1, 2. Mang e yog Jehovah ngak Moses ni nge rin’, ma mang e Ke micheg ngak?

 RA UW rogon e lem rom ni faan ga ra yan mu sak’iy nga p’eowchen e re pilung nth’abi gel lungun u fayleng ni ngam non ni pa’ e girdi’ rok Jehovah? Dabisiy ni ga ra rus ma ra mo’maw’ ni ngam non. Uw rogon ni ga ra mel’eg e thin ni nga mog ngak? Mang e rayog ni nge pi’ gelngin e thin ni ga ra yog, ni gur owchen fare Got ni gubin ma rayog rok?

² Ireray e n’en ni buch rok Moses. Moses e ir e “th’abi sobut’an’ u fithik’ e girdi’ nu fayleng,” ma ke yog Jehovah ngak ni nge yan i yog ngak Farao ni nge pag e girdi’ rok ngar chuwgad ko sib u Egypt. (Num. 12:3) Machane, i m’ug ko n’en ni buch ni Farao e ir be’ ndariy fan e girdi’ u wan’, mab tolangan’. (Ex. 5:1, 2) Baadag Jehovah ni nge yog Moses ngak Farao ni nge pag e girdi’ rok nga ranod! Ere, fith Moses ngak Jehovah ni gaar: “I gag mini’ ni nggu wan ngak Farao nggu fek piyu Israel nga wuru’ yu Egypt?” Dabisiy ni ke lemnag Moses ndabiyog rok ni nge rin’ e n’en ni ke yog Got ngak. Machane, me yog Jehovah ngak ni gaar: “Bay gu un ngom.”​—Ex. 3:9-12.

3, 4. (a) Mang e i rus Moses ngay? (b) Mang reb e kanawo’ nrayog ni nge buch rom e n’en ni buch rok Moses?

³ Mang fan ni ke rus Moses? Ke rus ya ri chey ma de motoyil Farao ngak ni ir e ke yan ni owchen Jehovah Got. Ki rus nri chey ma de mich u wan’ piyu Israel ni Jehovah e ir e ke mel’eg ni nge pow’iyrad nga wuru’ yu Egypt. Ere, yog Moses ngak Jehovah ni gaar: “Ma faanra dabi mich u  wan’ piyu Israel e tin ni ku gog ngorad, mi yad pag ndab ra motoyilgad ko tin ni ku gog me lungurad, ‘I Somol e de m’ug ngom,’ ma mang e nggu rin’?”​—Ex. 3:15-18; 4:1.

⁴ Gad ra fil ban’en ko fulweg ni pi’ Jehovah ngak nge n’en ni buch nga tomuren. Riyul’ ni sana dariy ba ngiyal’ ni ga ra yan mu sak’iy nga p’eowchen reb e tolang ko am ngam welthin. Machane, uw rogon ni faanra ba mo’maw’ ngom ni ngam weliy murung’agen Got nge Gil’ilungun ko girdi’ ni ga ma mada’nagrad? Faanra aray rogon e n’en ni ma buch rom, ma rayog ni ngam fil ban’en ko n’en ni buch rok Moses.

5. Mang e tay Jehovah nga lan pa’ Moses, ma uw rogon ni ayuweg e re n’ey ni nge dabki rus? (Mu guy e sasing ni bay u tabolngin e re article ney.)

