1. Mang boch ban’en nib manigil ni ke rin’ e pi tapigpig rok Jehovah ni kab kakrom i yib ke mada’ ko chiney?

 BA GA’ fan u wan’um e tha’ u thilmew Jehovah, fa? Ba mudugil nib ga’ fan u wan’um! Ma gathi kemus ni yigoo gur e arrogom, ya boor e girdi’ kakrom nib ga’ fan u wan’rad e tha’ u thilrad Jehovah. (Ps. 104:​33, 34) Boor i gadad e ke pag fan boch ban’en ya nge yag ni liyor ngak Jehovah. Aram e n’en ni i rin’ e pi Nazirite u Israel kakrom. Mini’ e pi cha’ney, ma mang e rayog ni ngad filed rorad?

2. (a) Mini’ e piin yad ma mang Nazirite? (Numbers 6:​1, 2) (b) Mang fan ni ma mel’eg boch e girdi’ nu Israel ni ngar manged Nazirite?

² Fare bugithin ni “Nazirite” e ke yib u bbugithin ni Hebrew ni be yip’ fan “Be’ ni Kan Fal Nga Bang,” ara “Be’ ni Kan Kieg ko Tin Ka Bay e Girdi’,” ara “Be’ ni Kan Ognag.” Yima fanay e re thin ney ni fan ngak e girdi’ nu Israel ni kar paged fan boch ban’en ya nge yag nra pigpiggad ngak Jehovah u reb e kanawo’ ni yugu ba thil. Rogon ni bay ko fare Motochiyel rok Moses e rayog ni nge micheg be’ nib pumoon ara be’ nib pin ban’en ngak Jehovah ni aram e nge mel’eg ni nge mang reb e Nazirite u lan ba ngiyal’. a (Mu beeg e Numbers 6:​1, 2.) Re n’ey ni ke micheg e ba muun ngay ni nge fol u boch e motochiyel nde t’uf ni nge fol e tin ka bay e girdi’ nu Israel riy. Ere mang fan nra mel’eg be’ nu Israel ni nge mang reb e Nazirite? Rayog ni bochan e rib t’uf Jehovah rok mab ga’ fan u wan’ e pi tow’ath nib manigil ni ma yib rok.​—Deut. 6:5; 16:​16, 17.

3. Uw rogon ni girdi’ rok Got e ngiyal’ ney e yad bod e pi Nazirite?

³ Nap’an ni yan “fare motochiyel ni pi’ Kristus” nga lon fare Motochiyel rok Moses ma aram e dakuriy reb e girdi’ rok Got ni  i mang Nazirite. (Gal. 6:2; Rom. 10:4) Machane ka be ulul e girdi’ rok Jehovah e ngiyal’ ney ni ngar daged nri yad baadag ni ngar pigpiggad ngak u polo’ i gum’ircha’rad, ngu polo’ i lanin’rad, ngu polo’ i lem rorad, ngu polo’ i gelngirad ni bod e pi Nazirite. (Mark 12:30) Gad ma micheg ni ngad rin’ed e re n’ey u nap’an ni gad ra ognaged gadad ngak Jehovah. Ra ngad ted u gil’ e n’en kad micheged mab muun ngay ni ngad rin’ed e n’en nib m’agan’ Jehovah ngay mad paged fadad u boch ban’en. Nap’an ni gad be weliy rogon ni i tay e pi Nazirite u gil’ e n’en ur micheged, ma rayog ni ngad filed boch ban’en riy nib ga’ fan u rogon ni ngad ted u gil’ e n’en kad micheged. b (Matt. 16:24) Ngad weliyed boch e pi n’ey.

