1-2. Tomuren ni gad ra un ko taufe, ma mang e thingar da ululgad ni ngad rin’ed? Mu tamilangnag.

 MINGIYAL’ e ga ma klinnag e naun rom? Sana som’on ni ka fin mman mu par ko naun rom e mu klinnag nib fel’ rogon. Machane mang e ra buch ni faanra nga tomuren ma da kum klinnag? Ba papey nra el e fiyath nge but’ u gubin yang riy. Ere faanra nge par e naun rom nib beech, mab t’uf ni ngaum klinnag ni gubin ngiyal’.

² Ku aray e n’en nib t’uf ni ngaud rin’ed ko lem rodad nge rarogodad. Riyul’ nu m’on ni ngad uned ko taufe, mab gel e maruwel nda ted ni ngad thilyeged e tin nib t’uf ni ngad thilyeged ko ngongol rodad ya nge yag ni “ngad pithiged gadad u urngin ban’en ni ma alitnag e dowef nge lanin’uy.” (2 Kor. 7:1) Ere chiney e ba t’uf ni ngad folgad ko fare fonow rok apostal Paul ni be yog ni “gubin ngiyal’ ni ngaud beechnaged gadad.” (Efe. 4:23, NW) Mang fan nib t’uf ni ngaud yal’uweged gadad ni gubin ngiyal’? Ya ba papey nrayog ni nge af e lem nib kireb ko re fayleng ney ngodad, me alitnagdad u p’eowchen Jehovah. Ere faanra ngad pared ni gad ba fel’ u wan’, ma gubin ngiyal’ nthingar ud fal’eged i yaliy rogon e lem rodad, nge rarogodad, nge pi n’en gad ma ar’arnag.

3. Mang e be yip’ fan ni ngam ‘piliyeg lanin’um ni polo’’? (Roma 12:2)

³ Mang e ba t’uf ni ngad rin’ed ya nge yag nda pilyeged lanin’dad ni polo’ ara da thilyeged rogon ni gad ma lem? (Mu beeg e Roma 12:2.) Fare thin ni Greek ni kan pilyeg ni “piliyeg lanin’med ni polo’” e rayog ni ngan pilyeg ni “mu thilyeg boch ban’en u rogon ni ga ma lem.” Ere re n’ey e der yip’ fan ni kemus ni in ban’en  nib manigil e ir e susun e ngaud rin’ed. Ya ba t’uf ni ngad fal’eged i yaliy e bin riyul’ i rarogodad ma gad thilyeg e tin nib t’uf ni ngad thilyeged riy, ya nge yag nda folgad ko pi motochiyel rok Jehovah u rogon feni fel’ rogon nrayog rodad. Machane re n’ey e gathi taab yay ni ngad rin’ed, ya susun e ngad rin’ed ni gubin ngiyal’.

4. Uw rogon ni nge dab da paged e re fayleng ney ni nge mang ir e gagiyegnag e lem rodad?

⁴ Nap’an ni gad ra flont ma gubin ngiyal’ nrayog ni ngad rin’ed e n’en nib m’agan’ Jehovah ngay. Machane chiney e kab t’uf ni ngaud athamgilgad nib gel ya nge yag nda rin’ed e re n’ey. Mu tay fanam i yan riy ni yog Paul ko Roma 12:2 nib t’uf ni ngad pilyeged lanin’dad ni polo’ ya nge yag nda nanged e tin nib m’agan’ Got ngay. Ere som’on e thingar da fal’eged i yaliy rarogodad ngad guyed ko uw rogon ni gad be pag e lem rok Got ni nge gagiyegnag e tin gad be nameg nge tin gad be dugliy, ko bin ngad paged e re fayleng ney ni nge mang ir e gagiyegnag e lem rodad.

5. Mang deer e rayog ni ngad fithed gadad riy ya nge yag nda nanged ko ka gad be lemnag ni ke chugur e rran rok Jehovah fa danga’? (Mu guy e sasing.)

