Awá usú iwaka kití?
Maã Bíblia umbeu
Deus uparawaka yepeyepé cristãoitá ta umuñhãwaá ivontade ta uviveri arama iwaka kití ta umanῦ riré. (1 Pedro 1:3, 4) Deus uparawaka riré kuaitá, aintá ti ta upoderi ta uxari ta usendú aé ne ta uxari ta umuñhã ivontade. Ti ramé ta umuñhã kuayé tiã ta usú ta upoderi ta uviveri iwaka upé. — Efezowaraitá 5:5; Filipowaraitá 3:12-14.
Maã uparawakawaitá ta usú ta umuñhã iwaka upé?
Aintá ta usú ta upurakí Jesus irum mayé rei asuí sacerdote mil akayú rupí. (Apokalipse 5:9, 10; 20:6) Aintá ta usú ta uikú “iwaka pisasuwaá” upé, kuá uputari umbeu yepé governo iwakapura, asuí ta usú ta ugovernari “mundo pisasuwaá” resé, kuá uputari umbeu miraitá ta usuwaá kurí ta uviveri iké iwí upé. Awaitá ta usuwaá ta ugovernari iwaka kití ta usú ta uajudari miraitá ta upitá arama masiíma, mayé Deus uputari kuxiíma suíwara. — Izaía 65:17; 2 Pedro 3:13.
Muíri miraitá ta usú ta upaka ta uviveri arama iwaka kití?
Bíblia uxari yakuá 144 mil miraitá ta usú ta upaka ta uviveri arama iwaka kití. (Apokalipse 7:4) Apóstolo João umbeu Apokalipse 14:1-3 upé umaãwaá kuá “Cordeiro uikú iwitera resé serawaá Sião, aintá irum kuaitá cento quarenta quatro mil”. Ikérupiwaá upé, “kuá Cordeiro” João umaãwaá aeté Jesus upaka riré. (João 1:29; 1 Pedro 1:19) Kuá “iwitera Sião” uputari umbeu Jesus asuí 144 mil miraitá ta urikú kirimbasá ta ugovernari arama iwaka kití. — Salmuitá 2:6; Ebreoitá 12:22.
Ta useruka kuá cristãoitá Deus “uparawakawaitá” ta ugovernari arama Jesus iwaka kití mayé “muíriirawaitá”. (Apokalipse 17:14; Luka 12:32) Kuá uputari umbeu aintá añhῦ yepeyepé Jesus discípuloitá suí. — João 10:16.
Tiwaá supí awá resé usú iwaka kití
Tiwaá supí: Pañhe miraitá purangawaá ta usú iwaka kití.
Supiwaá: Deus uprometeri siya miraitá purangawaá ta usú ta uviveri pañhe ara iwí upé. — Salmuitá 37:11, 29, 34.
Jesus umbeu: “Tiré awá uyupiri iwaka kití.” (João 3:13) Aé umbeu yuíri mira purangawaitá ta umanῦwaá isunderé, mayé Abraão, Moisés, Jó asuí Davi, ti ta usú iwaka kití. (Ato 2:29, 34) Aintá ta usarú ta upaka ta uviveri arama kurí iwí upé. — Jó 14:13-15.
Bíblia umbeu kuaitá yepesawaitá Deus upakawaá. (Apokalipse 20:6) Kuá uxari yakuá aé usú umbaka amú miraitá, iké iwí upé.
Bíblia umbué Deus Reino umunduwaá upé, “ti kurí yamaã manusawa”. (Apokalipse 21:3, 4) Iwaka upé ti yamaã manῦsá, yawé arama kuá promessa usú uyumuñhã iketé iwí upé.
Tiwaá supí: Yandé yapoderi yaparawaka sá yasú yaviveri iwí upé u iwaka upé.
Supiwaá: Deus uparawaka awaitá ta usú ta urikú “kuá sikuyaraímawaá Deus uxariwaá”. Kuá uputari umbeu Deus uparawaka awá usú uviveri iwaka kití. (Filipowaraitá 3:14) Amuramé yepé mira uputari uviveri iwaka kití, ma añhῦ Deus upoderi uparawaka mamé aé usú uviveri. — Mateu 20:20-23.
Tiwaá supí: Ti puranga yaviveri kurí iwí upé. Añhῦ usú uviveri iwí upé awá ti umereceri uviveri iwaka upé.
Supiwaá: Deus useruka awaitá ta usuwaá ta uviveri pañhe ara iwí upé mayé “se miraitá” asuí “Jeová uabençoariwaitá”. (Izaía 65:21-23) Kuá miraitá ta usú ta upoderi ta umuñhã maã Jeová uputariwaá miraitá supé arama: ta uviveri masiíma asuí pañhe ara yepé paraíso upé iké iwí upé. — Gênesi 1:28; Salmuitá 115:16; Izaía 45:18.
Tiwaá supí: Kuá número 144 mil uikuwaá Apokalipse upé, aé simbólico umbaá literal.
Supiwaá: Apokalipse upé aikué siya número simbólico, ma yepeyepé aintá literal. Yepé exemplo, Apokalipse umbeu ‘kuá Cordeiro dozewaitá’ apóstoloitá resé. (Apokalipse 21:14) Remaã maã uxari yakuá kuá 144 mil aé yepé número literal.
Apokalipse 7:4 umbeu “kuaitá aintá umusangawaitá selo irum”, u Deus uparawakawaá ta uviveri arama iwaka kití, aintá 144 mil miraitá. Ariré Apokalipse umbeu aikué amú bando miraitá. Yepé versículo umbeu “hamaã siyawaá mira tiawá upoderi upapari muíri aintá siyasawa”. Deus usú usalvari aintá yuíri. (Apokalipse 7:9, 10) Sá kuá número 144 mil aé simbólico, Bíblia ti uprecisari umbeu amú bando miraitá resé. a
Apokalipse umbeu yuíri kuá 144 mil aintá yepesawaitá Deus upiripanawaá “miraitá piterupi suí”. (Apokalipse 14:4) Kuá ñheenga yepesawaitá uxari yakuá aintá yepeyepé ma aikué amú miraitá. Ape umbeu awá resé usuwaá ugovernari Jesus irum iwaka kití. Aintá añhῦ yepeyepé ñhãsé aikué siya miraitá ta usuwaá ta uviveri iwí upé. — Apokalipse 5:10.
a Yepé umbuesara iserawaá Robert L. Thomas umbeu kuayé kuá número 144 mil resé uikuwaá Apokalipse 7:4 upé: “Kuá número aé literal, ma Apokalipse 7:9 ti umbeu yepé número específico resé. Sá kuá número 144 mil aé simbólico, ape ti aikué ne yepé número literal Apokalipse upé.” — Revelation 1-7: An Exegetical Commentary (Apokalipse 1-7: yepé Comentário Exegético), página 474.
Indé repoderi regustari yuíri
ESSENTIAL BIBLE TEACHINGS
Maã taá Deus Reino?
Umbué ramé kuera miraita, Jesus ukuntari píri Deus Reino resé amu maã suí. Até kuíri miraita ta upurandu úri arama kuá Reino.