⁵ Nap’an ni yog Moses ngak Got e pi n’en ni be rus ngay, ma aram me rin’ Got boch ban’en ya nge yag ni ayuweg Moses ni nge rin’ e maruwel ni ke pi’ ngak. Be gaar e Exodus: “Me fith Somol ngak [Moses] ni gaar, ‘Mang e bay u paam?’ Me gaar Moses, ‘Ba ley i sog.’ Me gaar Somol ngak, ‘Mon’ nga but’.’ Ma faani yin’ Moses fare ley i sog nga but’, me ngal’ nib porchoyog, me mil riy nga orel. Me gaar Somol ngak Moses, ‘Mu lumel nga but’ ngam kol p’ebuk’.’ Me lumel Moses nga but’ nge kol, me ki ngal’ bayay ni ba ley i sog u lan pa’. Me gaar Somol ngak, ‘Mu rin’ ni er rogon, ma aram me mich u wun’rad ni Somol, . . . e ir e ke m’ug ngom.’” (Ex. 4:2-5) Arrogon, ke tay Got nga lan pa’ Moses e n’en nra micheg ni thin ni be yog e ke yib rok Jehovah. I fanay gelngin ni nge pilyeg fa ley i sog u lan pa’ Moses nge ngal’ ni porchoyog! Re maang’ang nem e ir e ra pi’ gelngin e thin rok Moses me micheg ni Jehovah e ke l’og! Ere, yog Jehovah ngak ni gaar: “Mfek e re ley i sog ney, ngam ngongliy fapi maang’ang ngay.” (Ex. 4:17) Bochan e re n’ey, ma rayog ni nge yan Moses i non ko girdi’ rok Got nge Farao ni pa’ Got ndabi rus.​—Ex. 4:29-31; 7:8-13.

6. (a) Susun ni mang e ngaud feked u nap’an ni gad be yan ko machib, ma mang fan? (b) Mu weliy rogon nib “fos” e thin rok Got nge rogon ni “ba’ gelngin ni ma maruwel.”

⁶ Ku rayog ni ngan fith e re deer ney ngodad u nap’an ni gad be yan ko machib. Rayog ni nge gaar be’: “Mang e bay u paam?” Ba ga’ ni Bible rodad e ir e gad ma fek nrayog ni ngad fanayed. Yugu aram rogon ni ma lemnag boch e girdi’ ni Bible e yug taareb rogon nga yu ken e babyor, machane gad manang ni aram e gin ni ma non Jehovah riy ngodad. (2 Pet. 1:21) Bay riy e pi n’en ni ke micheg Got nra rin’ u tan Gil’ilungun. Aram fan nrayog ni nge yog apostal Paul ni: “Thin rok Got e ba fos ma ba’ gelngin ni ma maruwel.” (Mu beeg e Hebrews 4:12.) Gubin ban’en ni ke micheg Jehovah nra lebug ma dariy reb nra yan i aw nib m’ay fan. (Isa. 46:10; 55:11) Nap’an nra tamilang e re n’ey u wan’ be’, ma pi n’en nra beeg u Bible e rayog ni nge thilyeg e yafas rok.

7. Uw rogon nrayog ni ngad ‘machibnaged e thin rok Got nrogon’?

⁷ Arrogon, ke pi’ Jehovah e Thin rok ngodad nrayog ni nge ayuwegdad ni ngad micheged nib puluw e n’en ni gad be weliy ma ir e ke yib rok. Aram fan nu tomuren ni yol Paul ngak piyu Hebrew me yog ngak Timothy ni nge “machibnag e thin rok Got nrogon.” (2 Tim. 2:15) Uw rogon ni rayog ni ngad folgad ko fonow ni pi’ Paul? Thingar ud beeged boch e thin nu Bible nra taw nga gum’irchaen e piin ni yad ra motoyil ngay. Fapi tract ni kan pi’ ngodad u nap’an e duw ni 2013 e kan ngongliy rogon ni nge ayuwegdad ni ngad rin’ed e re n’ey.

8. Mang e yog reb e service overseer u murung’agen fapi tract ni kab beech?

⁸ Urngin e pi tract ney e kan ngongliy ni taareb rogon. Ere, nap’an ni gad ra nang rogon ni ngad pied reb, ma susun e kad nanged rogon ni ngad pied ni gubin. Ba mom ni ngan fanay e pi tract ney u nap’an e machib, fa? I yoloy reb e service overseer u Hawaii, U.S.A., ni gaar: “Dag nanged nra yib angin e pi talin e maruwel ney ni kab beech ko machib ni gamad ma tay u mit e tabinaw ngu fithik’ e girdi’ ni yoor.” Ke pirieg ni boor e girdi’ ni yad baadag ni ngan weliy e n’en ni bay ko pi tract ney ngorad ni bochan rogon ni kan yoloy. Ki guy ni fare deer ni bay u wuru’ nge fapi fulweg riy e ma k’aring  e girdi’ ni ngar adaged ni ngan machibnagrad. Maku re n’ey e ra ayuweg faen ni yibe machibnag ni nge dabi magar nri pi’ reb e fulweg ma de puluw.

