Juão 5:1-47
5 Asui yawe rire aintaumunya festa kuaita judewita, asui Jesus usu Jeruzalẽ kiti.
2 Ape Jeruzalẽ upe yepe lagu miri kuayentu uvelyaita rukena sui sera Betesda ebreu nyenga rupi, uriku sinku kupiara.
3 Ape aintauwapika siya imãsiwaita sesaimawaita, alejaduita yuiri, membekawaita yuiri ipira.
4 Aintausaru uriri kua lagu miri. Nyãse yepe anju uwiye amu rame uxari arama uriri kua lagu miri, asui awa uwikewaa primeru nyã lagu upe uriri rire purangana ae imãsisawa sui.
5 Ape yepe apigawa imãsiwaa urikuana trinta uitu akayu imãsi.
6 Asui Jesus umaa ixupe ukuawa sese urikuana siya akayu imãsi, asui upurandu ae unyee ixupe:
—Maitaa reputari puranga inde?
7 Asui kua imãsiwaa unyee ixupe:
—Tihariku serumuara uajudari arama ixe hawike lagu miri upe uriri rire ae, asui hasu irumu amu uwike serunde.
8 Asui Jesus unyee ixupe:
—Repuamu, repisika nekama resu arama.
9 Asui aramete kua apigawa umaa purangana ae asui upisika ikama asui upuamu uwatana. Sauru nyã ara.
10 Asui kuaita judewita aintaumbeu ixupe kua Jesus umukaturuwaa:
—Kuiri sauru ara, tipuranga rerasu nekama.
11 Asui usuaxara ainta:
—Kua umukaturuwaa ixe, unyee ixe arama:
—Repisika nekama resu arama.
12 Asui aintaupurandu ae:
—Awataa kua apigawa umbeuwaa inde arama, repisika nekama resu arama?
13 Maa kua umukaturuwaa tiukuawa awataa ae, nyãse Jesus uyuiriana aintasui, nyãse siya miraita akiti.
14 Asui arirewara Jesus usu uwasemu ae templu upe asui unyee ixupe:
—Remaa purangana inde, kuiri remaa nesui tiarama remunya nepuxuwerasawa tiarama puxuwera piri reiku.
15 Asui kua apigawa usu isui asui umbeu kuaita judewita supe arama Jesus kua umukaturuwaa ae.
16 Asui kuaita judewita aintaumuruanyana Jesus nyãse umukaturu ae sauru rame.
17 Maa Jesus unyee ainta supe:
—Sepaya upuraki ate kuiri, ixe yuiri hapuraki.
18 Asui sesewara (arampiri) aintauputari piri aintauyuká ae kuaita judewita nyãse umuaiwa sauru, asui umbeu yuiri ipayate Deus, umbeu yepewasute Deus irumu ae.
Umbeu maa resewarataa uri
19 Asui Jesus unyee ainta supe:
—Supiwa hambeu penye arama:
—Kua taira tiupuderi umunya simutara, anyunte umunya kua umaawaa ipaya umunya, nyãse panye kua ipaya umunyawaa taira umunya yuiri.
20 Nyãse ipaya ugustari taira asui umukame umaa panye umunyawaa, asui umukame yuiri umaa umunyawaa puranga piriwaa isui peakayemu arama pemaa.
21 Nyãse yawe ipaya usupiriwaa yawe umanuwaita umbaka ainta yawete yuiri taira umbaka kuaita uputariwaita.
22 Umbaa ipaya umbeu aintapekadu rese maa uxari taira umbeu arama aintapekadu,
23 Aintaurespetari arama kua taira panye ainta maye aintaurespetariwaa yawe ipaya. Awa tiurespetari kua taira tiyuiri urespetari ipaya kua umunduwaa ae.
24 Supiwa hambeu penye arama:
—Awa usendu senyenga uxari yuiri ipia sese kua umunduwaa ixe uriku mundu nunkawaa upawa, tikuri Deus umbeu ipekadu rese, nyãse usasawana manusawa sui upakawaa kiti.
25 Supiwa hambeu penye arama:
—Amu ara kuri, kuiri yuiri usikana sangawa, kuaita umanuwaita aintausendu kuri inyenga kua Deus raira, asui kuri aintaupaka kuaita usenduwaita ae.
26 Nyãse kuaye upakawaa yawe simutara kua ipaya, yawete yuiri uxariana upaka simutara kua taira.
27 Asui uxari ixupe arama ikirimbawasawa umbeu arama aintaresewara panye, nyãse aete kua unaseriwaa umaa kua ara.
28 Tepeakayemu pesendu, nyãse amu ara kuri panye kuaita iwi kuara upewaita aintausendu kuri inyenga asui kuri aintausemu isui.
29 Asui kuri kuaita umunyawaita puranga aintausemu kuri aintauwike arama mundu upakawaa kiti, asui kuaita umunyawaita puxuwera aintausemu kuri aintaumaa arama mundu puxuwerawa kiti.
30 Timaa nungara hamunya serimutara, anyunte hambeu aintarese kuaye hasenduwaa yawe. Supiwa hambeu aintarese nyãse timaa hamunya kuaye haputariwaa yawe anyunte haputari hamunya kuaye uputariwaa yawe kua umunduwaa ixe.
31 Hambeu rame maa seresepawate timaa supiwa kua hambeuwaa.
32 Aikuete yepe umbeuwaa serese asui hakuawa supiwa umbeuwaa serese.
33 Penye pemundu aintaupurandu Juão irumu asui umbeu penye arama inyenga supiwa.
34 Timaa haruyari apigawa umbeuwaa serese, maa hambeu penye arama kua hambeuwaa peyumukaturu arama.
35 Aete yepe turi sendiwaa umuturi puranga, asui peputari peyumusuuri kuera kuaira umuturiwaa upe.
36 Maa aikue yepe puranga piriwaa Juão sui umbeuwaa serese, nyãse kua muraki sepaya uxariwaa hamunya arama aete kua umbeuwaa serese sepaya umunduwaa ixe.
37 Aete kua sepaya umunduwaa ixe aete kua umbeuwaa serese. Nẽ mairame pesendu upurungita tiyuiri pemaa ae.
38 Tiyuiri inyenga uiku pepia upe nyãse tipexari pepia sese kua umunduwaa.
39 Pemaate aintaumpinimawaa Deus nyenga upe nyãse pemanduari pewasemu arama mundu nunkawaa upawa ipupe, aete kua umbeuwaa serese.
40 Maa tipeputari peyuiri sepiri periku arama mundu nunkawaa upawa.
41 Tihareseberi kua purangawaa apigawaita umeewaa ixe arama.
42 Hakuawate tiperiku pepia upe kua Deus ugustarisawa.
43 Hayuiri sepaya rera rese asui tipesuanti ixe, maa uri rame maa yepe sera resepawa anyunte maa pesuanti ae.
44 Maitaa maa pepuderi pexari pepia puranga penye pereseberiwaita amu umeewaa penye arama purangawaa, maa tipesikari kua purangawa uriwaa isui kua Deus yepenyuwaa?
45 Tepemanduari hambeu puxi peresewara sepaya supe, aete kua Muize pexariwaa pepia sese, aete umbeuwaa puxi perese.
46 Pexari rame maa pepia Muize rese pexari maa pepia serese yuiri nyãse kuxima umpinima serese.
47 Tirame maa peruyari umpinimawaa, maitaa maa peruyari kuri senyenga.
