Ke sunmiy Got e dowef rodad nrib manigil, ya ra maad’ad bang riy ma rayog ni nge gol ni ir rok. Faanra ke math’, ara ke magur, ara ke kur bang u dow be’ nib fel’ fithik’ i dow, ma “aram e ra tabab e dowef rok ni nge maruwel ni nge guy rogon ni nge golnag e gin ni ke maad’ad ndemtrug ko ba ga’ ara ba achig yang.” (Johns Hopkins Medicine) Ka chingiyal’ nem me tabab e dowef rok facha’ ni nge rin’ boch ban’en ni nge taleg e racha’ u dow ndab ki map’, me ngereg e pi nguchey ni ma yan e racha’ riy, me sulweg fa gin’en ni ke maad’ad nga rogon, miki gelnag fa gin’en ni ke maad’ad.

MU LEMNAG E RE N’EY: Faanra aray rogon ni ke ngongliy e En Tasunmiy e dowef rodad nrayog ni nge gol rok u tomuren ni ke maad’ad, me ere gathi rayog ni nge pagan’dad ko n’en ni ke micheg ni aram e rayog ni nge golnag lanin’dad ni ke maad’ad? I yoloy fare psalmist ni gaar: “Be golnag laniyan’ e piin ke kireban’rad ma be taflaynag e maad’ad rorad.” (Psalm 147:3, BT) Machane, faanra ke maad’ad lanin’um ni bochan ban’en ni ke buch rom kafram ara chiney, ma uw rogon nrayog ni nge pagan’um ngay nra golnag Jehovah lanin’um e chiney nge boch nga m’on?

Ke micheg Got ni gaar: “Dab mu tamdag, ya gu ba’ rom. I gag e Got rom, dab mu rus nga ban’en. Bay gu gelnigem mu gu ayuwegem.” (Isaiah 41:10) Faanra manang be’ ni ma lemnag Jehovah ma aram e ba gapas laniyan’ ma bay gelngin nrayog ni nge athamgil u fithik’ e pi magawon nib thilthil ni ma yib ngak. I yog apostal Paul nre gapas laniyan’ ney ni bay rodad e aram e “gapas rok Got ndabi chuchugur ni nge nang e girdi’ fan.” (Filippi 4:4-7, 9) Ki yog ni Got e ir e ma pi’ gelngin ngodad “ni ir e ba th’abi gel.”​—2 Korinth 4:7.

Thin nu Bible e ma ayuwegdad ni ngari mich u wan’dad e pi n’en ni ke micheg Jehovah ni fan ko girdi’ boch nga m’on. Bod ni, fare thin ko Revelation 21:4, 5 e be yog ngodad e n’en nra rin’ nge fan nrayog ni nge pagan’dad nra rin’ e re n’ey:

• “Bayi n’ag urngin e lu’” u owchen e girdi’. Ra chuweg Jehovah urngin e gafgow nge magafan’ ni ma yib ngodad, ngki mada’ ko tin ni ma lemnag e girdi’ nde ga’ fan.

• Fare Pilung ni Gubin Ma Rayog Rok ni ir e ke sunmiy urngin ban’en ni “ke par nga tagil’” u tharmiy e ra maruwel nga gelngin nge mat’awun ni nge taleg urngin e gafgow ni be buch rodad me ayuwegdad ko pi n’en nib t’uf rodad.

• Be micheg Jehovah ni pi n’en ni ke yog nra rin’ boch nga m’on e “ba riyul’ ma rayog ni ngan pagan’uy ngay.” Re n’ey e be yip’ fan ni ke micheg Jehovah u daken fithingan nge rarogon ni ir Got nra tay u gil’ e n’en ni ke micheg.

“Bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw. Ma faanem ni ke par nga tagil’ e gaar, ‘Chiney e nggu thiliyeg urngin ban’en nge beech!’ Mi ki gaar ngog, ‘Mu yoloy e re n’ey, ya pi thin ney e ba riyul’ ma rayog ni ngan pagan’uy ngay.’”​—Revelation 21:4, 5.

