Àwọn alákòóso ayé ń sapá lójú méjèèjì láti yanjú ìṣòro àìtó oúnjẹ tó kárí ayé. Wọ́n tiẹ̀ máa ń sọ pé láìpẹ́ ebi ò ní pa ẹnikẹ́ni mọ́. a Àmọ́ ṣé lóòótọ́ ni pé ìgbà kan ń bọ̀ tí ebi ò ní pa ẹnikẹ́ni mọ́? Kí ni Bíbélì sọ?

Bíbélì sọ tẹ́lẹ̀ pé àìtó oúnjẹ máa wà lákòókò wa yìí

 Bíbélì sọ tẹ́lẹ̀ pé àìtó oúnjẹ máa wà lákòókò wa yìí, ó sì pè é ní “àwọn ọjọ́ ìkẹyìn.” (2 Tímótì 3:1) Ọlọ́run kọ́ ló fà á tí ebi fi ń pa àwa èèyàn, àmọ́ ó kìlọ̀ fún wa pé ó máa ṣẹlẹ̀. (Jémíìsì 1:13) Ẹ jẹ́ ká wo méjì lára àwọn àsọtẹ́lẹ̀ yìí.

 “Àìtó oúnjẹ . . . máa wà láti ibì kan dé ibòmíì.” (Mátíù 24:7) Àsọtẹ́lẹ̀ yìí jẹ́ ká mọ̀ pé oúnjẹ ò ní tó àwọn èèyàn kárí ayé. Àjọ kan tó ń rí sí bí wọ́n ṣe ń pín oúnjẹ kárí ayé sọ pé: “Pàbó ni gbogbo ìsapá àwọn èèyàn láti fòpin sí àìtó oúnjẹ ń já sí. Kódà, kàkà kí ewé àgbọn dẹ̀, líle ló ń le sí i.” b Ọ̀pọ̀ mílíọ̀nù èèyàn ni ebi àpafẹ́ẹ̀kú ń pa kárí ayé, ọ̀pọ̀ nínú wọn lebi ọ̀hún sì ń pa kú.

 “Sì wò ó! mo rí ẹṣin dúdú kan, òṣùwọ̀n aláwẹ́ méjì sì wà lọ́wọ́ ẹni tó jókòó sórí rẹ̀.” (Ìfihàn 6:5) Nínú àsọtẹ́lẹ̀ yìí, ẹṣin àti ẹlẹ́ṣin ìṣàpẹẹrẹ náà dúró fún ìyàn tó máa mú láwọn ọjọ́ ìkẹyìn. c Òṣùwọ̀n tó wà lọ́wọ́ ẹlẹ́ṣin náà ń ṣàpẹẹrẹ bí wọ́n á ṣe máa yín oúnjẹ lé àwọn èèyàn lọ́wọ́. Bí ẹlẹ́ṣin náà ṣe ń gẹṣin lọ, ohùn kan ń kìlọ̀ pé owó oúnjẹ máa wọ́n gan-an, àti pé káwọn èèyàn má ṣe fi oúnjẹ ṣòfò. (Ìfihàn 6:6) Bọ́rọ̀ sì ṣe rí gẹ́lẹ́ lónìí nìyẹn torí pé ọ̀pọ̀ rẹpẹtẹ èèyàn nì ò lówó tí wọ́n lè fi ra oúnjẹ tó ń ṣaralóore, irú oúnjẹ bẹ́ẹ̀ sì ṣọ̀wọ́n láwọn agbègbè míì.

Bí ọ̀rọ̀ ebi tó ń pa àwa èèyàn ṣe máa yanjú

 Àwọn onímọ̀ sáyẹ́ǹsì sọ pé oúnjẹ tó wà láyé yìí máa tó láti bọ́ gbogbo èèyàn, kódà àá jẹ àjẹyó àti àjẹsẹ́kù. Tó bá jẹ́ bẹ́ẹ̀, kí wá ló dé tí oúnjẹ ò fi tó? Kí sì ni Bíbélì sọ pé Jèhófà d Ẹlẹ́dàá wa máa ṣe láti yanjú ìṣòro yìí?

 Torí pé Ìjọba Ọlọ́run máa fòpin sí ohun tó ń fa ebi, gbogbo èèyàn máa jẹ oúnjẹ aṣaralóore ní àjẹyó àti àjẹṣẹ́kù. (Àìsáyà 25:6) Tó o bá fẹ́ mọ ìgbà tí Ìjọba Ọlọ́run máa ṣe èyí, ka àpilẹ̀kọ náà “Ìgbà Wo Ni Ìjọba Ọlọ́run Máa Ṣàkóso Ayé?”