1. Mang e ba m’agan’ Jehovah ngay e ngiyal’ ney?

 BA M’AGAN’ Got ngay ni ngan machibnag fare thin nib fel’ ni murung’agen Gil’ilungun u ga’ngin yang e fayleng e ngiyal’ ney. (Mark 13:10; 1 Tim. 2:3, 4) Re maruwel ney e maruwel rok Jehovah, ma bochan nrib ga’ fan ma aram fan ni ke tay Fak nib t’uf rok ni ir e nge pow’iy rogon ni yibe rin’. Maku bochan e re n’ey, ma aram fan nrayog ni nge pagan’dad ngay ni yira mu’nag e re maruwel ney nrogon nib m’agan’ Jehovah ngay u m’on ni nge yib e tomur.​—Matt. 24:14.

2. Mang e gad ra weliy ko re article ney?

² Gad ra guy ko re article ney rogon ni be fanay Jesus “fare tapigpig nib yul’yul’ ma ba gonop” ni nge pi’ e ggan ni fan ko tirok Got ban’en, miki yarmiy rogon ni nge rin’ pi gachalpen fare maruwel ni machib u fayleng u reb e kanawo’ ndawori buch ba ngiyal’. (Matt. 24:45) Ku gad ra guy e n’en nrayog ni ngad rin’ed ni be’ nge be’ ya nge yag nda ayuweged Jesus nge fare tapigpig nib yul’yul’.

3. Mang e kan pag fan ngak Jesus?

³ Jesus e ir e be pow’iy fare maruwel ni machib. Uw rogon ni kad nanged e re n’ey? De n’uw nap’an u m’on ni nge sul Jesus nga tharmiy, mar mada’gad boch i gachalpen ni yad ba yul’yul’ nga daken reb e burey u Galile. I gaar ngorad: “Kan pag fan urngin ban’en ngog u tharmiy ngu but’.” Mu tay fanam i yan ko n’en ni yog ni migid. I gaar: “Mmarod ngak girdien e pi nam u gubin yang ngam pingeged yad ngar manged pi gachalpeg.” (Matt. 28:18, 19) Ere bay boch ban’en ni kan pag fan ngak Jesus, ma reb riy e aram e kan pag fan ngak ni nge pow’iy fare maruwel ni machib.

4. Mang fan nrayog ni nge pagan’dad ngay ni ka be pow’iy Jesus fare maruwel ni machib?

⁴ I yog Jesus ni fare maruwel ni machib nge ngan ayuweg e girdi’  ni ngar manged pi gachalpen e yira rin’ ko “pi nam u gubin yang” ma ra moy rok pi gachalpen “nge yan i mada’ nga tomren e fayleng [“ko ngiyal’ ni ke chugur nga tungun e re m’ag ney,” NW].” (Matt. 28:20) Ba tamilang ko pi thin ney nra ulul Jesus i pow’iy fare maruwel ni machib nge mada’ ko ngiyal’ ney ni gad bay riy.

5. Uw rogon ni gad be un i lebguy fare thin ni bay ko Psalm 110:3?

⁵ De magafan’ Jesus nra yan i taw ko ngiyal’ ni ke chugur nga tungun e re m’ag ney ma dabi gaman girdien e re maruwel ney. Manang nra lebug fapi thin ni yiiynag fare psalmist ni gaar: “Rofen ni ga ra mahl ngak e pi toogor rom e ra un e tirom e girdi’ ngom nra bagayad me ir e ra ognag ir.” (Ps. 110:3) Faanra ga be un ko fare maruwel ni machib, ma aram e ga be ayuweg Jesus nge fare tapigpig nib yul’yul’ ma ka ga be un i lebguy e re yiiy ney. Yugu aram rogon ni yibe rin’ e re maruwel ney, machane ka yibe mada’nag e magawon.

6. Mang reb e magawon ni be mada’nag e pi tamachib e ngiyal’ ney?

⁶ Reb e magawon ni be mada’nag e pi tamachib e aram e togopuluw. Boor ban’en nde riyul’ ni ma weliy e piin kar digeyed e bin riyul’ e liyor ma yad be chel ngaur togopuluwgad ngay, nge pi tayugang’ ko teliw, nge girdien e am ko girdi’ u murung’agen e maruwel rodad. Faanra mich u wan’ e girdi’ rodad, nge girdi’ ni manangdad, nge girdi’ u tabon e maruwel rodad e pi ban ney, ma aram e rayog ni ngar towasariyed gadad ni ngad talgad ko pigpig ni gad be tay ngak Jehovah nge machib. Bay boch e nam nrogon ni yima togopuluw riy ngodad e aram e yima guy rogon ni ngan k’aring e marus ngodad, ma yibe gafgownagdad, maku yibe kol boch i gadad nga non’ nga kalbus. Darud gingad ko pi n’ey, ya yiiynag Jesus ni gaar: “Urngin e girdi’ ni bay ra fanenikayed gimed ni bochag.” (Matt. 24:9) Re n’ey ni yibe fanenikaydad e aram e mich riy ni gad ba fel’ u wan’ Jehovah. (Matt. 5:11, 12) Moonyan’ e ir tapgin e pi togopuluw ney. Machane kab gel gelngin Jesus ngak! Be yag ni nge rung’ag e girdi’ u gubin e nam fare thin nib fel’ ni bochan e be ayuwegdad Jesus. Ere ngad weliyed e mich riy.

