1. Mang e yog Jesus ngak aningeg i pumoon ni yad bogi tafita’, ma mang e rrin’ed?

PETER, nge Andrew, nge James, nge John ni yad boch i gachalpen Jesus e ur moyed ni yad bogi girdien e fita’ ni yad ma fita’ ngaur pied nchuway’. Mu susunnag gelngin nra gingad u nap’an rung’aged ni ke gaar Jesus: ‘Mu uned ngog, mu gu fil ngomed rogon i yognag e girdi’.’ * Ere mang e rrin’ed? Be gaar e Bible: ‘Ka chingiyal’ nem mi yad digey e nug rorad ngar uned ngak.’ (Matt. 4:18-22) N’en nra dugliyed ni ngar rin’ed e ri thilyeg rogon e par rorad ndaki sul nga rogon ni immoy kafram. Chiney e aram e ‘bay ur yognaged e girdi’’ ko bin ngaur fita’gad ni ngaur koled e nig. (Luke 5:10) Ku aray e n’en be yog Jesus ngak e piin nib fel’ gum’ircha’rad mab t’uf e tin riyul’ rorad e ngiyal’ ney. (Matt. 28:19, 20) Ere ke m’agan’um ko n’en be yog Jesus ma ga be un i yognag e girdi’, fa?

2. U m’on ni ngad dugliyed ni ngad uned i yognag e girdi’, ma mang fan ni ngad fal’eged i lemnag e re n’ey? Mang e ra ayuwegdad ni ngad rin’ed e re n’ey?

² Sana ga be mon’og ko fol Bible ni ga be un ngay, ma ke taw nga nap’an ni ngam dugliy ko ga baadag ni ngam mang reb e tamachib ni ngam un i machibnag fare thin nib fel’ fa danga’. Faanra ka be maruwar e tafinay rom ko ngam fol ko n’en ni yog Jesus fa danga’, ma dabi mulan’um. Ya rayog nsana ka be maruwar e tafinay rom ni bochan e ga manang feni ga’ fan e re n’ey ni ga ra dugliy ni ngam rin’. Riyul’, ya be yog e Bible ni Peter nge fapi pumoon ni yad e “ka chingiyal’ nem” mar digeyed e nug rorad. Machane, gathi yugu ra dugliyed ban’en ndar lemgad u m’on riy. Ya ba pag nel’ e pul u m’on riy mar nanged miki  m’agan’rad ngay ni Jesus e ir fare Messiah. (John 1:35-42) Ku arrogom nsana boor ban’en ni kam fil u murung’agen Jehovah nge Jesus, ma ga baadag ni ngam ulul ni ngam mon’og ko tirok Got ban’en. Machane susun e dab mu dugliy ni ngam un ko machib ndawor mu fal’eg i lemnag u m’on riy. Ere mang e ayuweg Peter, nge Andrew, nge yugu boch e girdi’ ni ngar dugliyed ni ngar rin’ed e re n’ey?

3. Mang boch e fel’ngin nra k’aringem ni ngam adag ni ngam fol ko fapi thin ni yog Jesus?

³ Tin som’on i gachalpen Jesus e yad baadag ni ngar rin’ed e maruwel ni kan ognag ngorad, ma ri yad manang rogon ni ngar rin’ed e maruwel rorad nib fel’ rogon, maku darur rusgad, ma kar filed rogon ni ngar rin’ed boch ban’en nib mo’maw’ ngorad. Dariy e maruwar riy ni ku ireray e pi fel’ngin ni ayuwegrad ni ngar salapgad i yognag e girdi’. Re article ney e ra weliy rogon nrayog ni ngam maruweliy e pi fel’ngin ney ya nge yag nim salap u rogon ni ngam yognag e girdi’ ni ngar manged boch i gachalpen Kristus.

4. Mang e k’aring Peter ni nge mang reb e tafita’?

⁴ Peter e ma fita’ ya nge yag ni yognag e tin nib t’uf ko tabinaw rok. Machane gathi kemus ni ma fita’ ni bochan e aram e maruwel rok. Ya ri baadag Peter ni ma fita’. (John 21:3, 9-15) Maku reb e, ki fil rogon ni nge adag ni nge un i yognag e girdi’. Ma bochan e ayuw rok Jehovah, ma aram miki salap Peter i rin’ e binem e maruwel.​—Acts 2:14, 41.

