1. Mingiyal’ e rayog ni nge mo’maw’ ni ngad pigpiggad ngak Jehovah?

MINGIYAL’ e ga be lemnag nra mo’maw’ ngom ni ngam pigpig ngak Jehovah? Nap’an ni ga be mada’nag e magawon fa nap’an nib fel’ rogon gubin ban’en u puluwom? Nap’an ni gad ra mada’nag e magawon mab mom ni ngad taga’gad ngak Jehovah. Machane, mang e gad ma rin’ ni faanra gad be par ni gad ba gapas? Gur, bay yu ngiyal’ ni gad ra pagtalin feni ga’ fan e pigpig ni gad be tay ngak Got? Ireray e n’en ni ginang Jehovah piyu Israel riy nrayog ni nge buch rorad.​—Deut. 6:10-12.

2. Mang e n’en nib fel’ ni rin’ Asa ni Pilung?

² Asa ni Pilung e ir be’ nrib manigil e n’en ni rin’ nrayog ni ngan folwok riy ni bochan e i ngongol u fithik’ e gonop ni aram e i par ni be pagan’ ngak Jehovah u polo’ i gum’irchaen. Gathi kemus ni i pigpig ngak Jehovah ko ngiyal’ ni ke yib e magawon ngak ya kki pigpig ngak ko ngiyal’ nib gapas. Ka nap’an ni kab pagel Asa ma “i par nib yul’yul’ ngak Somol.” (1 Ki. 15:14, BT) Reb e kanawo’ ni dag Asa riy nib yul’yul’ e aram e taleg e liyor ni googsur ni un tay u Judah. Be yog e Bible ni chuweg e “pi altar nu yugu boch e nam nge yungi tagil’ e tayfan rok e piin dar nanged Got, me buthug yu ulung i malang ni yima meybil ngay, me t’ar nga but’ fapi yaan Asherah ni fare got nib pin.” (2 Kron. 14:3, 5, BT) Mus ngak Maakah ni titaw rok ni ki chuweg ko liw nib tolang ni immoy riy. Mang fan? Bochan e i k’aring e girdi’ ni ngar uned ko liyor nga ba liyos ni yaan reb e got ni googsur.​—1 Ki. 15:11-13.

3. Mang e gad ra weliy ko re article ney?

³ Gathi kemus ni taleg Asa e liyor ni googsur ni un tay u Judah, ya  ki ayuweg e girdi’ ni ngkur sulod ngar pigpiggad ngak Jehovah bayay. Ere tow’athnag Jehovah Asa nge piyu Israel ni aram e gagiyegnag ni ngar pared ba ngiyal’ u fithik’ e gapas. * N’umngin nap’an e gagiyeg ni tay Asa ma immoy ragag e duw riy ni par e re nam nem u fithik’ e “gapas.” (2 Kron. 14:1, 4, 6, BT) U lan e re article ney e gad ra weliy riy rogon ni rin’ Asa e n’en nib t’uf ni nge rin’ ko ngiyal’ nib gapas gubin ban’en. Ngemu’ ma gad weliy e n’en ni rin’ e pi Kristiano u nap’an e bin som’on e chibog ni kur rin’ed e tin nib t’uf ni ngar rin’ed u nap’an ni yad be par ni yad ba gapas ni bod rogon e n’en ni rin’ Asa. Ma tomur e gad ra weliy e fulweg ko re deer ni baaray ni be gaar: Faanra ga be par u reb e nam ni be pag e am e Pi Mich Rok Jehovah riy ni ngar liyorgad nib puf rogorad, ma uw rogon ni ngam ngongol u fithik’ e gonop e ngiyal’ ney ni kab gapas gubin ban’en?

