1-2. Mang e gad ra weliy ko re article ney?

BAY yu ngiyal’ nrayog ni ngad lemnaged rogon feni ngoch e yafos rodad “mab sug ko oloboch [“magawon,” NW].” (Job 14:1, BT) Aram fan ni bay yu ngiyal’ ni ma mulan’dad. Boor e tapigpig rok Jehovah ni bay murung’agrad u Bible ni aram rogon e lem rorad. Ku immoy boch i yad ni i finey ni manga yigi yim’. (1 Ki. 19:2-4; Job 3:1-3, 11; 7:15, 16) Machane, Jehovah ni fare Got ni i pagan’rad ngak e gubin ngiyal’ ni i fal’eg lanin’rad, ma be pi’ gelngirad. Kan yoloy murung’agen e pi cha’ney nga but’ ni bochan e nge fal’eg lanin’dad ma gad fil ban’en riy.​—Rom. 15:4.

² Re article ney e gad ra weliy riy murung’agen boch e tapigpig rok Jehovah ni ur athamgilgad u fithik’ boch e magawon ni i yib ngorad nrayog ni nge muleg lanin’rad. Pi cha’ney e bod rogon Josef ni fak Jakob, nge Naomi ni ke yim’ figirngin nge Ruth ni leengin bagayow fa gal pagel ni fak, nge fare Levite ni yoloy e Psalm 73, nge apostal Peter. Uw rogon ni pi’ Jehovah gelngirad? Ma mang boch ban’en nrayog ni ngad filed ko n’en ni buch rorad? Fulweg ko gal deer ney e be micheg ngodad ni Jehovah e “ba chugur ngak e piin ke mulan’rad; ma ma ayuweg e piin dakuriy ban’en ni be l’agan’rad ngay.”​—Ps. 34:18, BT.

3-4. Mang e buch rok Josef u nap’an nri kab pagel?

³ Sogonap’an 17 e duw rok Josef ma l’agruw e lik’ay ni tay ni Got e gagiyegnag nge yodorom. Gal lik’ay nem e be dag nra taw nga ba ngiyal’, ma ra par Josef nga reb e liw nib ga’ fan ma yira tayfan u lan e tabinaw rok. (Gen. 37:5-10) Machane de n’uw nap’an nga tomuren e gal lik’ay nem ni tay Josef, me buch boch ban’en rok nib  kireb. Ngiyal’ nem e fapi pagel ni walagen e dar ted fan. Ere ra pied nchuway’ ni nge mang sib, ma aram min fek ni nge maruwel u tafen be’ nu Egypt nib tolang e liw rok ni ka nog Potifar ngak. (Gen. 37:21-28) Rib gel e thil ni tay e par rok Josef u lan ba ngiyal’ nde n’uw nap’an, ya daki moy u tabinaw rok e chitamangin nrib t’uf rok, me yan i par ni ir reb e sib u Egypt ndariy fan mi i maruwel rok be’ nib pumoon nde nang Jehovah.​—Gen. 39:1.

⁴ De n’uw nap’an nga tomuren me gel boch e gafgow ko par rok Josef. I t’ar leengin Potifar e thin nga daken nge yog ni be guy rogon ni nge kol u gelngin. De guy Potifar rogon ni nge gay murung’agen e n’en ke buch nge nang ko ba riyul’ fa danga’. Ma aram me yog ni nga non’ Josef nga kalbus min m’ag e chen ngak. (Gen. 39:14-20; Ps. 105:17, 18) Ri kab pagel Josef e ngiyal’ nem. Ere mu lemnag rogon e tafinay rok ni kan t’ar e thin nga daken ni yibe yog ni be guy rogon ni nge kol be’ u gelngin. Kum lemnag e n’en ni lemnag e girdi’ u murung’agen Jehovah ni Got rok Josef u nap’an nrung’aged murung’agen e re n’ey. Ere ba mudugil ni bay tapgin ni nge mulan’ Josef!

