?” Me fulweg fare moon ni gaar: “Uw rogon mu gu nang fan ni faanra dabi weliy be’ fan ngog?” (Acts 8:26-31) Ere ayuweg Filip fare moon ni nge nang fan e n’en ni be beeg. I taw e n’en ni fil fare moon nga gum’irchaen ma aram me dugliy ni nge un ko taufe. (Acts 8:32-38) Pi babyor rodad nib puluw e thin riy ko Bible e ir e ke ayuwegdad ni ngad nanged fan e tin riyul’. Pi n’en ni kad beeged riy e ke taw nga gum’ircha’dad ma ke k’aringdad ni ngad folgad riy.​—Kol. 1:9, 10.

Boor ban’en ni ma pi’ Jehovah ko pi tapigpig rok u daken e pi babyor rodad ni yima ngongliy ni nge ayuwegdad ko tirok Got ban’en. Pi n’ey e taareb rogon ko ggan ni gad ma kay nge garbod ni gad ma unum. (Isa. 65:13) Bod ni, Fare Wulyang ko Damit e ba pag 210 mit e thin ni kan pilyeg ngay. Ma weliy murung’agen e pi yiiy u Bible, ma ma ayuwegdad ni ngad nanged fan e tin riyul’, ma ma pi’ e athamgil nga lanin’dad ni ngad folgad ko pi kenggin e motochiyel u Bible. Fare babyor ni Awake! e sogonap’an 100 mit e thin ni kan pilyeg ngay, ma boor ban’en ni ma fil ngodad u murung’agen e pi n’en ni ke sunmiy Jehovah ma ma fil ngodad rogon ni ngad folgad ko pi fonow nu Bible. (Prov. 3:21-23; Rom. 1:20) Ma fal’eg fare tapigpig nib yul’yul’ boch e babyor nib puluw e thin riy ko Bible u boor ko 680 mit e thin! Ere, ga ma tay e tayim ni gubin e rran ni ngam beeg e Bible, fa? Ga ma beeg e pi magazine nge pi babyor ni kab beech ni kan pilyeg ko thin rom, fa?

Gathi kemus ni yigoo babyor e ma ngongliy e ulung rok Jehovah, ya ku ma fal’eg boch e babyor u boch e welthin ni yima pi’ u nap’an e pi muulung, nge pi assembly, nge pi convention ni gad ma tay. Ga baadag e pi welthin, nge pi drama, nge pi demonstration, nge pi interview ni yima tay ko pi muulung ney, fa? Ri boor ban’en ni ma pi’ Jehovah nra ayuwegdad ko tirok Got ban’en!​—Isa. 25:6.

Fulweg riy e danga’. Ma susun ndab da gingad ngay ni bay boch e tapigpig rok Jehovah ni boor ban’en ni be yag ngorad ni fan ko tirok Got ban’en, ma boch e danga’. Mang fan? Am lemnag e pi apostal kakrom. Ka boor e thin rok Got ni un weliy ngorad ko tin ni ka bay i gachalpen Jesus u nap’an e bin som’on e chibog. (Mark 4:10; 9:35-37) Yugu aram rogon, ma i yag ngak e tin ni ka bay i gachalpen Jesus e tin nib t’uf rorad ni fan ko tirok Got ban’en.​—Efe. 4:20-24; 1 Pet. 1:8.

Ku dab da paged talin ni yooren e pi n’en ni i yog Jesus nge n’en ni i rin’ u nap’an ni immoy u fayleng e dan tay nga lan e pi Gospel. I yoloy apostal John ni gaar: “Ka boor boch ban’en ni rin’ Jesus, ni faan mang e yigoo ni yoloy nga babyor ntataareb, ma wun’ug e dabi taw ngaray nga fayleng urngin e re babyor nem ni yira yoloy.” (John 21:25) Yugu aram rogon ni ka boor ban’en u murung’agen Jesus ni manang pi gachalpen ko bin som’on e chibog ko tin ni gad manang, machane gathi be yip’ fan ni bay ban’en nib t’uf ni ngad nanged nda nog ngodad. Ya ke tamilangnag Jehovah e tin nib t’uf ni ngad nanged u murung’agen Jesus ya nge yag nda folwokgad rok.​—1 Pet. 2:21.