5. Mang fan ni i rus Peter nrogon ni bay ko Luke 5:8-11? Mang e rayog ni nge ayuwegdad ni ngad gelgad ko tiney e lem?

⁵ Gad ma machib ni bochan e ba t’uf Jehovah rodad. Aram e bin th’abi ga’ i fan ni gad ma rin’ e re maruwel ney. T’ufeg rodad ngak Jehovah e rayog ni nge ayuwegdad ni nge dab kud lemnaged ndabi bung rogodad ko biney e maruwel. Nap’an ni pining Jesus Peter ni nge un ngak i yognag e girdi’, me gaar ngak: “Dab mu tamdag.” (Mu beeg e Luke 5:8-11.) Gathi be rus Peter ko n’en nra buch rok ni  faanra mang reb i gachalpen Jesus, ya ke ngat nga urngin e nig nra koled ni bochan e ayuwegrad Jesus, ma be lemnag ndabi bung rogon ni ngar maruwelgow Jesus u taabang. Ere rayog ni be magafan’um nga urngin ban’en ni bay nthingar mu rin’ ya nge yag nim mang reb i gachalpen Kristus. Faanra aram rogon e lem rom, mag guy rogon ni ngari t’uf Jehovah, nge Jesus rom, nge en nib migid ngom. Faan ga ra rin’ ni aray rogon, ma aram e ga ra adag ni ngam fol ko n’en ni yog Jesus ni aram e ngam un i yognag e girdi’.​—Matt. 22:37, 39; John 14:15.

6. Ku mang boch i fan ni gad baadag ni ngad machibgad?

⁶ Kum lemnag boch i fan ni gad baadag ni ngad machibgad. Gad baadag ni ngad folgad ko fare thin ni yog Jesus ni faani gaar: “Mmarod ngak girdien e pi nam . . . ngam pingeged yad ngar manged pi gachalpeg.” (Matt. 28:19, 20) Ku gad ma machib ni bochan e ke par e girdi’ ni “ke magafan’rad ndar nanged e n’en ni ngar rin’ed,” ma rib t’uf ni ngar nanged e tin riyul’ u murung’agen Gil’ilungun Got. (Matt. 9:36) Baadag Jehovah ni nge nang urngin mit e girdi’ e tin riyul’ me yag e yafos ngorad.​—1 Tim. 2:4.

7. Uw rogon ni be dag e Roma 10:13-15 nib ga’ fan fare maruwel ni machib?

⁷ Nap’an ni gad ra lemnag rogon nrayog ni nge ayuweg e re maruwel ni machib ney e girdi’ ni nge yag e yafos ngorad, ma ra k’aringdad ni ngad adaged ni ngad machibgad. Gad ba thil ko pi tafita’ ni yad ma pi’ e nig ni kar koled nchuway’ ara ra ked, ya gadad e gad be “yognag” e girdi’ ni bochan e ngad ayuweged e yafos rorad.​—Mu beeg e Roma 10:13-15; 1 Tim. 4:16.

8-9. Mang e thingari nang reb e tafita’, ma mang fan?

⁸ Be’ nu Israel ni ma fita’ u nap’an Jesus e thingari nang e re miti nig nrayog ni nge kol. (Lev. 11:9-12) Ku thingari nang e gin nrayog ni nge pirieg e nig riy. Ba ga’ ni ma par e nig ko gin yad baadag rogon e ran riy maku boor e ggan riy. Ere gur, ba ga’ fan e ngiyal’ ni nge yan fare tafita’ ko fita’, fa? Mu tay fanam i yan ko n’en ni yog reb e Pi Mich ni ma par u reb e donguch e lan e Pacific u nap’an ni pining reb e missionary ni nge un ngak ko fita’, ya nge yag nim nang e ngiyal’ nib fel’ ni ngan yan ko fita’. I gaar fare missionary, “Bayi mereb e kolok ni kakadbul mu gub gguyem.” Me gaar fare walag ni pumoon ngak, “Dawori tamilang e re n’ey u wan’um. Gamad e gamad ma yan ko fita’ ko ngiyal’ nib fel’ ni ngan kol e nig riy. Gathi gamad ma yan ko ngiyal’ ni gamad baadag.”

⁹ Ku arrogon pi gachalpen Jesus kakrom nra manged boch e piin ma yognag e girdi’ ni u ranod ko gin bay e girdi’ riy nge ngiyal’ nrayog ni ngar pirieged e girdi’ ko yungi n’em. Bod ni, yad ma machib u tempel, nge tagil’ e muulung, ngu mit e tabinaw, nge gin yima pi’ boch ban’en riy nchuway’. (Acts 5:42; 17:17; 18:4) Ku arrogodad nib t’uf ni ngad nanged e ngiyal’ ni gad ra pirieg e girdi’ ko gin gad ma machib riy. Ba t’uf ni nge m’agan’dad ngay ni ngad thilyeged e n’en kad lemnaged ni ngad rin’ed ya nge yag nda machibgad ko yungi n’en nrayog ni ngad pirieged e girdi’ riy nge ngiyal’ nrayog ni ngad pirieged e girdi’.​—1 Kor. 9:19-23.