9, 10. (a) Uw rogon ni ma ayuwegdad fapi tract ni kab beech ni ngad fanayed e Bible u nap’an e machib? (b) Bin ngan ko pi tract ney e nap’an ni ga ra fanay ko machib mab ga’ ni ma yib angin, ma mang fan?

⁹ Ra reb e pi tract ney ma bay e thin nu Bible riy ni kan mel’eg nib fel’ rogon nrayog ni ngad beeged ngak e en ni gad be machibnag. Am yaliy fare tract ni kenggin e, Will Suffering Ever End? (Bay Ba Ngiyal’ Nra M’ay e Gafgow, Fa?) Demtrug ko ke yog faen ni ga be machibnag e “arrogon,” fa “danga’,” ara “sana,” ma rayog ni ngam pithig fare tract nga baan langgin me lungum ngak, “Baaray e n’en ni be yog e Bible.” Ngemu’, ma ga beeg e Revelation 21:3, 4. 

¹⁰ Ku rayog ni ngam rin’ e re n’ey u nap’an ni ga be pi’ fare tract ni kenggin e, How Do You View the Bible? (Uw Rogon e Bible u Wan’um?) Demtrug ko mang e ke mel’eg facha’, ma rayog ni ngam pithig fare tract nga baan langgin me lungum, “Be yog e Bible ni ‘urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor.’” Rayog ni ngki lungum, “Machane, gathi kemus e n’en ni be yog e re thin nu Bible ney.” Ngemu’, ma ga pithig e Bible rom ngam beeg e 2 Timothy 3:16, 17.

11, 12. (a) Mang boch e kanawo’ nrayog ni nge ayuwegem e pi tract ney ni ngam pasig ko machib ni ga ma tay? (b) Uw rogon ni nge ayuwegem e pi tract ni gad ma wereg u nap’an ni ga ra sul ngak be’ ni kam mada’nag u nap’an e machib?

¹¹ Ga ra guy faen ni ga be machibnag, ma ga ra nang urngin e n’en ni ngam beeg ngak nge n’en ni ngam weliy. Demtrug e n’en nra yog facha’ ngom ko tomur, ma n’en nib ga’ fan riy e ke yag ni ngam beeg taareb ara l’agruw e Thin nu Bible ngak ko yay ni som’on ni kam mada’gow. Ma rayog ni ngkum sul bayay ngkum weliyew boch ban’en ni bay ko fare tract.

¹² Ga ra pingeg e pi tract ney nga barba’ ma bay ba deer u tan fare thin ni kenggin e “Ngan Lemnag” nge boch e thin nu Bible nrayog ni ngam beeg ko yay ni migid ni kam sul ngak be’. Bod ni fare tract ni kenggin e, How Do You View the Future? (Uw Rogon u Wan’um e Gabul nge Langlath?) e ga ra pingeg nga barba’ riy ma bay ba deer riy ni be gaar: “Uw rogon nra thilyeg Got boch ban’en ko re fayleng ney nge fel’?” Rayog ni ngam weliyew be’ e re deer ney ko yay ni migid ni kam sul ngak. Ku bay fa gal thin nu Bible ko Matthew 6:9, 10 nge Daniel 2:44 u tan e re deer ney. Ga ra yaliy barba’ fare tract ni kenggin e, Rayog ni Ngki Fas e Piin ni Kar M’ad Bayay? ma bay ba deer riy ni be gaar: “Mang fan ni gad ma pilibthir, ma gad ma yim’?” Ma nga tanggin e re deer nem e bay fa  gal thin nu Bible riy ko Genesis 3:17-19 nge Roma 5:12.