⁵ Am lemnag reb e kanawo’ nrayog ni ngad rin’ed e re n’ey riy. Baadag Jehovah ni ngaud ‘athamgiliyed nrogon nrayog rodad nge papey nge taw’ ko fare rran rok. (2 Pet. 3:12) Ere mu fithem ni nge lungum: ‘Be m’ug u rogon e par rog ni gu manang ni kari chugur nga tungun e re m’ag ney, fa? Be m’ug ko pi n’en nug be dugliy u rogon e skul nge maruwel ni nggu un ngay ni pigpig rog ngak Jehovah e aram e n’en th’abi ga’ fan u lan e yafos rog, fa? Ba mich u wan’ug nra pi’ Jehovah e tin nib t’uf rog nge chon e tabinaw rog, fa gubin ngiyal’ ni ma magafan’ug ni bochan e salpiy nge chugum?’ Am lemnag gelngin e felfelan’ ni ma tay Jehovah u nap’an nra guy ni gad be rin’ e tin nib m’agan’ ngay.—Matt. 6:25-27, 33; Fil. 4:12, 13.

6. Mang e ba t’uf ni ngad rin’ed ni gubin ngiyal’?

⁶ Gubin ngiyal’ nib t’uf ni ngad fal’eged i yaliy rogon e lem rodad ma gad thilyeg e tin nib t’uf  ni ngad thilyeged riy. I gaar Paul ngak piyu Korinth: “Mu changargad ngomed ko gimed be par ni gimed be ngongol u fithik’ e michan’ romed ngak Kristus fa danga’.” (2 Kor. 13:5) Ra ngad ‘ngongolgad u fithik’ e michan’ rodad’ ma gathi kemus ni ngad uned ko muulung nge machib yu ngiyal’, ya kub muun ngay rogon e lem rodad, nge pi n’en gad ma ar’arnag, nge fan ni gad ma rin’ ban’en. Ere ba t’uf ni ngaud beeged e Thin rok Got ya nge yag nda pilyeged lanin’dad ni polo’, ma gad fil rogon ni ngaud lemgad ni bod rogon ni ma lem, ma gad rin’ e n’en nib t’uf ni ngad rin’ed ya nge yag nda felfelan’naged.—1 Kor. 2:14-16.

7. Mang e kub t’uf ni ngad rin’ed nrogon ni be yog e Efesus 4:31, 32? Mang fan nrayog ni nge mo’maw’ e re n’ey?

⁷ Mu beeg e Efesus 4:31, 32. Ku reb e ban’en nib ga’ fan ni ngad rin’ed e nga ‘don’ed nga dakendad e bin nib beech i gadad.’ (Efe. 4:24) Thingar da athamgilgad ni ngad rin’ed e re n’ey. Ere thingar da guyed rogon ni ngad chuweged boch ban’en nib kireb u rarogodad ni bod rogon boch ban’en nib kireb ni ke aw nga lanin’dad, nge damumuw nib pag rogon, nge ku boch ban’en. Mang fan nrayog ni nge mo’maw’ e re n’ey? Ya bay boch ban’en nib kireb u rarogodad ni ke n’uw nap’an ni kad mechamgad ngay. Bod ni be yog e Bible ni bay boch e girdi’ nib “papey e damumuw ngak.” (Prov. 29:22, BT) Be’ ni aray rogon e mus nga tomuren ni ke un ko taufe ma ka rayog nib t’uf ni nge athamgil ni nge thilyeg rarogon. Ireray e n’en ni buch rok be’ ni ngad weliyed murung’agen.

8-9. Uw rogon ni be m’ug ko n’en ni buch rok Stephen nib t’uf ni ngaud pared ma gad be guy rogon ni ngad chuweged e bin kakrom i gadad?

⁸ Bay reb e walag ni pumoon ni ka nog Stephen ngak nib mo’maw’ ni nge gagiyegnag e damumuw rok. I gaar: “Mus nga tomuren nug un ko taufe ma kub t’uf ni ngguy rogon ni ngaug gagiyegnag e damumuw rog. Bod ni bay bayay u nap’an ni yibe machib u mit e tabinaw, mug lol’og be’ ni ke yib i iring e radio u karrow rog. Nap’an nug chugur ngak me pithig pa’ ko fare radio me mil. Nap’an nug weliy ngak boch e walag ni gamad be machib u taabang rogon ni kug sulweg fare radio, me fitheg reb e piilal ni gaar, ‘Stephen, faan gomanga mu lol’og ngam kol ma mang e ga ra rin’ ngak?’ Re deer ney e k’aringeg ni nggu lemnag rarogog mug athamgil ni ngaug awnag e gapas u thilmad e girdi’.” b

