Faanra ga baadag ni ngam nang murung’agen be’ nib fel’ rogon, ma n’en nra ayuwegem e ngam nang e pi n’en ni ke rin’ nge magawon ni ke gel ngay. Ere ku taareb rogon ni faanra ga baadag ni ngam nang Got nib fel’ rogon, mab t’uf ni ngam nang ko mang e ke rin’. Ya nap’an ni ga ra nang ma rayog ni ngam gin ngay ni ga ra pirieg ni boor ban’en ni ke rin’ kakrom ni bay angin ngodad e ngiyal’ ney mab l’ag rogon ko n’en nra buch rodad boch nga m’on.

Jehovah Got e Ir e En Tasunmiy ma pi “fel’ngin ndabiyog ni ngan guy, ni aram gelngin ndabi m’ay biid nge rarogon ni ir Got, e kan guy nrib tamilang.” (Roma 1:20) “I Somol e ngongliy e fayleng nga gelngin; ni gonop rok e sunmeg e fayleng ngay me filath lan e lang.” (Jeremiah 10:12, BT) Ma rogon feni manigil e tin ni ke sunmiy e be m’ug riy ni ma lemnagdad.

Mu lemnag rogon ni ke tow’athnagdad Jehovah ni aram e ke sunmegdad “ni bod yaan.” (Genesis 1:27) Re n’ey e be yip’ fan ni ke n’igin nrayog ni nge m’ug pi fel’ngin rodad. Miki sunmegdad nrayog ni ngad nanged e tin nib t’uf ko tirok ban’en, ma rayog ni ngad nanged rogon ni ma lemnag boch ban’en nge tin nib ga’ fan u wan’. Ere nap’an ni gad ra athamgil ni ngad folgad ko pi n’ey, ma aram e ra gel e felfelan’ rodad ma ra yib angin e yafos rodad. Maku reb e, ke bing e kanawo’ nrayog ni nge fel’ e tha’ u thildad.

Gad ra guy rogon ni ke sunmeg Got e fayleng ma rayog ni ngad guyed rogon ni ma lemnagdad. Rogon ni be yog apostal Paul e Got e ‘gubin ngiyal’ ni be micheg ir u daken urngin e tin nib fel’ ni be rin’, ya ma pi’ e n’uw ngodad u lang nge galwog u ngal’an; me ir e ma pi’ e ggan ngodad ma ma fal’eg lanin’dad.’ (Acts 14:17) Gathi kemus ni ke pi’ Got e tin nib t’uf rodad ni ngad pared ni gad ba fos. Ya ka boor ban’en ni ke pi’ ngodad ni boor mit nrayog ni ngad felfelan’gad ngay u lan e yafos rodad. Ma gubin e pi n’ey e be dag rogon e tin nra rin’ ni fan ngodad boch nga m’on.

Ke sunmeg Jehovah e fayleng ya nge yag ni nge par e girdi’ u daken ni manemus. Be gaar e Bible: “Fayleng  e ke pi’ ngak e girdi’.” Ma “de ngongliy nge tay ni bangi ted ndariy ban’en riy ma der tugul ban’en riy, yi tay ni ngi i par e girdi’ riy.” (Psalm 115:16; Isaiah 45:18) Ere mini’ e piin ni ngar pared u daken, ma uw n’umngin nap’an ni ngar pared riy? “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.”​—Psalm 37:29.

Maku reb e, ke sunmiy Jehovah e bin som’on e pumoon nge ppin ni aram Adam nge Efa, me tayrow ni ngar parew u paradis u fayleng ni ngar ‘ayuwegew ma yow be matanagiy.’ (Genesis 2:8, 15) Me pi’ Got e maruwel ngorow ni l’agruw ban’en ni bay riy ni ngar rin’ew ya gaar: “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey.” (Genesis 1:28) Ere Adam nge Efa e ni pi’ e athap ngorow ni ngar parew u fayleng ni manemus ni yow ba felfelan’. Ba gel e kireban’ riy ya kar dugliyew ndab ra folgow rok Got, ma bochan e re n’ey ma aram e ke mul u pa’row e athap nrayog ni ngar parew u fithik’ e “piin ni yad mmat’aw” ni yad ra ‘par u daken’ e fayleng. Machane gad be guy ni n’en nrin’ew e de thilyeg e n’en nib m’agan’ Jehovah ngay ni fan ngodad nge fayleng. Bin som’on e ngad weliyed ban’en ni ki rin’.

