1-2. Mang l’agruw ban’en nrib ga’ fan u wan’ e Pi Mich Rok Jehovah?

L’AGRUW e deer nib ga’ fan ni bay e chiney nrib t’uf ni ngad gagiyelnaged e fulweg riy. Gal deer nem e bay rogon nga mat’awun e gagiyeg rok Got nge rogon ni ngan tayfan fithingan. Gadad e Pi Mich Rok Jehovah e ri gad baadag ni gad ma weliy murung’agen e gali n’ey. Machane gur, re n’ey ni ngan tayfan mat’awun e gagiyeg rok Got mu kun tayfan fithingan e l’agruw i ban’en ndariy rogon reb nga reb? Danga’.

² Gad gubin ni kad guyed nib t’uf ni ngan micheg nde riyul’ urngin ban’en ni ka nog nib togopuluw nga fithingan Got. Kud filed nthingar da micheged ni birok Got e gagiyeg e aram e bin th’abi fel’. Gali n’ey e l’agruw nib ga’ fan.

3. Mang e ba muun ko fare ngachal ni Jehovah?

³ Bin riyul’ riy e, fare ngachal ni Jehovah e ba muun ngay urngin ban’en u rarogon e Got rodad, ni kub muun ngay rogon e gagiyeg ni ma tay. Ere faanra dogned nrogon ni ngad micheged nde riyul’ urngin ban’en ni ka nog nib togopuluw nga fithingan Got e aram e bin th’abi ga’ fan e deer nib t’uf ni nge gagiyel e fulweg riy, maku aram e gad be yog ni kub t’uf ni ngan micheg ni birok Jehovah e gagiyeg e aram e bin th’abi fel’. Fithingan Jehovah e ba peth nga rogon e gagiyeg ni ma tay ni ir e En Th’abi Tolang u palpalth’ib ni gubin ma rayog rok.​—Mu guy fare kahol ni kenggin e “ Boch Ban’en u Rarogon Ba Deer Nrib Ga’ Fan.”

4. Mang e be yog e Psalm 135:13 u murung’agen fithingan Got? Mang boch e deer ni gad ra weliy e fulweg riy ko re article ney?

⁴ Rib ga’ fan fare ngachal ni Jehovah. (Mu beeg e Psalm 135:13. *) Mang nrib ga’ fan fithingan Got? Uw rogon ni ka nog boch ban’en nde riyul’ nib togopuluw nga fithingan Got aram ko tabolngin? Uw rogon ni ke tay Got fan e ngachal rok? Ma uw rogon ni ngad uned i tayfan fithingan? Ngad weliyed e fulweg ko pi deer ney.

5. Mang deer e rayog ni nge fith yugu boch e girdi’ u nap’an ni yad ra rung’ag nthingar da ted fan fithingan Got?

⁵ “Ngan tay fan fithingam nib thothup.” (Matt. 6:9) I yog Jesus ni ireray ban’en nrib ga’ fan ni ngaud uneged u lan e meybil rodad. Machane, mang e be yip’ fan e pi thin ney ni yog Jesus? Ra ngan tayfan ban’en ma be yip’ fan ni ngan thothupnag, ara ngan beechnag, ara ngan machalbognag. Ere rayog ni nge fith boch e girdi’ ni lungurad, ‘Gathi ba thothup, mab beech, mab machalbog fithingan Jehovah?’ Ra ngad nanged e fulweg ko re deer ney, mab t’uf ni ngad lemnaged e n’en nib muun nga fithingan be’.

6. Mang e n’en nra dugliy ko ba ga’ fan reb e ngachal fa danga’?

⁶ Fithingan be’ e gathi kemus ni bbugithin nrayog ni ngan yoloy nga babyor ara nga unog. Mu tay fanam i yan ko n’en be yog e Bible ni be gaar: “Faanra ngam dugliy e bin ni nge yog ngom, ko thim ni nge fel’ [“ngachal nib fel’,” NW] ara fel’ rogon ni ba ga’, ma thim ni nge fel’ [“ngachal nib fel’,” NW] e ngam dugliy nga daken.” (Prov. 22:1; Ekl. 7:1) Mang nib ga’ fan e ngachal ni kan pi’ ngak be’? Ya bay rogon nga thin ara rogon ni ma lemnag e girdi’ faen ni kan tunguy fare ngachal ngak. Ere gathi rogon ni kan yoloy reb e ngachal nga babyor ara rogon yima yog e aram e n’en nib ga’ fan, ya n’en nra lemnag e girdi’ u nap’an ni yad ra guy ara rrung’aged fare ngachal e aram e n’en nib ga’ fan.