MU PAG FAM U BOCH BAN’EN

4. Mang e i pag e pi Nazirite farad riy nrogon ni be yog e Numbers 6:​3, 4?

⁴ Mu beeg e Numbers 6:​3, 4. Dabiyog ni nge unum e pi Nazirite e alkul ara ra ked wom’engin e grape nge raisin. Girdi’ u toobrad e gubin ngiyal’ ni yad ma kay e pi ggan ney ni bochan e dariy ban’en nib kireb riy ni ngan kay. Be yog e Bible ni ‘wain ni ma pi’ e felfelan’ ngak’ be’ e ba tow’ath ni ke yib rok Got. (Ps. 104:​14, 15) Machane yugu aram rogon me m’agan’ e pi Nazirite ngay ndab ra ked e pi n’ey. c

5. Mang e mel’eg Madián nge Marcela ni ngar pagew fan, ma mang fan?

⁵ Ku arrogodad ni gad ma pag fadad u boch ban’en ya nge yag nda yoornaged e tin gad be rin’ ni fan ngak Jehovah ni bod e pi Nazirite. Am lemnag e n’en ni rin’ Madián nge Marcela. d Re wu’ i mabgol ney e ba fel’ e par rorow. Bochan nib fel’ e maruwel rok Madián, ma aram fan nrayog ni ngar parew u reb e naun nib manigil. Machane yow baadag ni ngar yoornagew e tin yow be rin’ ni fan ko pigpig rorow ngak Jehovah. Ere ra dugliyew ni ngar thilyegew boch ban’en u rogon e par rorow ya nge yag nrin’ew e re n’ey. Rognew ni lungurow: “Gu tababgow ni nggu lichnagew urngin e n’en gamow be n’ag e salpiy ngay. Gu warow gu parew nga reb e naun nib achig boch ma gamow pi’ e karrow romow ni chuway’.” De t’uf ni nge rin’ Madián nge Marcela e pi n’ey, machane ra dugliyew ni ngar rin’ew ni bochan e aram rogon nrayog ni ngar yoornagew e tin yow be rin’ ni fan ko machib. Ba fel’ u wan’row e n’en kar dugliyew maku yow ba felfelan’ ngay.

6. Mang fan ni ma pag e piin Kristiano farad u boch ban’en e ngiyal’ ney? (Kum guy e sasing.)

 ⁶ Ma felfelan’ e piin Kristiano ni ngar paged farad u boch ban’en ya nge yag nra yoornaged e tayim rorad ni fan ko tirok Got ban’en. (1 Kor. 9:​3-6) Der lemnag Jehovah ni ngad paged fan e pi n’ey; maku reb e pi n’ey e gathi bogi ban’en nib kireb. Bod ni bay boch e walag ni kar siyeged reb e maruwel ni yad baadag, ara kar dugliyed ndabi yag reb e naun ni ngar tafnayed, ara gamanman ni ngar fakayed. Ku boor e walag ni kar dugliyed ndab ka ar uned ko mabgol ara ra fakayed e bitir. Ku bay boch e walag ni kar mel’eged ni nga ranod ra pigpiggad ko gin nib t’uf e ayuw riy ko machib ni yugu aram rogon ni be yip’ fan nib t’uf ni nga ranod ra pared nga bang nib palog ko gin bay e piin nib t’uf rorad riy. Boor i gadad e ba m’agan’ ngay ni nge rin’ e pi n’ey ni bochan e gad baadag ni ngad pied e tin th’abi fel’ rodad ngak Jehovah. Nge pagan’um ngay ndemtrug ko buchuuw ara boor ban’en ni kam pag fan ya nge yag nim pigpig ngak Jehovah, ma gubin nrib ga’ fan u wan’.​—Heb. 6:10.

NGE M’AGAN’UM NGAY NI NGAM PAR NI GAB THIL

7. Mang fan nrayog ni nge mo’maw’ ngak reb e Nazirite ni nge tay u gil’ e n’en ke micheg? (Numbers 6:5) (Kum guy e sasing.)

⁷ Mu beeg e Numbers 6:5. Pi Nazirite e yad ma micheg ndab ra th’abed piyan lolugrad. Aram reb e kanawo’ ni yad ma dag riy nri yad be fol rok Jehovah. Faanra ke n’uw nap’an ni ke mang be’ nu Israel reb e Nazirite, ma aram e ra n’uw piyan lolugen mab mom ni nge guy yugu boch e girdi’. Faanra be pi’ e girdi’ u tooben e athamgil nga laniyan’ ni nge tay u gil’ e n’en ke micheg, ma aram e sana ra mom ngak ni nge par nib thil u fithik’ e tin ka bay e girdi’. Machane ba gel e kireban’ riy ya immoy yu ngiyal’ u nap’an piyu Israel nda un tayfan e pi Nazirite ara un pi’ e athamgil nga lanin’rad. Nap’an Amos ni profet ma i guy piyu Israel ndakurur folgad rogon ni ngar ‘gelniged yad ngak e pi Nazarite ni ngar unumed e wain,’ ma sana ur rin’ed e re n’ey ni bochan e yad be guy rogon ni ngar k’aringed yad ni nge dab kur ted u gil’ e n’en kar micheged ni aram e dab ra unumed e wain. (Amos 2:12) Yu ngiyal’ e ba t’uf ni nge par reb e Nazirite ndabi rus ni nge tay u gil’ e n’en ke micheg me par nib thil u fithik’ e tin ka bay e girdi’.