Bible e yimanang ni aram e Thin rok Got. Ere mang fan ni ke pi’ Jehovah e Bible ngodad? Bochan e ngad nanged murung’agen. (Proverbs 2:1-5) Riyul’ nder pi’ e Bible e fulweg u gubin e deer ni ngad nanged u murung’agen Got, ma dariy yugu reb e babyor nrayog ni nge pi’ e fulweg ko pi deer ney. (Eklesiastes 3:11) Yugu aram rogon ma gubin ban’en ni bay u lan e Bible e ra ayuwegdad ni ngad nanged ko mini’ Got. Gad ma guy rarogon u daken e tin ni ma rin’ ngak e girdi’. Gad ma fil rarogon e miti girdi’ ni baadag nge miti girdi’ ndabun. (Psalm 15:1-5) Ku gad ma fil rogon e liyor nge ngongol nib m’agan’ ngay nge rogon ni ma lemnag e salpiy nge chugum. Ma ri be tamilangnag e Bible ngodad rarogon Jehovah u daken e thin nge ngongol rok Fak ni aram Jesus Kristus.​—John 14:9.

Ku reb i fan ni ke pi’ Jehovah e Thin rok ngodad e bochan ni nge yag ni ngad nanged rogon ni ngad pared ni gad ba felfelan’, me yib angin e yafos rodad. Ke yog Jehovah ngodad u daken e Bible rogon ni nge yag e felfelan’ nga lan e tabinaw rodad, nge rogon ni nge fel’ u wan’dad e tin bay rodad, nge rogon ni ngad athamgilgad u fithik’ e magafan’ rodad. Maku bod rogon nra tamilangnag e re ke magazine ney ni Bible e bay e fulweg riy u boch e deer ni ma fith e girdi’ u murung’agen e yafos rodad ni bod e: Mang fan ni ke yoor e gafgow? Mang e ra buch boch nga m’on? Maku be weliy e n’en ni ke rin’ Got ya nge yag ni nge lebug e n’en nib m’agan’ ngay aram ko som’on.

Bible e riyul’ nib ke babyor nrib manigil. Ku bay boch e kanawo’ ni be dag ni Bible e bbabyor ni yugu ba thil ni kemus ni yigoo Got e ir e thin rok e bay riy. Ke pag 1,600 e duw ni kan yoloy ma 40 e pumoon nra yoloyed. Yugu aram rogon ma taareb kenggin e thin riy ni bochan e Got e ir e en riyul’ ni Thin Rok e bay riy. (2 Timothy 3:16) Mab thil nga boch e babyor ni ke kakrom ni bochan e ke yag ni ngan ayuweg u nap’an e pi duw ni ke yan. Ma be m’ug e mich riy u bokum biyu’ e Bible ni ke kakrom ni kan yoloy nga paay. Maku reb e, ke magey e Bible ni yugu aram rogon ni immoy boch e girdi’ nra guyed rogon ni ngan taleg ndabin pilyeg ara dabin wereg ngak e girdi’ ara ni beeg. Ma chiney e ke mang ba ken e babyor nrib boor ni yibe wereg maku yibe pilyeg. Bochan ni bay e Bible rodad e ngiyal’ ney ma be micheg nib riyul’ fapi thin ni gaar, “thin rok e Got rodad” e ra par ni manemus.​—Isaiah 40:8.