5. Mang e rin’ Josef ya nge dabi mulan’ nib pag rogon?

⁵ Nap’an nib sib Josef ngu nap’an ni immoy u kalbus, ma dabiyog ni nge thilyeg rogon e par rok. Ere mang e ayuweg ni nga i par nib fel’ rogon e lem rok? De par ni be lemnag e pi n’en ndabkiyog ni nge rin’, ya i rin’ e maruwel nni pi’ ngak u rogon rayog rok. Bin th’abi ga’ fan riy e, gubin ngiyal’ ni i par ni be lemnag rogon ni nge rin’ e tin nib m’agan’ Jehovah ngay. Bochan e re n’ey, ma aram me tow’athnag Jehovah u urngin ban’en ni i rin’.​—Gen. 39:21-23.

6. Uw rogon ni fa gal lik’ay ni tay Josef e yag ni nge fal’eg laniyan’?

⁶ Sana ku rayog ni i yib e athamgil nga laniyan’ Josef u nap’an ni sul nga i lemnag fa gal lik’ay ni gagiyegnag Jehovah ni nge tay boch e duw u m’on riy. Ba tamilang ko gal lik’ay nem ni ku ra guy chon e tabinaw rok bayay ma ra thil rogon e par rok nge manigil. Ma aram e n’en ni buch. Nap’an ni ke gaman sogonap’an 37 e duw rok Josef, ma aram me tabab ni nge lebug fa gal lik’ay ni tay  u reb e kanawo’ ni yira ngat ngay!​—Gen. 37:7, 9, 10; 42:6, 9.

7. Mang e ra ayuwegdad ni ngad athamgilgad u fithik’ e pi skeng ni ma yib ngodad nrogon ni bay ko 1 Peter 5:10?

⁷ N’en gad be fil riy. N’en ni buch rok Josef e be puguran ngodad nre fayleng ney e rib gel e kireb riy, ma ra i rin’ e girdi’ boch ban’en nde mat’aw ngodad. Mus ngak reb e walag nrayog ni nge rin’ ban’en nde mat’aw ngodad. Machane, faan gad ra tay Jehovah ni ir e Manaf rodad, ma dabi mulan’dad ara da talgad ko pigpig ni gad be tay ngak. (Ps. 62:6, 7; mu beeg e 1 Peter 5:10.) Dab mu pagtalin nsana sogonap’an 17 e duw rok Josef u nap’an fa gal lik’ay ni tay ni Jehovah e gagiyegnag nge yodorom. Ma pagan’ Jehovah ko pi tapigpig rok ni kab fel’ yangarrad. Boor e fel’ yangaren e ngiyal’ ney ni taareb rogorad ngak Josef, ya kub mich Jehovah u wan’rad. Bay boch i yad ni kan kalbusnagrad ni bochan e yad be par ni yad ba yul’yul’ ngak Got.​—Ps. 110:3.

8. Mang e buch rok Naomi nge Ruth?

⁸ Bochan e uyungol, ma aram me digey Naomi nge chon e tabinaw rok taferad u Judah nga ranod ra pared nga Moab. Nap’an ni yad bay u rom ma aram me yim’ Elimelek ni figirngin Naomi, ma ranod ra mageygad l’agruw i pagel ni fak. Boch nga tomuren ma aram me leay fa gal pagel l’agruw e ppin nu Moab ni ka nog Ruth nge Orpah ngorow. Sogonap’an ragag e duw nga tomuren, ma aram miki yim’ fa gal pagel ni fak Naomi, ma ngiyal’ nem e dariy e bitir ni fakrow. (Ruth 1:1-5) Am lemnag gelngin e kireban’ ni tay e re dalip i ppin nem! Riyul’ nrayog ni ngki mabgol Ruth nge Orpah bayay. Machane, mini’ e nge ayuweg Naomi ni ke pilibthir? Bay ba ngiyal’ nri kireban’ Naomi nib gel me yog ni gaar: “Dab mu pininged ngachaleg ni Naomi, . . . mu pininged ngachaleg ni Mara, . . . yi Got ni Gubin ma Rayog Rok e ba gel e gafgow ni ke pi’ ngog.” Tomuren ni buch e pi n’ey rok Naomi nri kireban’ ngay, ma aram me dugliy ni nge sul nga Bethlehem, miki un Ruth ngak.​—Ruth 1:7, 18-20.

