1. Mang e rayog ni nge rin’ Jehovah ya nge yag ni lebguy e n’en nib m’agan’ ngay?

RAYOG rok Jehovah ni nge mang e n’en nib t’uf ni nge mang ya nge lebguy e n’en nib m’agan’ ngay. Bod nrayog ni nge mang Sensey, nge En Ma Fal’eg Lanin’uy, nge reb e Tamachib. Ireray in ban’en u fithik’ urngin e pi n’en rayog ni nge mang. (Isa. 48:17; Isa. 66:13; Gal. 3:8) Yugu aram rogon, mab ga’ ni ma fanay e girdi’ ni ngar lebguyed e tin nib m’agan’ ngay. (Matt. 24:14; 28:19, 20; 2 Kor. 1:3, 4) Demtrug bagadad nrayog ni nge pi’ Jehovah e gonop ngak nge gelngin ya nge yag ni mang e n’en nib t’uf ni nge mang ni fan e nge lebguy e n’en nib m’agan’ Jehovah ngay. Gubin e pi n’ey nib muun nga fan fare ngachal ni Jehovah, nrogon ni ke yog boch e girdi’ ni boor ban’en ni yad manang.

2. (a) Mang fan nrayog ni nga i maruwar lanin’dad yu ngiyal’ ko rriyul’ ni be fanaydad Jehovah fa danga’? (b) Mang e gad ra weliy ko re article ney?

² Gad gubin ni gad baadag ni nge fanaydad Jehovah ni ngad rin’ed e n’en nib m’agan’ ngay. Machane, sana bay boch i gadad ni be maruwar u wan’rad ko rriyul’ ni be fanayrad Jehovah fa danga’. Mang fan? Bochan e bay boch i gadad ni be lemnag ni boor ban’en ndabiyog ni nge rin’ ni bochan yangaren, ara rarogon e par rok, ara tin rayog rok. Maku reb e, bay boch i gadad nsana ke gaman u wan’ e tin be rin’ ma dakir lemnag nib t’uf ni ngki yoornag boch e tin be rin’. Re article ney e gad ra weliy riy rogon nrayog rok Jehovah ni nge pi’ e n’en nib t’uf ni nge pi’ ngodad ya nge yag nda lebguyed e n’en nib m’agan’ ngay. Ku gad ra weliy murung’agen boch e pumoon nge ppin u Bible ni yad boch e tapigpig rok Jehovah ni pi’ gelngirad me pingeg lanin’rad ya ngar adaged ni ngar rin’ed e tin nib m’agan’ ngay. Ma bin tomur e gad ra weliy rogon nrayog ni ngad paged Jehovah ni nge fanaydad.

3. Uw rogon nrayog ni nge ayuwegdad Jehovah ni ngad adaged ni ngad rin’ed e tin nib m’agan’ ngay nrogon nib puluw ko Filippi 2:13?

³ Mu beeg e Filippi 2:13. * Rayog ni nge ayuwegdad Jehovah ni ngad adaged ni ngad rin’ed e tin nib m’agan’ ngay. Uw rogon nrayog ni nge rin’ e re n’ey? Sana rayog ni kad rung’aged ni bay reb e maruwel u lan e ulung nib t’uf e ayuw riy. Fa reb e ke beeg e piilal bang e babyor u nap’an e muulung ni ke yib ko branch ofis ni be yog nib t’uf e ayuw u yugu reb e binaw ara nam. Ere sana rayog ni ngad fithed gadad ni nge lungudad, ‘Uw rogon nrayog ni nggu pi’ e ayuw?’ Fa reb e sana ka nog ngodad ni ngad rin’ed reb e maruwel nib mo’maw’, machane dad nanged ko rayog rodad fa dabiyog. Fa reb e tomuren ni kad beeged bang u lan e Bible, ma sana rayog ni nge lungudad u wan’dad, ‘Uw rogon ni nggu fol ko re thin nu Bible ney ya nge yag nug ayuweg yugu boch e girdi’?’ Dabi towasariydad Jehovah ni ngad rin’ed ban’en. Machane faanra guy ni gad be lemnag murung’agen e tin rayog ni ngad rin’ed, ma aram e rayog ni nge ayuwegdad ni ngad adaged ni ngad rin’ed fapi n’em.