10. Mang boch e talin e maruwel ni ke pi’ e ulung rok Jehovah ni fan ngodad?

¹⁰ Be’ nib tafita’ e ba t’uf ni nge fanay e bin nib puluw e talin e fita’, ma kub t’uf ni nge nang rogon ni nge fanay. Ku arrogodad nib t’uf ni nge puluw e pi talin e maruwel ni ngad fanayed ni fan ko machib. Kub t’uf ni ngad nanged rogon i fanay e pi talin e maruwel nem. I yog Jesus ngak pi gachalpen rogon ni ngar machibnaged fare thin nib fel’. I yog ko mang e ngar feked nge un ngorad, nge gin ngar machibgad riy, nge n’en nga rogned. (Matt. 10:5-7; Luke 10:1-11) Ngiyal’ ney e ke ngongliy e ulung rok Jehovah ba Tafen Talin e Maruwel ni Yima Fil Ban’en Riy ko Girdi’ ni bay boch ban’en riy nrayog ni ngad fanayed ya nge yag nda rin’ed e maruwel rodad nib fel’ rogon. * Ku yibe fil ngodad rogon ni ngaud fanayed e pi talin e maruwel ney. Re n’ey e ma ayuwegdad ni nge gel boch e pagan’ rodad u nap’an  ni gad be machib, mu kud nanged rogon ni ngad manged boch e sensey nib manigil.​—2 Tim. 2:15.

11. Mang fan nthingari guy e piin yad ma machib rogon ni nge dab rrusgad?

¹¹ Pi tafita’ e ba t’uf ni ngar gelnaged lanin’rad ndab rrusgad. Bay yu ngiyal’ ni yad ma mada’nag boch e magawon u maday ndar lemnaged ni yad ra mada’nag. Ba ga’ ni yad ma fita’ nnep’ maku yad ma fita’ u yu yang nib ga’ ni ma yib e yoko’ riy nib tomgin. Ku arrogon e piin yad ma yognag e girdi’ nib t’uf ni ngar gelnaged lanin’rad ndab rrusgad. Nap’an ni gad ra tabab ni ngad uned ko machib ma gad be yog ni gadad boch e Pi Mich Rok Jehovah, ma rayog ni ngad mada’naged boch ban’en ni kan taarebrogonnag ko “yoko’.” Pi n’ey e bod rogon ni nga i togopuluw chon e tabinaw rodad ngodad, ara i moningnagdad e pi fager rodad, maku bay boch e girdi’ ndab ur motoyilgad ngodad. Machane darud gingad ko re n’ey. I yog Jesus u m’on riy ni ke l’og pi gachalpen ni ngar machibnaged e girdi’ nra togopuluw ngorad.​—Matt. 10:16.

12. Mang e rayog ni nge ayuwegdad ni ngad gelnaged lanin’dad ndab da rusgad nrogon nib puluw ko Joshua 1:7-9?

¹² Ere uw rogon ni ngam gelnag lanin’um ndab mu rus? Som’on, e thingari mich u wan’um ni ka be ulul Jesus ni nge pow’iy rogon ni yibe rin’ fare maruwel ni machib e chiney ni bay u tharmiy. (John 16:33; Rev. 14:14-16) Bin migid e, ngam guy rogon ni ngari mich u wan’um e n’en ke micheg Jehovah ni aram e ra ayuwegem. (Matt. 6:32-34) Faanra gel e michan’ rom, ma aram e rayog ni ngam par ndab mu rus. Nap’an ni digey Peter nge fapi cha’ ni yad  be un ngak e maruwel rorad ni yad ma fita’ ngar uned ngak Jesus, mar daged nrib gel e michan’ rorad. Ku arrogom ni kam dag nib gel e michan’ rom u nap’an ni mog ngak e pi fager rom nge chon e tabinaw rom ni kam tababgad e Pi Mich Rok Jehovah ko fol Bible ma ga be un ko pi muulung ni yad ma tay! Dariy e maruwar riy ni kam thilyeg boch ban’en ko ngongol rom ya nge yag ni puluw nga rogon e ngongol nib mat’aw u wan’ Jehovah ni ngan rin’. Kub t’uf ni nge gel e michan’ rom mu kum guy rogon ni nge dab mu rus ya nge yag nim rin’ e re n’ey. Nap’an ni ga be guy rogon ni nge dab kum rus, ma rayog ni nge pagan’um ngay nra moy Jehovah “rom ko yungi n’en ni bay um man riy.”​—Mu beeg e Joshua 1:7-9.

