1-2. Uw rogon ni ngad nanged rogon feni manigil Jehovah nrogon ni bay ko Psalm 34:8?

MU SUSUNNAG ni ke pi’ be’ ba mit e ggan ni ngam kay ndawori kay bayay. Rayog ni ngam nang ban’en u rarogon fare ggan ni faan ga ra yaliy, ara mu farabon, ara mu nang rogon ni kan ngongliy, ara mu fith boch e girdi’ ko yad baadag lamen fa danga’. Machane rogon ni ngarim nang ko ga ra adag fare miti ggan fa danga’ e ngam ri’ lamen.

² Rayog ni ngad filed ban’en u murung’agen feni manigil Jehovah u nap’an ni gad be beeg e Bible, nge boch e babyor rodad, ngu nap’an ni be weliy boch e girdi’ murung’agen e tin nib fel’ ni ke rin’ ni fan ngorad. Machane rayog ni ngad nanged feni manigil Jehovah u nap’an ni gad ra guy e tin nib fel’ ni be rin’ ni fan ngodad. (Mu beeg e Psalm 34:8, BT.) Ngad weliyed reb e kanawo’ nrayog ni ngad rin’ed e re n’ey riy. Susun e gad baadag ni ngad pigpiggad ngak Jehovah u polo’ e tayim rodad. Machane ba t’uf ni ngad momnaged rogon e par rodad ya nge yag nda rin’ed e re n’ey. Sana gad ma beeg murung’agen e n’en ni micheg Jesus ni faan gad ra m’oneg Gil’ilungun Got u lan e yafos rodad, ma ra pi’ Jehovah e tin nib t’uf rodad. Machane dawor da guyed ni ke rin’ Jehovah e re n’ey ni fan ngodad. (Matt. 6:33) Machane bochan nib mich u wan’dad e n’en ni yog Jesus, ma aram e kad guyed rogon ni ngad lichnaged e tin gad be n’ag e salpiy ngay, nge urngin e awa ni gad be maruwel riy, ma kad yoornaged e tayim rodad ni fan ko machib. Nap’an ni gad ra rin’ e re n’ey, ma gad ra nang ni Jehovah e riyul’ ni ma pi’ e tin nib t’uf rodad ma gad ra guy rogon “feni manigil.”

3. Mini’ e piin ma tow’athnagrad Jehovah nrogon ni bay ko Psalm 16:1, 2?

³ Jehovah e “ba fel’ e tin ni ma rin’ ngak urngin e girdi’” nib muun ngay e piin dar nanged murung’agen. (Ps. 145:9; Matt. 5:45) Machane ri boor e tow’ath ni ma pi’ ngak e piin nib t’uf rorad ma yad ma pigpig ngak u polo’ i gum’ircha’rad. (Mu beeg e Psalm 16:1, 2.) Chiney e ngad weliyed boch ban’en nib manigil ni ke rin’ Jehovah ni fan ngodad.

4. Uw rogon ni ma dag Jehovah rogon feni manigil ngak e piin yad ma chugurnaged yad ngak?

 ⁴ Urngin yay ni gad ra fol ko n’en be fil Jehovah ngodad, ma gad ra guy angin ni be yib ngodad. Nap’an nda filed murung’agen me t’uf rodad, ma aram me ayuwegdad ni ngad siyeged boch e lem nge ngongol nde m’agan’ ngay. (Kol. 1:21) Maku nap’an nda ognaged e yafos rodad ngak Jehovah ngad uned ko taufe, miki yoor boch ban’en nib manigil ni pi’ ngodad ni bod ni ke fel’ e nangan’ rodad, miki chugur e tha’ u thildad.​—1 Pet. 3:21.