4. Uw rogon nrayog ni nge pi’ Jehovah gelngidad ni ngad rin’ed e tin nib m’agan’ ngay?

⁴ Rayog ni nge pi’ Jehovah gelngidad ni ngad rin’ed e tin nib m’agan’ ngay. (Isa. 40:29) Rayog ni nge pi’ gelngin nib thothup ngodad ya nge yag nda mon’ognaged e pi salap rodad. (Ex. 35:30-35) Rayog ni nge fanay Jehovah e ulung rok ni nge fil ngodad rogon ni ngad rin’ed ba mit e maruwel. Ere faanra gathi ri ga manang rogon ni ngam rin’ reb e maruwel ni kan pi’ ngom, mag ning e ayuw. Maku reb e, demtrug e ngiyal’ nrayog ni ngam wenig ngak e Chitamangidad ni bay u tharmiy ni nge pi’ fare gelngin ngom ni “ir e ba th’abi gel.” (2 Kor. 4:7; Luke 11:13) Boor e pumoon nge ppin ni be weliy e Bible murung’agen ni pi’ Jehovah gelngirad me piningeg lanin’rad ya ngar adaged ni ngar rin’ed e tin nib m’agan’ ngay. Nap’an ni gad be weliy murung’agen boch e pi girdi’ ney, mag lemnag boch e kanawo’ nrayog ni nge fanayem Jehovah riy ni ngam rin’ boch ban’en ni bod e pi girdi’ ney.

5. Mang e kad filed u rogon ni fanay Jehovah Moses ni nge chuweg e girdi’ rok ko gafgow nge ngiyal’ ni rin’ e re n’ey riy?

⁵ I k’aring Jehovah Moses ni nge mang e en ni nge chuweg piyu Israel u fithik’ e gafgow. Machane mingiyal’ e fanay Jehovah Moses? Gur, i fanay Moses ko ngiyal’ ni be lemnag ni aram e ke bung rogon nrayog ni nge rin’ boch ban’en u tomuren ni kan “fil ngak urngin e llowan’ rok yu Egypt”? (Acts 7:22-25) Danga’, ya fin u tomuren ni ke ayuweg Jehovah Moses ni nge mang be’ nib sobut’an’ mab sumunguy e fin aram e ngiyal’ ni fanay ni nge rin’ boch e maruwel. (Acts 7:30, 34-36) I gelnag Jehovah laniyan’ Moses ni nge dabi rus ya nge yag ni yan i sak’iy nga p’eowchen e bin th’abi ga’ lungun e pilung u Egypt. (Ex. 9:13-19) Ere mang e gad be fil u rogon ni fanay Jehovah Moses nge ngiyal’ ni rin’ riy? Gad be fil riy ni ma fanay Jehovah e piin ma m’ug fel’ngin rorad maku yad ma taga’ ngak ni nge pi’ gelngirad.

6. Mang e gad be fil u rogon ni fanay Jehovah Barzillai ni nge ayuweg David ni Pilung?

⁶ Boch e chibog nga tomuren, me fanay Jehovah Barzillai ni nge ayuweg David ni Pilung. Nap’an ni be mil David nge boch e girdi’ ni kar uned ngak rok Absalom ni fak, ma bay ba ngiyal’ nra magargad nib gel me “yib e bilig nge belel” ngorad. Ma Barzillai nreb e pumoon ni ke pilibthir nge boch e girdi’ e ra ted e yafos rorad nga thatharen e riya’ ni ngar pied e tin nib t’uf rok David nge fapi girdi’ ni yad be un ngak. De lemnag Barzillai ndabkiyog ni nge maruwel Jehovah ngak ni bochan e ke pilibthir. Ya bin riyul’ riy e, fanay e tin bay rok ni nge ayuweg boch e tapigpig rok Got ni ke t’uf e ayuw rorad. (2 Sam. 17:27-29) Mang e gad be fil ko re n’ey? Demtrug yangardad, ma rayog ni nge fanaydad Jehovah ni ngad pied e tin nib t’uf rok pi walagdad ni  ke t’uf ni ngan ayuwegrad u boch ban’en nib t’uf ko par rorad. Pi cha’ney e demtrug ko pi walagdad ko gin gad ma par riy ara pi walag u yugu reb e nam. (Prov. 3:27, 28; 19:17) Mus ni faanra dabiyog ni nga darod ko gin yad bay riy ngad ayuweged yad, machane rayog ni ngad pied boch e salpiy ni fan ko maruwel rodad ni yibe rin’ u ga’ngin yang e fayleng ya nge yag nni fanay ni ngan ayuweg e pi walag ko ngiyal’ ni ke t’uf e ayuw rorad nge gin’en ni ke t’uf e ayuw riy.​—2 Kor. 8:14, 15; 9:11.