9. Uw rogon ni pi’ Ruth e athamgil nga laniyan’ Naomi nrogon ni bay ko Ruth 1:16, 17, 22?

⁹ T’ufeg nni dag ngak Naomi u fithik’ e yul’yul’ e aram e n’en ni ayuweg. Bod ni dag Ruth e t’ufeg u fithik’ e yul’yul’ ngak Naomi ni aram e par rok nde digey. (Mu beeg e Ruth 1:16, 17, 22.) Ma nap’an nranow nga Bethlehem, mab gel e maruwel ni i tay Ruth ni be kunuy e tin ke magey u wom’engin e barley ni fan ngorow. Bochan e re n’ey, ma aram me guy e girdi’ ni Ruth e ir reb e ppin nib manigil ma ma maruwel nib gel.​—Ruth 3:11; 4:15.

10. Mang boch e kanawo’ ni i dag Jehovah e t’ufeg riy ngak e piin gafgow ni bod rogon Naomi nge Ruth?

¹⁰ I pi’ Jehovah ba motochiyel ngak piyu Israel ni be dag rogon e runguy rok ngak e piin gafgow ni bod rogon Naomi nge Ruth. I yog ko girdi’ rok nnap’an ni yad ra kunuy wom’engin e woldug rorad, ma thingar ra digeyed e tin bay u marichlen e milay’ ndab ra kunuyed ya ngan tay ni fan ngak e piin gafgow. (Lev. 19:9, 10) Ere dariy rogon ni nge ning Naomi nge Ruth e ggan ngak be’ ya rayog ni ngar yognagew boch ni fan ngorow.

11-12. Uw rogon ni yibnag Boaz e felfelan’ ngak Naomi nge Ruth?

¹¹ En fiin fagi milay’ ni i kunuy Ruth wom’engin e grain riy e be’ nib moon ni boor ban’en rok ni ka nog Boaz ngak. Ri ngat nga rogon feni yul’yul’ Ruth ngak Naomi nge rogon ni i dag e t’ufeg ngak. Ere boch nga tomuren ma aram me leay Boaz Ruth, me chuw’iy nge sulweg fagi binaw ni immoy nib milfan ngak chon e tabinaw rok Naomi ya nge yag ni tafanay pi fak Ruth. (Ruth 4:9-13) Tomuren, ma aram mar fakayew bochi tir min tunguy Obed ngak ni ir e yan i mang tutuw rok David ni Pilung.​—Ruth 4:17.

¹² Am lemnag gelngin e felfelan’ ni tay Naomi u nap’an ni be dibey Obed u nap’an ni kab achichig ma be pining e magar ngak Jehovah u daken e meybil! Machane ka bay ban’en nib fel’ ni fan  ngak Naomi nge Ruth boch nga m’on. Nap’an ni yira fasegrow ko yam’, ma yow ra nang ni Obed e yan i mang reb e ga’ rok Jesus Kristus, ni ir fare Messiah ni Kan Micheg!

13. Mang boch ban’en nib ga’ fan nrayog ni ngad filed ko n’en ni buch rok Naomi nge Ruth?

¹³ N’en gad be fil riy. Nap’an ni gad ra mada’nag e magawon, ma rayog ni nge mulan’dad miki kireban’dad nib gel. Sana rayog ni gad be lemnag ndabiyog ni nge puf e magawon rodad. Faanra buch boch ban’en rodad ni aray rogon, ma aram e ngiyal’ ni ngari pagan’dad ngak e Chitamangidad ni bay u tharmiy mad chugurnaged gadad ngak pi walagdad u lan e ulung. Riyul’ nsana dabi chuweg Jehovah e magawon rodad. Bod rogon nde faseg figirngin Naomi nge fa gal pagel ni fak. Machane ra ayuwegdad, ni aram e sana rayog ni nge rin’ e re n’ey u daken boch ban’en nib manigil nra i rin’ pi walagdad ni fan ngodad.​—Prov. 17:17.

