De n’uw nap’an u m’on ni nge yim’ Jesus, ma mang fan ni sul u daken fapi thin ni yog David ni bay ko Psalm 22:1?

De n’uw nap’an u m’on ni nge yim’ Jesus me yog fapi thin ni bay ko Matthew 27:46 ni be gaar: “Got rog, Got rog, mang fan ni kam n’igeg?” Nap’an ni yog Jesus e pi thin ney, ma aram e ke lebguy fapi thin ni yog David ni bay ko Psalm 22:1. (Mark 15:34) De puluw ni nga dogned ni fan ni sul Jesus u daken e pi thin ney e bochan ni ke dabuy e n’en ke rin’ Jehovah, ara daki mich Got u wan’ u lan ba ngiyal’. Manang Jesus fan nib t’uf ni nge yim’, mab m’agan’ ngay ni nge rin’ e re n’ey. (Matt. 16:21; 20:28) Ku manang nra taw nga nap’an ni ngan li’ nge yim’, ma ra t’uf ni nge tal Jehovah ndab ki ‘yororiy.’ (Job 1:10) Ere pag Jehovah Jesus ni ngari micheg ni gubin ngiyal’ nra par nib yul’yul’ ndemtrug rogon e yam’ nra tay.​—Mark 14:35, 36.

Ere mang fan ni yog Jesus e pi thin ney? Yugu aram rogon ndabiyog ni ngar da micheged, machane ngad weliyed boch i fan nrayog ni yog e pi thin ney. *

Nap’an ni yog Jesus e pi thin ney, ma rayog ni be tamilangnag ndabi rin’ Jehovah ban’en ni nge taleg ndabin thang e fan rok. Ba t’uf ni nge pi’ Jesus puluwon fare biyul ndabi ayuweg Jehovah. Ba t’uf ni “nge yim’ ni fan ngak urngin e girdi’.”​—Heb. 2:9.

Rayog ni sul Jesus u daken in bug e thin ko re psalm ney ni bochan e baadag ni nge fal’eg e girdi’ i lemnag urngin e thin ni bay ko re  psalm ney. Ngiyal’ nem e ka ban’en ni ma rin’ e pi Jew ni aram e yad ma fil e thin ko fapi psalm nge mit ngorad. Ere nap’an ni yad ra rung’ag taa bochi yang ko fare psalm ni kan beeg, ma aram e ra yib ngan’rad e thin ni bay ko fare psalm ni ga’ngin. Ere faanra ireray e n’en ni i lemnag Jesus, ma aram e be ayuweg pi gachalpen ni yad boch e Jew ni nge yib boor e yiiy ngan’rad ni bay ko re psalm ney ni be weliy murung’agen e pi n’en nra buch u m’on nge yan i mada’ ko ngiyal’ ni yira thang e fan rok. (Ps. 22:7, 8, 15, 16, 18, 24) Maku reb e, fapi thin ni bay u tungun e re psalm nem e be n’uf Jehovah, ma be yog ni ir e Pilung u ga’ngin yang e fayleng.​—Ps. 22:27-31.

Rayog ni sul Jesus u daken e pi thin ney ni yog David ni bochan e nge tamilangnag ndariy ban’en nib kireb ni ke rin’. U m’on ni nge yim’ Jesus, min fek ko fare Sanhedrin min sasalapiy e oloboch ni kan togopuluwnag ngak, mi nog nib kireb e rok ni ke darifannag Got nge fithingan. (Matt. 26:65, 66) Ra gurgad ngar muulunggad nga taabang ni lukngun e nep’ ngar pithiged e re pa’ i oloboch nem ndarur folgad ko motochiyel ko am rorad. (Matt. 26:59; Mark 14:56-59) Ere nap’an ni yog Jesus fapi thin ni be gaar, “Got rog, Got rog, mang fan ni kam n’igeg?,” ma rayog ni be tamilangnag ndariy ban’en ni ke rin’ nib kireb, ma dariy tapgin ni ngan li’ nge yim’.

Rayog ni be puguran Jesus ngak e pi girdi’ nem ni yugu aram rogon ni kun pag David ni nge gafgow ni ir e yoloy e pi thin ney, machane gathi be yip’ fan ndaki fel’ u wan’ Jehovah. Re deer ney ni fith David e der yip’ fan ndaki mich Got u wan’. Tomuren ni fith e re deer ney me yog nib pagan’ ngak Jehovah nra ayuweg e yafos ko girdi’ rok, ma kki ulul Jehovah ni nge tow’athnag. (Ps. 22:23, 24, 27) Ere ku arrogon Jesus ni “Fak David.” Yugu aram rogon ni gafgow u daken fare ley i gek’iy, machane gathi be yip’ fan ndaki fel’ u wan’ Jehovah.​—Matt. 21:9.

Rayog ni be weliy Jesus rogon gelngin e kireban’ rok ni bochan e thingari tal Jehovah ndab ki yororiy ndabi buch ban’en rok ya nge yag ni micheg nra par nib yul’yul’. De lemnag Jehovah aram ko tabolngin ni ngan gafgownag Fak, ngemu’ min li’ nge yim’. I t’uf ni nge buch e re n’ey u tomuren ni togopuluw Adam nge Efa. Dariy ban’en ni ke rin’ Jesus nib kireb, machane ba t’uf ni nge gafgow min li’ nge yim’ ya nge yag ni pi’ e fulweg ko fapi deer ni ke sum ni bochan Satan, miki pi’ fare biyul nra pi’ puluwon e n’en ke mul u pa’ e girdi’. (Mark 8:31; 1 Pet. 2:21-24) Rayog ni nge rin’ Jesus e re n’ey ni faanra tal Jehovah ndab ki ayuweg u lan ba ngiyal’.

Rayog ni be guy Jesus rogon ni nge ayuweg pi gachalpen ni ngar lemnaged fan ni ke pag Jehovah ni nge yim’ u daken fare ley i gek’iy. * Manang Jesus nre n’ey ni kan dugliy ni nge yim’ u daken fare ley i gek’iy ni bochan e ke th’ab e motochiyel e rayog ni nge magawonnag laniyan’ boch e girdi’. (1 Kor. 1:23) Machane faanra fal’eg pi gachalpen i lemnag fan e yam’ ni ke tay, ma aram e rayog ni ngar nanged e bin riyul’ i fan nib t’uf ni nge yim’. (Gal. 3:13, 14) Ku yad ra nang ni ir e En Nra Thapegrad, ma gathi ir be’ nib kireb.

Ere demtrug fan ni sul Jesus u daken e pi thin ney, ma manang nib m’agan’ Jehovah ngay ni nge yim’ u daken fare ley i gek’iy. De n’uw nap’an nga tomuren ni yog e pi thin ney, me gaar: “Ke libug!” (John 19:30; Luke 22:37) Arrogon, bochan ni tal Jehovah ndaki ayuweg Jesus u lan ba ngiyal’, ma aram e n’en ni bing e kanawo’ ngak Jesus ni ngari lebguy e n’en ni kan l’og nga fayleng ni nge rin’. Bochan e re n’ey, miki yag ni nge lebguy urngin ban’en ni kan yoloy ni murung’agen ni bay “u lan babyoren e Motochiyel rok Moses, nge tin ni ke yoloy e pi profet, nge tin ni kan yoloy u lan babyoren e pi Psalm.”​—Luke 24:44.