2 Timuteu 3:1-17
3 Maa haputari rekuawa anyu aramawaa kuri ara rundere uri kuri puxuwerawa.
2 Nyãse kuaita apigawaita aintauyugustari kuri aintapawa, aintaugustari yuiri kuri aintamaa, aintaumanduari kuri purangawaa ainta, puxi kuri aintaumaa amuita, aintaumutenyuntu kuri amuita, tikuri aintauruyari aintapaya, tikuri suuri aintaumaa kuaita umunyawaita puranga, timaa kuri aintauputari aintaumanduari Deus;
3 Tikuri aintaugustari miraita, tikuri aintauputari aintausendu, aintaumbeu kuri puxi amuita rese, tikuri aintaumunya kuaye aintauputariwaa yawe, aintaumpurarakari panye awantu, aintaumuruanyana kuri kuaita purangawaita,
4 Umunyawaita puxi amuita supe, suaxara maya ainta, teresemu ainta aintaumanduarisawa irumu, aintaugustari aintauyumusuuri aintapawa Deus sui.
5 Aintauputari aintauxari yakuawa aintaumanduari Deus, maa timaa aintauxari ukuawasawa uiku aintapia upe. Retirika aintasui kuaita yawewaita.
6 Nyãse yawewaa pitera suiwara kuaita uwikewaita amuita ruka upe, aintauganani kuaita kunyaita pituawaita puxuwerawaita umunyawaita panye maantu aintapuxuwerasawa;
7 Yawewarawate aintauputari aintauyumbue, maa timaa aintaupuderi aintaukuawa kua nyenga supiwa.
8 Aintaumuruanyana kua nyenga supiwa kuaye Jane, Jambre yuiri aintaumuruanyanawaa yawe Muize kuxima. Kuaita apigawaita aintauriku aintaumanduarisawa iyukawaa, tiaintauruyari supiwa;
9 Maa tikuri aintausu aintarunde kiti, nyãse panye kuri aintaukuawa ainta tiresewara aintauruyari ainta, kuaye aintaukuawa yawe kuera aintarese kuaita mukuĩwaita.
Timuteu uruyari puranga
10 Kuiri inde reruyariana puranga kua hambuewaa, remaawana maitaa hamunyawaa, rekuawana kua haputariwaa hamunya, maitaa haruyari yuiri, maitaa hamuturusu sepia, maitaa hagustari yuiri, maitaa yuiri santa haiku;
11 Rekuawate maitaa aintaumuruanyana ixe, maitaa yuiri hapurara, rekuawate maitaa hasasawa Antiukia upe, Ikuniu upe yuiri asui Listra upe yuiri; siya viaji haaguentari aintaumuruanyana rame ixe. Maa yaneruixawa uyurawa ixe aintasui panye.
12 Nyãse panye kuaita uputariwaita umanduari puranga Kristu Jesus rese, aintaumuruanyana kuri ainta.
13 Nyãse kuaita apigawaita puxuwerawaita ugananiwaita puxuwera piri kuri aintauiku, aintauganani kuri amuita, asui amuita kuri uganani ainta.
Deus nyenga
14 Maa inde reiku santa sese kua reyumbuewaa, rexariwaa nepia sese, nyãse rekuawa awataa umbue inde.
15 Asui netainasawa suiwara rekuawa kua aintaumpinimawaa purangawaa, kua uxariwaa rekuawa arama umukaturu inde rexari resewara nepia Kristu Jesus rese.
16 Deus suiwara panye kua nyenga aintaumpinimawaa, puranga umbue yande, umbeu yuiri yande arama yanepuxuwerasawa, uajudari yuiri yande yaxari arama yanepekadu, umbue yuiri yande yawata arama puranga,
17 puranga arama kua apigawa Deus yara, ukuawa arama puranga umunya panye maa purangawaa.