4. Mang e rin’ Asa u nap’an nib gapas gubin ban’en nrogon ni bay ko 2 Kronicles 14:2, 6, 7?

⁴ Mu beeg e 2 Kronicles 14:2, 6, 7. I yog Asa ko girdi’ ni Jehovah e ir e be ‘yoror rorad ma be matanagiyrad u gubin yang.’ Machane de lemnag Asa nre ngiyal’ i n’em ni yad be par u fithik’ e gapas e aram e ngiyal’ ni ngan toffan. Ya aram e ngiyal’ ni tabab ni nge ngongliy rogon boch e mach, ma be ubung e pi yoror, nge pi wulyang ni tafen e damit, ma be ngongliy e pi garog. Me gaar ko girdi’ nu Judah: ‘Ka gad be gagiyegnag e re nam ney.’ Mang e be yip’ Asa fan? Be yip’ fan ni ka rayog ni nge mithmith e girdi’ u lan fare nam nib fel’ rogon mar ngongliyed boch ban’en ndariy e toogor ni be togopuluw ngorad. Ere tay ir ko girdi’ ni ngar rin’ed e tin nib t’uf ni ngar rin’ed e ngiyal’ nem ni kab gapas gubin ban’en.

5. Mang fan ni fal’eg Asa rogon e pi salthaw rok ni fan ko mahl?

⁵ Ki fanay Asa e ngiyal’ nem nib gapas gubin ban’en ni ngki fal’eg rogon e pi salthaw rok ni fan ko mahl. (2 Kron. 14:8) Ere gur, re n’ey e be yip’ fan  nder pagan’ ngak Jehovah? Danga’, ya manang Asa ni bochan ni ir e pilung mab milfan ngak ni nge fal’eg rogon e girdi’ rok ni fan ko magawon nrayog ni ngar mada’naged boch nga m’on. Manang Asa ndabisiy ni gathi gubin ngiyal’ nra i par fare nam nu Judah u fithik’ e gapas, me m’ug nib riyul’ e re n’ey.

6. Mang e i rin’ e pi Kristiano ko bin som’on e chibog u nap’an nib gapas gubin ban’en?

⁶ Yugu aram rogon nib ga’ ni un gafgownag e pi Kristiano ko bin som’on e chibog, machane ku immoy yu ngiyal’ ni ur pared u fithik’ e gapas. Ere mang e rrin’ed ko yu ngiyal’ i n’em? I ulul e pi pumoon nge ppin nem ni yad ba yul’yul’ ko machib ndar talgad. Fare thin ni bay ko Acts e be yog ni ur ‘rin’ed e tin nib m’agan’ Somol ngay ma yad be ta’ fan.’ Ere ra ululgad i machibnag fare thin nib fel’, ma bochan e re n’ey ma aram mu ur ‘yoorgad i yan.’ Ba tamilang ni tow’athnagrad Jehovah ko machib ni ur ted u fithik’ e pasig ko ngiyal’ ni yad be par u fithik’ e gapas.​—Acts 9:26-31.

7-8. Mang e rin’ Paul nge boch e walag u nap’an ni mab e kanawo’ ngorad? Mu tamilangnag.

⁷ Gubin ngiyal’ nra mab e kanawo’ ko pi gachalpen Jesus ma ur fanayed ni ngar machibnaged fare thin nib fel’. Bod nnap’an ni guy apostal Paul ni ke mab e kanawo’ ngak ni nge machib u Efesus, ma aram me par u rom nga i machib ma be ayuweg boch e girdi’ ko re mach nem ni ngar manged boch i gachalpen Jesus.​—1 Kor. 16:8, 9. 

⁸ Nap’an ni puf fare magawon ni sum u murung’agen e ngan maad’adnagey ko duw ni 49 C.E., ma aram miki mab e kanawo’ ngak Paul nge yugu boch e Kristiano ni ngar machibnaged boor e girdi’. (Acts 15:23-29) Tomuren nnog ko ulung e n’en ngar rin’ed, ma aram me athamgil pi gachalpen Jesus u rogon nrayog rorad ni ngar ‘machibnaged e thin rok Somol.’ (Acts 15:30-35) Ere mang angin ni yib riy? Be yog e Bible ni “i gel i yan e michan’ rok girdien e galesiya ma yad be yoor i yan ni gubin e rran.”​—Acts 16:4, 5.