5. Uw rogon ni gad ma guy rogon feni manigil Jehovah u nap’an e machib ni gad ma tay?

⁵ Gad ra ulul ni ngad guyed rogon feni manigil Jehovah u nap’an ni gad ra un ko machib. Gur be’ ni gab tamra’, fa? Boor e girdi’ rok Jehovah ni aray rogorad. Rayog nu m’on ni ngam mang tapigpig rok Jehovah, ma dam lemnag ni ga ra yan nga tafen be’ ndam nang owchen ngam weliy murung’agen e Bible ngak. Machane chiney e aray e n’en ni ga be rin’ ni gubin ngiyal’. Maku reb e, ki ayuwegem Jehovah ni ngam adag e machib! Ku boor e kanawo’ ni ke ayuwegem Jehovah riy. Ke ayuwegem ni ngam par ni gab gapas u nap’an ni ke togopuluw be’ ngom u nap’an e machib. Ki ayuwegem ni nge yib ngan’um e bin nib puluw e thin nu Bible ni ngam beeg ngak be’ ni ke motoyil ngom. Ku be pi’ gelngim ni ngam ulul ko machib ni yugu aram rogon ndabun e girdi’ ni ngar motoyilgad ngom.​—Jer. 20:7-9.

6. Uw rogon ni be m’ug feni manigil Jehovah u rogon ni be skulnagdad?

⁶ Ki dag Jehovah ngodad nrib manigil u rogon ni be skulnagdad ni fan ko machib. (John 6:45) Gad ma motoyil ko pi n’en yima weliy u nap’an e muulung u lan e wik ni murung’agen e pi n’en nrayog ni nga nog u nap’an e machib, ma yima pi’ e athamgil ngodad ni ngad fanayed e pi n’ey. Som’on e sana rayog ni gad be rus ni ngad rin’ed ban’en ndawor da rin’ed bayay. Machane nap’an ni gad ra rin’, ma rayog ni ngad guyed ni be yib angin ko piin gad be machibnagrad. Ku yima pi’ e athamgil ngodad u nap’an e pi muulung nge convention ni ngad machibgad u boch e kanawo’ nsana dawor da machibgad riy bayay. Sana ku rayog ni ngad rusgad ni ngad rin’ed e re n’ey. Machane faan gad ra gay rogon ni ngad rin’ed, ma ra tow’athnagdad Jehovah. Chiney e ngad weliyed boch e tow’ath nra yag ngodad u nap’an ni gad ra athamgil ni ngad machibgad u boch e kanawo’ ndawor da machibgad riy ndemtrug rarogodad. Ngemu’ ma gad weliy rogon nrayog ni ngad rin’ed boch ban’en ni gad be nameg.

7. Mang tow’ath e ra yag ngodad u nap’an ni gad ra athamgil ni ngad yoornaged e tin gad be rin’ ni fan ko machib?

⁷ Ra gel e chugur ko tha’ u thildad Jehovah. Am lemnag e n’en ni rin’ reb e piilal ni ka nog Samuel * ngak ni yow ma pigpig e ppin rok u Colombia. Re wu’ i mabgol ney e yow baadag ni yow be pioneer ko gin yow ma par riy. Machane yow baadag ni ngar yoornagew e tin yow be rin’ ni fan ko machib ni aram e ngar ayuwegew reb e ulung nib t’uf e ayuw riy. Ba t’uf ni ngar pagew fan boch ban’en ya nge yag nrin’ew e n’en yow be nameg. I gaar Samuel: “Gu folgow ko fare thin ni bay ko Matthew 6:33, ma aram mug talgow i chuw’iy boch ban’en nde t’uf romow. Machane n’en th’abi mo’maw’ ngomow e aram e nggu chuwgow ko naun ni gamow ma par riy, ya ri gamow baadag rarogon e re naun nem ni kan ngongliy, ma dariy e malfith romow riy.” Nap’an nranow ko bin baaram e ulung nib beech, ma ke lich e salpiy nib t’uf ni nge yag ngorow ko kafram. I gaar Samuel: “Kug guyew rogon ni be pow’iy Jehovah e tin gamow be rin’ ma be fulweg taban e meybil romow. Gamow manang nib felfelan’ ngomow, ma rayog ni ngguyew ni be t’ufegmow u boch e kanawo’ nda i buch riy kafram.”  Rayog ni ngam yoornag e tin ga be rin’ ni fan ko machib, fa? Faanra rayog ni ngam rin’ e re n’ey, ma rayog ni nge pagan’um ngay nra gel e chugur ko tha’ u thilmew Jehovah, me pi’ e tin nib t’uf rom.​—Ps. 18:25.