⁹ Ba tamilang ko n’en kad weliyed u murung’agen Stephen ni yugu aram rogon ni gad be lemnag ni ke yag ni ngad chuweged ban’en u rarogodad nib kireb, machane ka rayog ni nge yib i m’ug ndad lemnaged. Faanra buch e re n’ey rom, ma dabi mulan’um maku dab mu lemnag ni gathi gur reb e Kristiano nib manigil. Mus ngak apostal Paul miki yog ni gaar: “Faanra gub adag ni nggu rin’ e tin nib fel’, ma ke mus ntin nib kireb e rayog ni gu rin’.” (Rom. 7:21-23) Gubin e Kristiano ni bay boch ban’en nib kireb u rarogorad ni ma yib u m’ug rorad yu ngiyal’ ni bod e fiyath nge but’ ni ma yib nga lan e naun rodad. Ere ba t’uf ni ngaud guyed rogon ni ngad pared ni gad bbeech. Uw rogon nrayog ni ngad rin’ed e re n’ey?

10. Uw rogon nrayog ni ngad gelgad nga boch ban’en u rarogodad nib kireb? (1 John 5:14, 15)

¹⁰ Mu yibilay ngak Jehovah murung’agen reb e ban’en u rarogom ni be mo’maw’ ni ngam chuweg, me pagan’um ngay nra rung’ag e meybil rom me ayuwegem. (Mu beeg e 1 John 5:14, 15.) Yugu aram rogon ndabi ngongliy Jehovah e maang’ang nge chuweg e re n’ey, machane rayog ni nge pi’ gelngim ya nge yag ni nge dabki m’ug e re n’ey u rarogom. (1 Pet. 5:10) Kub t’uf ni ngam tal i rin’ boch ban’en nrayog ni nge  n’igin ni ngki m’ug e bin kakrom e pangin rom ya nge yag nim ngongol nib puluw ko n’en ga be yibilay. Mu kol ayuw ndab um yaliy boch e kachido, ara um beeg murung’agen boch ban’en ni be dag nde kireb ni nga i m’ug e mit ney e ngongol u rarogoy ni ga be guy rogon ni ngam chuweg. Maku dab um par ni ga be lemnag boch ban’en nib kireb ni yima ar’arnag.—Fil. 4:8; Kol. 3:2.

11. Mang e rayog ni ngad rin’ed ya nge yag nda ululgad i guy rogon ni nga don’ed e bin nib beech e pangin nga dakendad?

¹¹ Yugu aram rogon ni kam n’ag e bin kakrom i rarogom, ma kab t’uf ni ngam maruweliy ni nge yag e bin nib beech e pangin ngom. Uw rogon nrayog ni ngam rin’ e re n’ey? Mu nameg ni ngam folwok rok Jehovah u nap’an ni ga be fil murung’agen pi fel’ngin. (Efe. 5:1, 2) Bod nnap’an ni ga ra beeg murung’agen ban’en u Bible ni be tamilangnag rogon ni ma n’ag Jehovah fan e kireb, mag fithem ni nge lungum, ‘Gu ma n’ag fan e kireb rok yugu boch e girdi’, fa?’ Nap’an ni ga ra beeg murung’agen rogon ni ma runguy Jehovah e piin kar gafgowgad, mag fithem ni nge lungum, ‘Aray rogon nug ma lemnag e pi walag ni ke t’uf e ayuw rorad, ma ma m’ug e re n’ey ko ngongol rog, fa?’ Ere mon’ nga dakenam e bin nib beech e pangin ya nge yag ni ngaum pilyeg lanin’um ni polo’, ma dabi mulan’um u nap’an ni ga be rin’ e re n’ey.

12. Uw rogon ni guy Stephen rogon ni ma thilyeg e Bible e ngongol ko girdi’?

¹² Stephen ni faan kan weliy murung’agen e guy ni yag ni nge yon’ nga daken e bin nib beech e pangin ni buchuuw ma buchuuw. I gaar: “Ka nap’an nug un ko taufe, ma bay in ban’en ni buch nib t’uf ni nggu gagiyegnag e damumuw rog riy. Kug fil nreb e nggu wan nggu chuw u tooben e girdi’ ni be guy rogon ni nge k’aring e damumuw ngog fa ngguy rogon ni nggu taleg fare magawon ndabi ga’. Boor e girdi’ ni yad ma yog nib fel’ e n’en nug ma rin’ u nap’an nra buch e pi n’ey, ni kub muun leengig ngay. Mus ngog ma kug ma gin nga rogon ni ma yag ni nggu rin’ e re n’ey! Pi n’ey ni kug thilyeg u rarogog e gathi kug rin’ u gelngig, ya aram e n’en be micheg nrayog ni nge thilyeg e Bible e ngongol ko girdi’.”