14. Mang fan nri mulan’ reb e Levite?

¹⁴ En ni yoloy e Psalm 73 e ir reb e Levite. Ere rib tow’ath ni bochan e rayog ni nge un ko pigpig u tempel rok Jehovah. Machane bay ba ngiyal’ ni taw ngay, mi ri mulan’ nib gel. Mang fan? I tabab ni nge awan’ ngak e piin nib kireb mab tolangan’rad, ni gathi bochan e kireb ni yad be rin’, ya bochan ni be m’ug ni kab fel’ rogon e par rorad ko par rok. (Ps. 73:2-9, 11-14) I guy ni gubin ban’en ni bay rorad, ya yad ba flaab, mab fel’ e par rorad, maku dariy ban’en ni be magafan’rad ngay. Nap’an ni guy e re Levite nem e re n’ey, ma aram mi ri mulan’ nib gel me gaar: “Gur mm’ay fan ni kug tiyeg ni gub machalbog, ma gu be ayuw gu be par ndagur ngongliy e denen?” Ba tamilang nre n’ey e rayog ni nge k’aring e re Levite ney ni nge tal ko pigpig ni be tay ngak Jehovah.

15. Uw rogon ni yag rok fare Levite ni yoloy e re thin ney ko psalm ni nge gel nga boch ban’en ni i muleg laniyan’ nrogon ni bay ko Psalm 73:16-19, 22-25?

¹⁵ Mu beeg e Psalm 73:16-19, 22-25. Ere yan fare Levite “nga lan e tempel” rok Got. Nap’an ni bay u rom ko gin ku bay yugu boch e tapigpig rok Jehovah riy, ma aram me yag ni nge fal’eg i lemnag rogon e magawon rok nib gapas laniyan’, maku rayog ni nge lem nib fel’ rogon, miki yibilay murung’agen e magawon rok. Bochan e re n’ey, ma aram me yag ni nge guy nde puluw rogon e lem ni be tay, miki nang ni be rin’ ban’en nrayog ni nge palognag rok Jehovah. Ki tamilang  u wan’ ni piin nib kireb e yad bay ko “yungi n’en nib tamasirgig” ma bay ra mada’naged e “gafgow nib gel.” Ba t’uf ni nge lemnag fare Levite boch ban’en ni bod rogon ni be lemnag Jehovah, ya nge dabki mulan’ ma dabki awan’ ngak e piin nib kireb. Nap’an ni rin’ e re n’ey, ma aram me yag ni nge gapas laniyan’ miki felfelan’ bayay. I gaar: “[Jehovah] ga ba’ rog, ere be mang e re n’en ni bay u fayleng ni go manga ngku gu adag?”

16. Mang boch ban’en nrayog ni ngad filed rok reb e Levite?

¹⁶ N’en gad be fil riy. Dabi awan’dad ngak e girdi’ nib kireb ni gad be lemnag nib fel’ rogorad. Ra munmun me m’ay e felfelan’ rorad, maku dab ra pared ndariy n’umngin nap’an. (Ekl. 8:12, 13) Faanra awan’dad ngorad, ma rayog ni nge mulan’dad miki kireb e tha’ u thildad Jehovah. Ere faanra yan i taw nga ba ngiyal’ ma kam lem ni bod rogon fare Levite, mag rin’ e n’en ni rin’. Mu fol ko fonow rok Got ni ma pi’ ngodad u fithik’ e t’ufeg, mag chag ngak e piin yad ma rin’ e tin nib m’agan’ Jehovah ngay. Faanra gel feni t’uf Jehovah rom ko tin ka bay ban’en, ma aram e ga ra pirieg e bin riyul’ e felfelan’, mu kum par u daken fare pa’ i kanawo’ ni be sor ko “bin riyul’ e yafos.”​—1 Tim. 6:19.

17. Mang boch i fan ni mulan’ Peter?

¹⁷ Apostal Peter e ir be’ nib pasig. Machane bay yu ngiyal’ ni ma yog ara ma rin’ boch ban’en der lem u m’on riy, me tomur riy me kalngan’. Bod nnap’an ni yog Jesus ngak e pi apostal rok nra gafgow miki yim’, ma aram me puwan’ Peter ngak ni gaar: “Thingari dabi yib e pi n’ir ngom!” (Matt. 16:21-23) I yal’uweg Jesus Peter. Maku nap’an ni yib ba ulung i girdi’ ni ngar koled Jesus, miki rin’ Peter ban’en nde lem u m’on riy, ma aram me th’ab yuwan tel e sib rok e en nib tolang ko prist. (John 18:10, 11) Ere ki yal’uweg Jesus e re apostal nem bayay. Maku reb e, ki non Peter u fithik’ e ufanthin ni be yog ni mus ni faanra digey e tin ka bay e apostal Jesus, ma ir e dabi rin’ ban’en ni aram rogon! (Matt. 26:33) Machane bochan ni yigi pag rogon e pagan’ rok Peter ma aram me rus ko girdi’, ma dalip yay ni yog nde  nang e Masta rok. Bochan nri mulan’ Peter nib gel, ma aram “me yan nga wuru’ e yoror ngi i yor ni kari kireban’.” (Matt. 26:69-75) Dabisiy ni i lemnag ko ka ra n’ag Jesus fan e kireb rok fa danga’.