13. Mu weliy rogon nrayog ni ngad fanayed fapi tract ni kab beech ni ngad tababgad i fil e Bible ngak be’.

¹³ Mu fanay e pi tract ney ni nge ayuwegem u rogon ni ngam tabab i fil e Bible ngak be’. Nap’an nra scannag be’ fare QR Code * ni bay u wuru’ e pi tract ney, ma aram e ra fek ko fagi n’en ni bay ko Web site rodad ni ma pi’ e athamgil nga laniyan’ e girdi’ ni ngar uned ko fol Bible. Ku bay yaan fare brochure ni kenggin e Thin nib Fel’ ni Yib rok Got! ko pi tract ney, ma ra reb ma be yog ko mang guruy ko re brochure ney e ngan yaliy. Bod ni fare tract ni kenggin e, Who Really Controls the World? (Mini’ e Riyul’ ni Be Gagiyegnag e Fayleng?) e be yog ni ngan yaliy e guruy ni 5 ko re brochure ney. Ma fare tract ni kenggin e, What Is the Key to Happy Family Life? (Mang e Ra Yibnag e Felfelan’ Nga Lan e Tabinaw?) e be yog ni ngan yaliy e guruy ni 9 ko re brochure ney. Faan ga ra fanay e pi tract ney u rogon ni kan ngongliy ni ngan fanay, ma ra ayuwegem ni nge yag nim fanay e Bible ko yay ni som’on ni kam mada’nag be’ u nap’an e machib ngu nap’an ni kam sul ngak. Ga ra rin’ ni aray rogon, ma aram e rayog ni nge yoor e girdi’ nim tabab i fil e Bible ngorad. Uw rogon nrayog ni ngkum fanay e Thin rok Got nib fel’ rogon u nap’an e machib?

14, 15. Uw rogon ni ngaum lem ni bod Paul u nap’an ni ga be yan ko machib?

¹⁴ Baadag Paul ni nge nang fan laniyan’ “urngin e piin nrayog” ni nge nang fan lanin’rad u nap’an e machib. (Mu beeg e 1 Korinth 9:19-23.) Mu tay fanam i yan riy ni i athapeg Paul ni nge ‘bod be’ u Israel ni fan e nge yognagrad ngak Kristus . . . , ku aram rogon ni ngiyal’ ni ba’ rok e piin ni gathi yad piyu Israel e i par ni bod bagayad . . . , ni bochan e nge yognag e piin ni gathi yad piyu Israel ngak Kristus . . . , ma faanra be par u fithik’ e piin nib meewar me meewarnag ir, ni fan e nge yognagrad ngak Kristus.’ Arrogon, baadag Paul ni nge ayuweg ‘urngin mit e girdi’, ni fan e nge yognag boch i yad ngak Kristus u rogon e re mit i kanawo’ nrayog riy.’ (Acts 20:21) Ere, uw rogon ni ngad lemgad ni bod Paul u nap’an ni gad be fal’eg rogodad ni ngad weliyed e tin riyul’ ngak “urngin mit e girdi’” ni bay ko gin ni gad ma machib riy?​—1 Tim. 2:3, 4. 

¹⁵ Gad ra guy e Machib ko Gil’ilungun ni yima pi’ ngodad u gubin e pul, ma be dag boch e kanawo’ u rogon ni ngad machibgad riy. Mu gay rogon ni ngam fol ko pi n’ey. Machane, faanra kam man ko machib mab thil e n’en ni be lemnag e girdi’ ko gin ni ga be machib riy, ma gog boch ban’en nib puluw ko n’en ni yad be lemnag. Mu lemnag rarogon e par ko binaw rom, nge girdi’ ni ma par riy, nge n’en nib ga’ ni yad ma lemnag. Ngemu’ ma ga lemnag reb e thin nu Bible nra m’ag ngorad. I weliy reb e walag ni ma lekag e ulung rogon ni ke yag ni ngar fanayew e ppin rok e thin nu Bible u nap’an e machib ni gaar: “Yooren e girdi’ ko gin ni gamow ma machib riy e yad ma pagmow ni nggu beegew taareb e thin nu Bible ni faanra de yoor ban’en ni gu weliyew mab tamilang. Tomuren ni ku gognew ko gamow mini’ ma aram ma gamow pithig e Bible romow nggu beegew reb e thin riy.” Baaray boch ban’en, nge boch e deer, nge thin nu Bible nrayog ni ngam fanay ko gin ni ga ma machib riy.