7. Uw rogon ni ke guy e girdi’ rogon ni nga rogned boch ban’en nde riyul’ u murung’agen Got?

⁷ Nap’an nra yog e girdi’ boch ban’en nde riyul’ u murung’agen Jehovah, ma aram e yad be kirebnag thin. Nap’an nra guy e girdi’ boch ban’en nib kireb ni be buch, mab ga’ ni yad ma yon’ e kireb riy nga daken Got ma rogned boch ban’en nde riyul’ nib togopuluw ko ngachal rok. U lan fare milay’ nu Eden e aram e gin som’on ni yog be’ boch ban’en riy nde riyul’ u murung’agen Got. Me guy rogon ni nge k’aring e girdi’ ni ngar lemnaged boch ban’en nib kireb u murung’agen Got. Am lemnag e n’en rayog ni ngad filed ko re n’ey ni buch.

8. Mang e manang Adam nge Efa, ma mang deer e ke sum?

⁸ Manang Adam nge Efa fithingan Jehovah, maku yow manang boor ban’en u murung’agen nib ga’ fan mab riyul’. Yow manang ni ir e En Tasunmiy, nge En ke pi’ e yafos ngorow, nge fare Paradis nrib fel’ yaan ni ngar tafnayew, maku ir e ke m’ag e  mabgol rorow. (Gen. 1:26-28; 2:18) Machane gur, ra ur parew ni yow be lemnag urngin ban’en ni ke rin’ Jehovah ni fan ngorow, fa? Gur, ra ur guyew rogon ni nge gel feni t’uf Jehovah rorow me par nib ga’ fan u wan’row, fa? I gagiyel e fulweg riy u nap’an ni yib e toogor rok Got i skengnagrow.

9. Mang e yog Jehovah ngak e gal nsom’on e girdi’, ma uw rogon ni k’aringrow Satan ni ngar lemnagew boch ban’en nde puluw u murung’agen Jehovah nrogon ni bay ko Genesis 2:16, 17 nge 3:1-5?

⁹ Mu beeg e Genesis 2:16, 17 nge 3:1-5. I n’igin Satan ni nge m’ug ni gowa ba porchoyog e ir e be non, ma aram me fith e re deer ni baaray ngak Efa ni gaar: “Rriyul’ ni yog Got ngomew ni dab mu koyew wom’engin urngin e gek’iy ni ba’ ko gi woldug ney?” Ere fith Satan ba deer ni be weliy ban’en nde riyul’ u murung’agen Got, ma aram me tabab Efa ni nge lemnag boch ban’en nde puluw u murung’agen Got. Bin riyul’ riy e, yog Got ngorow nrayog ni ngar kew wom’engin urngin ken e gek’iy ni bay u rom, ma kemus ni taab ken e dab ra kew wom’engin. Dariy e maruwar riy ni boor ken e gek’iy nrayog ni nge kay Adam nge Efa wom’engin. (Gen. 2:9) Arrogon, riyul’ nib gol Jehovah. Machane, bay taab ken e gek’iy ni yog ngorow ndab ra kew wom’engin. Ere, rogon e deer ni fith Satan e k’aringrow ni ngar lemnagew boch ban’en nde puluw u murung’agen Jehovah. I n’igin Satan ni nge m’ug ni Got e ir be’ nde gol. Bochan e re n’ey ma sana rayog ni gaar Efa u wan’, ‘Gur, bay ban’en nib fel’ ni be tel Got rog?’

