Kam beeg e pi Wulyang ko Damit ni fan ko re duw ney nib fel’ rogon, fa? Mu guy ko rayog ni ngam pi’ e fulweg ko pi deer ni baaray fa dabiyog:

Uw rogon nsusun e ngaud ngongolgad ngak e pi Kristiano ni kan dugliyrad?

Ba ga’ fan e michan’ rorad u wan’dad, machane yugu dab da n’ufed yad nga lang nib pag rogon. Ku dab ud pied yad nga lang ko thin ara rogon e ngongol rodad ngorad. (Jude 16) Ku dab ud fithed boch e deer ngorad u murung’agen e athap rorad.​—w20.01, p. 29.

Mang e susun ni nge micheg nga lanin’um ni ma tiyan’ Jehovah ngom?

Be tamilangnag e Bible ni i guyem Jehovah u m’on ni ngan gargelnagem. Ku ma rung’ag e meybil rom. Manang e n’en ga be lemnag nge n’en bay u gum’irchaem. Rayog ni nge felfelan’ ko ngongol rom, maku rayog ni nge kireban’ ngay. (1 Kron. 28:9; Prov. 27:11) Ir e ke pow’iyem ngak.​—w20.02, p. 12.

Mingiyal’ e ba fel’ ni ngad nonad, ma mingiyal’ e ba fel’ ni ngad th’abed gulungdad?

Gad ba felfelan’ ni gad ma weliy murung’agen Jehovah. Ku gad ma yog ban’en u nap’an ni gad ra guy be’ ni be rin’ ban’en nra waliy ni nge rin’ reb e denen. Piin piilal e ku yad ma non u nap’an ni ke t’uf ni ngar fonownaged be’. Gad ma th’ab gulungdad ndab dogned ara da weliyed murung’agen rogon ni yima rin’ e maruwel rodad u boch e nam ni kan taleg e maruwel rodad riy. Ku gad ma th’ab gulungdad ndab da weliyed murung’agen ban’en nsusun e ngan tay nib mith.​—w20.03, pp. 20-22.

Uw rogon nib thil e pi asmen’ing ni bay murung’agen ko Joel ko guruy ni 2 ko tin bay murung’agen ko Revelation ko guruy ni 9?

Be yog e Joel 2:20-29 nra chuweg Got e pi asmen’ing ney me fulweg puluwon urngin e tin kar kirebnaged. Tomuren ma aram me pi’ Got gelngin nib thothup. Gin som’on ko re yiiy ney ni lebug e bay rogon ko pi salthaw nu Babylon nra longobiyed yu Israel, ma gin migid riy e lebug boch nga tomuren. Revelation 9:1-11 e be weliy murung’agen e pi asmen’ing ni kan taarebrogonnag ko piin kan dugliyrad e ngiyal’ ney ni yad be machibnag murung’agen e pufthin ni bayi fek Got i yib ko re m’ag nib kireb ney, ma re n’ey e ban’en ndabun e piin yad bang ko re fayleng ney.​—w20.04, pp. 2-6.

Mini’ fare pilung ko lel’uch e chiney?

Russia nge pi nam ni yad ba mang ngak. Yad be gafgownag e girdi’ rok Got, ma yad be taleg fare maruwel ni machib, maku yad be dag ni yad be fanenikan e Pi Mich. Fare pilung ko lel’uch e be tagenging ko fare pilung ko yimuch.​—w20.05, pp. 12-13.

Fapi fel’ngin ni bay ko Galatia 5:22, 23, NW e kemus e pi fel’ngin ni bang u “wom’engin gelngin Got nib thothup,” fa?

Danga’. Gelngin Got nib thothup e ma ayuwegdad ni ngki yag boch e fel’ngin ngodad ni bod e tin nib mat’aw ban’en. (Efe. 5:8, 9)​—w20.06, p. 17.

Mang riy’en ni faanra mu tay boch ban’en u murung’agem ko yungi n’en ni bay ko Internet nrayog ni ngan non riy ngak yugu boch e girdi’?

Pi n’en ni ga ma tay ko Internet e rayog ni nge m’ug riy ni ga be ufanthin, ma de sobut’an’um.​—w20.07, pp. 6-7.

Mang e rayog ni nge fil e piin Kristiano rok e piin yad ba salap ko fita’?

Pi girdi’ ney e yad ma fita’ ko ngiyal’ nge gin nrayog ni ngar koled boor e nig riy. Kan skulnagrad u rogon ni ngar fanayed e bin nib puluw e talin e fita’. Ku yad ma fita’ ndarur rusgad ni yugu aram rogon ni be thilthil rarogon boch ban’en u toobrad. Ku rayog ni ngad rin’ed e pi n’ey u nap’an e machib.​—w20.09, p. 5.

Mang boch e kanawo’ nrayog ni ngad ayuweged e piin gad ma fil e Bible ngorad ni ngari gel e t’ufeg rorad ngak Jehovah?

Ngad pied e athamgil nga lanin’rad ni ngaur beeged e Bible rorad ni gubin e rran mi yad fal’eg i lemnag e n’en yad be beeg. Ku rayog ni ngad filed ngorad rogon ni ngar meybilgad.​—w20.11, p. 4.

Mini’ e ba muun ko piin yibe weliy murung’agrad ko fare thin ni be gaar: “Gubin e girdi’ ni bay ni faseg ko yam’ ni bochan e kar taab girdi’gad Kristus”?​—1 Kor. 15:22.

Der yog apostal Paul ni gubin e girdi’ ni yira faseg ko yam’. Ya be weliy murung’agen e pi Kristiano ni kan dugliyrad ni “kar taab girdi’gad Kristus Jesus.” (1 Kor. 1:2; 15:18)​—w20.12, pp. 5-6.

Mang e ra rin’ e piin kan dugliyrad u nap’an nra thil downgirad ni “bod machregin lan mit be’ ni talab, ko ngiyal’ ni bay non e bin tomur e rappa riy”?​—1 Kor. 15:51-53.

Yad ra un ngak Kristus ngar gafaliyed e pi nam nga ba ley i wasey. (Rev. 2:26, 27)​—w20.12, pp. 12-13.