9. Uw rogon e par u boor e nam e ngiyal’ ney, ma mang deer e rayog ni ngad fithed gadad riy?

⁹ Boor e nam e ngiyal’ ney nib puf rogodad ni ngad machibgad riy. Ga ma par u reb e pi nam ney, fa? Faanra ga ma par, ma ngam fithem ni nge lungum, ‘Uw rogon ni gu be maruwel ko puf rogon rog?’ Rib felfelan’ e girdi’ rok Jehovah ko ngiyal’ ney ko tin tomuren e rran ni yad be par riy ni bochan e yad be fanay e tayim rorad ni ngar rin’ed e bin th’abi ga’ e maruwel ni yibe rin’ u fayleng e chiney ni aram e ngan machib min fil e tin riyul’ ko girdi’. (Mark 13:10) Boor ban’en nrayog ni nge rin’ e girdi’ rok Jehovah ni fan ko re maruwel ney.

10. Mang e be pi’ e 2 Timothy 4:2 e athamgil nga lanin’dad ni ngad rin’ed?

¹⁰ Mang e rayog ni ngam rin’ e chiney ni kab gapas gubin ban’en? (Mu beeg e 2 Timothy 4:2.) Mang ndab mu yaliy rogon e par rom, ngam guy ko rayog rom fa reb e rayog rok reb i girdien e tabinaw rom ni nge yoornag e tin be rin’ ni fan ko fare maruwel ni machib ni bod ni nge un ko pioneer. Chiney e gathi ireray e ngiyal’ ni nge be’ me yoornag e salpiy nge chugum rok, ya ireray boch ban’en ndabi magey u nap’an fare gafgow nib ga’.​—Ezek. 7:19; Matt. 6:31-33; 1 John 2:15-17.

11. Mang e ke rin’ boch e walag ni bochan e nge yag nra machibnaged fare thin nib fel’ ngak boor e girdi’?

¹¹ Boor e walag ni kar filed yugu reb e thin ni gathi thin rorad ni bochan e nge yag nra ayuweged yugu boch e girdi’ ni ngar filed murung’agen Jehovah. Ere boor ban’en ni ke ngongliy e ulung rok rogon ni nge ayuwegdad ni ngad machibgad u boor mit e thin. Bod nnap’an e duw ni 2010, ma sogonap’an 500 mit e thin ni un pilyeg e pi babyor rodad riy. Machane, chiney e ke yoor ke pag 1,000 mit e thin!

12. Mang angin ni ma yib ko girdi’ u nap’an ni yad ra rung’ag fare thin ni murung’agen Gil’ilungun Got ko thin rorad? Mu weliy ban’en ni ke buch.

¹² Mang angin ni ma yib ko girdi’ u nap’an ni yad ra rung’ag e tin riyul’ ni bay ko Thin rok Got ko  thin rorad? Am lemnag e n’en ni buch rok reb e walag nib pin ni yib angin ngak e n’en ni rung’ag u nap’an reb e regional convention nni tay u Memphis, Tennessee ni bay u Meriken. Re convention nem e nni tay ko thin ni Kinyarwanda ni aram e thin ni yima yog u Rwanda, ngu Congo (Kinshasa), ngu Uganda. Tomuren e re convention nem, me gaar fare walag nib pin ni ma non ko thin ni Kinyarwanda: “Ka nap’an ni gub gu par nga Meriken ni ke yan 17 e duw, ma ireray e yay nth’abi som’on ni ka rug nang fan e n’en ni kan weliy u nap’an reb e muulung ni kan tay.” Ere ba tamilang ni kari taw nga gum’irchaen e re walag nib pin ney e pi n’en ni rung’ag ni kan weliy ko thin rok u nap’an e re muulung nem. Faanra rayog u rarogom, ma gur, rayog ni ngam fil yugu reb e thin ya nge yag nim ayuweg boch e girdi’ ni yad ma par ko gin ga ma machib riy, fa? Gur, gathi ra fel’ ni ngam rin’ e re n’ey ko gin ma machib e ulung rom riy ni bochan e bay boch e girdi’ ni yad ma par u rom nib thil e thin rorad? Ba gel e felfelan’ nra yib ngom ko maruwel nib gel ni ga ra tay.

