Nígbà míì, ó máa ń ṣe àwọn kan lára àwọn tó ń jọ́sìn Ọlọ́run bíi pé ṣe ni wọ́n kàn ń fi àkókò àti okun wọn ṣòfò bí wọ́n ṣe ń sapá láti fi àwọn ìlànà Bíbélì sílò láyé wọn. (Sáàmù 73:2, 3) Wọ́n lè bẹ̀rẹ̀ sí í ṣe àwọn nǹkan tó lòdì sí òfin Ọlọ́run lábẹ́lẹ̀, kí wọ́n sì máa díbọ́n bíi pé àwọn ń ṣe dáadáa tí wọ́n bá wà pẹ̀lú àwọn tí wọ́n jọ ń sin Jèhófà.

 Tá a bá rí ẹni tó ń gbé irú ìgbésí ayé yìí tó sì wù ú pé kó jáwọ́, á dáa kí onítọ̀hún ka àpilẹ̀kọ yìí torí ó máa ràn án lọ́wọ́.

Nínú àpilẹ̀kọ yìí

•  Kí lẹnì kan lè máa ṣe táá fi hàn pé ó ń hùwà tí ò dáa lábẹ́lẹ̀?

•  Tí mo bá ń gbé ìgbésí ayé méjì, ṣé ìyẹn túmọ̀ sí pé èèyàn burúkú ni mí?

•  Kí ni mo lè ṣe tí mo bá ń hùwà tí ò dáa lábẹ́lẹ̀?

•  Ohun táwọn ojúgbà rẹ sọ

 Tí ẹnì kan bá ń ṣojú ayé, á máa hùwà tí ò dáa tó bá wà láàárín àwọn ọ̀rẹ́ tí ò ka ìlànà Ọlọ́run sí. Àmọ́ tó bá wà láàárín àwọn tí wọ́n jọ ń sin Jèhófà, á máa ṣe bíi pé òun ń ṣe dáadáa. Àwọn tó ń hu irú ìwà yìí la máa ń sọ pé wọ́n ń hùwà tí ò dáa lábẹ́lẹ̀ tàbí pé wọ́n ń gbé ìgbésí ayé méjì.

 “Tó o bá ń díbọ́n, ṣe lò ń fi irú ẹni tó o jẹ́ pa mọ́ fáwọn èèyàn, ìyẹn ò sì ní jẹ́ kí wọ́n mọ irú ẹni tó o jẹ́ gan-an. Ìwà àìṣòótọ́ gbáà sì nìyẹn jẹ́.”​—Erin.

 Ǹjẹ́ o mọ̀? Ẹni tó bá ń díbọ́n á máa ṣe ohun tí inú Jèhófà ò dùn sí tó bá dá wà.

 “Ọmọ ọdún mẹ́rìnlá (14) ni mí nígbà tí mo bẹ̀rẹ̀ sí í wo àwọn àwòrán tí ò dáa lórí Íńtánẹ́ẹ̀tì, tí mo bá sì wà pẹ̀lú àwọn míì, mo máa ń ṣe bíi pé mo kórìíra ẹ̀. Àmọ́ lọ́kàn mi mo fẹ́ràn kí n máa wò ó.”​—Nolan.

 Ìlànà Bíbélì: “Kò sí ẹni tó lè sin ọ̀gá méjì; àfi kó kórìíra ọ̀kan, kó sì nífẹ̀ẹ́ ìkejì tàbí kó fara mọ́ ọ̀kan, kó má sì ka ìkejì sí.”​—Mátíù 6:24.

 Ó lè má fi gbogbo ara rí bẹ́ẹ̀. Lóòótọ́, àwọn kan ti pinnu pé àwọn ò ní máa fi ìlànà Bíbélì sílò láyé wọn. Ṣé bọ́rọ̀ tìẹ náà ṣe rí nìyẹn? Àbí ó nídìí míì tó o fi ń hu irú ìwà yìí, bí àpẹẹrẹ:

•   Ó máa ń rí bákan lára ẹ láti dá yàtọ̀ láàárín àwọn ọ̀rẹ́ ẹ.

•   Ó máa ń ṣe ẹ́ bíi pé ọ̀rọ̀ ẹ yé àwọn ọmọ ilé ìwé ẹ ju àwọn tẹ́ ẹ jọ wà nínú ìjọ.

•   Ó máa ń ṣe ẹ́ bíi pé o ò ní lè pa gbogbo àṣẹ Ọlọ́run mọ́.