8. Mang e ga be fil ko n’en ni yog Ivan nge Viktoria?

⁸ Gad ra felfelan’ ko pigpig ni gad be tay. Mu tay fanam i yan ko n’en ni yog Ivan nge Viktoria ni ba wu’ i mabgol ni yow ma pioneer u Kyrgyzstan. Ra momnagew rogon e par rorow ya nge yag nra piew e ayuw u boch e maruwel ni yira pi’ ngorow nib muun ngay e dimow naun ni yima tay. I gaar Ivan: “Gubin e maruwel ni yira pi’ ngomow, ma gamow ma rin’ u rogon nrayog romow. Yugu aram rogon nra yan i blayal’ ma ke aw parowmow, machane gamow ba felfelan’ ni bochan e gamow manang ni gamow be fanay gelngimow ni nggu maruwelgow nib gel ni fan ngak Jehovah. Ku gamow ba felfelan’ ni bochan e boor e fager ni ka yag ngomow, maku boor ban’en nib manigil ni ug rin’ew ni ke par u lanin’mow.”​—Mark 10:29, 30.

9. Mang e ke rin’ reb e walag nib pin ni bay e magawon rok ya nge yag ni yoornag e tin be rin’ ni fan ko machib, ma mang angin ni ke yib riy?

⁹ Gad ma felfelan’ ko pigpig ni gad ma tay ngak Jehovah ni yugu aram rogon ni gad ma mada’nag boch e magawon. Mirreh e reb e walag ni ke pilibthir ma ke yim’ e pumoon rok ni ma par u West Africa maku ir reb e togta. Nap’an ni retire ko maruwel rok ma aram me tabab ko pioneer. Re walag ney e bay ba mit e m’ar rok nrib gel e amith riy mab mo’maw’ ni nge yan nib n’uw yang. Ere kemus ni taareb e awa nrayog ni nge un ko machib u mit e tabinaw. Machane rayog ni nge machib ko yungi n’en ni ma muulung e girdi’ ni yoor ngay nib n’uw nap’an. Ma boor e girdi’ ni ke mada’nagrad u nap’an e machib ni ma sul ngorad nge piin ma fil e Bible ngorad ni boch i yad e yad ma non u telefon. Mang fan ni baadag Mirreh ni nge yoornag e tin be rin’ ni fan ngak Jehovah? I yog ni gaar: “Rib t’uf Jehovah nge Jesus Kristus rog. Ma gubin ngiyal’ nug ma meybil ngak Jehovah ni nge ayuwegeg ni nggu rin’ urngin e tin rayog ni nggu rin’ ni fan ko pigpig rog ngak.”​—Matt. 22:36, 37.

10. Mang e ra pi’ Jehovah ngak e piin yad be yoornag e tin yad be rin’ ni fan ngak nrogon ni bay ko 1 Peter 5:10?

¹⁰ Ma skulnagdad Jehovah u rogon ni ngad rin’ed boch e maruwel. Kenny nreb e pioneer ni ma pigpig u Mauritius e guy nriyul’ e re n’ey. Nap’an ni fil e tin riyul’ ma aram me tal ndaki un nga reb e skul nib tolang ni i un ngay, me un ko taufe, ma aram me tabab ni nge pigpig ngak Jehovah u polo’ e tayim rok. I yog ni gaar, “Gu athamgil ni nggu folwok rok Isaiah ni profet ni faani yog ni gaar: ‘Bay gu wan! Mu l’ugeg!’” (Isa. 6:8) Boor e naun rodad ni kan toy ni ke pi’ Kenny e ayuw riy, ma ki pi’ e ayuw ni ngan pilyeg boch e babyor rodad ko thin rok. I yog ni gaar: “Kug fil boch ban’en ni ke ayuwegeg ni nggu rin’ e maruwel ni kan pi’ ngog nib fel’ rogon.” Machane gathi kemus e n’en ni fil. Ya ki yog ni gaar, “Kug nang ni bay boch ban’en ndabiyog ni nggu rin’, maku bay boch e fel’ngin nib t’uf ni nge yag ngog ya nge yag nug mon’og ko pigpig ni gu be tay ngak Jehovah.” (Mu beeg e 1 Peter 5:10.) Ere sana rayog ni ngkum thilyeg boch ban’en u rarogom ya nge yag ni skulnagem Jehovah u yugu boch e kanawo’.