7. Uw rogon ni fanay Jehovah Simeon, ma mang fan nra pi’ e re n’ey e athamgil nga lanin’dad?

⁷ I micheg Jehovah ngak Simeon nreb e pumoon ni ke pilibthir u Jerusalem nib yul’yul’ nra guy fare Messiah u m’on ni nge yim’. Dariy e maruwar riy nri pi’ e pi thin ney e athamgil nga laniyan’ Simeon ni bochan e ke yoor e duw ni be sonnag fare Messiah. Ni tow’athnag ni bochan e michan’ nge k’adan’ ni tay. Faani reb e rran me yib gelngin Got nib thothup i “pow’iy” Simeon nge yan nga lan e tempel. Ma aram me guy fare tir i Jesus, me fanay Jehovah Simeon ni nge yiiynag boch e thin u murung’agen e chi tir ney ni ir e ra mang Kristus. (Luke 2:25-35) Yugu aram rogon nsana yim’ Simeon u m’on ni nge tabab Jesus ko machib u fayleng, machane ri felfelan’ ko binem e tow’ath nni pi’ ngak, maku boor e tow’ath nra yag ngak boch nga m’on! U lan e bin nib beech e fayleng e ra guy e re pumoon ney nib yul’yul’ rogon ni yira tow’athnag e girdi’ u fayleng u tan e gagiyeg rok Jesus. (Acts 3:25) Ku arrogodad ni gad ma pining e magar ngak Jehovah u rogon ni ma fanaydad ni ngad rin’ed e tin nib m’agan’ ngay.

8. Uw rogon nrayog ni nge fanaydad Jehovah ni bod rogon ni fanay Barnabas?

⁸ Nap’an e bin som’on e chibog C.E., ma immoy reb e pumoon nib gol ni ka nog Josef ngak ni pag Jehovah ni nge maruwel ngak. (Acts 4:36, 37) Dabisiy ni bochan ni manang e re walag ney rogon ni nga i fal’eg laniyan’ yugu boch e girdi’, ma aram fan ni tunguy e pi apostal Barnabas ngak ni fan e re ngachal nem e “Be’ ni ma Pi’ e Athamgil nga Lanin’uy.” Bod nu tomuren ni mang Saul reb e Kristiano, ma boor e walag ni ur rusgad ni ngar nonad ngak ni bochan e goo yimanang ni ir be’ ni i gafgownag e ulung kafram. Yugu aram rogon me fal’eg Barnabas laniyan’ Saul miki ayuweg, ma dariy e maruwar riy nrib ga’ fan u wan’ Saul e n’en ni rin’ Barnabas ni fan ngak. (Acts 9:21, 26-28) Boch nga tomuren, me guy e piin piilal u Jerusalem nib t’uf ni ngan pi’ e athamgil nga laniyan’ e pi walag u Antiok ni bay u lan yu Syria. Ere mini’ e ra pied ni nge yan? Barnabas! Ma rib fel’ e en nra mel’eged ni ngar pied. Be yog e Bible ni tabab Barnabas i “tay ir ngorad ni yad gubin ni nguur pired ni yad ba yul’yul’ ma yad mmudugil ngak Somol u polo’ i lanin’rad.” (Acts 11:22-24) Ku arrogon e ngiyal’ ney nrayog ni nge ayuwegdad Jehovah ni ngkud manged be’ ni ma pi’ e athamgil nga lanin’uy ya nge yag ni ud pied e athamgil nga laniyan’ pi walagdad. Bod nrayog ni nge fanaydad ni ngad fal’eged laniyan’ e piin ke yim’ be’ nib t’uf rorad. Fa reb e rayog ni nge pow’iydad ni nga darod da guyed ara da callnaged be’ ni ke m’ar ara ke kireban’ ni ngad pied e athamgil nga laniyan’. Ere gur, ga ra pag Jehovah ni nge fanayem ni bod rogon ni fanay Barnabas, fa?​—1 Thess. 5:14.