7. Mang ban’en ni ga be guy ni be buch ni be micheg ni be lebug fare thin ko Revelation 14:6, 7?

⁷ Ku reb e magawon ni gad ma mada’nag u nap’an e machib e aram e ba thilthil e thin ko girdi’. Nap’an nni pilyeg e changar rok apostal John, me yiiynag Jesus nra taw ko ngiyal’ ney ni gad bay riy ma mus ko biney e magawon ma dabi taleg fare thin nib fel’ ndabi garer. (Mu beeg e Revelation 14:6, 7.) Ni uw rogon? Gad be bing e kanawo’ ngak urngin e girdi’ nrayog ni ngar motoyilgad ko fare thin ni gad be machibnag ni murung’agen Gil’ilungun Got. Ngiyal’ ney e rayog ni nge beeg e girdi’ u ga’ngin yang e fayleng boch ban’en ko fare website rodad ni jw.org nib puluw ko Bible ni bochan e kan pilyeg nga boor ko 1,000 mit e thin! Ka nog ni ngan pilyeg fare ke babyor ni gad be fanay ni ngad ayuweged e girdi’ ni ngar manged pi gachalpen Jesus ni kenggin e Mu Par Ndariy N’umngin Nap’an ni Gab Felfelan’! nga boor ko 700 mit e thin! Ku yibe ngongliy e ggan ni fan ko tirok Got ban’en u daken boch e video ni fan ko biling, nge boch e babyor ni fan ko piin malmit. Gad be guy e pi yiiy u Bible ni be lebug. Girdi’ “u urngin mit e thin ko pi nam” e yad be fil fare “thin nib machalbog” ni aram e tin riyul’ u Bible. (Zek. 8:23, NW; Zef. 3:9, NW) Urngin e pi n’ey ni be yag ni ngan rin’ ni bochan e Jesus Kristus e ir e be pow’iy e re maruwel ney.

8. Mang angin e machib ni gad be tay?

⁸ Ngiyal’ ney e ba pag 8,000,000 e girdi’ u 240 e nam ni kar manged bang ko ulung rok Jehovah, ma gubin e duw ni bokum biyu’ e girdi’ ni yibe taufenagrad! Machane n’en ni kab ga’ fan e aram e pi girdi’ ney ni kar manged boch i  gachalpen Jesus e kar maruweliyed ni nge yag ngorad e pi fel’ngin e Kristiano ara ‘bin nib beech i yad.’ (Kol. 3:8-10) Boor i yad e ke taleg e ngongol nib kireb, nge cham, nge laniyan’, ma dakir lemnag nib fel’ e nam rok nga yugu boch e nam. Be lebug fare yiiy ko Isaiah 2:4, ya ‘dakurur fal’eged rogorad ni fan ko mahl.’ Bochan ni gad be athamgil u rogon nrayog rodad ni nga don’ed nga dakendad e bin nib beech i gadad, ma aram e gad be ayuweg e girdi’ ni ngar bad ko ulung rok Got maku gad be micheg ni gad be fol rok Kristus Jesus ni ir e en be pow’iydad. (John 13:35; 1 Pet. 2:12) Mang fan ni be buch e re n’ey? Bochan ni be ayuwegdad Jesus.

9. Mang e yiiynag Jesus nra buch ko tin tomuren e rran nrogon ni bay ko Matthew 24:45-47?

⁹ Mu beeg e Matthew 24:45-47. I yiiynag Jesus nra taw ko tin tomuren e rran, ma ra dugliy ba “tapigpig nib yul’yul’ ma ba gonop” ni nga i pi’ e ggan ni fan ko tirok Got ban’en. Ere gad manang nib gel e maruwel nra i tay e re tapigpig nem ko ngiyal’ ney ni gad bay riy. Ma ireray e n’en be buch. Ke fanay Jesus bochi ulung i pumoon ni kan dugliyrad ni ngar pied e ggan ni fan ko tirok Got ban’en ngak e girdi’ rok Got nge piin yad baadag ni ngar nanged e tin riyul’ “ko ngiyal’ ni yima pi’ riy.” Pi pumoon ney e darur lemnaged ni yad e ngar gagiyegnaged rogon e michan’ rok yugu boch e girdi’. (2 Kor. 1:24) Ya yad manang ni Jesus Kristus e ir e en be “yog e thin” ma be “tay murung’agen” e girdi’ rok.​—Isa. 55:4.