 “Mo ronú pé ara máa ń tu àwọn ọ̀dọ́ kan tí wọ́n bá wà láàárín àwọn tí kò mọyì àwọn ìlànà Jèhófà, torí ìyẹn máa ń jẹ́ kí wọ́n lè ṣe bó ṣe wù wọ́n. Wọn ò sì bìkítà bóyá ohun tí wọ́n ṣe yẹn tọ́ tàbí kò tọ́.”​—David.

 Ká sòótọ́, kò yẹ kẹ́nì kan tìtorí àwọn ohun tá a sọ yìí kó wá máa hùwà tí ò dáa lábẹ́lẹ̀. Síbẹ̀, ohun tá a gbé yẹ̀ wò yìí jẹ́ ká rí i pé àwọn èèyàn dáadáa náà lè ṣe irú àṣìṣe yìí. Tí irú ẹ̀ bá ṣẹlẹ̀ sí ẹ, kí lo lè ṣe?

1.  1. Ronú nípa irú ìgbésí ayé tó ò ń gbé báyìí. Bi ara rẹ pé: ‘Ṣé irú ẹni tó wù mí kí n jẹ́ nìyí? Tí mo bá sì ń bá a lọ báyìí, kí ló máa jẹ́ àbájáde ẹ̀?’

    Ìlànà Bíbélì: “Ọlọ́gbọ́n rí ewu . . . , àmọ́ aláìmọ̀kan kọrí síbẹ̀, ó sì jìyà rẹ̀.”​—Òwe 27:12.

2.  2. Má ṣe fi ohunkóhun pa mọ́. Sọ ohun tó ń ṣẹlẹ̀ fáwọn òbí ẹ tàbí fún ọ̀rẹ́ ẹ kan tí òtítọ́ jinlẹ̀ nínú ẹ̀. Inú wọn máa dùn pé o sọ ohun tó ń ṣẹlẹ̀ fún wọn. Inú wọn á tún dùn pé o fẹ́ ṣe ohun tó tọ́.

    “Bó tiẹ̀ jẹ́ pé ó máa ń nira fún mi láti sọ àṣìṣe mi fáwọn míì, àmọ́ tí mo bá ti ṣe bẹ́ẹ̀, ṣe lara máa ń tù mí pẹ̀sẹ̀.”​—Nolan.

    Ìlànà Bíbélì: “Ẹni tó bá ń bo àwọn ẹ̀ṣẹ̀ rẹ̀ mọ́lẹ̀ kò ní ṣàṣeyọrí, àmọ́ ẹni tó bá jẹ́wọ́, tó sì fi wọ́n sílẹ̀ la ó fi àánú hàn sí.”​—Òwe 28:13.

3.  3. Gba ìbáwí. Ti pé o fi àwọn nǹkan kan pa mọ́ fáwọn òbí ẹ àtàwọn alàgbà, wọ́n lè má fọkàn tán ẹ bíi ti tẹ́lẹ̀ mọ́. Ìyẹn lè mú káwọn òbí ẹ tàbí àwọn alàgbà bá ẹ wí, kí wọ́n sì sọ pé o ò ní lè ṣe àwọn ohun tó o ti ń ṣe tẹ́lẹ̀. Gba ìbáwí náà, kó o sì pinnu pé láti àkókò yẹn lọ wàá “jẹ́ olóòótọ́ nínú ohun gbogbo.”​—Hébérù 13:18.

    Ìlànà Bíbélì: “Fetí sí ìmọ̀ràn kí o sì gba ìbáwí, kí o lè di ọlọ́gbọ́n ní ọjọ́ ọ̀la rẹ.”​—Òwe 19:20.

4.  4. Jẹ́ kó dá ẹ lójú pé Ọlọ́run nífẹ̀ẹ́ ẹ. Torí pé Jèhófà nífẹ̀ẹ́ wa, ó ń kíyè sí gbogbo ohun tá à ń ṣe. Torí náà, tó o bá ń ṣojú ayé pé ò ń jọ́sìn Ọlọ́run tó o sì tún ń hùwà tí ò dáa lábẹ́lẹ̀, ó máa mọ̀, inú ẹ̀ kò sì ní dùn sí ẹ. Àmọ́ ‘torí ó ń bójú tó ẹ,’ ó ṣe tán láti ràn ẹ́ lọ́wọ́ kó o lè tún ìwà ẹ ṣe.​—1 Pétérù 5:7.

    Ìlànà Bíbélì: “Ojú Jèhófà ń lọ káàkiri gbogbo ayé láti fi agbára rẹ̀ hàn nítorí àwọn tí wọ́n ń fi gbogbo ọkàn wọn sìn ín.”​—2 Kíróníkà 16:9.