9. Mang e rayog ni ngad filed u rogon ni ayuweg Jehovah reb e walag ni pumoon ni ka nog Vasily ngak ya nge yag ni rin’ e maruwel rok nib fel’ rogon ni ir reb e piilal?

⁹ I ayuweg Jehovah reb e walag ni pumoon ni ka nog Vasily ngak ya nge yag ni rin’ e maruwel rok nib fel’ rogon ni ir reb e piilal. Nap’an nni mel’eg Vasily ni nge mang reb e piilal u nap’an ni ke gaman 26 e duw rok, me rus ni bochan e be lemnag ndawori bung rogon ni nge ayuweg e ulung ko tirok Got ban’en, nib ga’ ni piin yad be mada’nag boch e magawon. Yugu aram rogon ma boor ban’en ni fil rok boch e walag ni pumoon ni ke n’uw nap’an ni kar manged piilal nge fare skul ni ka nog e Kingdom Ministry School ngay. Ba gel e athamgil ni tay Vasily ya nge yag ni mon’og. Bod ni yoloy boch ban’en nga but’ nde mo’maw’ ni nge nameg. Nap’an ni yag ni nge rin’ reb nge reb e pi n’ey, ma aram me munmun me yag ni nge gel boch e pagan’ rok. Chiney e ma yog ni ma gaar: “Pi n’en ni ug rus ngay kafram e ma yibnag e felfelan’ ngog e chiney. Nap’an nra ayuwegeg Jehovah ni nggu pirieg e bin nib puluw e thin nu Bible ni nggu fanay ni nggu fal’eg laniyan’ reb e walag ngay u lan e ulung, ma rib gel e felfelan’  ni gu ma tay.” Pi walag ni pumoon, faan gimed ra folwok rok Vasily me m’agan’med ngay ni ngam paged Jehovah ni nge maruwel ngomed, ma aram e rayog ni nge ayuwegmed ni ngam rin’ed boch e maruwel ni boor u lan e ulung.

10. Mang e rin’ Abigail, ma mang e gad be fil ko n’en ni rin’?

¹⁰ Be lol’og Saul ni Pilung David nge piin kar uned ngak, mab t’uf e ayuw rorad. Ere ning David buchuuw e ggan ngak be’ nib moon u Israel nib fel’ rogon ni ka nog Nabal ngak. Ra lemnaged nrayog ni ngar ninged e ggan ngak ni bochan e ka ur ayuweged e saf rok u daken e ted. Machane cha’ney i Nabal e ir be’ ni yigoo ir e ma lemnag ir, ere yog ndabi pi’ ban’en ngorad. Ri damumuw David me lemnag ni nge thang e fan rok Nabal nge urngin e pumoon u lan e tabinaw rok. (1 Sam. 25:3-13, 22) Machane Abigail ni be’ nib pin nrib pidorang ni leengin Nabal e ir be’ nrib gonop. I gelnag laniyan’ ndabi rus me yan i paraw nga daken e but’ u puluwon rifrifen ay David, me wenig ngak ndabi sulweg taban e kireb ni ke rin’ Nabal ngak. I yog ngak u fithik’ e sumunguy ni nge pag fan urngin ban’en ngak Jehovah. Ri taw nga gum’irchaen David e thin ni yog Abigail ngak u fithik’ e sobut’an’ nge rogon ni ngongol u fithik’ e gonop. Ma aram me tamilang u wan’ ni Jehovah e ir e ke pi’ Abigail ni nge ayuweg. (1 Sam. 25:23-28, 32-34) Bochan e pi fel’ngin ni ke maruweliy Abigail ni nge yag ngak, ma aram me yag ni nge fanay Jehovah ni nge rin’ e tin nib m’agan’ ngay. Ku arrogon e pi walag nib pin ni faan yad ra guy rogon ni nge yag e gonop ngorad, ma aram e rayog ni nge fanayrad Jehovah ni ngar pied e athamgil nga laniyan’ chon e tabinaw rorad nge boch e walag u lan e ulung.​—Prov. 24:3; Titus 2:3-5.

