Bay boch e girdi’ ndar fal’eged i beeg e pi thin nu Bible ney nib fel’ rogon ni kar fithed e re deer ney. Machane pi thin nu Bible ney e be weliy murung’agen l’agruw e pumoon ni ka nog Mefibosheth ngorow, ma faan gad ra fil murung’agen e n’en ni buch ma bay ban’en nrayog ni ngad filed riy.

Medlip e pumoon nge l’agruw e ppin ni  fak Saul ni Pilung. Jonathan e ir e bin th’abi ilal e pumoon ni fak Saul. Boch nga tomuren, miki fakay Saul reb e bitir nib pumoon ni Mefibosheth fithingan me Rizpah e chitiningin. Machane ku bay reb e pumoon ni fak Jonathan ni ku Mefibosheth fithingan. Ere bay reb e pumoon ni fak Saul ni Pilung ni Mefibosheth fithingan, maku bay reb ni tungin.

I tabab Saul ni Pilung ni nge fanenikay piyu Gibeon, ma aram me guy rogon ni nge thang owcherad. Ma boor i yad e yag ni nge thang e fan rok. Rib kireb e n’en ni rin’. Mang fan? Ya nap’an ni kab fos Joshua, me ngongliy e piin yad ma yog e thin rok yu Israel ba m’ag ko gapas u thilrad piyu Gibeon.​—Josh. 9:3-27.

Nap’an Saul ni Pilung ma dawori math’ e re m’ag nem. Yugu aram rogon me guy Saul rogon ni nge thang owchen piyu Gibeon. Bochan e re n’ey, ma aram me buch e rok Saul nge chon e tabinaw rok ko “mathang pogofan.” (2 Sam. 21:1, BT) Boch nga tomuren me mang David e pilung. Ma piyu Gibeon ni ka yad ba fos e ra weliyed ngak murung’agen e re kireb ney. Ere fith David ngorad ko uw rogon ni ngan fulweg labgen e kireb ni ke rin’ Saul ya nge yag ni fal’eg Jehovah waathan e re nam nem. I yog piyu Gibeon ni ngan pi’ medlip e pumoon ni fak fare moon ni ‘baadag ni nge thang owcherad’ ya ngar thanged e fan rorad ko bin nga rogned ni ngan pi’ e salpiy ngorad. (Num. 35:30, 31) Ma aram me yog David ni ngan rin’ e n’en ka rogned.​—2 Sam. 21:2-6.

Ngiyal’ nem e ke yim’ Saul nge Jonathan u nap’an e mahl, machane kab fos Mefibosheth ni fak Jonathan. Bay ban’en ni buch rok u nap’an ni kab bitir me par nib mugutgut. Ere ba tamilang nde un ko cham ni tay e tutuw rok ngak piyu Gibeon. I micheg David nge Jonathan ngorow ni ngar parew ni yow ba fager, ma re m’ag nem e ra yib angin ngak pi fakrow nib muun Mefibosheth ngay ni fak Jonathan. (1 Sam. 18:1; 20:42) Be gaar e Bible: “Bochan e michmich u fithingan Got ni tay David nge Jonathan, ma de pi’ David Mefibosheth ni be’ nib pumoon ni fak Jonathan, ni Saul e tutuw rok.”​—2 Sam. 21:7, BT.

Yugu aram rogon me rin’ David e n’en ni yog piyu Gibeon. I pi’ l’agruw e pumoon ni fak Saul ngorad ni bay bagayow riy ni Mefibosheth fithingan, nge lal e pumoon ni tungin Saul. (2 Sam. 21:8, 9) N’en ni rin’ David e yag ni nge chuweg e kireb ni ke yib nga daken fare nam.

Re n’ey e gathi kemus nib chep ni yima weliy, ya ba tamilang e n’en be yog e motochiyel rok Got ni be gaar: “Bitir e dab ni gechignag ni bochan e kireb ni ke ngongliy e gallibthir.” (Deut. 24:16) Ere dabi pag Jehovah ni ngan thang e fan rok fa gal pumoon ni fak Saul nge fa lal i pumoon ni tungin ni faanra dariy ban’en nib kireb ni kar rin’ed. Ku be ulul e re motochiyel nem ngay ni be gaar: “Ra be’ ma ngan thang e fan rok ni bochan e kireb ni ir e ke ngongliy.” Rayog ni pi pumoon ney nra m’ad e ku yad ba l’ag ko n’en ni rin’ Saul u nap’an ni guy rogon ni nge thang owchen piyu Gibeon. Ere kar m’ad ni bochan e kireb rorad.

Re n’ey e be tamilangnag nde puluw ni nge lemnag be’ ara yog ni kemus ni be fol ko n’en ni ka nog ngak ni bochan e nge mang tawey rok ko kireb ni ke rin’. Be gaar e Bible: “Mu fal’eg i gonopiy e n’en ni ga be rin’, ma demtrug e n’en ga ra rin’ ma ra yib i aw nib mat’aw.”​—Prov. 4:24-27, BT; Efe. 5:15.