KENGGIN E RE KE BABYOR NEY | MINI’ E PI MICH ROK JEHOVAH?
Ba Miti Mang Girdi’ e Pi Mich Rok Jehovah?
Gamad reb e ulung ni gamad bay u ga’ngin yang e fayleng ma gathi gamad ba peth nga yugu boch e teliw. Yugu aram rogon ni bay e tochuch romad u Meriken, machane yooren i gamad e ma par u yugu boch e nam u fayleng. Bin riyul’ riy e, sogonap’an meruk e milyon urngimad u gubin, ma gamad ma fil e Bible ko girdi’ u boor ko 230 e nam u fayleng. Gamad ma rin’ e re n’ey ni bochan e gamad be fol ko fapi thin ni yog Jesus ni faani gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang.”—Matthew 24:14.
Demtrug e gin ni gamad ma par riy, ma gamad ma fol ko motochiyel. Machane, da gur uned nga ngongolen e pi am nu fayleng ni bochan e gamad ma fol ko n’en ni yog Jesus ngak e pi Kristiano ni aram e gathi yad bang ko “fayleng.” Ere, aram fan nda gur uned ko pi n’en ni ma rin’ e am, maku da gur uned ko mahl. (John 15:19; 17:16) Bin riyul’ riy e, nap’an e Bin L’agruw e Mahl ko Fayleng, ma boor e Pi Mich Rok Jehovah ni u non’rad nga kalbus, ma yibe gafgownagrad nib gel ni bochan e da ur uned nga ngongolen e am. I yoloy be’ ni immoy ni ir reb e bishof u Chiyamen ni gaar: “Kemus ni yigoo yad e ur pared ni yad ba mudugil nda ur uned nga ngongolen e am u nap’an ni be gagiyegnag e pi Nazi yu Chiyamen.”
“Riyul’ nrib mudugil laniyan’ e [Pi Mich Rok Jehovah] u murung’agen rogon e ngongol nib fel’ ni ngaun rin’. Ireray e re miti girdi’ nrayog ni ngan tayrad ni ngar manged tolang ko am—machane dariy e n’en nra rin’ me m’agan’rad ngay ni ngar pared ko pi liw nem. . . . Yad ma tayfan e piin ni yad ba tolang ko am, machane ba mich u wan’rad ni goo Gil’ilungun Got e rayog ni nge pithig urngin e magawon ko girdi’.”—Nová Svoboda newspaper, Czech Republic.
Machane, da gur guyed rogon ni ngaug pared ni yug gamad ba thay nga bang. Ya yibilay Jesus pi gachalpen ngak Got ni gaar: “Gathi gu be wenignag ngom ni ngam fekrad ngar chuwgad u fayleng.” (John 17:15) Ere, aram fan ni yima guymad ni gamad ma un ko maruwel, maku gamad ma yan nga kantin, maku ma un pi fakmad nga skul ko yungi n’en ni gamad ma par riy.