13. Mang e ra ayuwegdad ni nge dab kud ar’arnaged boch ban’en nib kireb? (Galatia 5:16)

¹³ Mu beeg e Galatia 5:16. Ke pi’ Jehovah gelngin nib thothup ni nge ayuwegdad ya nge yag nda rin’ed e tin nib fel’. Ere nap’an ni gad ra fil e Thin rok Got, ma aram e gad be pag gelngin nib thothup ni nge gagiyegnagdad. Ku ma yag e re gelngin ney ngodad u nap’an ni gad ra un ko muulung. Ku aram e gin rayog ni ngad chaggad ko pi walag riy ni ku yad be athamgil u rogon nrayog rorad ni ngar rin’ed e tin nib fel’, ma re n’ey e ku ma pi’ e athamgil nga lanin’dad. (Heb. 10:24, 25; 13:7) Maku reb e, nap’an ni gad ra wenig ngak Jehovah u daken e meybil ni nge ayuwegdad u ban’en ni gad ba meewar riy, ma ra pi’ gelngin nib thothup ni nge ayuwegdad. Yugu aram rogon ni pi n’ey ni gad ma rin’ e dabi talegdad ndab kud ar’arnaged boch ban’en nib kireb, machane ra ayuwegdad ndab da paged gadad ko pi ar’ar ney. Be yog e Galatia 5:16 ni piin yad ma pag gelngin Got nib thothup ni nge gagiyegnagrad e ‘daru ranod nga ar’aren lanin’rad.’

14. Mang nib ga’ fan ni ngaum guy rogon ndab kum ar’arnag boch ban’en nib kireb?

¹⁴ Tomuren ni kad tababgad ni ngad rin’ed e pi n’en nra ayuwegdad ni nge fel’ e tha’ u thildad Jehovah, mab ga’ fan ni ngad ululgad i rin’ e pi n’ey mad guyed rogon ndab kud ar’arnaged boch ban’en nib kireb. Mang fan? Ya bay reb e toogor rodad nder ma mol. Re toogor nem e aram e ar’ar ni bay rodad ni ngaud rin’ed e tin nib kireb ban’en. Mus nga tomuren ni kad uned ko taufe ma rayog ni ngkud ar’arnaged boch e  ngongol nsusun e ngad siyeged nib muun ngay e gosgos ni yima fek e salpiy riy, ara muun rrum nib pag rogon, ara ngaun yaliy yaan e ngongol ni puwlag. (Efe. 5:3, 4) Bay reb e walag ni kab pagel ni yog ni gaar: “Reb e magawon ni bay rog nrib mo’maw’ ni nge chuw e gu baadag e pumoon. Gu lemnag nra munmun ma dab kug adag e pumoon, machane ke mada’ ko chiney ma ka dawori chuw e biney e ar’ar rog.” Mang e rayog ni nge ayuwegem ni faanra ri ga be ar’arnag ban’en nib kireb?

15. Mang fan nra yib e athamgil nga lanin’dad ni ngad nanged ni ar’ar nib kireb ni ma yib ngodad e ban’en ni “ka ma yib ngak e girdi’”? (Mu guy e sasing.)

¹⁵ Nap’an ni ga be guy rogon ni ngam gel nga ban’en nib kireb ni ga be ar’arnag, ma dab mu pagtalin ni ku bay boch e girdi’ ni yad be guy rogon ni ngar rin’ed e re n’ey. Be gaar e Bible: “Urngin e n’en ni ma waliy e girdi’ nge denen ni ke yib ngomed e ereyer e mit i n’en ni ka ma yib ngak e girdi’.” (1 Kor. 10:13a) Ku bay reb e Bible ni kan pilyeg e re thin ney riy ni: “Dariy ba mit e lumel ni ke yib ngomed nder ma yib ko girdi’.” Re thin ney e nog ni fan ngak e pi pumoon nge ppin ni Kristiano ni yad ma par u Korinth. Bay boch e pi girdi’ ney ni ur pared e piin gathi mabgol rorad, ma yad e pumoon ni ma darngalnag e pumoon, ma yad ma balyang ko rrum. (1 Kor. 6:9-11) Ga be lemnag nu tomuren nra uned ko taufe, ma da kur ar’arnaged boch ban’en nib kireb, fa? Dabiyog ni er rogon, ya yugu aram rogon ni yad boch e Kristiano ni kan dugliyrad machane ka dawor ra flontgad. Ere ba mudugil ni ku immoy yu ngiyal’ ni ur ar’arnaged boch ban’en nib kireb. Re n’ey e susun nra pi’ e athamgil nga lanin’dad. Mang fan? Ya be dag ndemtrug e re miti ar’ar nib kireb ni ga be guy rogon ni ngam gel ngay, ma bay be’ ni ke yag rok ni nge gel ngay. Arrogon, rayog ni ngam par ‘nib mudugil e michan’ rom ngak Kristus mag togopluw ngak fare moonyan’, ya ga manang ni piin ni yad be par u roy u fayleng ni polo’ ni Kristus e ke michan’rad ngak e gafgow ni be yib ngom e ku ir e be yib ngorad.’—1 Pet. 5:9.

