Sáàmù 102:1-28
Àdúrà ẹni tí ìnilára bá nígbà tí nǹkan tojú sú u,* tó sì ń sọ ẹ̀dùn ọkàn rẹ̀ níwájú Jèhófà.+
102 Jèhófà, gbọ́ àdúrà mi;+Jẹ́ kí igbe mi fún ìrànlọ́wọ́ dé ọ̀dọ̀ rẹ.+
2 Má fi ojú rẹ pa mọ́ fún mi nígbà tí mo wà nínú wàhálà.+
Tẹ́tí sí mi;*Tètè dá mi lóhùn nígbà tí mo bá pè ọ́.+
3 Nítorí àwọn ọjọ́ mi ń pa rẹ́ lọ bí èéfín,Àwọn egungun mi sì ti di dúdú bí ibi ìdáná.+
4 Ọkàn mi dà bíi koríko tí a gé, tó sì ti rọ,+Nítorí mi ò rántí jẹ oúnjẹ mi.
5 Nítorí bí mo ṣe ń kérora gidigidi,+Egungun mi ti lẹ̀ mọ́ ẹran ara mi.+
6 Mo dà bí ẹyẹ òfú tó wà ní aginjù;Mo dà bí òwìwí kékeré tó wà láàárín àwókù.
7 Mi ò rí oorun sùn;*Mo dà bí ẹyẹ tó dá wà lórí òrùlé.+
8 Àwọn ọ̀tá mi ń pẹ̀gàn mi láti àárọ̀ ṣúlẹ̀.+
Àwọn tó ń fi mí ṣẹ̀sín* ń lo orúkọ mi tí wọ́n bá fẹ́ gégùn-ún.
9 Eérú ni mo fi ń ṣe oúnjẹ jẹ,+Omijé sì ti dà pọ̀ mọ́ ohun tí mò ń mu,+
10 Nítorí ìbínú rẹ àti ìrunú rẹ,O gbé mi sókè kí o lè jù mí sí ẹ̀gbẹ́ kan.
11 Àwọn ọjọ́ mi dà bí òjìji tó ń pa rẹ́ lọ,*+Mo sì ń rọ bíi koríko.+
12 Àmọ́, Jèhófà, o wà títí láé,+Òkìkí rẹ yóò sì máa kàn* láti ìran dé ìran.+
13 Ó dájú pé wàá dìde, wàá sì ṣàánú Síónì,+Torí àkókò ti tó láti ṣe ojú rere sí i;+Àkókò tí a dá ti pé.+
14 Nítorí àwọn ìránṣẹ́ rẹ fẹ́ràn àwọn òkúta rẹ̀,+Kódà, wọ́n nífẹ̀ẹ́ erùpẹ̀ rẹ̀.+
15 Àwọn orílẹ̀-èdè yóò máa bẹ̀rù orúkọ Jèhófà,Gbogbo ọba ayé yóò sì máa bẹ̀rù ògo rẹ.+
16 Jèhófà máa tún Síónì kọ́;+Á fara hàn nínú ògo rẹ̀.+
17 Á fetí sí àdúrà àwọn òtòṣì,+Kò sì ní kó àdúrà wọn dà nù.+
18 A kọ èyí sílẹ̀ torí ìran tó ń bọ̀,+Kí àwọn èèyàn tí a ó bí* lè yin Jáà.
19 Ó ń bojú wolẹ̀ láti ibi gíga rẹ̀ mímọ́,+Láti ọ̀run, Jèhófà ń wo ayé,
20 Kí ó lè gbọ́ bí ẹlẹ́wọ̀n ṣe ń kérora,+Kí ó lè dá àwọn tí wọ́n ti dájọ́ ikú fún sílẹ̀,+
21 Ká lè kéde orúkọ Jèhófà ní Síónì+Àti ìyìn rẹ̀ ní Jerúsálẹ́mù,
22 Nígbà tí àwọn èèyàn àti àwọn ìjọbaBá kóra jọ láti sin Jèhófà.+
23 Ó gba agbára mi láìtọ́jọ́;Ó gé ọjọ́ ayé mi kúrú.
24 Mo sọ pé: “Ìwọ Ọlọ́run mi,Má ṣe dá ẹ̀mí mi légbodò,*Ìwọ tí àwọn ọdún rẹ lọ láti ìran dé ìran.+
25 Tipẹ́tipẹ́ lo ti fi ìpìlẹ̀ ayé sọlẹ̀,Ọ̀run sì jẹ́ iṣẹ́ ọwọ́ rẹ.+
26 Wọ́n á ṣègbé, àmọ́ ìwọ á máa wà nìṣó;Gbogbo wọn á gbó bí aṣọ.
Wàá pààrọ̀ wọn bí aṣọ, wọn ò sì ní sí mọ́.
27 Àmọ́ ìwọ kò yí pa dà, àwọn ọdún rẹ kò sì ní dópin láé.+
28 Ọmọ àwọn ìránṣẹ́ rẹ yóò máa wà láìséwu,A ó sì fìdí àtọmọdọ́mọ wọn múlẹ̀ gbọn-in níwájú rẹ.”+
Àlàyé Ìsàlẹ̀ Ìwé
^ Tàbí “tí àárẹ̀ mú un.”
^ Tàbí “Bẹ̀rẹ̀ kí o sì fetí sí mi.”
^ Tàbí kó jẹ́, “Mo ti rù kan eegun.”
^ Tàbí “tó ń dá yẹ̀yẹ́ mi sílẹ̀.”
^ Tàbí “òjìji àṣálẹ́.”
^ Tàbí “Orúkọ rẹ yóò sì wà.” Ní Héb., “Ìrántí.”
^ Ní Héb., “dá.”
^ Ní Héb., “Má ṣe mú mi kúrò ní ààbọ̀ àwọn ọjọ́ mi.”
