1-2. (a) Mang fan ni gad manang ni gad ra mada’nag e magawon? (b) Mang e gad ra weliy ko re article ney?

 GADAD e girdi’ rok Jehovah e gad manang ni gad ra mada’nag e magawon. Fan ni gad manang e re n’ey e bochan ni be yog e Bible ni “thingar danod u fithik’ boor e gafgow ma gadad yan ko gin nsuwon Got.” (Acts 14:22) Ku bay boch e magawon rodad ni fin ra chuw u nap’an ni ka darod nga lan e bin nib beech e fayleng rok Got, ya aram e ngiyal’ ni “dab ku unim’, ma dab ki i kireban’uy, ma dab ku un yor, ma dab ku un amith.”—Rev. 21:4.

² Der ma yororiydad Jehovah ndabi yib e magawon ngodad. Machane ma ayuwegdad ni ngad athamgilgad u fithik’. Mu tay fanam i yan ko n’en ni yog apostal Paul ngak e pi Kristiano ni yad ma par u Roma. Som’on e yoloy murung’agen boch e magawon ni yad be mada’nag e pi walag. Ngemu’ me yoloy ni gaar: “Cha’nem ni gadad ba t’uf rok e ir e ke pi’ gelngidad kad gelgad.” (Rom. 8:35-37) Re n’ey e be yip’ fan ni yugu aram rogon ndawori chuw e magawon rom, machane rayog ni nge ayuwegem Jehovah ni ngam athamgil u fithik’. Ere chiney e ngad weliyed rogon ni ayuweg Jehovah Josef nge rogon nrayog ni nge ayuwegem.

3. Uw rogon ni thil e par rok Josef nib tomgin?

³ I dag Jakob nrib t’uf Josef ni fak rok. (Gen. 37:3, 4) Bochan e re n’ey, ma aram me awan’ e tin nib ilal e pumoon ni walagen ngak. Nap’an ni mab e kanawo’ ngorad, ma aram mar pied Josef nchuway’ ngak bogi ni’ nta chuway’ ni ka nog e Midianite ngorad. I fek e pi girdi’ nem Josef ni bokum miriay e mayel nga ranod ra mada’gad nga Egypt, mu kur pied nchuway’ ngak  Potifar ni ir pilungen e pi matanag rok Farao. Rib tomgin ni thil e par rok Josef, ya immoy nrib t’uf rok e chitamangin ma chiney e ke mang sib rok be’ nu Egypt!—Gen. 39:1.

4. Uw rogon nrayog ni ngad mada’naged reb e magawon ni bod e magawon ni mada’nag Josef?

⁴ Be yog e Bible ni “gubin e girdi’ ni ma buch boch ban’en nib kireb rorad.” (Ekl. 9:11, Holy Bible—Easy-to-Read Version) Bay yu ngiyal’ ni gad ma mada’nag e magawon ni “ka ma yib ngak e girdi’.” (1 Kor. 10:13) Fa reb e rayog ni ngad gafgowgad ni bochan e gad boch i gachalpen Jesus. Bod nrayog ni ngaun moningnagdad, ara un togopuluw ngodad, ara un gafgownagdad ni bochan e michan’ rodad. (2 Tim. 3:12) Ere demtrug e re miti magawon ni ga ra mada’nag, ma rayog ni nge ayuwegem Jehovah. Uw rogon ni rin’ e re n’ey ni fan ngak Josef?

5. Mang e guy Potifar u rarogon e pi n’en be rin’ Josef? (Genesis 39:2-6)

⁵ Mu beeg e Genesis 39:2-6. I guy Potifar ni Josef e ir reb e pagel nib salap ko maruwel maku ma maruwel nib gel. Ku manang ko mang fan ni ir be’ ni aray rogon. I guy ni “urngin ban’en nra muruwliy Josef ma ra fel’ ni bochan e ba’ Somol rok ni be ayuweg.” b Munmun me fek ni nge mang tapigpig rok, miki tay ni nge milfan e tabinaw rok ngak nge urngin ban’en rok. Mang angin ni yib riy? I fel’ rogon Potifar.

6. Uw rogon nrayog ni i lemnag Josef e n’en ni i buch rok?

⁶ Am lemnag rogon e lem rok Josef. Mang e ri baadag ni nge buch? Gur, baadag ni nge guy Potifar e n’en be rin’ me tow’athnag? Dabisiy ni baadag ni ngan pag ya nge yag ni sul ko chitamangin. Bin riyul’ riy e yugu aram rogon ni boor ban’en ni kan pag fan ngak Josef u tafen Potifar, machane ka ir e sib rok be’ nder ma pigpig ngak Jehovah. De k’aring Jehovah Potifar ni nge pag Josef. Maku reb e, be n’en ni nge mada’nag Josef boch e magawon ni kab gel boch e mo’maw’ riy.