16. Mu weliy rogon nrayog ni ngan fanay fare thin ko Isaiah 14:7 u nap’an e machib.

¹⁶ Faanra ga ma par u reb e binaw ni boor e oloboch ni ma fal’eg e girdi’ riy, ma kub ga’ ni yima cham riy, ma rayog ni ngam fith facha’ ni nge lungum: “Rayog ni ngam susunnag ni kan tay e re thin ni baaray nga wuru’ e shimbung ni be gaar: ‘Fin aray e be toffan e fayleng ni ga’ngin u fithik’ e gapas. Be tangnag gubin e girdi’ e felfelan’’? Ireray e n’en ni be yog e Bible ko Isaiah 14:7. Bin riyul’ riy, e boor e thin nu Bible ni be weliy ni ke micheg Got nra boch nga m’on ma ra par e fayleng u fithik’ e gapas.” Ngemu’ ma gog ngak ni ngam beeg reb e pi thin nu Bible ney.

17. Uw rogon ni ngam fanay fare thin ni bay ko Matthew 5:3 u nap’an ni gimew be non be’?

¹⁷ Ba mo’maw’ ko piin pumoon ko gin ni ga ma par riy ni ngar pied e tin nib t’uf ko tabinaw rorad, fa? Faanra aray rogon, ma rayog ni nge lungum: “Ga be lemnag ma susun ni uw urngin e salpiy nib t’uf ni nge yognag reb e pumoon mfini yag ni nge  felfelan’ e tabinaw rok?” Tomuren ni ke weliy laniyan’, me lungum: “Boor e pumoon ni ka boor e salpiy ni yad ma yognag, machane der yag ni nge felfelan’ chon e tabinaw rorad. Ere gur, mang e rib t’uf ni nge yag ngorad?” Ngemu’ ma ga beeg e Matthew 5:3 ma ga ognag e fol Bible ngak.

18. Uw rogon nrayog ni ngam fanay fare thin ni bay ko Psalm 37:11 ni ngam fal’eg laniyan’ boch e girdi’?

¹⁸ Bay ban’en ni ka fini buch ko gin ni ga ma par riy ni kari gafgownag laniyan’ e girdi’, fa? Ere, rayog ni nge lungum: “Ku gub ya gu baadag ni nggu weliy boch e thin ngom nra fal’eg lanin’um. (Mu beeg e Psalm 37:11.) Kam guy l’agruw ban’en ko re thin ney ni baadag Got ni nge yag ngodad? Aram e ‘gapas’ nge ‘felfelan’.’ Gathi gad ra felfelan’ ni ngad nanged ni baadag Got ni nge fel’ e par rodad? Machane, uw rogon ni nge yag e yafas ni aray rogon ngodad?” Ngemu’ ma ga pithig fare brochure ni Thin nib Fel’ nga reb e guruy nib puluw ko n’en ni gimew be weliy.

19. Mu weliy rogon nrayog ni ngan fanay fare thin ko Revelation 14:6, 7 u nap’an ni yibe machibnag e girdi’ nib m’ing ko teliw rok.

