Be tamilangnag e Bible nrayog ni nge yog Jehovah e n’en nra buch boch nga m’on. (Isa. 45:21) Machane der yog gubin ban’en u murung’agen rogon nra rin’ e re n’ey, ara ngiyal’ nra rin’ riy, ara urngin ban’en ni ke mel’eg ni nge nang. Ere dad nanged gubin ban’en u rogon nrayog rok Jehovah ni nge nang e n’en nra buch boch nga m’on. Machane baaray in ban’en ni gad manang.

Demtrug ban’en ni baadag Jehovah ni nge rin’ ma rayog rok, machane yu ngiyal’ e ma mel’eg ndabi rin’ boch ban’en. Bochan ndariy e gin nra mus e gonop rok riy, ma aram fan ndemtrug ban’en ni baadag ni nge yiiynag ma rayog rok. (Rom. 11:33) Machane bochan nrayog ni nge t’ar laniyan’ u gubin ban’en, ma aram fan ni ku rayog ni nge mel’eg ndabi nang e n’en nra buch boch nga m’on.​—Mu taarebrogonnag ko Isaiah 42:14.

Ma k’aring Jehovah ni nge buch e n’en nib m’agan’ ngay. Uw rogon ni be ayuwegdad e re n’ey ni nge tamilang u wan’dad rogon nrayog rok ni nge yog e n’en nra buch boch nga m’on? Be gaar e Isaiah 46:10: “Gog ko tabolngin e tin ni bay ko tungun; kab kakrom mu gog e tin ni bay yib. Mu gog ni tin ni ke m’ay i lemnag rog e dabiyog ni nge thil; ya gu ra rin’ urngin e tin ni ke m’ay i lemnag rog.”

Reb i fan nrayog rok Jehovah ni nge yog e n’en nra buch boch nga m’on e bochan ni bay gelngin ni nge k’aring boch ban’en ni nge buch. De t’uf ni nge yan e lem rok Jehovah nge taw ko pi n’en nra buch boch nga m’on ni bod e n’en gad ma rin’ yu ngiyal’ ni gad ma yaliy tungun reb e kachido ya ngad nanged e n’en nra buch. Rayog ni nge dugliy Jehovah e ngiyal’ ni nge buch ban’en riy, ma nap’an nra taw ko re ngiyal’ i n’em me k’aring fare n’em ni nge buch.​—Ex. 9:​5, 6; Matt. 24:36; Acts 17:31.

Aram fan ni ma fanay e Bible fapi thin ni “kug rin’” nge “tin ni ke m’ay i lemnag rog” ni nge weliy e n’en ma rin’ Jehovah ni fan nga boch ban’en nra buch boch nga m’on. (2 Ki. 19:25; Isa. 46:11) Pi thin ney e kan pilyeg u bbugithin ni Hebrew ni bay rogon nga bbugithin ni be yip’ fan be’ ni ma ‘ngongliy e th’ib.’ (Jer. 18:4) Rayog rok Jehovah ni nge gagiyegnag boch ban’en ni nge lebguy e n’en nib m’agan’ ngay ni bod rogon be’ nib salap i ngongliy e th’ib nrayog rok ni nge ngongliy ba rume’ nib fel’ yaan u bangi but’.​—Efe. 1:11.

Ma pag Jehovah e girdi’ ni ngar mel’eged e n’en ngar rin’ed. Der ma dugliy e n’en nra buch rok be’ boch nga m’on. Ku der ma k’aring be’ nib fel’ ni nge rin’ ban’en nra gafgow riy. Ya ke pag urngin e girdi’ ni ngar mel’eged e n’en ngar rin’ed, ma be pi’ e athamgil nga lanin’rad ni ngar mel’eged e n’en nib fel’ ni ngar rin’ed.

Am lemnag l’agruw ban’en. Bin som’on e bay rogon ngak piyu Nineveh. I yiiynag Jehovah nra thang e girdi’ ko re mach nem ni bochan e ba kireb e ngongol rorad. Machane nap’an nra kalgadngan’rad, ma aram me “thiliyeg laniyan’ nge daki pag fare riya’ nge yib ngorad ni bod rogon ni yog ni bay rin’.” (Jonah 3:​1-10) I thilyeg Jehovah e lem rok u murung’agen e n’en ke yiiynag ni bochan e fanay piyu Nineveh e puf rogon rorad ni ngar thilyeged e ngongol rorad u tomuren nni ginangrad.

Bin migid e aram fare yiiy ni murung’agen be’ ni ka nog Cyrus ngak ni ir e pag e pi Jew u kalbus me yog ni ngkun toy fare tempel rok Jehovah bayay. (Isa. 44:26–45:4) Cyrus ni Pilung nu Persia e ir e lebguy e re yiiy nem. (Ezra 1:​1-4) Machane der ma liyor ko bin riyul’ e Got. Ere fanay Jehovah Cyrus ni nge lebguy e re yiiy ney, machane de towasariy ni nge liyor ngak.​—Prov. 21:1.

Bin riyul’ riy e ireray in ban’en ni ma lemnag Jehovah u nap’an ni be yog e n’en nra buch boch nga m’on. Ya dariy be’ nrayog ni ngari nang fan rogon ni ma rin’ Jehovah boch ban’en. (Isa. 55:​8, 9) Machane chuuw ni gad manang e be ayuwegdad ni ngari mich u wan’dad ni gubin ngiyal’ ni ma rin’ e tin nib fel’, nib muun ngay e ngiyal’ ni ke yog e n’en nra buch boch nga m’on.