13. Faanra um fal’eg i lemnag boch ban’en ma ga be meybil, ma uw rogon nra ayuwegem ni ngam gelnag lanin’um ndab mu rus?

¹³ Ku mang reb e kanawo’ nrayog ni ngam gelnag lanin’um riy ya nge dab mu rus? Aram e ngam meybil ni ngan ayuwegem ni nge dab mu rus. (Acts 4:29, 31) Ra fulweg Jehovah taban e meybil rom ma dabi pagem. Gubin ngiyal’ nra moy rom ni nge ayuwegem. Maku reb e, rayog ni ngam fal’eg i lemnag rogon ni i ayuweg Jehovah e yafos rok boch e girdi’ kakrom. Kum lemnag rogon ni ke ayuwegem ni ngam gel nga boch e magawon ni keb ngom ma ke pi’ gelngim ya nge yag nim thilyeg e ngongol rom. Dariy e maruwar riy ni En ni ayuweg e girdi’ rok ni ngar th’abed fare day ni Red Sea nga barba’ e ku rayog ni nge ayuwegem ni ngam mang reb i gachalpen Kristus. (Ex. 14:13) Rayog ni nge mich Jehovah u wan’um ni bod rogon fare psalmist ni faani gaar: “I Somol e ba’ rog, ere dab gu rus; mang e rayog ni nge rin’ e girdi’ ngog?”​—Ps. 118:6.

14. Mang e kam fil ko n’en ni buch rok Masae nge Tomoyo?

¹⁴ Ku reb e kanawo’ nrayog ni ngam gelnag lanin’um ndab mu rus e aram e ngam fil rogon ni ke ayuweg Jehovah e girdi’ rok ni yad ba tamra’ ni ngar nanged rogon ni nge dab kur rusgad. Am lemnag e n’en ni buch rok reb e walag nib pin ni ka nog Masae ngak. Cha’ney e ir be’ nib tamra’ ma i lemnag ndabiyog rok ni nge un ko machib. Ma lemnag nrib mo’maw’ ni nge non ko girdi’ nde nangrad, ya rogon u wan’ e bod ni nge gararaw u dow ba rungrung nrib tolang. Ere lemnag ndabiyog rok ni nge rin’ e re n’ey. Machane i guy rogon ni ngari gel feni t’uf Got rok nge girdi’. Ki fal’eg i lemnag feni ga’ fan fare maruwel ni machib e ngiyal’ ney me meybil ni ngan pi’ gelngin. Ke yag ni nge gel ko pi n’en ni i rus ngay ma kki yag ni nge un ko regular pioneer. Ere ku rayog ni nge ayuweg Jehovah e piin ka fin ra uned ko machib ni nge ‘dab rrusgad.’ Kum lemnag e n’en ni buch rok reb e walag nib pin ni ka nog Tomoyo ngak. Nap’an ni tabab ni nge un ko machib u mit e tabinaw, ma re tabinaw ni yan ngay nth’abi som’on e tolul be’ riy ngak ni gaar: “Dabug ni nggu non ngomed e Pi Mich Rok Jehovah!” ngemu’ me ning e mab rok. De rus Tomoyo ni bochan e re n’ey, ya yog ngak e en yow be machib u taabang ni gaar: “Kam rung’ag e n’en ke yog? Dawor gu non ma ke poyeg ni gag reb e Pi Mich Rok Jehovah. Kar gu felfelan’!” Chiney e ma pigpig Tomoyo ni ir reb e regular pioneer.

15. Faanra be mo’maw’ ngodad ni ngad rin’ed fare maruwel ni machib, ma uw rogon nrayog ni ngad boded e pi tafita’? Mang nib ga’ fan ni nge rin’ e piin Kristiano e re n’ey?

¹⁵ Pi tafita’ nib fel’ rogon e fita’ ni yad ma tay e yad ma athamgil ni ngar rin’ed boch ban’en ni yad manang nsusun e ngar rin’ed. Bod ni thingar ra athamgilgad ngar odgad nri kab kakadbul, mar pared ko maruwel rorad nge mada’ ko ngiyal’ ni kar mu’gad, mar athamgilgad ngar ululgad ko fita’ ni yugu aram rogon nib kireb e lang. Ku arrogodad nthingar da filed rogon ni ngad rin’ed boch ban’en nib mo’maw’ ngodad ni faanra nge yag nda athamgilgad ma gad mu’nag e maruwel rodad.​—Matt. 10:22.