10. Uw rogon ni yog Satan boch ban’en nde riyul’ u murung’agen fithingan Got? Mang wenegan ni yib nga tomuren?

¹⁰ Nap’an ni fith Satan e re deer ney, ma ka be fol Efa rok Jehovah. Ere yog ngak Satan e n’en nib tamilang ni ke yog Got ngorow. Ngemu’ miki yog nsusun e dab ra mathgow ko re ke gek’iy nem. Manang ni ke yog Got ngorow ni faanra dab ra folgow ma yow ra yim’. Machane, me fulweg Satan ni gaar: “Gathi gimew ra yim’.” (Gen. 3:2-4) Ere nap’an ni yog Satan e re thin ney ma aram e gathi kemus ni be yog ni ke ban Jehovah, ya ku be yog boch ban’en nde riyul’ u murung’agen e ngachal rok Got. Bochan e re n’ey ma aram e be yog ngak Efa ni Jehovah e ir be’ nib malulfith l’igin. Aram e ngiyal’ ni mang Satan fare Moonyan’, ara be’ ni ma t’ar e thin nga daken be’. Ere kar ni bannag Efa ma aram me mich u wan’ e n’en ke yog Satan. (1 Tim. 2:14) I pagan’ Efa ngak Satan ko bin nge pagan’ ngak Jehovah. Re n’ey e momnag ngak Efa ni nge dugliy ban’en nrib gel e kireb riy. I dugliy ni nge dabki fol rok Jehovah. Ma aram me kay wom’engin fare ke gek’iy ni ke yog Jehovah ngak ndabi kay, ma nga tomuren miki pi’ boch ngak Adam miki kay.​—Gen. 3:6.

11. Mang e rayog ni nge rin’ Adam nge Efa, machane yugu aram rogom ma mang e de yag ni ngar rin’ew?

¹¹ Am lemnag e n’en nsusun e nge yog Efa ngak Satan. Mu susunnag ni ke gaar: “Dagnang ko gur mini’, machane gu manang Jehovah ni Chitamag, mab t’uf rog ma be pagan’ug ngak. Ir e en ke pi’ urngin e tin nib t’uf romow Adam. Ere gur mini’ ni nga mog e tinir e thin nib kireb u murung’agen? Mu chuw rog!” Dariy e maruwar riy nra felfelan’ Jehovah u nap’an nra rung’ag ni ke yog fak boch e thin ni aray rogon ni be dag ni be par nib yul’yul’! (Prov. 27:11) Machane de t’uf Jehovah rok Efa ma de yul’yul’ ngak, maku arrogon Adam. Bochan nde t’uf e Chitamangirow rorow, ma aram fan ndar michegew nde riyul’ e pi n’en ni yibe yog nib togopuluw nga fithingan e Chitamangirow.

12. Uw rogon ni k’aring Satan Efa ni nge maruwar boch ban’en u wan’? Mang e de yag ni nge rin’ Adam nge Efa?

¹² Ere ba tamilang ko n’en kad weliyed nsom’on e  tabab Satan ni nge k’aring Efa ni nge maruwar boch ban’en u wan’. I k’aring ni nge maruwar u wan’ rarogon e En be fek fare ngachal ni Jehovah. Bochan e re n’ey ma de yag ni nge micheg Adam nge Efa nde riyul’ e pi n’en be yog Satan nib togopuluw nga fithingan Jehovah. Ra momnagew ngorow ni ngar motoyilgow ngak Satan mar togopuluwgow ngak e Chitamangirow. Ku arrogon e n’en ma rin’ Satan e ngiyal’ ney. Ma yog boch ban’en nde riyul’ nib togopuluw nga fithingan Jehovah. Piin ma mich u wan’rad e pi ban rok Satan e ba mom ni ngar togopuluwgad nga rogon e gagiyeg rok Jehovah nib mat’aw.

13. Uw rogon ni be tamilangnag e Ezekiel 36:23 kenggin e machib ni bay u lan e Bible?

¹³ Gur, ke pag Jehovah ni nga unog boch ban’en nde riyul’ nib togopuluw nga fithingan nde rin’ ban’en ngay? Danga’! Bible ni ga’ngin e be weliy murung’agen e pi n’en ke rin’ Jehovah ya nge yag ni micheg nde riyul’ e pi n’en nib kireb ni kan weliy u murung’agen u Eden. (Gen. 3:15) Bin riyul’ riy e, rayog ni nga dogned ni kenggin e machib ni bay u lan e Bible e aram e: Be fanay Jehovah Gil’ilungun ni Fak e ir e pilung riy ni nge tayfan e ngachal rok me sulweg e gapas nge tin nib mat’aw ban’en nga fayleng. Be weliy e Bible boch ban’en ni be ayuwegdad ni ngad nanged rogon nra tay Jehovah fan e ngachal rok.​—Mu beeg e Ezekiel 36:23.