10. Ken ngan ko pi babyor ni baaray ni bay yaan ko sasing e ayuwegem ni ngam tabab ko pigpig ngak Jehovah?

¹⁰ Ka nap’an e duw ni 1919, ma boor ken e babyor ni ke ngongliy fare tapigpig nib yul’yul’ ni nge ayuweg e piin yad baadag ni ngar nanged e tin riyul’ ni ngar filed e tin riyul’ u lan e Thin rok Got. Nap’an e duw ni 1921, me ngongliy fare tapigpig fare ke babyor ni The Harp of God ni nge ayuweg e piin yad baadag ni ngar nanged  e tin riyul’ ni ngar filed e pi kenggin e machib u Bible. Munmun mu kun ngongliy yu ken e babyor nib thil. Ken ngan e babyor e ayuwegem ni ngam nang e Chitamangidad ni bay u tharmiy me t’uf rom? Gur, fare ke babyor ni “Let God Be True,” ara Thin Nriyul’ Ni Ma Pow’iy I Yan Ko Yafas Ni Manemus, ara Rayog Ni Ngam Par Ni Gab Fas U Paradis U Fayleng, ara Knowledge That Leads to Everlasting Life, ara Mang e Ri Be Fil e Bible?, ara What Can the Bible Teach Us?, ara Mu Par Ndariy N’umngin Nap’an ni Gab Felfelan’! ni fa ken nem e babyor rodad ni kab beech? Gubin e yu ke babyor ney ni kan ngongliy ni nge ayuwegdad ni ngad yognaged e girdi’ ni ngar manged pi gachalpen Jesus. Mab puluw e n’en bay riy ko n’en nib t’uf rodad u nap’an nni ngongliy.

11. Mang fan ni gad gubin nib t’uf ni ngad filed boor ban’en u murung’agen Jehovah nge Bible?

¹¹ Gathi kemus ni yigoo piin yad baadag ni ngar nanged e tin riyul’ e ir e ba t’uf ni ngar nanged e tin nib toar e machib u murung’agen Jehovah nge Bible, ya gad gubin. I yoloy apostal Paul ni gaar: “Ggan nib el e piilal e ngar ked.” Ki yog Paul ni faan gad ra fol ko pi n’en gad be fil u Bible ma ra ayuwegdad ni ngad “nanged e tin nib fel’ ko tin nib kireb.” (Heb. 5:14) Chiney ni kari gel e kireb ko ngongol ko girdi’ e rayog nrib mo’maw’ ni ngan fol ko pi motochiyel rok Jehovah. Machane ma guy Jesus rogon ni ngad filed e tin nib t’uf ni ngad filed ya nga i par e michan’ rodad nib gel. Gad ma fil e pi n’ey u lan e Thin rok Got ni kan thagthagnag ni aram e Bible. Jesus e ir e be pow’iy fare tapigpig nib yul’yul’ ni nge ngongliy e pi n’ey me pi’ ngodad.

12. Uw rogon ni kad ted fan fithingan Got ni bod Jesus?

¹² Kad ted fan fithingan Got u rogon kanawoen nthingar ni rin’ ni bod Jesus. (John 17:6, 26) Bod nnap’an e duw ni 1931, ma gad fanay fare ngachal ni kan fek u Bible ni Pi Mich Rok Jehovah. Nap’an nda rin’ed e re n’ey, ma gad dag nrib ga’ fan fithingan Got u wan’dad,  ma gad baadag ni ngaud feked fithingan e Chitamangidad ni bay u tharmiy. (Isa. 43:10-12) Ma ka nap’an e October ko re duw nem, min tay fithingan Got nga wuru’ e re ke babyor ney. Maku reb e, kan sulweg fithingan Got kan tay ko yungi n’en u lan fare Bible ni New World Translation of the Holy Scriptures ni immoy e re ngachal nem riy aram ko som’on. Rib thil ko pi yurba’ i teliw ko Kristiano ni googsur ni kar chuweged fithingan Jehovah u lan boor ken e Bible ni kar pilyeged!