¹⁹ Ga ma par u bang ni boor e girdi’ riy ni yad ba m’ing ko teliw rorad? Faanra aram rogon, ma rayog ni ngam fith ni nge lungum: “Faanra ke non reb e engel ngom, ma ga ra motoyil ko n’en ni be yog? (Mu beeg e Revelation 14:6, 7.) Mang e be yog e re engel ney nib ga’ fan? Be yog ni susun e nge yib madgun faen ni ke ‘sunumiy e tharmiy, nge but’’ u wan’dad. Ga be lemnag, ma uw rogon nrayog ni nge m’ug ni bay madgun Got u wan’dad?” Tomuren ni ke weliy laniyan’ ma ga pining e magar ngak, ngemu’ ma ga beeg e Deuteronomy 6:2 ni be gaar: “N’umngin nap’an e yafos romed, ni gimed nge piin ni owchemed e nguum pired ni bay madgun Somol ni Got romed u wun’med ma gimed be fol u urngin fapi motochiyel rok ni nggu pi’ ngomed, ya nge yog ni n’uw nap’an ni um pired ko fare nam.” Ngemu’, miki lungum: “Ere kam guy, ra nge yib madgun Got u wan’dad ma be yip’ fan ni ngaud folgad ko pi motochiyel rok. Machane, boor e girdi’ e dar nanged murung’agen reb e motochiyel rok Got nrib ga’ fan, ni aram e nge t’uf Got rodad u polo’ i gum’ircha’dad.” Tomuren ni kam weliyew e pi n’ey, ma gog ngak e rofen ni ngkum sul ni ngam weliyew rogon nrayog ni ngad daged nib t’uf Got rodad.

20. (a) Uw rogon nrayog ni ngan fanay fare thin ko Proverbs 30:4 ni ngan dag ngak be’ ko mini’ fithingan Got? (b) Bay reb e thin nu Bible ni ga ma fanay ni ke yib angin, fa?

²⁰ Faanra kam mada’nag be’ ni kab fel’ yangaren, ma rayog ni nge lungum: “Gu baadag ni nggu beeg reb e thin nu Bible ngom ni bay reb e deer riy nrib ga’ fan. (Mu beeg e Proverbs 30:4.) Dariy be’ nrayog ni nge rin’ e pi n’ey, ere dabisiy ni be weliy e re thin nu Bible ney murung’agen e En ni Ke Sunmiydad. Uw rogon ni ngad nanged fithingan e cha’nem? Gu baadag ni nggu dag ngom u Bible.”

21, 22. (a) Faan gad ra mel’eg e thin nu Bible nib fel’ ni ngad beeged ngak be’, ma uw rogon nrayog ni nge thilyeg e yafas rok facha’? (b) Mang e kam dugliy ni ngam rin’ u nap’an e machib ni ga ma tay?

²¹ Dam nang ko mang e ra rin’ e girdi’ u nap’an ni ga ra beeg reb e thin nu Bible ngorad ni kam mel’eg nib fel’ rogon. Immoy l’agruw e Pi Mich Rok Jehovah u Australia nranow ra tugtuguyew e mab rok be’ nib pin, me fith bagayow fare pin ni gaar, “Ga manang ko mini’ fithingan Got?,” ngemu’ me beeg fare thin ngak ni bay ko Psalm 83:18. I yog fare pin ni gaar, “Ka rug gin ko n’en ni yog. Ma tomuren nra chuwgow, mug af nga karrow rog nggu wan ni 35 e mayel palogin nga bang ni yima chuw’iy e babyor riy ni nggu yaliy e re thin nu Bible nem u yu ken e Bible, ngemu’ mu gu yaliy e re ngachal nem u lan e dictionary. Nap’an nri mich u wan’ug ni Jehovah fithingan Got, ma aram mu ug lemnag ko mang e ka bay ndawor gu nang.” De n’uw nap’an nga tomuren me un e re ppin ney nge re pumoon ni baaram ni mang figirngin ko fol Bible, ma boch nga tomuren mi yow un ko taufe.

²² Thin rok Got e rayog ni nge thilyeg e yafas rok e piin ni yad ra beeg me mich u wan’rad e pi n’en ni ke micheg Jehovah. (Mu beeg e 1 Thessalonika 2:13.) Kab gel gelngin e thin nu Bible ko thin ni gad ma yog. Ere, aram fan nnap’an ni yugu ra mab e kanawo’ ngodad ma ngad fanayed e Thin rok Got, ya ba fas!