Faanra aray rogon, ma aram e ra tay e ulung ni ke mus fare mabgol u nap’an ni ke un fare pumoon ko mabgol bayay, ma bin baaram e mabgol ni ka fini un ngay e yira sap ngay nib puluw ko motochiyel ko nam. Ra ngad nanged fan e re n’ey, ma aram e ngad weliyed e n’en ni yog Jesus u murung’agen ba wu’ e mabgol ni kar dargow, miki un bagayow ko mabgol bayay.

I weliy Jesus ko Matthew 19:9 tapgin nrayog ni nge mus reb e mabgol nrogon nib puluw ko Bible. I gaar: “En nra chuweg leengin ni gathi ban’en ni ke par fare pin nge be’ ngki leengiy yugu reb e ppin, e aram e ke th’ab e motochiyel, ya kar pirew yugu reb e ppin ni gathi mabgol rok.” Gad be fil ko n’en ni yog Jesus ni (1) kemus ni tapgin nrayog ni nge dar ba wu’ e mabgol nrogon nib puluw ko Bible e faanra ke un bagayow ko ngongol ndarngal, ma (2) faanra n’ag fare pumoon leengin ni gathi bochan e ke un fare pin ko ngongol ndarngal ngemu’ miki leay yugu be’, ma aram e kar parew be’ ni gathi mabgol rok. *

Gur, pi thin ney ni yog Jesus e be yip’ fan ni faanra ke un reb e pumoon ko ngongol ndarngal mar dargow leengin, ma aram e ba puf rogon ni ngki mabgol bayay nrogon ni be yog e Bible? Be yan u rogon. Faanra ke par fare pumoon nge be’ ni gathi mabgol rok, ma fa arorow nde kireb e rok e ra dugliy ko nge n’ag fan fa danga’. Faanra dugliy fare pin ndabi n’ag fan mar dargow nrogon nib puluw ko motochiyel ko nam, ma aram e nap’an nra yan i m’ay urngin e babyor nib t’uf ni ngan ngongliy ni nge micheg ni kar dargow, ma yow l’agruw nib puf rogorow nrayog ni ngkur leayew yugu be’.

Machane rayog ni ka baadag fare pin ni ngar parew fare pumoon u taabang, me yog ngak nib m’agan’ ngay ni nge n’ag fan e kireb rok. Ere uw rogon ni faanra dabun fare pumoon ni nge par rok leengin ni yugu aram rogon nib m’agan’ ngay ni nge n’ag fan e kireb rok, ma aram me yan i ngongliy e babyor rorow ni ngar dargow? Bochan nib m’agan’ fare pin ngay ni nge n’ag fan e kireb rok mu kur parew u taabang, ma aram e de puf rogon fare pumoon ni ngki mabgol bayay nrogon ni be yog e Bible. Faanra dugliy ni nge leay yugu be’ ni yugu aram rogon nde puf rogon ni ngki mabgol bayay, ma aram e kar parew be’ bayay ni gathi mabgol rok. Ere ba t’uf ni ngki yib dalip e piilal nga taabang bayay ni ngar dugliyed e n’en ngan rin’ ko kireb rok.​—1 Kor. 5:1, 2; 6:9, 10.

Faanra ke mabgol fare pumoon bayay ni yugu aram rogon nde puf rogon ni nge rin’ e re n’ey, ma uw rogon nra lemnag e ulung fare mabgol ni immoy riy nge bin ka fini un ngay e chiney? Gur, rogon nib puluw ko Bible e ka yow ba mabgol e bin baaram e ppin nsom’on ni leay, fa? Ka rayog ni nge dugliy fare pin ni nge n’ag fan e kireb rok ara dugliy ndabi n’ag fan fa danga’? Gur, ra sap e ulung ngay ni fa bin baaram e mabgol ni ka fini un ngay e be yip’ fan ni kar parew be’ ni gathi mabgol rok?

Kafram e ma sap e ulung ngay ni n’umngin nap’an ni kab fos fa bin som’on e ppin ni i leay fare pumoon, ma be par nder mabgol, ma der un ko ngongol ndarngal, ma aram e fa bin baaram e mabgol ni ka fini un fare pumoon ngay e be yip’ fan ni yow be par be’ ni gathi mabgol rok. Machane de weliy Jesus ban’en u murung’agen fare pin u nap’an ni be weliy murung’agen ba wu’ e mabgol ni kar dargow, miki un bagayow ko mabgol bayay. Ya be weliy ni faanra ke chuw reb e pumoon rok leengin nde puluw fan ko Bible miki  leay yugu be’, ma aram e kar parew be’ ni gathi mabgol rok. Ere faanra aram rogon, ma ireray e n’en nra museg e bin som’on e mabgol ni i un ngay.