13. Mang e rin’ pi walagdad u Russia u nap’an ni kab gapas gubin ban’en?

¹³ Gathi gubin pi walagdad nib puf rogorad ni ngar machibgad nib fel’ rogon. Bay boch e nam ndabiyog ni nge machib pi walagdad riy nrib fel’ rogon ni bochan e bay boch ban’en ni be talegrad e am ndabiyog ni ngar rin’ed. Am lemnag pi walagdad u Russia. Boor e duw ni un gafgownagrad riy. Machane nap’an ni taw ko March ko duw ni 1991, ma aram me pagrad e am rorad ni ngar liyorgad nib puf rogorad. Ngiyal’ nem e sogonap’an 16,000 e Pi Mich u Russia. Machane 20 e duw nga tomuren, ma kar yoorgad ke taw urngirad ko 160,000! Ere ba tamilang ni ke rin’ pi walagdad boch ban’en u fithik’ e gonop u nap’an ni kab mab e kanawo’ ngorad ni ngar machibgad nib puf rogorad. Machane, de par nib gapas nib n’uw nap’an. Yugu aram rogon ni ke thil gubin ban’en u rogon e par ko pi walag ko re nam ney, ma ka yad ba pasig ko pigpig ni yad be tay ngak Jehovah. Ka yad be athamgil u rogon nrayog rorad ni ngar pigpiggad ngak.

14-15. Uw rogon ni fanay Jehovah gelngin ni nge ayuweg Asa?

¹⁴ Fare gapas ni immoy u nap’an Asa e munmun me mus. I yib ba ulung i salthaw nib pag reb e milyon urngirad u Ethiopia ni ngar chamgad ngak Asa. Zerah ni ir e en nib ga’ rorad e ba pagan’ ngay nrayog ko pi salthaw rok nem ni ngar gelgad ngak yu Judah. Machane Asa ni Pilung e de pagan’ nga urngin e salthaw ni immoy rok, ya pagan’ ngak Jehovah ni Got rok. I meybil ni gaar: “Somol ni Got romad mu ayuwegmad e chiney, ni bochan e gamad be gif ngom, mu daken fithingam e kug bad riy ni nggu chamgad ngak e re raba’ i salthaw ney nib ga’.”​—2 Kron. 14:11, BT.

¹⁵ Yugu aram rogon nsogonap’an l’agruw yay nib mun nga urngin e pi salthaw rok yu Ethiopia ni ka yad boor ko pi salthaw rok Asa, machane manang Asa nib gel gelngin Jehovah nrayog ni nge ayuweg e girdi’ rok. Ma riyul’ ni ayuweg Jehovah e girdi’ rok, ya ra gelgad ko fapi salthaw rok yu Ethiopia.​—2 Kron. 14:8-13.

16. Uw rogon ni kad nanged ni gapas ni gad be par u fithik’ e bayi mus?

¹⁶ Yugu aram rogon nra bagadad ma de nang e n’en nra buch rok boch nga m’on, machane gad manang nrogon e gapas ni bay e girdi’ rok Got u fithik’ e chiney e bayi mus. Bin riyul’ riy e, yog Jesus nnap’an nra taw ko tin tomuren e rran, ma ‘urngin e girdi’ ni yad ra fanenikan’ pi gachalpen. (Matt. 24:9) Ki yog apostal Paul ni “urngin e girdi’ ni yad ba adag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.” (2 Tim. 3:12) “Kari damumuw” Satan, ma gad bbalyang ni ngad lemnaged nrayog ni ngad siyeged e damumuw rok.​—Rev. 12:12.