13. Mang e be micheg ngom ni be fanay Jesus “fare tapigpig nib yul’yul’ ma ba gonop” e ngiyal’ ney? (John 6:68)

¹³ Ke fanay Jesus “fare tapigpig nib yul’yul’ ma ba gonop” ni nge sunmiy reb e ulung u fayleng nrib manigil ni nge mon’ognag e bin riyul’ e liyor. Uw rogon e re ulung ney u wan’um? Sana taareb rogon e lem romew apostal Peter ni faani gaar ngak Jesus: “Mini’ e gamad ra yan ngak? Yi gur e bay fapi thin rom ni ir e ma pi’ e yafos ndariy n’umngin nap’an ngak e girdi’.” (John 6:68) Faan gomanga dad bad nga lan e ulung rok Jehovah, ma uw e gad bay riy e chiney? Be fanay Kristus e re ulung ney ni nge pi’ e tin nib t’uf rodad ni fan ko tirok Got ban’en. Ku be skulnagdad u rogon ni ngad machibgad u reb e kanawo’ nra yib angin. Maku reb e, be ayuwegdad ni nga don’ed nga dakendad e ‘bin nib beech i gadad’ ya nge yag nda fel’gad u wan’ Jehovah.​—Efe. 4:24.

14. Bochan ni gur bang ko ulung rok Jehovah, ma uw rogon ni ke yib angin e re n’ey ngom u nap’an fare m’ar ni COVID-19?

¹⁴ Nap’an nra yib e magawon nib gel ma ma pi’ Jesus e fonow ni bay e gonop riy. Ke gagiyel angin e pi fonow ney u nap’an ni tabab fare m’ar ni COVID-19. Yugu aram rogon ni boor e girdi’ u fayleng ndar nanged e n’en ngar rin’ed, machane i guy Jesus rogon ni ngan pi’ e fonow  ngodad nib tamilang nra ayuwegdad ndabi buch ban’en rodad. Kan pi’ e athamgil ngodad ni ngaud upunguyed langdad u nap’an ni gad ra yan nga fithik’ e girdi’ ni yoor ma dab ku un chuchugur nga taabang. Kun puguran ko piin piilal ni ngaur nanged salpen urngin e walag u lan e ulung ni gubin ngiyal’, ma yad be guy rogon ni ngar nanged e tin nib t’uf ko par rorad nge tin nib t’uf rorad ni fan ko tirok Got ban’en. (Isa. 32:1, 2) Ku bay boch e fonow ni un pi’ ngodad nge boch ban’en ni yibe pi’ e athamgil riy ngodad u daken fapi update ni ma yib ko fare Ulung ni Ma Pow’iyey.

15. Mang e fonow ni kan pi’ ngodad u rogon ni ngaud ted e muulung rodad nge rogon ni ngad machibgad u nap’an fare m’ar ni COVID-19, ma mang angin ni ke yib riy?

¹⁵ Nap’an e re m’ar nem, mu kun pi’ e fonow nib tamilang u rogon ni ngaud ted e muulung rodad nge rogon ni ngad machibgad. Ba papey nda tababgad ni ngaud ted e muulung, nge assembly, nge convention u Internet. Kud tababgad ni ngaud machibgad u daken e babyor ni gad be yoloy ngaud pied ko girdi’ nge telefon. Ke tow’athnagdad Jehovah ko athamgil ni gad be tay. Boor e branch ni ka rogned ni ke yoor e pi tamachib ko pi ulung ni bay u tan pa’rad. Bin riyul’ riy e, boor e walag ni ke buch boch ban’en rorad u nap’an e machib e ngiyal’ ney nra pi’ e athamgil nga lanin’uy.​—Mu guy fare kahol ni “ Ma Tow’athnagdad Jehovah ko Machib ni Gad Ma Tay.”

16. Mang e rayog ni nge pagan’dad ngay?

¹⁶ Sana rayog ni bay boch e girdi’ ni ur lemnaged ni kaygi thum’ nga wuru’ rogon ni be kol ayuw e ulung rodad u nap’an fare m’ar ni COVID-19. Machane boor yay ni ke gagiyel ni bay e gonop ko fonow ni un pi’ ngodad. (Matt. 11:19) Ma nap’an ni gad ra fal’eg i lemnag rogon ni be pow’iy Jesus e girdi’ rok u fithik’ e t’ufeg, ma rayog ni nge pagan’dad ngay ndemtrug e n’en nra buch boch nga m’on ma dabi digeydad Jehovah nge Fak nib t’uf rok.​—Mu beeg e Hebrews 13:5, 6.

17. Uw rogon u wan’um ni Jesus e ir e be pow’iyem?

¹⁷ Ri gad ba felfelan’ ngay ni Jesus e ir e En Be Pow’iydad! Gad bang u reb e ulung ni be par nib taareb ni yugu aram rogon nib thilthil e yalen, nge nam, nge thin ko girdi’ riy. Gad ba gaman ko tirok Got ban’en ma kan skulnagdad nib fel’ rogon u rogon ngad rin’ed fare maruwel ni machib. Ra bagadad ma yibe fil ngak rogon ni nge yon’ nga daken e bin nib beech e pangin, nge rogon ni nge bagadad me t’uf rok bagadad. Ere bay rogon ni ngad ufgad ni bochan e Jesus e ir e En Be Pow’iydad!