11. Mang e rin’ fapi rugod ni fak Shallum? Mini’ e piin be folwok rorad e ngiyal’ ney?

¹¹ Boor e chibog nga tomuren, ma fapi rugod ni fak Shallum e yad boch e piin ni fanayrad Jehovah ni ngar uned i ngongliy fare yoror nu Jerusalem. (Neh. 2:20; 3:12) Yugu aram rogon ni chitamangirad e ir e ma yog e thin, machane ba m’agan’rad ngay ni ngar rin’ed e re maruwel nem nib mo’maw’ mab gel e riya’ riy. (Neh. 4:15-18) Rib thil e n’en nrin’ed ko n’en ni rin’ fapi pumoon nu Tekoa ni yad ma gagiyeg nra siyeged ni ngar sobut’naged yad “ngar ngongliyed e maruwel nib gel.” (Neh. 3:5, BT) Am lemnag gelngin e felfelan’ ni tay fapi rugod ni fak Shallum u nap’an ni m’ay e re maruwel nem u lan 52 e rran! (Neh. 6:15) Ngiyal’ ney e pi walag nib pin nib m’agan’rad ngay ni nge fanayrad Got e yad ba felfelan’ ngay ni ngar rin’ed boch e maruwel ni fan ngak Got ni yugu ba thil, ni bod rogon e dimow naun ara ngan ayuweg boch e naun rodad nib milfan ngak Jehovah. Rib t’uf e ayuw ko pi walag nib pin ney ni yad ba salap ko maruwel, ma yad ba pasig, maku yad ba yul’yul’.

12. Uw rogon nrayog ni nge fanaydad Jehovah ni bod ni fanay Tabitha?

¹² I k’aring Jehovah Tabitha ni nge “par ni tin nib fel’ e be rin’ ma be ayuweg e piin ni gafgow,” nib ga’ ni piin ni kem’ figirngirad. (Acts 9:36) Bochan ni ir be’ nrib gol mab sumunguy, ma aram fan nri boor e girdi’ ni kireban’ u nap’an ni yim’. Machane rib gel e felfelan’ nra ted u nap’an ni faseg apostal Peter e re ppin ney ko yam’. (Acts 9:39-41) Ere mang e kad filed rok Tabitha? Demtrug ko ka gad bbitir ara kad pilibthirgad, fa gad reb e pumoon ara ppin, ma rayog ni ngad rin’ed boch ban’en ni ngad ayuweged pi walagdad.​—Heb. 13:16.

13. Uw rogon ni fanay Jehovah reb e walag nib pin nib tamra’ ni ka nog Ruth ngak? Mang e yog e re walag ney?

¹³ Immoy reb e walag nib pin nib tamra’ ni ka nog Ruth ngak ni baadag ni nge mang reb e missionary. Nap’an ni kab bitir mab ga’ ni ma gurnag ir ni nge yan u reb e tabinaw nga reb ni be pi’ boch e tract. I yog ni gaar: “Rug ma felfelan’ ni nggu rin’ e re maruwel ney.” Yugu aram rogon mab mo’maw’ ngak ni nge machib u mit e tabinaw ara nge weliy ko girdi’ murung’agen Gil’ilungun Got. Yugu aram rogon ni ir be’ nib tamra’ me yag ni nge un ko regular pioneer u nap’an ni ke gaman 18 e duw rok. Nap’an e duw ni 1946, me un ko fare skul ni ka nog e Watchtower Bible School of Gilead ngay, ma tomuren ma aram me pigpig u Hawaii ngu Sapan. I fanay Jehovah e re  walag ney ni nge rin’ boor ban’en ni fan ko fare maruwel ni machib. Tomuren 80 e duw ni ke machib Ruth riy, me yog ni gaar: “Kab kafram i yib ni ma pi’ Jehovah gelngig. Ir e ke ayuwegeg ke yag ni nggu gel ko tamra’ rog. Rib mich u wan’ug ndemtrug be’ nra pagan’ ngak Jehovah ma rayog ni nge fanay faanem ni nge rin’ e tin nib m’agan’ ngay.”