14. Uw rogon ni pi n’en ni rin’ Jehovah u tomuren fare togopuluw nni tay u Eden e be tayfan e ngachal rok?

¹⁴ Ke rin’ Satan urngin e tin rayog rok ya nge taleg Jehovah ndabi lebguy e n’en nib m’agan’ ngay. Machane gubin ngiyal’ nder yag rok Satan ni nge rin’ e re n’ey. Be weliy e Bible murung’agen e pi n’en ke rin’ Jehovah Got, ma re n’ey e be micheg ndariy be’ ni taareb rogorow. Riyul’ nrib gel e kireban’ ni ke tay Jehovah ni bochan e togopuluw ni ke tay Satan nge piin yad ba mang ngak. (Ps. 78:40) Machane, ke rin’ boch ban’en ni nge pithig e re magawon ney u reb e kanawo’ ni be m’ug riy nib gonop, mab gum’an’, mab mat’aw. Maku reb e, ku boor e kanawo’ ni ke dag riy feni gel gelngin. Ma bin th’abi ga’ fan riy e, ke dag e t’ufeg rok u fithik’ urngin e tin ma rin’. (1 John 4:8) Kab kafram i yib ni be maruwel Jehovah nib gel ya nge yag ni tayfan e ngachal rok.

15. Uw rogon ni be yog Satan boch ban’en nde riyul’ nib togopuluw nga fithingan Got e ngiyal’ ney? Mang wenegan ni ke yib riy?

¹⁵ Ke mada’ ko chiney ni ka be yog Satan boch ban’en nde riyul’ nib togopuluw nga fithingan Got. Ma guy rogon ni nge k’aring e girdi’ ni nge maruwar u wan’rad ni Got e ba gel gelngin, mab mat’aw, mab gonop, ma ma t’ufegey. Bod ni, ma guy Satan  rogon ni nge mich u wan’ e girdi’ ni gathi Jehovah e Ir e Ke Sunmiy urngin ban’en. Ma faanra bay boch e girdi’ nib mich u wan’rad nriyul’ ni bay Got, ma aram e ma guy Satan rogon ni nge k’aringrad ni ngar lemnaged ni Got nge pi motochiyel rok e ma taleg e girdi’ u boch ban’en maku de mat’aw. Ku ma fil ko girdi’ ni Jehovah e ir be’ nder ma runguyey ma ma urfiy e girdi’ u fithik’ e nifiy. Nap’an nra mich e pi ban ney u wan’ e girdi’, ma aram e ra mom ni ngar togopuluwgad nga rogon e gagiyeg rok Jehovah nib mat’aw. Satan e dabi tal i yog boch ban’en nde riyul’ u murung’agen Jehovah, maku dabi tal i guy rogon ni nge k’aringem ni ngam togopuluw ngak Got nge taw ko ngiyal’ ni kan thang. Machane gur, ra yib angin e tin be rin’?

16. Mang e rayog ni ngam rin’ nde yag rok Adam nge Efa ni ngar rin’ew?

¹⁶ Ku be pag Jehovah e girdi’ ndawor ra flontgad ni ngar uned i tayfan e ngachal rok. Ere aram fan nrayog ni ngam rin’ e n’en nde yag rok Adam nge Efa ni ngar rin’ew. Yugu aram rogon ni ga be par u ba fayleng ni ke sug e girdi’ riy ni yad ma yog boch ban’en nde riyul’ u murung’agen fithingan Jehovah maku yad be togopuluw ngay, machane ba mab e kanawo’ ngom nrayog ni ngam micheg nde riyul’ e pi n’ey, mag gagiyelnag ni ir reb e Got nib thothup, mab mat’aw, mab manigil, mab sug ko t’ufeg. (Isa. 29:23) Rayog ni ngam dag ni ga baadag ni ir e nge gagiyegnagem. Rayog ni ngam ayuweg e girdi’ ni nge tamilang u wan’rad ni kemus ni yigoo gagiyeg rok Jehovah e ba mat’aw ma rayog ni nge yibnag e gapas nge felfelan’ ko pi n’en ke sunmiy.​—Ps. 37:9, 37; 146:5, 6, 10.