A kum lemnag fapi babyor ni i yoloy e pi apostal ngaur pied ko pi ulung u nap’an e bin som’on e chibog. Immoy taareb ko pi babyor nem ni yoloy Paul ndan tay nga lan e Bible. (Kol. 4:16) Ere gur, de gaman e pi n’en ni be yag ngodad ni fan ko tirok Got ban’en ni bochan e dan tay e gi babyor nem nga Bible? Danga’, ya manang Jehovah e tin nib t’uf rodad mab gaman e pi n’en ni be pi’ ngodad nra ayuwegdad ni ngad pared nib gel e michan’ rodad.​—Matt. 6:8.

Ngiyal’ ney e bay boch e tapigpig rok Jehovah ni boor e pi n’en ni be yag ngorad ni fan ko tirok Got ban’en. Boor ken e babyor ni kan pilyeg ko thin rom fa danga’? Faanra de yoor ma dab mu lemnag nder ma lemnagem Jehovah, ya bin riyul’ riy e ma lemnagem. Rayog ni ngam beeg e pi babyor ni kan pilyeg ko thin rom, ma faanra bay reb e ulung ko gin ni ga ma par riy ni ga manang e thin rorad, ma rayog ni ngam un ko muulung rorad. Ma dab mu pagtalin nra ayuwegem Jehovah ni ngam par ni gab gel ko tirok Got ban’en.​—Ps. 1:2; Heb. 10:24, 25.

Yima tay e pi magazine nge yu ken e babyor ni gad ma ngongliy nib puluw e thin riy ko Bible ko Web site rodad. Ku bay boch ban’en ko re Web site ney ni ma ayuweg e piin mabgol, nge piin fel’ yangaren, nge piin ni bay e bitir rorad ni kab achig. Ma fanay chon e tabinaw e pi n’ey ko Fol Bible ni Tabinaw ni yad ma tay ma ma yib angin. Ku bay murung’agen boch ban’en ni gad ma rin’ ko re Web site ney ni bod e piin ni kar chuwgad ko fare skul u Gilead, nge fare annual meeting ni yima tay u gubin e duw, maku bay riy murung’agen e yoko’, nge durru’, nge ku boch ban’en ni be buch u boch e nam ni bay rogon ko pi tapigpig rok Jehovah. (1 Pet. 5:8, 9) Ku ma ayuwegdad e re Web site ney ko machib, ma ma ayuwegdad ni ngad wereged fare thin nib fel’ u boch e nam ni ke taleg e am e machib rodad riy.

Machane, demtrug ko rayog ni ngam man ko re Web site rodad ney fa dabiyog, ma ka rayog ni ngam par ni gab gel ko tirok Got ban’en. Ba gel e maruwel ni ke tay fare tapigpig ya nge yag ni ngongliy boch e babyor nra ayuweg gubin e Kristiano ko tirok Got ban’en. Ere, susun ndab mu lemnag nthingar mu chuw’iy e computer ara boch ban’en nrayog ni ngam fanay ni ngam man ko jw.org. Bay boch e walag ni yad ma printnag boch ban’en ni bay ko re Web site ney ni ngar pied ngak e piin ndariy e Internet rorad, machane, re n’ey e gathi ban’en nthingari rin’ e pi ulung.

Ri gad be pining e magar ni ke rin’ Jesus e n’en ni ke micheg ni aram e nge pi’ e tin nib t’uf rodad ni fan ko tirok Got ban’en. Rayog ni nge pagan’dad nra ulul Jehovah i pi’ ‘gadad ko ngiyal’ ni yima pi’ riy’ nge mada’ ko ngiyal’ nra mus e re m’ag nib kireb ney.