17. Mang boch e kanawo’ nrayog ni ngan skengnag e michan’ rodad riy?

¹⁷ Dabki n’uw nap’an ma gad gubin ni gad ra mada’nag boch ban’en nra skengnag rogon e yul’yul’ rodad. Dabki n’uw nap’an ma bay yib ba gafgow nib ga’ nga fayleng “ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran.” (Matt. 24:21) Ra taw ko ngiyal’ nem, ma rayog ni nge chel girdien e tabinaw rodad ngar togopuluwgad ngodad maku rayog ni ngan taleg e maruwel rodad. (Matt. 10:35, 36) Ere gur, ra taw ko ngiyal’ nem ma gad gubin ni gad ra folwok rok Asa ni aram e nge bagadad me pagan’ ngak Jehovah ni nge ayuweg me yoror rok, fa?

18. Mang e ra ayuwegdad ni ngad pared ni kad fal’eged rogodad ni fan ko ngiyal’ nra mus nap’an e gapas nrogon ni bay ko Hebrews 10:38, 39?

 ¹⁸ Kab kafram i yib ni be fal’eg Jehovah rogodad ya nge yag ni par e michan’ rodad nib gel ni fan ko pi n’en ni bayi buch rodad boch nga m’on. Be pow’iy “fare tapigpig nib yul’yul’ ma ba gonop” ni nge pi’ e tin nib t’uf rodad ni fan ko tirok ban’en “ko ngiyal’ ni yima pi’ riy,” ya nge yag nda pared ni gad ba mudugil ni fan ko liyor ni gad be tay. (Matt. 24:45) Machane, ra bagadad ma thingari rin’ e tin rayog rok ni ngari mich Jehovah u wan’.​—Mu beeg e Hebrews 10:38, 39.

19-20. Mang boch e deer nsusun e ngad fithed gadad riy nrogon nib puluw ko 1 Kronicles 28:9? Mang fan nsusun e ngad fithed e pi deer ney?

¹⁹ Ba t’uf ni ngad “gayed Jehovah” ni bod ni rin’ Asa. (2 Kron. 14:4, NW; 15:1, 2) Da tababgad ni ngad gayed Jehovah u nap’an nda filed murung’agen ma gad un ko taufe. Ku gad ma rin’ urngin e tin nrayog rodad ni ngari t’uf Jehovah rodad. Rogon ni ngad nanged ko gad be rin’ e re n’ey nib fel’ rogon fa danga’ e ngad fithed gadad ni nge lungudad, ‘Gu ma un ko muulung ni gubin ngiyal’, fa?’ Nap’an ni gad ra un ko muulung, ma rayog ni nge yib gelngidad ni ngad ululgad ko pigpig ni gad be tay ngak Jehovah miki pi’ pi walagdad e athamgil nga lanin’dad. (Matt. 11:28) Ere rayog ni ngad fithed gadad ni nge lungudad, ‘Gubin ngiyal’ ni gu ma tay e fol Bible ni goo gag, fa?’ Faanra gimed chon e tabinaw rom ni gimed ma par, ma gimed ma tay e tayim u gubin e wik ni fan ko fol Bible ni tabinaw, fa? Ma faanra yigoo gur ni ga ma par, ma kag ma tay e tayim ni fan ko re n’ey ni taareb rogon ko bin ga be par u reb e tabinaw ni boor e girdi’ riy, fa? Maku reb e, ga ma athamgil u rogon nrayog rom ni ngam un ko machib ma ga be fil e tin riyul’ ko girdi’, fa?

²⁰ Mang fan susun e ngad fithed e pi deer ney? Be yog e Bible ngodad ni ma fal’eg Jehovah i yaliy e pi n’en bay u lanin’dad ngu gum’ircha’dad. Ere susun ni ku aram rogon e n’en ngad rin’ed. (Mu beeg e 1 Kronicles 28:9.) Ere faanra gad be guy ni bay boch ban’en nib t’uf ni ngad thilyeged u rogon e tin gad be nameg, ara rogon e lem ni gad ma tay, ma susun e ngad weniggad ngak Jehovah ni nge ayuwegdad ngad thilyeged e pi n’em u rarogodad. Ireray e ngiyal’ ni ngad fal’eged rogodad ni fan ko pi skeng ni bay da mada’naged boch nga m’on. Dab mu pag ban’en ni nge talegem ndab kum ngongol u fithik’ e gonop ko ngiyal’ nib gapas gubin ban’en!