Nap’an nra chuw reb e pumoon rok leengin ngki leay yugu be’, ma aram e dabkiyog ni nge dugliy fare pin ko nge n’ag fan e kireb rok fare pumoon fa danga’. Ere dakuriy rogon ni nge tomalnag laniyan’ ni bochan e ba t’uf ni nge dugliy ko nge n’ag fan e kireb rok fare pumoon fa danga’. Maku reb e, re n’ey e dabi thilyeg rogon ni nge lemnag e girdi’ u lan e ulung fare mabgol ni ka fini un fare pumoon ngay ndemtrug ko ke yim’ e bin som’on e ppin rok, ara ki mabgol bayay, ara ke un ko ngongol ndarngal. *

N’en kad weliyed aray u lang e aram e fare pumoon e kar parew be’ ni gathi mabgol rok ma kar dargow leengin. Machane uw rogon ni faanra dawori par fare pumoon nge be’ ni gathi mabgol rok machane me ngongliy e babyor ni ngar dargow leengin, ngemu’ miki yan i leay yugu be’? Fa reb e uw rogon ni faanra fin u tomuren nra dargow fare pin e un fare pumoon ko ngongol ndarngal, ngemu’ miki mabgol bayay ni yugu aram rogon nib m’agan’ e bin som’on e ppin rok ngay ni nge n’ag fan rok? Urngin e pi n’ey ni kad weliyed e be tamilangnag ni n’en ke rin’ fare pumoon ni aram e ke chuw rok leengin ngki yan i leay yugu be’ e be yip’ fan ni kar parew be’ ni gathi mabgol rok, ma aram e n’en nra museg e bin som’on e mabgol ni i un ngay. Ere bin baaram e mabgol ni ka fini un ngay e yira sap ngay ni ban’en ni ke rin’ nib puluw ko motochiyel ko nam. Rogon ni be yog e The Watchtower ko November 15, 1979 ko page 32 e “chiney e kan yan i un nga reb e mabgol nib beech, ere dabiyog ni nga yigi pos me museg e biney e mabgol ngki sul ko bin baaram e ppin ni ur mabgolgow nsom’on; ke mus e binem e mabgol u nap’an nra dargow, me par facha’ nge be’ ni gathi mabgol rok, ngemu’ miki mabgol bayay.”

Re n’ey ni kan thilyeg rogon ni gad be weliy e gathi be yip’ fan ndakir lemnag e piin Kristiano nib thothup e mabgol, ara dakurur lemnaged nra par be’ nge be’ ni gathi mabgol rok ma aram reb e denen nib ubchiya’. Faanra ke chuw reb e pumoon rok leengin nde puluw fan ko Bible, ngemu’ miki mabgol bayay ni yugu aram rogon nde puf rogon ni nge rin’ e re n’ey nrogon ni be yog e Bible, ma aram e ba t’uf ni ngki yib dalip e piilal nga taabang bayay ni ngar dugliyed e n’en ngan rin’ ngak ni bochan e kar parew be’ ni gathi mabgol rok. (Faanra bin baaram e ppin ni ka fini leay e ir reb e Kristiano, ma aram e ku ra yib dalip e piilal nga taabang ni ngar dugliyed e n’en ngan rin’ ngak ni bochan e kar parew be’ ni gathi mabgol rok.) Yugu aram rogon ni bin baaram e mabgol ni ka fini un fare pumoon ngay e dabin sap ngay ni aram e yow be par be’ ni gathi mabgol rok, machane boor e duw ndabiyog ni ngan pi’ boch e maruwel ngak fare pumoon u lan e ulung. Maku reb e dabiyog ni ngan pi’ boch e maruwel ngak ni faanra kab kireb laniyan’ e girdi’ ni bochan e n’en ke rin’, ara yad be lemnag ndariy rogon ni ngan tayfan. Ku ra lemnag e piin piilal rarogon e bin som’on e ppin rok nde yul’yul’ ngak, ma faanra ku bay pi fakrow ni ka bay u tan pa’row ni kki digeyrad maku yira lemnagrad.​—Mal. 2:14-16.

Bochan nrib kireb wenegan nra yib ni faanra chuw reb e pumoon rok leengin nde puluw fan ko Bible ngemu’ miki leay yugu be’, ma aram fan nib gonop e piin Kristiano ni faan yad ra folwok rok Jehovah ma ur ted e mabgol ni aram ban’en nib thothup.​—Ekl. 5:4, 5; Heb. 13:4.