Pi n’en ni bay u palpalth’ib ngu lan e Bible e be dag ngodad pi fel’ngin e Chitamangidad ni bay u tharmiy. Yugu aram rogon ni pi n’en ni kan sunmiy e be k’aringdad ni ngad adaged ni ngad manged fager rok Got, machane rib tamilang e n’en ni be yog e Bible ni be gaar: “Mu chugurgad ngak Got, me chugur ngomed.” (James 4:8) Be gaar e Acts 17:27: “Dariy bagadad nib mal’af Got rok nga orel.”

Faan ga ra tay e tayim ni ngam nang murung’agen Got, ma aram e rayog ni nge gel e pagan’ rom ni ma ‘lemnagem.’ (1 Peter 5:7) Mang angin nra yib ngom ni faanra pagan’um ngak Jehovah?

Am lemnag e n’en ni buch rok Toru ni be’ nu Sapan. Chitiningin e ir be’ nib Kristiano, machane nap’an ni ilal ma aram me un nga reb e ulung ni yad ba ta cham u Sapan ni ka nog e yakuza ngorad. I yog ni gaar, “Ba mich u wan’ug ni be fanenikayeg Got, ma ug lemnag ni yam’ ni i tay e girdi’ ni gu manangrad nib kub muun ngay e piin nri yad ba t’uf rog e aram e gechig rog ni be pi’ Got.” I yog Toru ni bochan ni i chag ko pi girdi’ nem ni yad ba ta cham ma yigoo murung’agen e cham e yad ma lemnag, ma aram me yan i par ni “ir be’ nder ma kireban’ ko girdi’.” I weliy murung’agen e n’en nri baadag ni nge rin’ ni gaar, “Gu baadag ni nggum’ ni ku gub pagel u tomuren ni kug thang e fan rok be’ ni kab gilbuguwan boch ngog ni bochan e nggum’ ma rayog ni ngaun weliy murung’ageg ko n’en ni kug rin’.”

 Machane, nap’an ni fil Toru nge Hannah ni ppin rok e Bible, ma aram me thilyeg boch ban’en u lan e yafos rok nge lem rok. I yog Hannah ni gaar, “Rug guy nga owcheg rogon ni thil e pumoon rog.” Chiney e ma yog Toru u fithik’ e pagan’ ni ma gaar: “Riyul’ ni bay ba Got nri ma lemnagdad ni be’ nge be’. Dabun ni nge yim’ be’, mab m’agan’ ngay ni nge n’ag fan e kireb rok e piin nriyul’ ni kar kalgadngan’rad ko kireb rorad. Ma motoyil ko pi n’en ni gad ma yog ngak ndabiyog ni nga dogned ngak be’ nge boch ban’en ndariy be’ nra nang fan. Dabki n’uw nap’an ma ra chuweg Jehovah urngin e magawon, nge gafgow, nge amith ni gad be yan u fithik’. Mus ko chiney, ma ma ayuwegdad u boch e kanawo’ ndad lemnaged nra ayuwegdad riy. Ma t’ufegdad ma ma ayuwegdad ko ngiyal’ ni kad gafgowgad.”​—Psalm 136:23.

Bochan ni gad manang nrayog rok Got maku dabki n’uw nap’an ma bayi chuweg urngin e gafgow miki chuweg urngin e lu’ u owchedad, ma aram e gathi kemus ni be ayuwegdad ni nge pagan’dad ko pi n’en ni bay nga m’on, ya ku be ayuwegdad ni nge fel’ e par rodad e chiney ni bod rogon e n’en ni buch rok Toru. Arrogon, yugu aram rogon ni gad be par u ba fayleng ni ke sug boch ban’en riy ni be k’aring e gafgow ko girdi’, ma rayog ni nge yib angin ngom rogon ni ma lemnagem Got u fithik’ e t’ufeg.