14. Mang e thingar da rin’ed ni faanra nge yag ni maruwel Jehovah ngodad nrogon nib puluw ko Kolose 1:29?

¹⁴ Kab kafram i yib ni ma fanay Jehovah e pi tapigpig rok u boor e kanawo’. Ere mang e ra k’aringem ni ngam mang? Re n’ey e be yan u rogon gelngin fanam adag ni ngam maruwel nib gel. (Mu beeg e Kolose 1:29. *) Faan ga ra pagem ni nge maruwel Jehovah ngom, ma aram e rayog ni nge k’aringem ni ngam mang reb e tamachib nib pasig ko machib, ara reb e sensey nib manigil, ara be’ ni manang rogon ni nge fal’eg lanin’uy, ara be’ nib salap ko maruwel, ara reb e fager ni ma ayuwegey, ara ngam mang e n’en nib t’uf rok Jehovah ya nge yag ni lebguy e n’en nib m’agan’ ngay.

15. Mang e ba t’uf ni nge wenig e pi walag ni kab pagel ngak Jehovah ni nge ayuwegrad ngar rin’ed nrogon ni bay ko 1 Timothy 4:12, 15?

¹⁵ Ere uw rogomed e pi walag ni ki gimed ba pagel? Rib t’uf boch e walag ni pumoon ni ka yad ba gel ni ngar manged boch e ministerial servant ni ngar ayuweged e ulung. Boor e ulung ni boor e piilal riy ma buchuuw e ministerial servant. Ere rayog rok boch i gimed ni nge guy rogon ni nge adag ni ngki yoornag boch e maruwel ni be un i rin’ u lan e ulung, fa? Bay yu ngiyal’ ni ma gaar boch e walag ni pumoon, “Gu baadag ni kemus ni gu be pigpig ni gag reb e publisher.” Faanra aray rogon e lem rom, mag wenig ngak Jehovah ni nge ayuwegem ya nge yag nim adag ni ngam maruweliy e tin nib t’uf ni ngam maruweliy nge yag nim mang reb e ministerial servant, miki pi’ gelngim nge yag nim rin’ e tin rayog rom ni fan ko pigpig rom ngak. (Ekl. 12:1) Rib t’uf e ayuw rom!​—Mu beeg e 1 Timothy 4:12, 15.

16. Mang e susun ni nga dogned ngak Jehovah ni nge ayuwegdad riy, ma mang fan?

¹⁶ Rayog ni nge k’aringem Jehovah ni ngam mang e n’en nib t’uf ni ngam mang ya nge yag ni lebguy e tin nib m’agan’ ngay. Ere mog ngak ni nge ayuwegem ngam adag ni ngam rin’ e maruwel rok, mu ku mog ngak ni nge pi’ gelngim ya nge yag nim rin’ e re n’ey. Demtrug ko kab fel’ yangarem ara kam pilibthir, ma ngam fanay e tayim rom, nge gelngim, nge tin bay rom ban’en ya nge yag nim n’uf Jehovah e chiney. (Ekl. 9:10) Nap’an nra mab e kanawo’ ngom nrayog ni ngkum yoornag boch ban’en ni ga be rin’ ni fan ko pigpig rom ngak Jehovah, ma dab mu gur ngam siyeg ni bochan e ga be lemnag ndabiyog rom. Ri gad ba tow’ath nrayog ni ngad rin’ed e tin rayog rodad ni ngad pininged e sorok ngak e Chitamangidad ni gad ba t’uf rok ni ir e en bay rogon ni ngan pining e sorok ngak!