7. Uw rogon ni gel e ubchiya’ ko magawon ni mada’nag Josef? (Genesis 39:14, 15)

⁷ Be yog e Genesis ko guruy ni 39 ni baadag fare pin ni leengin Potifar Josef ma boor yay  ni i guy rogon ni ngar parew. Machane gubin yay ni i siyeg Josef e re n’ey. Tomur riy mi ri damumuw ngak Josef me t’ar e thin nga daken nge yog ni ke kol u gelngin. (Mu beeg e Genesis 39:14, 15.) Nap’an ni rung’ag Potifar e re n’ey, me yon’ Josef nga kalbus me par u rom u lan in e duw. (Gen. 39:19, 20) Uw rogon e re kalbus nem nnon’ Josef ngay? Fare bugithin ni Hebrew ni fanay Josef ni fan ko fare bugithin ni “kalbus” e rayog ni nge yip’ fan e “luwed” ara “low nib toar.” Re n’ey e be dag nib lumor e gin’em ni immoy riy ma i lemnag ndakuriy ban’en nrayog ni nge rin’ ko n’en ke buch rok. (Gen. 40:15, NW, ftn.) Ku be yog e Bible ni immoy ba ngiyal’ nni m’ag e chen nga ay min the’ ba wasey nga belel’ugun. (Ps. 105:17, 18) Ere ri be gel e ubchiya’ ko magawon ni be mada’nag Josef, ya immoy ni ir reb e sib ni yima pagan’uy ngak ma chiney e ke mang reb e kalbus.

8. Mang e rayog ni nge pagan’dad ngay ni yugu aram rogon ni be gel e ubchiya’ ko magawon rodad?

⁸ Bay ba ngiyal’ ni kam mada’nag reb e magawon nri be gel e ubchiya’ riy ni yugu aram rogon nda mur tal ko meybil, fa? Rayog ni nge buch e re n’ey. Der ma yororiydad Jehovah ndabi yib e magawon ngodad u lan e re fayleng ney ni be gagiyegnag Satan. (1 John 5:19) Yugu aram rogon ma rayog ni nge pagan’um ngay nri manang Jehovah e magawon rom ma be lemnagem. (Matt. 10:29-31; 1 Pet. 5:6, 7) Maku reb e ki micheg ni gaar: “Ri dab gu pagem; ma ri dab gu n’igem.” (Heb. 13:5) Rayog ni nge ayuwegem Jehovah ni ngam athamgil ni yugu aram rogon ni ga be lemnag ndakuriy ban’en nrayog ni ngam rin’ ko magawon rom. Ere chiney e ngad guyed rogon ni ayuweg Jehovah Josef.

9. Mang e be dag ni i ayuweg Jehovah Josef u kalbus? (Genesis 39:21-23)

⁹ Mu beeg e Genesis 39:21-23. Yugu aram rogon nib gel e gafgow ni i tay Josef u kalbus, machane i ayuweg Jehovah. Ni uw rogon? Munmun ma en nib milfan e kalbus ngak e pagan’ ngak Josef miki tayfan ni bod e n’en ni rin’ Potifar. Me munmun me tay ni ir e nge milfan e tin ka bay e kalbus ngak. Bin riyul’ riy e be yog e Bible ni “faanem nib mil fan e kalbus ngak e yan i par ndakuriy fan ni ngi i guy e pi n’en ni ke pag fan ngak Josef.” Ere chiney e bay e maruwel nrayog ni nge rin’ Josef ni nga i l’agan’ ngay. Re n’ey ni thil e ban’en ndan lemnag! Uw rogon nrayog ni ngan pag fan boch e maruwel ni aray rogon ngak reb e kalbus ni yibe yog ni ke guy rogon ni nge kol leengin reb e salthaw nib tolang u gelngin? Kemus ni taareb i fan ni bay. Be yog e Genesis 39:23 ni “ba’ Somol rok Josef, ni be ayuweg Josef be fel’ urngin ban’en ni be ngongliy.”  

10. Mu weliy fan nrayog ni nge lemnag Josef ni gathi gubin ban’en nib fel’ rogon u puluwon.

¹⁰ Kum lemnag bayay rogon e lem rok Josef. Tomuren nni t’ar e thin nga daken min kalbusnag, ma ga be lemnag ni i lemnag nib fel’ rogon gubin ban’en u puluwon? Mang e ri baadag ni nge buch? Gur, baadag ni nge fel’ u wan’ e en nib milfan e kalbus ngak, fa? Dabisiy ni baadag ni ngan pag u kalbus. Ki yog ngak yugu reb e kalbus ni yibe n’en ni ngan pag ni nge weliy murung’agen ngak Farao ya nge yag nni pag u kalbus. (Gen. 40:14) Machane de weliy fare pumoon murung’agen Josef ngak Farao ni ka chingiyal’ nem. Ere ki par u kalbus u lan l’agruw e duw. (Gen. 40:23; 41:1, 14) Yugu aram rogon miki ulul Jehovah ni nge ayuweg. Ni uw rogon?

