OBÌNRIN kan tó ń jẹ́ Sarah * lórílẹ̀-èdè Gánà tí òun àti Jacob ti ṣègbéyàwó fún ọdún mẹ́tàdínlógún [17] sọ pé: “A sábà máa ń bá ara wa fa ọ̀rọ̀ owó.” Sarah ṣàlàyé pé: “Inú máa ń bí mi torí pé iṣẹ́ kékeré kọ́ ni mò ń ṣe láti bójú tó ìdílé wa, àmọ́ Jacob kì í bá mi sọ nǹkan kan nípa bá a ṣe fẹ́ náwó. Nígbà míì, a kò ní bá ara wa sọ̀rọ̀ fún ọ̀pọ̀ ọ̀sẹ̀.”

Jacob ọkọ rẹ̀ sọ pé: “Òótọ́ ni pé àwọn ìgbà míì wà tá a máa ń sọ̀kò ọ̀rọ̀ sí ara wa. Àìgbọ́ra-ẹni-yé ló sábà máa ń fà á àti pé a kì í bá ara wa sọ̀rọ̀ tó nítumọ̀. Nígbà míì sì rèé, wàhálà máa ń ṣẹlẹ̀ torí pé a máa ń gba ọ̀rọ̀ tí kò tó nǹkan sódì.”

Nathan ní Íńdíà tó ṣègbéyàwó lẹ́nu àìpẹ́ yìí sọ ohun tó ṣẹlẹ̀ lọ́jọ́ kan tí bàbá ìyàwó rẹ̀ jágbe mọ́ ìyá ìyàwó rẹ̀. Ó ní: “Ọ̀rọ̀ náà bí ìyá ìyàwó mi nínú, ó sì bínú jáde nílé. Nígbà tí mo bi bàbá ìyàwó mi pé kí ló dé tó fi pariwo bẹ́yẹn, ńṣe ló sọ pé mò ń rí òun fín. Kí n tó mọ ohun tó ń ṣẹlẹ̀, bàbá yìí ti bẹ̀rẹ̀ sí í pariwo mọ́ gbogbo wa.”

Ó ṣeé ṣe kí ìwọ náà ti rí i pé ọ̀rọ̀ tí kò yẹ lè bọ́ sódì lára ẹnì kejì, kó sì dá wàhálà sílẹ̀ nínú ilé. Ọ̀rọ̀ tí ẹ fi ohùn tútù bẹ̀rẹ̀ lè di èyí tí ẹ máa bẹ̀rẹ̀ sí í pariwo mọ́ ara yín. Kò sẹ́ni tí kì í ṣi ọ̀rọ̀ sọ lẹ́ẹ̀kọ̀ọ̀kan, èyí sì lè mú kí ẹnì kejì ṣi ọ̀rọ̀ náà lóye. Láìka èyí sí, ẹ lè gbádùn àlàáfíà àti ìṣọ̀kan nínú ìdílé yín.

Kí lo lè ṣe nígbà tí awuyewuye bá ṣẹlẹ̀? Àwọn nǹkan wo lẹ lè ṣe kí ìdílé tún lè pa dà wà ní àlàáfíà? Kí sì lẹ lè ṣe tí àlàáfíà fi máa jọba nínú ilé? Jọ̀wọ́ ka àwọn àpilẹ̀kọ tó tẹ̀ lé e.