Mary nge John a ni figirngin e yow ma par u reb e nam ni boor e girdi’ nu Manile’ ni ka ranod ngay ni maruwel nrayog ni ngan machibnagrad. Nap’an fare m’ar ni COVID-19, me tabab Mary i fil e Bible ngak boch e girdi’ ni yad ma par ko nam rok nge yugu boch e nam u fayleng. Uw rogon ni rin’ e re n’ey?

Ba ga’ ni ma gaar ngak e piin yad ma fil e Bible, “Ga manang be’ ni ku ra adag ni nge fil e Bible?” Faanra yog ni manang, ma aram me yog ngak ni ngan ayuweg nge yag ni non ngak. Re deer ney ni ma fith e ba ga’ ni ma yib angin. Mang fan? Ya piin nib ga’ fan e Thin rok Got u wan’rad e ba ga’ ni yad baadag ni ngar weliyed e tin yad be fil ngak chon e tabinaw rorad nge pi fager rorad. Ere mang angin ni ke yib riy ni bochan e re deer ney ni ma fith?

Jasmin ni yow ma fil Mary e Bible e ki yog ngak murung’agen e girdi’ ni ku yad baadag ni ngar filed e Bible. Bay bagayad ni ka nog Kristine ngak nri baadag e fol Bible ni i un ngay, ma aram me yog ngak Mary ni ngaun fil e Bible ngak ni l’agruw yay u reb e wik. Nap’an ni fith Mary ko ka bay be’ ni manang ni baadag ni nge fil e Bible, me fulweg ni gaar, “Ba’, bay gguy rogon ni ngam mada’gad e pi fager rog.” De gaman in e wik nga tomuren, me ayuweg Kristine Mary ni ngar mada’gad aningeg e fager rok ni yad baadag ni ngar filed e Bible. Boch nga tomuren miki ayuweg Kristine ni ngkur mada’gad yugu boch e fager rok, ma bay boch i yad ni ki pi’ fithingan yugu boch e girdi’ nsana ku yad ra adag ni ngar filed e Bible.

Ku baadag Kristine ni nge fil chon e tabinaw rok u Manile’ e Bible. Ere non ngak reb e ppin ni fak ni ka nog Andrea ngak. Som’on e gaar Andrea u wan’, ‘Pi Mich e yad barba’ e teliw nib mit rogon, ma de mich Jesus u wan’rad, ma kemus ni yigoo Bin Kakrom e M’ag u Bible e yad ma fanay.’ Machane taab yay ni un ko fol Bible me nang nde puluw e pi n’ey ni i lemnag. Nap’an ni be fil e Bible mab ga’ ni ma gaar, “Faanra arrogon ni be yog e Bible, mab mudugil nib riyul’!”

Boch nga tomuren me ayuweg Andrea Mary ni ngkur mada’gad l’agruw e fager rok nge be’ ni yow nga maruwel, mu kur tababgad ko fol Bible. Ku bay ba auntie rok Andrea ni ka nog Angela ngak ni ma motoyil u nap’an ni yow be fil e Bible nder nang Mary. Me yan i reb e rran me yog Angela ngak Andrea ni nge fith Mary ko rayog ni nge fil e Bible ngak fa dabiyog. Ri baadag Angela e n’en be fil. De gaman in e pul nga tomuren ma boor e thin nu Bible ni ke fil ke mit ngak, ma baadag ni nge fil e Bible ni aningeg yay u reb e wik! Ki  ayuweg Andrea ni nge tabab ni nga i un ko muulung ni gubin ngiyal’ u online.

Nap’an ni nang Mary nib ga’ ni ma yib i par Joshua ni figirngin Kristine nga bang nib chugur ngorow u nap’an ni yow be fol Bible, ma aram me fith ngak ko baadag ni nge un ngorow ko fol Bible fa danga’. Me gaar Joshua, “Kemus ni nggu motoyil, machane dab mu fith e deer ngog; ya ga ra fith mug chuw romew.” Lal e minit nga tomuren ni kar filed e Bible ma boor e deer ni ke fith ko tin ke fith Kristine, ma baadag ni ngki ulul ko fol Bible.

Bochan fare deer ni fith Mary, ma aram me yag ni nge fil e Bible ngak boor e girdi’. Bay boch i yad ni pi’rad ngak yugu boch e Pi Mich ni ngar filed e Bible ngorad. Ere 28 e girdi’ ni yad ma par u aningeg e nam ni tababnag Mary e fol Bible ngorad.

Jasmin ni ir e som’on ni kan weliy murung’agen e un ko taufe ko April ko duw ni 2021. Me Kristine e nni taufenag ko May ko duw ni 2022, ma ke sul nga Manile’ ko gin bay chon e tabinaw rok riy. Ku bay l’agruw ni’ ni ayuweg Kristine ni ngar mada’gad Mary ni kur filew e Bible ma kur unew ko taufe. In e pul nga tomuren me un Angela ko taufe ma chiney e ma pigpig ni ir reb e regular pioneer. Joshua ni figirngin Kristine, nge Andrea ni fakrow, nge ku boch e girdi’ ni yad be fil e Bible e ku yad be mon’og ko tirok Got ban’en.

Nap’an e bin som’on e chibog, mab papey ni i garer fare thin nib fel’ u thilin girdien e tabinaw nge pi fager. (John 1:​41, 42a; Acts 10:​24, 27, 48; 16:​25-33) Ere mang ndabi lungum ngak e piin gimed be fil e Bible nge yugu boch e girdi’ ni yad baadag e tin riyul’, “Ga manang be’ ni ku ra adag ni nge fil e Bible?” Faan ga ra fith e re deer ney, ma sana ka ga ra pirieg yugu boch e girdi’ ni yad ra adag ni ngar filed e Bible.