11. Mang e ayuweg Jehovah Josef ni nge rin’? Uw rogon ni bing e re n’ey e kanawo’ ni nge lebug e n’en nib m’agan’ Jehovah ngay?

¹¹ Nap’an ni immoy Josef u kalbus me gagiyegnag Jehovah Farao ni pilung nu Egypt ni  nge lik’aynag l’agruw ban’en ni magawonnag laniyan’. Ri baadag ni nge nang fan e gal lik’ay rok nem. Ere nap’an ni nang nrayog rok Josef ni nge weliy fan e lik’ay, ma aram me yog ni ngan yan ni pining. I ayuweg Jehovah Josef ni nge weliy fan fa gal lik’ay miki gin Farao ko fonow nib manigil ni pi’ ngak. Nap’an ni guy Farao ni be ayuweg Jehovah Josef, ma aram me tay ni ir e nge milfan e ggan ko fare nam nu Egypt ngak. (Gen. 41:38, 41-44) Boch nga tomuren me yib ba uyungol nib gel nga Egypt nge Kanaan ni aram e gin ma par chon e tabinaw rok Josef riy. Ere rayog rok Josef ni nge ayuweg e yafos rok chon e tabinaw rok, miki ayuweg e re tabinaw nra yib fare Messiah riy ndabi math owcherad.

12. Mang boch e kanawo’ ni i ayuweg Jehovah Josef riy?

¹² Am lemnag e pi n’en ni i buch u lan e yafos rok Josef ni yu gub thil. Mini’ e k’aring Potifar ni nge tiyan’ ngak Josef ni yugu aram rogon ni ir reb e sib? Mini’ e k’aring e en nib milfan e kalbus ngak ni nge fel’ Josef u wan’ ni yugu aram rogon ni ir reb e kalbus? Mini’ e gagiyegnag Farao ni nge lik’aynag l’agruw ban’en ni magawonnag laniyan’ miki ayuweg Josef ni nge weliy fan e gal lik’ay nem? Mini’ e gagiyegnag Farao ni nge dugliy Josef ni nge mang ir e nge milfan e ggan ko fare nam nu Egypt ngak? (Gen. 45:5) Ba tamilang ni Jehovah e ir e ayuweg Josef ni nge fel’ rogon gubin ban’en ni i rin’. Yugu aram rogon ni guy fapi pumoon ni walagen Josef rogon ni ngar thanged e fan rok, machane me thilyeg Jehovah e n’en ni buch ya nge yag ni lebug e n’en nib m’agan’ ngay.

13. Gubin ban’en ni ma buch rodad ni ma rin’ Jehovah ban’en ngay, fa? Mu tamilangnag.

¹³ Mang e rayog ni ngad filed ko n’en ni buch rok Josef? Gubin ban’en ni ma buch rodad ni ma rin’ Jehovah ban’en ngay, fa? Ir e ma gagiyegnag gubin ban’en ni ma buch u lan e yafos rodad ya nge yan i aw ni bay fan ni ke buch ban’en nib kireb rodad, fa? Danga’, ya gathi aram e n’en be yog e Bible. (Ekl. 8:9; Jas. 4:14) Machane n’en ni gad manang e nap’an ni gad ra mada’nag e magawon, ma manang Jehovah maku ma motoyil ngodad u nap’an ni gad ra ning e ayuw ngak. (Ps. 34:15; 55:22; Isa. 59:1) Maku reb e rayog ni nge ayuwegdad ya nge yag nda athamgilgad u fithik’ e magawon rodad. Ni uw rogon?

14. Uw rogon ni ma ayuwegdad Jehovah u nap’an ni gad ra mada’nag e magawon?

 ¹⁴ Reb e kanawo’ ni ma ayuwegdad Jehovah riy e aram e ma fal’eg lanin’dad me pi’ e athamgil ngodad ko ngiyal’ nib puluw ni nge rin’ riy. (2 Kor. 1:3, 4) Aram e n’en ni buch rok Eziz nreb e walag ni pumoon u Turkmenistan nni kalbusnag u lan l’agruw e duw ni bochan e michan’ rok. I gaar: “Yan i kadbul ko rofen ni yira fekeg nga tagil’ e puf oloboch, me dag reb e walag ni pumoon ngog fare thin ni bay ko Isaiah 30:15 ni be gaar: ‘Ngam pagedan’med ngog mi gimed par ndakir wagageyan’med.’ Gubin ngiyal’ ni i ayuwegeg e re thin ney ni ngaug par ndabi wagagey lanin’ug mug taga’ ngak Jehovah u gubin ban’en. Re thin ney ni ug fal’eg i lemnag e ayuwegeg u n’umngin nap’an nug par u kalbus.” Rayog ni nge yib ngan’um ba ngiyal’ ni fal’eg Jehovah lanin’um me pi’ e athamgil ngom ko ngiyal’ ni kari t’uf rom, fa?