16. Mang e rayog ni nge ayuwegdad ni ngad rin’ed boch ban’en nib mo’maw’ ngodad?

¹⁶ Ba ga’ ni gad baadag ni ngad rin’ed ban’en u rogon kanawoen nth’abi mom ngodad. Machane, bay yu ngiyal’ nde mom ni ngad rin’ed e tin th’abi ga’ fan ban’en. Ere ba t’uf ni ngad filed rogon ni ngaud t’ared lanin’dad. Maku reb e, ba t’uf ni ngan ayuwegdad  ni ngad filed rogon ni ngad rin’ed boch ban’en nib mo’maw’ ngodad. Ma pi’ Jehovah e re ayuw nem ngodad u daken gelngin nib thothup.​—Gal. 5:22, 23.

17. Mang e yog Paul ko 1 Korinth 9:25-27 nib t’uf ni nge rin’ ya nge yag ni fil rogon ni nge rin’ boch ban’en nib mo’maw’ ngak?

¹⁷ I fil apostal Paul rogon ni nge rin’ boch ban’en nib mo’maw’ ngak. Machane, i yog nib t’uf ni nge ‘gelnag’ ir ya nge yag ni rin’ e tin nib mat’aw ban’en. (Mu beeg e 1 Korinth 9:25-27.) Ki pi’ e athamgil ngak yugu boch e girdi’ ni ngkur filed rogon ni ngar rin’ed boch ban’en nib mo’maw’ ngorad, ma ngkur rin’ed urngin ban’en nib “fel’ rogon ma ba yaram.” (1 Kor. 14:40) Thingar da maruwelgad nib gel ya nge yag nda ululgad ko pigpig ni gad be tay ngak Jehovah nib muun ngay ni ngaud machibgad ni gubin ngiyal’ ma gad be fil fare thin nib fel’ ko girdi’.​—Acts 2:46.

18. Mang e thingar da rin’ed ni faanra gad baadag ni nge guy Jehovah nib fel’ rogon fare maruwel ni machib ni gad be rin’?

¹⁸ Be’ ni ma fita’ e faanra boor e nig ni ke kol ma aram e ba fel’ rogon e fita’ ni ke tay. Machane, gadad e rogon angin e maruwel rodad e gathi be yan u rogon urngin e girdi’ ni kad ayuweged kar bad nga lan e ulung rok Got. (Luke 8:11-15) Ya faan gad ra athamgil ngad ululgad i machibnag fare thin nib fel’ ma gad be fil e tin riyul’ ko girdi’, ma aram e rayog ni nge tay Jehovah nib fel’ rogon e maruwel ni kad rin’ed. Mang fan? Bochan e gad be fol rok nge Fak.​—Mark 13:10; Acts 5:28, 29.

19-20. Ku mang reb i fan nib ga’ fan ni ngad machibgad e ngiyal’ ney?

¹⁹ Bay boch e nam nib mudugil e pul nrayog ni ngaun fita’ riy. Ere pi tafita’ ni yad ma par ko pi nam ney e nap’an nra chugur ni nge mus ngal’an nrayog ni ngan fita’ riy, ma aram e ri yad be elmerin ko fita’. Gadad e piin gad be yognag e girdi’ e baaray reb i fan nthingar da machibgad e ngiyal’ ney: Rib papey ni gad be chugur nga tungun e re m’ag ney! Ke ngoch e tayim ni ngad machibnaged fare thin nib fel’ riy nra ayuweg e yafos ko girdi’. Ere dab mu son ni ngari fel’ rogon urngin ban’en ko par rom mfin mu un i rin’ e re maruwel ney nrib ga’ fan.​—Ekl. 11:4.

²⁰ Mu rin’ ban’en ni ka chiney ya nge yag nim adag ni ngam rin’ e re maruwel ney, mag ga’nag e tamilangan’ rom ko thin nu Bible, mag guy rogon ni nge dab kum rus, mag fil rogon ni ngam adag ni ngam rin’ boch ban’en nib mo’maw’ ngom. Mu un ngak fa meruk milyon e girdi’ ni yad be machibnag fare thin nib fel’ u ga’ngin yang e fayleng, ma aram e ra ayuwegem Jehovah ni ngam pirieg e felfelan’. (Neh. 8:10) Mu dugliy u wan’um ni ngam rin’ e re maruwel ney u rogon nrayog rom mu kum ulul i rin’ nge mada’ ko ngiyal’ ni kan mu’nag e re maruwel ney. Bin migid e article e ra weliy dalip e kanawo’ nrayog ni ngad dugliyed u wan’dad ni ngad ululgad i machibnag fare thin nib fel’ ni murung’agen Gil’ilungun Got.