8. Uw rogon ni be pi’ e n’en ni buch rok Benjamin e athamgil nga lanin’um?

⁸ Ku arrogodad nrayog ni nge ayuwegdad Jehovah ni nge dab da rusgad ni ngad pared ni gad ba thil u fithik’ e tin ka bay e girdi’ ni yugu aram rogon ni gad ba tamra’. Am lemnag e n’en ni buch rok Benjamin nreb e Pi Mich u Norway ni ragag e duw rok. Bay reb e gam’ing nni tay u skul rok ni fan ko girdi’ nu Ukraine ni kar gafgowgad ko mahl ni yibe tay u rom. Nog ko bitir ni ngar chuwgad ko mad ni bod raen e flak nu Ukraine ma ron’ed reb e tang. I guy Benjamin  rogon ndabi un ko re gam’ing ney, ma aram me yan i par nga bang nib palog ko gin yibe tay riy. Machane bay reb e sensey ni guy me pining nib ga’ laman ni gaar: “Thingar mub e chiney ngam un ko n’en yibe rin’, ya yibe sonnagem!” Ere yan Benjamin ko fare sensey me gaar ngak: “Gag e gu ma par u mathilin ngongolen e am, maku da gur un nga boch ban’en ni yima rin’ ni bay rogon ko am. Bin riyul’ riy e boor e Pi Mich Rok Jehovah ni kan kalbusnagrad ni bochan e darur uned ko mahl.” I fel’ u wan’ fare sensey e n’en ni yog Benjamin ngak, ma aram me yog nde t’uf ni nge un ko n’en yibe rin’. Machane piin yad nga class e ra tababgad ni ngar fithed fan nde un ko n’en yibe rin’. Ere ri rus Benjamin me chugur ni nge yor. Yugu aram rogon me athamgil nge weliy e n’en ke yog ko fare sensey ngak gubin e bitir u class rok. Tomuren me yog ko gallabthir rok ni ke thamiy ni ke ayuweg Jehovah ni nge par nib mudugil ni fan ko michan’ rok.

9. Uw rogon nrayog ni ngad felfelan’naged Jehovah?

⁹ Bochan ni kad mel’eged ni ngad rin’ed e n’en nib m’agan’ Jehovah ngay, ma aram fan ni gad ba gagiyel ni gad ba thil u fithik’ e tin ka bay e girdi’ u toobdad. Ba t’uf ndab da rusgad ni nga dogned ni gadad boch e Pi Mich Rok Jehovah u tabon e maruwel ara skul. Ma chiney ni be gel e kireb ko lem nge ngongol ko girdi’ ko re fayleng ney e dabisiy nra gel boch e mo’maw’ riy ni ngad folgad ko pi kenggin e motochiyel u Bible ma gad weliy fare thin nib fel’ ko girdi’. (2 Tim. 1:8; 3:13) Machane dariy ba ngiyal’ ni ngam pagtalin ni faanra dab da rusgad ni ngad pared ni gad ba thil u fithik’ e piin ndarur pigpiggad ngak Jehovah, ma aram e “ra felfelan’.”​—Prov. 27:​11, BT; Mal. 3:18.