11. Mang e ke rin’ e pi walag nib pin u South Korea ya nge yag nra uned ko machib, ma mang angin ni ke yib riy? (Mu guy e sasing ni bay u wuru’ e re ke babyor ney.)

¹¹ Mus ngak e piin ke yoor e duw ni kar manged boch e Pi Mich nib t’uf ni ngan skulnagrad u nap’an ni yad ra tabab ni ngar pigpiggad u reb e kanawo’ nib thil. Nap’an fare m’ar ni COVID-19, me yog e piin piilal u reb e ulung u South Korea ni lungurad: “Bay boch e walag ni ur lemnaged kafram ndabiyog ni ngar uned ko machib ni bochan e yad ba m’ar ni be yag ni ngar machibgad e chiney u online. Bay dalip e walag nib pin ni ke pag 80 e duw rorad ni kar filed rogon ni ngar fanayed e computer ni ngar rin’ed e re n’ey, ma chiney e ba dake gubin e rran ni yad ma un ko  machib.” (Ps. 92:14, 15) Ga baadag ni ngam yoornag e tin ga be rin’ ni fan ko machib, me yoor e kanawo’ nim nang rogon feni manigil Jehovah riy, fa? Baaray boch ban’en nrayog ni ngam rin’.

12. Mang e ke micheg Jehovah ngak e piin nra pagan’rad ngak?

¹² Mu fil rogon ni nge pagan’um ngak Jehovah. Ke micheg ni faanra pagan’dad ngak ma gad pi’ e tin th’abi fel’ rodad ni fan ngak, ma ra tow’athnagdad. (Mal. 3:10) Fabiola nreb e walag nib pin ni ma par u Colombia e guy rogon ni rin’ Jehovah e re n’ey ni fan ngak. De n’uw nap’an nga tomuren ni un ko taufe me adag ni nge un ko regular pioneer. Machane thingari maruwel ni nge pi’ e tin nib t’uf ko tabinaw rok. Ere nap’an ni taw ko ngiyal’ nrayog ni nge retire, ma aram mi ri meybil ngak Jehovah ni nge ayuweg. I yog ni gaar: “Ba ga’ nib n’uw nap’an ni ma son e girdi’ u m’on ni nga fin tabab i pi’ e salpiy rorad. Machane gag e ni pi’ e birog e salpiy reb e pul nga tomuren. Riyul’ ni ireray reb e maang’ang!” L’agruw e pul nga tomuren ma aram me tabab ko pioneer. Chiney e ke pag 70 e duw rok ma kki pag 20 e duw ni ke pioneer. N’umngin nap’an ni ke pioneer, ma ke yag ni nge ayuweg meruk e girdi’ ni ngar uned ko taufe. I yog ni gaar: “Yugu aram rogon ni bay yu ngiyal’ nug ma thamiy rog ni kug meewar, machane gubin e rran ni be ayuwegeg Jehovah ni nggu ulul ko pioneer ni gu be tay.”

13-14. Mini’ boch e girdi’ nrayog ni nge ayuwegdad ni nge pagan’dad ngak Jehovah ma gad yoornag e tin gad be rin’ ni fan ngak?

¹³ Mu fil ban’en rok e piin i pagan’rad ngak Jehovah. Boor e girdi’ ni be weliy e Bible murung’agen ni boor ban’en ni ur rin’ed ni fan ko pigpig  rorad ngak Jehovah. Boor yay ni tow’athnagrad Jehovah u tomuren nrin’ed ban’en ni nge dag ni be pagan’rad ngak. Bod nu tomuren ni digey Abraham e nam rok nge yan “nde nang e gin’en ni be sor ngay” e fin aram e ngiyal’ ni tow’athnag Jehovah. (Heb. 11:8) Fin u tomuren ni fathal Jakob nge fare engel e ni tow’athnag. (Gen. 32:24-30) Nap’an ni be yan piyu Israel ni ngar thapgad nga lan fare Nam ni Kan Micheg, ma fin ngiyal’ ni tay fapi prist e rifrif u ayrad nga fithik’ e ran u lan fare Lul’ nu Jordan e yag ni nge th’ab piyu Israel fare lul’ nga barba’.​—Josh. 3:14-16.