17. Uw rogon ni i weliy Jesus fithingan e Chitamangin ngan nang?

¹⁷ Nap’an ni gad ra micheg nde riyul’ e pi n’en yibe yog nib togopuluw nga fithingan Jehovah, ma aram e gad be folwok rok Jesus Kristus. (John 17:26, NW) I weliy Jesus fithingan e Chitamangin ngan nang ni aram e gathi kemus ni i fanay e re ngachal nem, ya ku i fil ko girdi’ e bin riyul’ i rarogon Jehovah. Bod ni i togopuluw ko pi Farise ni bochan e yad ma weliy murung’agen Jehovah u boch e kanawo’ nra k’aring e girdi’ ni ngar lemnaged ni ir be’ nib kireb, ma der ma yan nga laniyan’ be’, ma dabiyog ni ngan chugur ngak, maku der ma runguyey. I ayuweg Jesus e girdi’ ni ngar nanged ni Chitamangin e ir be’ nib mat’aw e tin ma rin’, mab gum’an’, ma ma t’ufegey, ma ma n’ag fan e kireb u wan’. Ki ayuweg e girdi’ ni ngar nanged Jehovah u rogon ni i m’ug pi fel’ngin ko ngongol ni i dag u n’umngin nap’an e yafos rok.​—John 14:9.

18. Mang e rayog ni ngad rin’ed ya nge m’ug nde riyul’ e pi ban ni yima weliy u murung’agen Jehovah?

¹⁸ Rayog ni ngad weliyed e tin gad manang u murung’agen  Jehovah, ma gad fil ko girdi’ rarogon ni Ir reb e Got ni ma t’ufegey mab gol ni bod ni rin’ Jesus. Faan gad ra rin’ ni aray rogon, ma aram e rayog ni ngad micheged nde riyul’ e pi ban ni yima weliy u murung’agen Jehovah. Maku reb e, aram e gad be tayfan fithingan Jehovah ma gad be thothupnag u wan’ e girdi’ ngu gum’ircha’rad. Ku rayog ni ngad folwokgad rok Jehovah. Re n’ey e ban’en nrayog ni ngad rin’ed ni yugu aram rogon ndawor da flontgad. (Efe. 5:1, 2) Faanra ud daged ko girdi’ e bin riyul’ i rarogon Jehovah u daken e thin nge ngongol rodad, ma aram e gad be un i tayfan fithingan. Gad be micheg nde riyul’ e pi n’en ka nog nib togopuluw ko re ngachal nem ni aram e gad be ayuweg e girdi’ ni ngar nanged e tin riyul’ u murung’agen Got. * Ku gad be micheg ni mus ko girdi’ ndawor ra flontgad ma rayog ni ngar pared ni yad ba yul’yul’.​—Job. 27:5.

19. Uw rogon ni be ayuwegdad e Isaiah 63:7 ni ngad nanged e n’en ni ir e ngad nameged u nap’an ni gad be fil e tin riyul’ ko girdi’?

¹⁹ Ku bay reb e ban’en nrayog ni ngad rin’ed ya nge yag nda ted fan fithingan Jehovah. Nap’an ni gad ra fil e tin riyul’ ko girdi’ ni bay u Bible, mab ga’ ni gad ma tamilangnag ngorad mat’awun e gagiyeg rok Jehovah, ma gad ma yog ni ir e bay mat’awun ni nge gagiyegnag e palpalth’ib. Rib puluw e re n’ey ni gad ma rin’. Machane, yugu aram rogon nib ga’ fan ni ngad filed e pi motochiyel rok Got ko girdi’, ma n’en nri gad be nameg e aram e ngad ayuweged e girdi’ ni nge t’uf Jehovah rorad ni ir e Chitamangidad, mar yul’yul’gad ngak. Aram fan nib t’uf ni ngad tamilangnaged murung’agen pi fel’ngin Jehovah nrib manigil, ma gad tamilangnag rarogon e En be fek fare ngachal ni Jehovah. (Mu beeg e Isaiah 63:7.) Faan gad ra fil e tin riyul’ ni aray rogon, ma aram e rayog ni ngad ayuweged e girdi’ ni nge t’uf Jehovah rorad mar folgad rok ni bochan e yad baadag ni ngar pared ni yad ba yul’yul’ ngak.

20. Mang e gad ra weliy ko bin migid e article?

²⁰ Ere uw rogon ni ngad ngongolgad ma gad fil e tin riyul’ ko girdi’ u reb e kanawo’ nra k’aringrad ni ngar lemnaged e tin nib fel’ ban’en u murung’agen Jehovah mar adaged ni ngar chugurgad ngak? Gad ra weliy e fulweg ko re deer ney ko bin migid e article.