MM’ONEG JEHOVAH U LAN E YAFOS ROM

10. Uw rogon nrayog ni nge mo’maw’ ngak e pi Nazirite ni ngar folgad ko fare motochiyel ni bay ko Numbers 6:​6, 7?

¹⁰ Mu beeg e Numbers 6:​6, 7. Pi Nazirite e dabiyog ni ngar chugurgad nga tooben be’ ni ke yim’. Sana ga ra lemnag ni gathi rib mo’maw’ ni ngar rin’ed e re n’ey. Machane kakrom e rayog ni nge mo’maw’ e re n’ey ngak reb e Nazirite u nap’an nra yim’ reb e girdi’ rok nib chugur ngak. Rogon e yalen ko tayam’ e ngiyal’ nem e ba t’uf ni nge chugur e girdi’ nga tooben be’ ni ke yim’. (John 19:​39, 40; Acts 9:​36-40) Machane dabiyog ni nge fol reb e Nazirite ko pi yalen ney ni bochan e n’en ke micheg. Pi Nazirite e ur daged nib gel e michan’ rorad ni aram e ur ted u gil’ e n’en kar micheged ngki mada’ nga nap’an ni yad be mada’nag boch e magawon u lan e tabinaw rorad ko ngiyal’ nem ni ke yim’ be’. Ba mudugil ni i pi’ Jehovah gelngin e pi tapigpig rok nem ni yad ba yul’yul’ ni ngar athamgilgad u fithik’ e pi magawon nem ni ur mada’naged.

11. Mang e thingari dugliy reb e Kristiano u wan’ ni nge rin’ u nap’an ni be dugliy boch ban’en ni bay rogon ko tabinaw rok? (Kum guy e sasing.)

 ¹¹ Gadad e piin Kristiano e ri gad ma tay u gil’ e n’en kad micheged ngak Jehovah u nap’an nda ognaged gadad ngak. Re n’ey e ra rin’ ban’en ko pi n’en gad ma dugliy nge boch ban’en ni gad ma rin’ ni bay rogon nga boch ban’en u lan e tabinaw rodad. Yugu aram rogon ni gad ma maruwel nib gel ni ngad pied e tin nib t’uf ko tabinaw rodad, machane darud m’oneged e n’en yad baadag ni ngad rin’ed ko n’en nib m’agan’ Jehovah ngay ni ngad rin’ed. (Matt. 10:​35-37; 1 Tim. 5:8) Bay yu ngiyal’ nrayog nib t’uf ni ngad dugliyed boch ban’en nde m’agan’ e girdi’ rodad ngay ya nge yag nda felfelan’naged Jehovah.

12. Mang e rin’ Alexandru u nap’an ni be mada’nag reb e magawon nib mo’maw’ u lan e tabinaw rok, ma mang e de rin’?

¹² Am lemnag e n’en ni buch rok Alexandru nge Dorina ni leengin. Tomuren nra filew e Bible u lan reb e duw, me dugliy Dorina ni nge tal maku baadag ni ngki tal Alexandru. Machane i yog Alexandru ngak u fithik’ e gapas nge gonop ni ir e ka ra ulul ko fol Bible. Dabun Dorina e re n’ey ma aram mi i guy rogon ni nge towasariy ni nge tal ko fol Bible. I yog Alexandru ni i guy rogon ni nge nang fan ni be ngongol Dorina ni aray rogon, machane de mom e re n’ey ngak. Yu ngiyal’ e nap’an nra gathibthibnag Dorina me non ngak nib gel e thin rok, me lemnag ni nge tal ko fol Bible. Yugu aram rogon me ulul Alexandru ni nga i m’oneg Jehovah u wan’ ma ka be dag e t’ufeg nge tayfan ngak leengin. Tomur riy me sul Dorina ngki fil e Bible bayay ni bochan e ngongol nib manigil ni i dag figirngin ngak, me munmun me un ko taufe.​—Mu guy fare video ni Alexandru and Dorina Văcar: “Love Is Patient and Kind” ni bay ko jw.org u tan fare thin ni “Truth Transforms Lives.”

13. Uw rogon ni ngad daged nib t’uf Jehovah rodad nge chon e tabinaw rodad?

¹³ Jehovah e ir e sunmiy e tabinaw ma baadag ni nge yag e felfelan’ nga lan e tabinaw rodad. (Efe. 3:​14, 15) Ere faanra gad baadag ni ngad felfelan’gad, mab t’uf ni ngad rin’ed boch ban’en nrogon nib m’agan’ Jehovah ngay. Nge pagan’um ngay nib ga’ fan u wan’ Jehovah e athamgil ni ga be tay ni ngam pigpig ngak, ma ka ga be ayuweg e tabinaw rom ma ga be dag e t’ufeg nge tayfan ngorad.​—Rom. 12:10.