¹⁴ Ku rayog ni nge yib angin ngom e n’en ke rin’ boch e Pi Mich e ngiyal’ ney ni ke pagan’rad ngak Jehovah, ma kar yoornaged e tin yad be rin’ ni fan ngak. Bay reb e walag ni pumoon ni ka nog Payton ngak nge ppin rok ni Diana ni yow baadag ni yow ma beeg murung’agen boch e walag ni kar yoornaged e tin yad be rin’ ni fan ko pigpig rorad ngak Jehovah ni bay murung’agrad ko fapi article ni kenggin e “They Offered Themselves Willingly.” * I gaar Payton: “Nap’an nug beegew murung’agrad, ma gowa bod ni gamow be yaliy be’ ni be abich nrib fel’ lamen e ggan ni be kay. Faani n’uw nap’an nug yaliyew, ma aram me k’aringmow ni nggu adagew ni nggu nangew ‘feni manigil’ Jehovah.” Munmun me yag ni nge yan Payton nge Diana ra pigpiggow u bang nib t’uf e ayuw ko machib riy. Ke yag ni ngam beeg e pi article ney, fa? Ma ke yag ni ngam yaliy fa gal video ni kenggin e Witnessing in Isolated Territory​—Australia nge Witnessing in Isolated Territory—​Ireland ni bay ko jw.org, fa? Pi n’ey e sana rayog ni nge ayuwegem ni ngam lemnag boch e kanawo’ nrayog ni ngam yoornag e tin ga be rin’ riy ni fan ko pigpig rom.

15. Faanra ud chaggad ngak e piin nib fel’ ni ngaud chaggad ngorad, ma uw rogon nra ayuwegdad?

¹⁵ Mmel’eg e piin nib fel’ ni ngaum chag ngorad. Ba mom ni ngad adaged ni ngad ked ba mit e ggan ndawor da ked bayay ni faanra ud chaggad ngak e piin yad baadag e re miti ggan nem. Ere ku arrogon ni faanra ud chaggad ngak e piin yad ma m’oneg Jehovah u lan e yafos rorad, ma aram e gad ra adag ni ngad gayed boch e kanawo’ ni ngad yoornaged e tin gad be rin’ ni fan ko pigpig rodad ngak Got. Ireray e n’en ni buch rok Kent nge Veronica. I yog Kent ni gaar: “I pi’ e pi fager romow nge chon e tabinaw romow e athamgil nga lanin’mow ni ngguyew rogon ni nggu pigpiggow u boch e kanawo’ nib thil. Gu nangew ni faanra ug chaggow ngak e piin yad ma m’oneg Gil’ilungun Got u lan e yafos rorad, ma aram e ra pagan’mow ni nggu rin’ew ban’en ni yugub thil.” Chiney e ma pigpig Kent nge Veronica u Serbia ni yow l’agruw e special pioneer.

16. Mang fan nsusun e nge m’agan’dad ngay ni ngad paged fan boch ban’en nrogon ni tamilangnag Jesus ko fare fanathin rok ni bay ko Luke 12:16-21?

¹⁶ Mu pag fan boch ban’en ni fan ngak Jehovah. De t’uf ni ngad paged urngin ban’en ni ma yibnag e felfelan’ ngodad ni bochan e ngad felfelan’naged Jehovah. (Ekl. 5:19, 20) Machane faanra ddugliyed ndab da yoornaged e tin gad be rin’ ni fan ko pigpig rodad ngak Jehovah ni bochan e bay boch ban’en ndubdad ni ngad paged, ma aram e rayog ni ngad rin’ed ban’en nde puluw ni bod e n’en ni buch ko fare moon ni weliy Jesus murung’agen ko fanathin rok ni guy rogon ni nge yoor ban’en rok, machane dariy fan Got u wan’. (Mu beeg e Luke 12:16-21.) Bay reb e walag ni pumoon ni Christian fithingan ni ma par u France ni yog ni gaar, “Da ug fanay e tayim rog nge gelngig ni fan ngak Jehovah nge tabinaw rog.” Ere ra dugliyew e ppin rok ni ngar unew ko pioneer. Machane thingar ra talgow ko maruwel rorow ya nge yag nrin’ew e re n’ey. Ere ra tababnigew reb e siyobay ni yow ma klinnag boch e naun, mar filew rogon ni ngar parew ni yow ba felfelan’ ni yugu aram rogon ni ke buchuuw e salpiy rorow. Gur, yow ba felfelan’ ni kar pagew fan boch ban’en ya nga yag nra unew ko pioneer? I  gaar Christian, “Ke gel e felfelan’ ni gamow be tay u nap’an e machib e chiney, ma ka gamow ba felfelan’ ni gamow be guy e piin gamow be fil e Bible ngorad, nge piin gamow ma sul ngorad u nap’an e machib ni yad be fil murung’agen Jehovah.”

