Deus umbeu siya arama Abraão anamaita. Abraão anamaita, aintá israelwaraita kuera. Jeová uparawaka aintá mayé imiraita ta uadorari arama aé. Ta urikuté ma ta usendu Deus lei asuí ta uadorari aé mayé uputariwaá. (Salmo 147:19, 20) Pañhe amu miraita ta upuderi kuera ta uriku Deus ajuda israelwaraita rupí.​—Releri Galasiawaraita 3:8.

Deus uparawaka israelwaraita mayé umbeusáita sesé. Amu miraita ta upuderi kuera ta ukuá Jeová resé israelwaraita rupí. Maã usasá kuera ta irum uxári yakuá puranga yandé arama yasendu ramé Jeová lei. — Deuteronômio 4:6.​—Releri Ato 1:8.

Ariréwara israelwaraita ta upituú ta usendu Deus Ñheenga. Ape Jeová tiã uputari aintá mayé umbeusáita sesé. Deus uparawaka amu miraita. (Mateu 21:43; 23:37, 38) Kuá tempo upé Jeová uriku cristão supíwaita mayé umbeusáita sesé.​—Releri Ato 15:14, 17.

Jesus umbué idiscípuloita ta umbeu arama Deus Reino resé asuí umundú ta ‘umbué pañhe kuá mundo upé asuí ta ubatizari aintá’. (Mateu 10:7, 11; 24:14; 28:19, 20) Ikentuwana upawa arama kuá mundo, asuí cristão supíwaita ta umbeu ta uiku Deus Reino resé pañhe kuá mundo upé. Kuíri siya miraita pañhe tetamaita suíwara, aintá Jeová miraita. (Apokalipse 7:9, 10) Asuí yuíri, kuáita cristão supíwaita, ta uyugustari asuí ta uyuajudari ta uiku resewara yepéwasu. Pañhe kuá mundo upé ta uyumbué yepéwasu Bíblia resé.​—Releri Ebreoita 10:24, 25.

Akayu 1870 suíwara, yepéyepé uyumbuéwaita Biblía ta uyupiru ta ukuá píri ma resé Biblía umbuéwaá. Ta ukuá kuera Jesus uputari cristãoita ta ukuntari Deus Reino resé. Ape, ta uyupiru ta umbeu kuá Reino resé pañhe kuá mundo upé. Akayu 1931 upé, ta uyupiru ta usari kuá rera Umbeusáita Jeová resé.​—Releri Ato 1:8; 2:1, 4, 11; 5:42.

Pañhe tempo Jesus umundú cristãoita supíwaá resé. Kuxiíma kuera, aé usari yepéyepé ta umuñhakunta asuí ta umbué arama congregaçãoita. Aintá apóstoloita asuí yepéyepé anciãoita. (Ato 16:4, 5) Yané tempo upé, aikué yepéyepé apigáita ukuáwaita puranga ta umuñhakuntawaá kuá muraki Umbeusáita Jeová resé ta umuñhãwaá. Ta useruka aintá Umuñhakuntawaita Yané Resé. Ta umuñhakunta yamuñhã arama asuí yamusasá arama paperaita Bíblia resé usasá píri 1000 ñheengaita rupí pañhe kuá mundo upé. Umuñhakuntawaita Yané Resé ta usari Bíblia ta uajudari asuí ta umbué arama quase 120 mil congregaçãoita. Muíri congregaçãoita upé, apigáita purangawaá ta rikusá ta upuraki mayé anciãoita. Aintá ta ugustari asuí ta umuñhakunta puranga Deus miraita resé.​—Releri 1 Pedro 5:2, 3.

Umbeusáita Jeová resé ta umbeu Deus Reino resé. Yamuñhã mayé apóstoloita yawé, yasu ramé ukaita rupí. (Ato 20:20) Yambué yuíri Biblía resé pañhe awá supé ta uputariwaá ta uyumbué Deus resé. Ma Umbeusáita Jeová resé aintá ti añhu yepé religião. Yandé yepé anama asuí yariku yepé paya usaisuwaá. Yandé imuita asuí rendiraita yayumuñhakuntawaá yané resé pawaté. (2 Tesalonikawaraita 1:3) Yandé yepé anama surí píriwaá kuá mundo upé, ñhasé yandé Deus miraita, yamuñhãwaá uputariwaá asuí yajudari amu miraita.​—Releri Ato 20:35; 1 Pedro 2:9.