Gad gubin ni gad bay u woen ban’en ni kan taarebrogonnag nga bangi “yoko’” nib gel. I yog Jesus nre n’ey e aram fare “gafgow” nib ga’. (Matthew 24:21) Dabiyog ni ngad siyeged e re n’ey nra buch. Machane, bay ban’en nrayog ni ngad rin’ed ya nge dabi buch ban’en rodad. Mang e re n’em?

Nap’an fare Welthin ni Pi’ Jesus Kristus u Daken e Burey, me yog ni gaar: “Ere ngam m’oneged u wun’med e gagiyeg rok Got nge tin nib m’agan’ ngay ni ngam rin’ed.” (Matthew 6:33) Uw rogon ni ngad rin’ed e re n’ey?

Ngam m’oneg u wan’um e Gagiyeg rok Got. Re n’ey e be yip’ fan ni ngad ted Gil’ilungun Got ni ir e th’abi ga’ fan u wan’dad ko tin ka bay ban’en. (Matthew 6:25, 32, 33) Mang fan ni ngad lemgad ni aray rogon? Bochan e dabiyog ko girdi’ ni ngar pithiged urngin e magawon ko girdi’. Kemus ni yigoo Gil’ilungun Got e rayog ni nge rin’ e re maruwel ney nib mo’maw’.

Ngam m’oneg u wan’um e tin nib m’agan’ ngay ni ngam rin’. Susun e ngad athamgilgad u rogon nrayog rodad ni ngad folgad ko pi motochiyel rok Got nib mat’aw nge pi kenggin e motochiyel rok. Mang fan? Ya faanra gadad e ngad dugliyed ko mang e ba fel’ ma mang e ba kireb ni ngad rin’ed, ma rib kireb wenegan nra yib. (Proverbs 16:25) Machane faan gad ra fol ko pi motochiyel rok Got, ma gathi kemus ni gad ra felfelan’nag Got, ya ku ra yib angin ngodad.​—Isaiah 48:17, 18.

Ngaum m’oneg u wan’um e Gagiyeg rok Got nge tin nib m’agan’ ngay ni ngam rin’. I yog Jesus ni bay boch e girdi’ nsana yad ra lemnag nrayog ni nge pagan’rad ni faan yad ra guy rogon ni nge yoor e salpiy rorad. Ku bay boch e girdi’ nrayog ni ngaur fanayed boor e tayim nge gelngirad ni ngar pithiged  e pi magawon ni yad be mada’nag u reb e rran ngu reb, ma dakuriy e tayim rorad ni ngar m’oneged Gil’ilungun Got u wan’rad.​—Matthew 6:19-21, 25-32.

Machane i micheg Jesus ni piin yad ra rin’ boch ban’en ni fan nga Gil’ilungun Got e ra yag ngorad e tin nib t’uf rorad e chiney, ma ra boch nga m’on ma yad ra felfelan’ ko pi tow’ath nra yag ngorad.​—Matthew 6:33.

Yugu aram rogon ni i mon’eg pi gachalpen Jesus ko bin som’on e chibog Gil’ilungun Got nge tin nib m’agan’ ngay, machane ka dawori chuw e amith nge gafgow ni i tay e girdi’. Machane, kan ayuwegrad. Ni uw rogon?

Pi motochiyel rok Got nib mat’aw ni ur folgad riy e i yororiyrad ko pi magawon ni i mada’nag e piin nder fol ko tin be yog Got. Bochan nrib mich u wan’rad nra yib Gil’ilungun Got, ma aram e n’en ni ayuwegrad ni ngar athamgilgad u fithik’ e pi magawon nib gel ni ur mada’naged. Ki pi’ Got ngorad fare ‘gelngin ni ir e ba th’abi gel,’ ya nge yag nra athamgilgad u fithik’ e pi magawon ni i yib ngorad.​—2 Korinth 4:7-9.

Pi Kristiano ko bin som’on e chibog e ra folgad ko n’en ni tay Jesus chilen ni aram e ngan mon’eg Gil’ilungun Got. Ur machibnaged fare thin nib fel’ ko gin ur moyed riy e ngiyal’ nem. (Kolose 1:23) Bay be’ ni ka be rin’ e re maruwel ney e ngiyal’ ney, fa?

Arrogon! Manang e Pi Mich Rok Jehovah ndab ki n’uw nap’an ma bayi thang Gil’ilungun Got e biney e m’ag. Ere yad be rin’ e tin rayog rorad ni fan ko fare maruwel ni ke tay Jesus chilen ni ngan rin’ ni faani gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.”​—Matthew 24:14.

Mang e ga ra rin’ u nap’an ni ga ra rung’ag fare thin nib fel’? Gamad be pi’ e athamgil nga lanin’um ni ngam folwok ko piin ur pared ko fare mach ni bay u lan yu Macedonia ni ka nog yu Berea ngay u nap’an e bin som’on e chibog. Nap’an nrung’aged rok apostal Paul fare thin nib fel’ ni murung’agen Gil’ilungun Got, mar “uthmed telrad ngay.” Ngemu’ ma “ur gayed u lan e babyor nib thothup ni ngar guyed ko rriyul’” e tin kar rung’aged fa danga’, ma aram mar folgad ko tin kar filed.​—Acts 17:11, 12.

Ku rayog ni ngam rin’ e re n’ey. Faan ga ra m’oneg e Gagiyeg rok Got u wan’um nge tin nib m’agan’ ngay ni ngam rin’, ma aram e rayog ni ngam pirieg e ayuw e chiney, me yag nim par u fithik’ e gapas nge felfelan’ boch nga m’on ndariy n’umngin nap’an.