KAM guy ni boor e girdi’ u fayleng ni yad ma lemnag nsusun e kab fel’ e ngongol ni ngaun dag ngorad ko ngongol ni ngaun dag ngak yugu boch e girdi’ me yib mat’awrad u boch ban’en, fa? Demtrug feni fel’ e ngongol ni yibe dag ngorad ma ka yad be lemnag nib t’uf ni ngkun rin’ yugu boch ban’en ni fan ngorad. Girdi’ ni yad ma lem ni aray rogon e yigoo yad e yad ma lemnaged yad ma darur pininged e magar ko tin bay rorad. Ireray e n’en be yog e Bible u rarogon e girdi’ ko tin tomuren e rran.​—2 Tim. 3:2.

Riyul’ ni lem ni fel’ ngak e gathi ban’en ni ka fini sum. I dugliy Adam nge Efa ni ngar mel’egew rorow e n’en nib fel’ nge n’en nib kireb, ma aram me yib wenegan ngorow. Boch e chibog nga tomuren me lemnag Uzziah ni Pilung nu Judah ni bay mat’awun ni nge ognag e incense u tempel, machane ri de puluw e n’en ni lemnag. (2 Kron. 26:​18, 19) Ku arrogon e pi Farise nge pi Sadduse ni ur lemnaged ni bay rogon ni nge ngongol Got ngorad u reb e kanawo’ nib thil ko tin ka bay e girdi’ ni bochan e yad owchen Abraham.​—Matt. 3:9.

Ba liyegdad e girdi’ ni yigoo yad e yad be lemnaged yad, ma rayog ni nge af e re lem ney ngodad. (Gal. 5:26) Rayog ni ngad tababgad ni ngad lemnaged ni bay rogon ni ngan pi’ reb e tow’ath ngodad ara ni ngongol ngodad u reb e kanawo’ ni yugu ba thil. Uw rogon nrayog ni ngad siyeged e mit ney e lem? Som’on e ba t’uf ni ngad nanged rogon e re n’ey u wan’ Jehovah. Bay l’agruw i kenggin e motochiyel u Bible nra ayuwegdad.

Jehovah e ir e ma dugliy e n’en bay rogon ni nge yag ngodad. Baaray boch ko pi n’ey.

•   Ra yib nga lan e tabinaw, ma en figirngiy e ba t’uf ni nge nang ni be tayfan leengin, ma en leengiy e ba t’uf ni nge nang ni be t’ufeg figirngin. (Efe. 5:33) L’agruw ni’ ni yow ba mabgol e susun e yigoo yow e ngaur dagew e t’ufeg rorow ngorow nde un yugu be’ ngay. (1 Kor. 7:3) Ma piin gallabthir e thingari fol pi fakrad rorad, ma piin bitir e susun e nga i t’ufegrad e gallabthir rorad ma yad be ayuwegrad.​—2 Kor. 12:14; Efe. 6:2.

• Bay tapgin ni ngad ted fan e piin piilal nib gel e maruwel ni yad ma tay u lan e ulung. (1 Thess. 5:12) Machane dariy mat’awrad ni ngar suweyed pi walagrad.​—1 Pet. 5:​2, 3.

• Ke pi’ Got mat’awun e am ko girdi’ ni nga rogned ko girdi’ ni ngar pied e tax, miki tay e girdi’ ni yad bay u tan e gagiyeg rorad farad.​—Rom. 13:​1, 6, 7.

Bochan ni gad ba t’uf rok Jehovah, ma ka boor ban’en ni ma pi’ ngodad ndariy rogon ni nge yag ngodad. Bay rogon ni ngad m’ad ni bochan e denen ni ke af ngodad. (Rom. 6:23) Machane boor e tow’ath ni ke pi’ Jehovah ngodad ni bochan e t’ufeg ni ma dag ngodad u fithik’ e yul’yul’. (Ps. 103:​10, 11) Gubin e tow’ath ni ma pi’ ngodad e ban’en ni ke yag ngodad ni bochan e runguy rok.​—Rom. 12:​6-8; Efe. 2:8.

Mu kol ayuw ko lem nu fayleng. Rayog ndad nanged ma gad tabab ni ngad lemnaged ni bay rogon ni ngan rin’ yugu boch ban’en ni fan ngodad nib thil ko tin ka bay e girdi’. I weliy Jesus feni mom nrayog ni nge sum e biney e lem u daken fare fanathin ni weliy ni murung’agen fapi girdien e maruwel nni pi’ puluwrad nra bagayad ma reb e salpiy ni silber. Bay boch i girdien e maruwel nra tababgad ko maruwel nri kab kakadbul mar maruwelgad u taramaen e yal’ nib polo’ reb e rran; ma boch e girdi’ e kemus ni taareb e awa nra maruwelgad riy. Tin baaram e girdi’ nra tababgad ko maruwel nsom’on e ra lemnaged ni bay mat’awrad ni ngan pi’ puluwrad ni kab tolang ko tin baaram e girdi’ ni bochan e maruwel ni kar rin’ed. (Matt. 20:​1-16) I tamilangnag Jesus ko re fanathin ney nsusun e nge fel’ u wan’ pi gachalpen e n’en ke m’agan’ Got ngay ni nge pi’ ngorad.

Um pining e magar ma dab um lemnag ni nga i pi’ e girdi’ boch ban’en ngom. (1 Thess. 5:18) Mu folwok rok apostal Paul nda i yog ko pi walag u Korinth ni ngar pied boch ban’en ngak ni yugu aram rogon ni bay mat’awun ni nge rin’ e  re n’ey. (1 Kor. 9:​11-14) Susun e ngaud pininged e magar ko pi tow’ath ni be yag ngodad, ma dab ud lemnaged ni ngaun pi’ boch ban’en ngodad.

Mu dag e sobut’an’. Nap’an nra lemnag be’ ir nge pag rogon, mab ga’ ni ma tabab ni nge lemnag ni bay rogon ni nge yag boch ban’en ngak nib pag urngin ko tin bay rok. Sobut’an’ e ra ayuwegdad ni nge dab ud lemgad ni aray rogon.

Ba manigil e kanawo’ ni dag Daniel ni profet u rogon ni i dag e sobut’an’. Rayog ni nge lemnag ni bay rogon ni nge thil e ngongol ni ngaun dag ngak ko ngongol ni yibe dag ko tin ka bay e girdi’ mu kun pi’ boch e tow’ath ngak ni bochan e tabinaw ni yib riy, nge rogon feni pichoay, nge llowan’ rok, nge pi salap rok. (Dan. 1:​3, 4, 19, 20) Yugu aram rogon me par Daniel nib sobut’an’, ma aram fan ni par nib t’uf rok Jehovah.​—Dan. 2:30; 10:​11, 12.

Ngad siyeged e lem ni fel’ ngak ma dab ud lemnaged ni kab ga’ fadad ko tin ka bay e girdi’ ni bod rogon e lem ni ma tay yooren e girdi’ u fayleng e ngiyal’ ney. Ya ngad ululgad ni ngad felfelan’gad ko pi tow’ath ni be pi’ Jehovah ngodad ni bochan e runguy rok ngodad.