Tin Riyul’ u Murung’agen e Par Boch Nga M’on
Ka am lemnag ko mang e ra buch boch nga m’on, fa? Be yog e Bible ngodad murung’agen boch ban’en nib ga’ fan ndab ki n’uw nap’an ma bayi buch nra thilyeg rogon e par rok urngin e girdi’ u fayleng.
I weliy Jesus rogon ni gad ra ‘nang ni gagiyeg rok Got e ke chugur ni nge taw.’ (Luke 21:31) I yiiynag murung’agen boch ban’en nra buch nib muun ngay e mahl, nge durru’ nib gel, nge uyungol, nge liliy nib machreg ni ma af. Ireray e pi n’en ni gad be guy ni be buch e ngiyal’ ney.—Luke 21:10-17.
Ku be tamilangnag e Bible nreb e ban’en nra buch ko “tin tomren e rran” u tan e gagiyeg ko girdi’ e aram e ra kireb e ngongol ko girdi’. Rayog ni ngam beeg murung’agen e re n’ey ko 2 Timothy 3:1-5. Nap’an ni ga ra guy rogon e lem nge ngongol ko girdi’ e ngiyal’ ney, ma dariy e maruwar riy nra m’agan’um ngay nre yiiy ney e ba puluw ko pi n’en ni be buch e ngiyal’ ney.
Mang e be yip’ fan e re n’ey? Ke chugur nga nap’an ni bayi thilyeg Gil’ilungun Got boch ban’en ya nge yag ni mon’og e par ko girdi’ u roy u fayleng. (Luke 21:36) Bay boch ban’en nib manigil ni ke micheg Got u lan e Bible ni fan ko fayleng nge piin yad ra par riy. Baaray boch ko pi n’em.
BA FEL’ ROGON E GAGIYEG NI YIRA TAY
“Min pi’ mat’awun [Jesus] ko gagiyeg ni nge tay ma ngan tay fan, ma nge par ni ir e pilung, ya girdi’ u urngin e pi nam, nge pi racha’, nge pi thin e nguur folgad rok. Ma mat’awun ko gagiyeg ni nge tay e bay i par ndariy n’umngin nap’an, ma gagiyeg rok e dabi mus.”—DANIEL 7:14.
N’en be yip’ fan: Rayog ni ngam felfelan’ ko yafos rom u tan reb e am ni kab gel e fel’ riy ni ke sunmiy Got nra gagiyegnag e re fayleng ney ni Fak e ir e Pilung riy.
RA FEL’ FITHIK’ I DOWEY
“Dariy be’ ni be par u lan e nam rodad ni bay ki yog nib m’ar.”—ISAIAH 33:24.
N’en be yip’ fan: Dab kum m’ar ma dab ki marwoth bang u dowam; rayog ni ngam par ndab mum’.
RA GAPAS GA’NGIN YANG E FAYLENG
“Be taleg e pi mahl ni yibe tay u fayleng i yan.”—PSALM 46:9.
N’en be yip’ fan: Ra tal e mahl me chuw urngin e gafgow ni ma k’aring.
RA SUG E FAYLENG KO GIRDI’ NIB FEL’
“[Ra] yan e piin nib kireb nga bayang . . . [ma] piin ni yad mmunguy e bay ra pired u daken e nam.” —PSALM 37:10, 11.
N’en be yip’ fan: Ra chuw e girdi’ nib kireb ma kemus ni piin yad baadag ni ngar folgad rok Got e yad ra magey.
RA PARADIS E FAYLENG NI GA’NGIN
“Bay ra toyed e naun mi yad par u lan. . . . Bay ra yunged e woldug ni grapes me fel’ rogorad u logowen.”—ISAIAH 65:21, 22.
N’en be yip’ fan: Ga’ngin yang e fayleng nra fel’ yaan. Ra lebguy Got e n’en ni gad ma yibilay ni aram e ngan rin’ e n’en nib m’agan’ ngay “u roy u but’.”—Matthew 6:10.