15-16. Mang e ga be fil ko n’en ni buch rok Tori?

¹⁵ Ba ga’ ni fin ra m’ay e magawon rodad e gad ma guy rogon ni ke ayuwegdad Jehovah ni ngad athamgilgad u fithik’. Aram e n’en ni nang reb e walag nib pin ni ka nog Tori ngak. Nel’ e duw ni m’ar ba pagel ni fak ni ka nog Mason ngak ni ke yib e cancer ngak ma nga tomuren me yim’. Ri kireban’ Tori nib gel. I gaar, “Da gur lemnag ni ka bay ban’en nga bang nrayog ni nge buch rog ni kab gel e kireban’ riy nge migid e biney.” Ki ulul ngay ni gaar, “Gu manang ni tin ka bay e gallabthir e ku yad ra yog ni kab gel e amith riy ni ngaum guy fakam ni be gafgow ko bin gur e ngaum gafgow.”

¹⁶ Yugu aram rogon nib gel e kireban’ ni tay Tori u nap’an ni be guy fak ni be gafgow, machane me yan i boch nga tomuren me lemnag rogon ni ayuweg Jehovah ni nge athamgil  u fithik’ e magawon rok. I gaar: “Nap’an nug ra sul nggu lemnag e ngiyal’ nem, ma rayog ni ngguy rogon ni ayuwegeg Jehovah u n’umngin nap’an nib m’ar fakag. Bod ni yugu aram rogon ndabkiyog ni nga nib ni guy Mason ni bochan gelngin e m’ar rok, machane l’agruw e awa ni ma milekag e pi walag riy ni ngar bad nga aspital. Gubin ngiyal’ ni bay be’ ko gin yima son riy ni ke fal’eg rogon ma kub m’agan’ ngay ni nge pi’ e ayuw. Maku reb e urngin ban’en nib t’uf romow ni yad ma pi’. Mus ko ngiyal’ nrib gel e gafgow ni gamow be tay, ma gubin ngiyal’ ni bay e tin nib t’uf romow.” I ayuweg Jehovah Tori nge Mason ni ngar athamgilgow u fithik’ e magawon rorow.—Mu guy fare kahol ni “ I Pi’ e Tin nib T’uf Romow ko Ngiyal’ nib T’uf ni Nge Pi’ Riy.”

17-18. Mang e ra ayuwegdad ni ngad guyed rogon ni be ayuwegdad Jehovah u nap’an ni gad be mada’nag e magawon miki ga’ fan u wan’dad? (Psalm 40:5)

¹⁷ Mu beeg e Psalm 40:5. Be’ ni be yan nga daken e burey e be nameg ni nge taw nga p’ebugul. Machane bay yu yang nra taw ngay me tal nge yaliy boch ban’en nib fel’ yaan. Ere ku arrogon nib t’uf ni ngaum tay e tayim ni ngam lemnag rogon ni be ayuwegem Jehovah ni yugu aram rogon ni ga be mada’nag e magawon. Nap’an nra taw nga tungun reb e rran, mag fithem ni nge lungum: ‘Uw rogon ni kug guy rogon ni ke tow’athnageg Jehovah e daba’? Yugu aram rogon ndawori chuw e magawon rog, machane uw rogon ni be ayuwegeg Jehovah ni nggu athamgil u fithik’?’ Mu guy rogon ni ngam lemnag taa ban’en ni ke ayuwegem Jehovah riy.

¹⁸ Riyul’ nsana rayog ni ga be meybil ni nge chuw e magawon rom. Re n’ey e ka ban’en ni yima rin’ ma kub puluw ni ngan rin’. (Fil. 4:6) Yugu aram rogon ma susun e ngkud lemnaged e pi tow’ath ni bay rodad e chiney. Ya bin riyul’ riy e be micheg Jehovah nra pi’ gelngidad me ayuwegdad ni ngad athamgilgad. Ere gubin ngiyal’ ni nge ga’ fan u wan’um rogon ni be ayuwegem Jehovah. Ga ra rin’ e re n’ey, ma aram e ga ra guy ni be ayuwegem Jehovah ngki mada’ ko ngiyal’ ni ga be mada’nag e magawon ni bod rogon ni ayuweg Josef.—Gen. 41:51, 52.