BÁWỌN èèyàn ṣe ń pọ̀ sí i, bẹ́ẹ̀ ni ẹ̀ṣẹ̀ àti ìwà ibi ń yára gbilẹ̀ sí i lórí ilẹ̀ ayé. Wòlíì kan ṣoṣo tó ń sọ̀rọ̀ nípa Ọlọ́run nígbà náà, ìyẹn Énọ́kù, ṣèkìlọ̀ pé ọjọ́ kan ń bọ̀ tí Ọlọ́run máa pa àwọn èèyàn búburú run. Síbẹ̀, ìwà ibi ń gbilẹ̀ ó sì ń burú sí i. Àwọn áńgẹ́lì kan ṣọ̀tẹ̀ sí Jèhófà nígbà tí wọ́n fi àyè wọn sílẹ̀ lọ́run, tí wọ́n gbé àwọ̀ èèyàn wọ̀ wá sí ilẹ̀ ayé, tí ojú kòkòrò sì sún wọn láti gbé àwọn ọmọbìnrin èèyàn níyàwó. Irú àjọṣe tí kò bá bí Ọlọ́run ṣe dá wọn mu yìí mú kí wọ́n bí àwọn àdàmọ̀dì ọmọ, àwọn òmìrán abúmọ́ni tó ń jẹ́ Néfílímù, tí wọ́n mú kí ìwà ọ̀daràn àti ìtàjẹ̀sílẹ̀ pọ̀ sí i lórí ilẹ̀ ayé. Ó dun Ọlọ́run gan-an láti rí bí àwọn tó dá sórí ilẹ̀ ayé ṣe ń pa ara wọn run.

Lẹ́yìn ikú Énọ́kù, ọkùnrin kan wà tó dá yàtọ̀ pátápátá nínú ayé búburú yẹn. Nóà ni orúkọ rẹ̀. Òun àti ìdílé rẹ̀ gbìyànjú láti ṣe ohun tó tọ́ lójú Ọlọ́run. Nígbà tí Ọlọ́run pinnu láti pa àwọn èèyàn búburú tó ń gbé nínú ayé yẹn run, ó fẹ́ láti dáàbò bo Nóà àtàwọn ẹranko tó wà lórí ilẹ̀ ayé. Torí náà, Ọlọ́run sọ fún Nóà pé kó kan ọkọ̀ áàkì, ìyẹn ọkọ̀ ńlá kan tó ní igun mẹ́rin. Ó fẹ́ pa Nóà àti ìdílé rẹ̀ mọ́ nínú ọkọ̀ náà, kí òun àti onírúurú ẹranko bàa lè la ìkún omi tó ń bọ̀ náà já. Nóà ṣe ohun tí Ọlọ́run pa láṣẹ fún un. Láàárín nǹkan bí ogójì sí àádọ́ta ọdún tí Nóà fi kan ọkọ̀ yẹn, ó tún jẹ́ “oníwàásù òdodo.” (2 Pétérù 2:5) Ó kìlọ̀ fáwọn èèyàn nípa Ìkún-omi tó ń bọ̀, àmọ́ wọn ò kọbi ara sí ohun tó ń sọ. Ìgbà tó yá, àkókò tó fún Nóà, ìdílé rẹ̀ àtàwọn ẹranko náà láti wọnú ọkọ̀ áàkì. Nígbà tí wọ́n sì wọnú ẹ̀ tán, Ọlọ́run pa ilẹ̀kùn ọkọ̀ náà dé. Òjò sì bẹ̀rẹ̀ sí í rọ̀.

Òjò náà ya bolẹ̀ gan-an fún ogójì [40] ọjọ́ àti ogójì [40] òru, títí tí omi fi bo gbogbo ilẹ̀ ayé. Àwọn ẹni ibi bómi lọ. Ọ̀pọ̀ oṣù lẹ́yìn náà, omi tó wà lórí ilẹ̀ fọn, ọkọ̀ áàkì náà sì gúnlẹ̀ sórí òkè ńlá kan. Ọdún kan gbáko ni Nóà àtàwọn ẹranko tó wà pẹ̀lú rẹ̀ lò nínú áàkì náà kí wọ́n tó jáde kúrò nínú ẹ̀. Nígbà tí wọ́n jáde kúrò nínú ẹ̀ tán, Nóà rúbọ sí Jèhófà láti fi dúpẹ́ lọ́wọ́ rẹ̀. Inú Ọlọ́run dùn sí ẹbọ Nóà ó sì mú kó dá òun àti ìdílé rẹ̀ lójú pé Òun ò ní fi Ìkún-omi pa gbogbo ohun alààyè tó wà lórí ilẹ̀ ayé run mọ́. Láti fìdí ìlérí yìí múlẹ̀, Jèhófà fi òṣùmàrè sójú sánmà gẹ́gẹ́ bí àmì tó ṣeé fojú rí, èyí tí yóò máa rán an létí ìlérí tí ń tuni nínú yìí.

Lẹ́yìn Ìkún-omi náà, Ọlọ́run tún fún aráyé láwọn òfin tuntun mìíràn. Ó yọ̀ọ̀da fún wọn láti máa jẹ ẹran. Àmọ́, ó ní wọn kò gbọ́dọ̀ jẹ ẹ̀jẹ̀. Ó tún pàṣẹ fáwọn àtọmọdọ́mọ Nóà pé kí wọ́n gbilẹ̀ kárí ayé, àmọ́ àwọn kan lára wọn ṣàìgbọràn. Àwọn èèyàn gbìmọ̀ pọ̀ lábẹ́ aṣáájú kan tó ń jẹ́ Nímírọ́dù wọ́n sì bẹ̀rẹ̀ sí í kọ́ ilé ìṣọ́ gogoro kan sí ìlú Bábélì, èyí tá a wá mọ̀ sí Bábílónì nígbà tó yá. Wọ́n pinnu láti ta ko òfin Ọlọ́run pé kí wọ́n gbilẹ̀ kárí ayé. Àmọ́ Ọlọ́run sọ èrò àwọn ọlọ̀tẹ̀ náà dasán nípa dída èdè kan ṣoṣo tí wọ́n ń sọ rú, ó sì mú kí wọ́n máa sọ onírúurú èdè. Nígbà tó wá di pé wọn ò lóye ara wọn mọ́, wọ́n pa ilé gogoro náà tì, wọ́n sì fọ́n káàkiri ayé.

—A gbé e ka Jẹ́nẹ́sísì orí 6 sí 11; Júúdà ẹsẹ 14, 15.