Ku reb e ban’en ni ke rin’ Got e aram fare biyul ni ke pi’ ni be micheg nra lebug e tin nib m’agan’ ngay ni fan ngodad. Bod ni kan weliy kafram ni n’en ni baadag Got ni fan ngak e girdi’ e ngar pared u fayleng ni manemus. Machane bochan ni ke dugliy Adam ndab ki fol rok Got, ma aram ma ke denen me mul e athap rok ko yafos ni manemus ni gathi yigoo ir ya kub muun e yafos rok pi fak ngay. “Denen e yib nga fayleng u daken taabe’, ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng, ni bochan e urngin e girdi’ ni ngongliy e denen.” (Roma 5:12) Bochan e de fol Adam rok Got ma gowa bod ndabkiyog ni nge lebug e n’en nib m’agan’ Got ngay. Ere mang e ke rin’ Jehovah?

Rogon e ngongol rok Jehovah e ba puluw nga rarogon. Ba mat’aw rogon ni ke gechignag Adam nge Efa ko kireb ni kar rin’ew. Machane bochan nib t’uf e girdi’ rok ma aram fan ni ke pi’ fare biyul ni fan ngak pi  fakrow. Bochan nib gonop Jehovah ma ke dugliy e n’en ni nge rin’ ko re magawon nem, ma aram ma ka chingiyal’ nem me weliy ni ngan nang. (Genesis 3:15) Rogon kanawoen nrayog ni nge chuw e girdi’ u tan e denen nge yam’ e aram e nge pi’ Got Fak ni aram Jesus Kristus. Ere mang e ba muun ko re n’ey?

Bochan nib t’uf ni ngan ayuweg e girdi’ ko wenegan e togopuluw ni tay Adam, ma aram me l’og Jehovah Jesus nga fayleng ni nge fil ngak e girdi’ kanawoen e yafas me “pi’ e pogofan rok nge biyuliy boor e girdi’ ngay.” a (Matthew 20:28; John 14:6) Rayog ni nge pi’ Jesus e re biyul nem ni bochan e ba flont ni bod Adam. Machane yow ba thil ya Jesus e yag rok ni nge par ni be fol nge mada’ ko ngiyal’ ni nge yim’. Ere bochan ndariy rogon ni nge yim’ Jesus ma aram fan ni faseg Jehovah me yan nga tharmiy. Aram e chiney e rayog ni nge rin’ Jesus e n’en nde yag ni nge rin’ Adam, ni aram e nge pi’ e athap ko yafos ni manemus ko girdi’ ni yad ma fol. “Rogon ni boor e girdi’ ni yan i par ni yad e tadenen ni bochan e taareb e girdi’ nde fol, e ku aram rogon ni boor e girdi’ ni bayi mat’awnagrad Got ngak ni bochan taabe’ ni ke fol.” (Roma 5:19) Ere u daken fare biyul ni pi’ Jesus ma ra lebguy Got e n’en ni ke micheg ni aram e nge par e girdi’ u fayleng ni manemus.

Boor ban’en ni kad filed u murung’agen Jehovah u rogon ni pithig fare magawon ni sum ni bochan e de fol Adam. Gad be guy ndariy ban’en nrayog ni nge taleg Jehovah ni nge dabi lebguy e n’en ni tababnag ya thin ni ma yog e ma ‘rin’ urngin ban’en ni ke l’og ni nge rin’.’ (Isaiah 55:11) Kad filed riy rogon feni ri gad ba t’uf rok Jehovah. “Baaray rogon ni dag Got ni gadad ba t’uf rok: i l’og Fak ni kari maagirag rok ngaray nga fayleng ni fan e nge yog e yafos ngodad u daken. Baaray rogon ni gadad ba t’uf rok Got: gathi ud pired nib t’uf Got rodad, ya ud pired ni gadad ba t’uf rok me l’og Fak nge yib, nu daken Fak e nge n’ag Got fan e denen rodad riy.”​—1 John 4:9, 10.

Mus ngak Fak me pi’ “ni fan ngodad ni gadad gubin nde yog ni nge tel,” ere nge pagan’dad nra “pi’ urngin ban’en ngodad ndariy puluwon” ni ke micheg. (Roma 8:32) Mang e ke micheg Got nra rin’ ni fan ngodad? Mu ulul i beeg.