16. Mang e susun ndab ud lemnaged, ma mang fan?

 ¹⁶ Mu guy rogon ndab um lemnag ndariy be’ nrayog ni nge nang fan e re miti magawon ni ga be mada’nag. Ra um lem ni aray rogon ma rayog ni nge k’aringem ni ngam lemnag ndakuriy ban’en nrayog ni ngam rin’ ko magawon rom, maku dariy gelngim ni ngam gel ko pi n’en nib kireb ni ga ma ar’arnag. Ba thil e n’en be yog e Bible, ya be gaar: “Got e dabi thiliyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabiyog romed ni ngam taleged gimed riy; machane re ngiyal’ i n’em e ra pi’ gelngimed ngam k’adedan’med riy, ni aram e ke pi’ e kanawo’ ngomed ni ngam bad riy nga wuru’ e pi n’em.” (1 Kor. 10:13b) Ere mus ni faanra ba gel e ar’ar rodad ko tin nib kireb ban’en, ma ka rayog ni ngad pared ni gad ba yul’yul’ ngak Jehovah. Rayog ni nge ayuwegdad Jehovah ni nge dab da paged gadad ko ar’ar nib kireb ni bay rodad.

17. Yugu aram rogon ndabiyog ni ngad siyeged e ar’ar nib kireb, machane mang e rayog ni ngad rin’ed?

¹⁷ Baaray ban’en ndab mu pagtalin: Dabiyog ni ngam siyeg e ar’ar nib kireb ni bochan e dawor mu flont. Machane nap’an ni ga ra ar’arnag boch ban’en nib kireb, ma rayog ni ngam gel ngay ni ka chingiyal’ nem ni bod Josef u nap’an ni gurnag ir nge mil rok fare pin ni leengin Potifar. (Gen. 39:12) Dariy rogon ni ngam pagem ko ar’ar nib kireb!

18-19. Mang deer e rayog ni ngad fithed gadad riy u nap’an ni gad be guy rogon ni ngad pilyeged lanin’dad ni polo’?

¹⁸ Ra ngad pilyeged lanin’dad ni polo’ ma be yip’ fan nsusun e ngad guyed rogon ni ngaud lemgad ni bod rogon ni ma lem Jehovah, ma gad rin’ e n’en nib m’agan’ ngay. Ere gubin ngiyal’ ni ngaum fithem ni nge lungum: ‘Be m’ug ko ngongol rog ni gu manang ni kari chugur nga tungun e re m’ag ney, fa? Gu be mon’og u rogon ni gu be yon’ e bin nib beech e pangin nga dakenag, fa? Gu be pag gelngin Jehovah nib thothup ni nge pow’iyeg ya nge dab gu pageg ko ar’ar nib kireb ni ma yib ngog, fa?’

¹⁹ Nap’an ni ga be fal’eg i yaliy rarogom ma dab mu lemnag ni ngam rin’ urngin ban’en nib fel’ rogon ndab kum oloboch, ya ngam felfelan’ ko mon’og ni kam tay. Faanra ga be guy ni ka bay boch ban’en nib t’uf ni ngam thilyeg u rarogom, ma dabi mulan’um ya ngam fol ko fare fonow ni bay ko Filippi 3:16 ni be gaar: “Nga darod i yan nga m’on ni bod rogon fapi motochiyel ni ud folgad riy ke yan i mada’ ko chiney.” Ga ra rin’ e re n’ey, ma rayog ni nge pagan’um ngay nra tow’athnagem Jehovah nga rogon ni ga be athamgil ni ngam pilyeg lanin’um ni polo’.