18. Uw rogon ni ayuweg Jesus Peter ni nge gel ko pi n’en ni muleg laniyan’?

¹⁸ Machane de mulan’ Peter nge taw nga reb e dodow ni k’aring ni nge tal ko pigpig ngak Jehovah. Tomuren e oloboch ni tay, miki ulul ni nge pigpig ngak Jehovah, ma boch nga tomuren miki yan i chag ngak e tin ka bay e apostal. (John 21:1-3; Acts 1:15, 16) Mang e ayuweg ni nge dabki kireban’ ko oloboch rok? Reb riy e meybil Jesus u m’on riy ndabi mul e michan’ rok Peter, miki tay Jesus ir ngak ni nge sul ngak pi walagen nge pi’ e athamgil ngorad. I fulweg Jehovah taban e re meybil nem ni tay Jesus u polo’ i gum’irchaen. Boch nga tomuren ma aram me m’ug Jesus ngak Peter u nap’an ni yigoo ir, nib mudugil ni bochan e nge pi’ e athamgil nga laniyan’. (Luke 22:32; 24:33, 34; 1 Kor. 15:5) Tomuren reb e nep’ ni fita’ e pi apostal ndar koled ban’en, ma aram me m’ug Jesus ngorad. Aram e ngiyal’ ni ki bing Jesus e kanawo’ ngak Peter ni nge micheg ngak nrib t’uf rok. Ke n’ag Jesus fan e kireb rok e re fager rok nem, ere ki pi’ boch e maruwel ngak ni nge rin’.​—John 21:15-17.

19. Uw rogon ni be ayuwegdad e Psalm 103:13, 14 ni ngad lemnaged e denen rodad ni bod rogon ni ma lemnag Jehovah?

¹⁹ N’en gad be fil riy. Rogon e ngongol rok Jesus ngak Peter e be dag ni Jesus e ir be’ nri ma runguy e girdi’ ni bod rogon e Chitamangin. Ere nap’an ni gad ra oloboch, ma dab da lemnaged ndabi n’ag Jehovah fan e kireb rodad. Susun e dab da paged talin ni aram rogon ni baadag Satan ni ngad lemgad. Ere n’en nsusun e ngad rin’ed e ngad fal’eged i lemnag gelngin nri gad ba t’uf rok Jehovah ni manang e tin dabiyog rodad, ma baadag ni nge n’ag fan e kireb rodad. Ma susun e ngkud folwokgad rok u nap’an ke rin’ be’ ban’en ni ke kirebnag lanin’dad.​—Mu beeg e Psalm 103:13, 14.

20. Mang e gad ra weliy ko bin migid e article?

²⁰ N’en ni buch rok Josef, nge Naomi nge Ruth, nge fare Levite, nge Peter e be micheg ngodad ni Jehovah e “ba chugur ngak e piin ke mulan’rad.” (Ps. 34:18, BT) Bay yu ngiyal’ ni ma pag ni nge yib boch e skeng ngodad ni gad ma gafgow riy miki mulan’dad. Machane, faan gad ra athamgil u fithik’ e pi magawon nem ni keb ngodad ma gad pag Jehovah ni nge ayuwegdad, ma aram e ra gel e michan’ rodad. (1 Pet. 1:6, 7) Bin migid e article e ku gad ra guy boch e kanawo’ riy ni ma ayuweg Jehovah e piin yad ba yul’yul’ ngak u nap’an ke mulan’rad nsana bochan e pi meewar rorad ara bochan boch ban’en nib mo’maw’ ni be buch rorad.