17. Mang e rayog ni nge talegdad ndab da guyed rogon ni ngad machibgad u reb e kanawo’ nib thil?

¹⁷ Nge m’agan’um ngay ni ngam machib u boch e kanawo’ nib thil. (Acts 17:16, 17; 20:20, 21) Shirley nreb e pioneer u Meriken e thingari thilyeg boch ban’en u rogon e machib ni ma tay u nap’an fare m’ar ni COVID-19. Som’on e dabun ni nge un ko machib u telefon. Tomuren ni fil rogon ni nge machib ko biney e kanawo’ u nap’an ni yib e en ma lekag e ulung, ma aram me tabab ni nge un ko machib u telefon ni gubin ngiyal’. I yog ni gaar: “Som’on e ug rus, machane chiney e ka rug adag. Ya ke yoor e girdi’ ni gamad be machibnag ko ngiyal’ ni baaram ni un machib u mit e tabinaw!”

18. Mang e ra ayuwegdad ni faanra bay ban’en ni be mo’maw’nag ngodad ni ngad yoornaged e tin gad be rin’ ni fan ko machib?

¹⁸ Mu nameg ban’en mag guy rogon ni ngam rin’. Nap’an ni gad ra mada’nag e magawon ma gad meybil ni ngan ayuwegdad, ma gad fal’eg i lemnag rogon ni ngad pithiged. (Prov. 3:21) Sonia nreb e regular pioneer ni ma un nga reb e ulung u Europe ni yima non riy ni thin ni Romany e yog ni gaar: “Gu baadag nug ma yoloy e n’en nug be nameg nga babyor mug tay nga bang nib mom ni ngguy. Bay bangi sasing u daken e tebel rog ni yaan l’agruw pa’ i kanawo’ nra ba pa’ ma gin be sor ngay. Nap’an nra t’uf ni nggu dugliy ban’en, ma gu ma yaliy e gal pa’ i kanawo’ nem mug lemnag ko ra ayuwegeg e n’en ni nggu dugliy ni nggu rin’ e n’en nug be nameg fa danga’.” Ma guy Sonia rogon ni nge puluw rogon ni be lemnag e pi magawon ni ma mada’nag. I yog ni gaar, “Nap’an nug ra mada’nag reb e magawon, mab t’uf ni nggu dugliy ko nggu lemnag fare magawon ni bod bangi rungrung ni be talegeg ndab gu taw ko gin gu be nameg, fa nggu lemnag ni bod ba wethal nra ayuwegeg ni nggu taw ngay.”

19. Mang e susun ni ngad dugliyed u wan’dad ni ngad rin’ed?

¹⁹ Boor e kanawo’ ni ma tow’athnagdad Jehovah riy. Rayog ni ngad daged nib ga’ fan e pi tow’ath nem u wan’dad ni aram e ngad rin’ed urngin e tin rayog rodad ni ngad pininged e sorok ngak. (Heb. 13:15) Rayog ni ngad rin’ed boch ban’en nib thilthil ni fan ko pigpig rodad ngak Jehovah, ma angin nra yib riy e ku ra yoor boch e tow’ath nra pi’ ngodad. Ere gubin e rran ni ngaud lemnaged boch e kanawo’ nrayog ni ngad guyed “feni manigil” Jehovah riy. Faan gad ra rin’ ni aray rogon, ma aram e rayog ni ngad boded Jesus ni faani gaar: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu muruwliy.”​—John 4:34.