NGE BAGADAD ME PI’ E ATHAMGIL NGA LANIYAN’ BAGADAD NI NGE BOD E PI NAZIRITE

14. Mini’ e piin nsusun e ngaud pied e athamgil nga lanin’rad?

¹⁴ Gubin e piin kar mel’eged ni ngar pigpiggad ngak Jehovah e ngiyal’ ney e ba t’uf ni nge m’agan’rad ngay ni ngar paged fan boch ban’en ni bochan e ba t’uf Jehovah rorad. Yu ngiyal’ e de mom ni ngan rin’ e re n’ey. Ere uw rogon nrayog ni nge bagadad me ayuweg bagadad ni nge pag  fan boch ban’en ni fan ngak Jehovah? Aram e nge bagadad mi i yog boch e thin nra pi’ e athamgil nga laniyan’ bagadad. (Job 16:5) Bay boch e walag u lan e ulung rom ni yad be guy rogon ni ngar momnaged e par rorad ya nge yag nra yoornaged e tin yad be rin’ ni fan ngak Jehovah, fa? Ga manang boch e fel’ yangaren ndarur rusgad ni ngar gagiyelgad ni yad ba thil u fithik’ yugu boch e bitir u skul ni yugu aram rogon nib mo’maw’ ni ngar rin’ed e re n’ey, fa? Ma uw rogon e piin yad be fil e Bible nge yugu boch e walag nrayog ni be mo’maw’ ngorad ni ngar pared ni yad ba yul’yul’ ni bochan e togopluw ni yad be mada’nag u lan e tabinaw? Ngad guyed rogon ni ngad pied e athamgil nga laniyan’ e pi walag ney, ma gad yog ngorad nib ga’ fan u wan’dad rogon ni yad be pag farad u boch ban’en nge rogon ndarur rusgad.​—Filem. 4, 5, 7. 

15. Uw rogon ni ke ayuweg boch e walag e piin yad ma pigpig u polo’ e tayim rorad?

¹⁵ Bay yu ngiyal’ nsana rayog ni ngad ayuweged e pi walagdad ni yad ma pigpig u polo’ e tayim rorad u boch ban’en nib t’uf rorad. (Prov. 19:17; Heb. 13:16) Ireray e n’en baadag reb e walag nib pin ni ke pilibthir ni ma par u Sri Lanka ni nge rin’. I yoor boch e salpiy ni be yib ngak ma baadag ni nge ayuweg l’agruw i walag nib pin ni yow ma pioneer ni ngar ululgow ko machib ni yow be tay ni yugu aram rogon ni yibe magawon ko salpiy. Ere dugliy nra reb e pul ma bay urngin e salpiy ni nge pi’ ni nge ayuwegrow u puluwon e telefon rorow. Rib manigil e n’en ni rin’ e re walag nem!

16. Mang e rayog ni ngad filed ko fare yaram ni ngongliy Jehovah ni fan ko pi Nazirite kakrom?

¹⁶ Boor ban’en nrayog ni ngad filed ko pi n’en nib manigil ni i rin’ e pi Nazirite! Machane re n’ey e ku be dag ban’en ngodad u rarogon Jehovah ni Chitamangidad ni bay u tharmiy. Ba pagan’ ngay ni gad baadag ni ngad rin’ed e n’en nib m’agan’ ngay, ma kub m’agan’dad ngay ni ngad paged fan boch ban’en ya nge yag nda ted u gil’ e n’en kad micheged u nap’an nda ognaged gadad ngak. Ma tay fadad ni aram e ma bing e kanawo’ ngodad ni ngad mel’eged ni ngad daged nib t’uf rodad. (Prov. 23:​15, 16; Mark 10:​28-30; 1 John 4:19) Rogon e yaram ni ngongliy Jehovah ni fan ko pi Nazirite e be dag ni manang ma kub ga’ fan u wan’ e pi n’en gad ma pag fan ya nge yag nda pigpiggad ngak. Ere manga yu gud dugliyed u wan’dad ni ngad ululgad ko pigpig ni gad be tay ngak Jehovah, me m’agan’dad ngay ni ngad pied e tin th’abi fel’ rodad ni fan ngak.