Teʼ yáax jaats tu taasaj le xookaʼ tsoʼol tiʼ bix u meyaj jw.org utiaʼal u naʼaksaʼal videoʼob yéetel publicaciónoʼob ich Internet. Teʼ kaʼa jaatsaʼ yaan k-ilik bix u yojéeltik u testigoʼob Jéeoba le baʼaxoʼob ku aktáantik u maasil sukuʼunoʼob tiʼ tuláakal yóokʼol kaaboʼ.

Túumben noticiaʼob: Teʼ jaats «Noticiaʼob yoʼolal u testigoʼob Jéeoba» jeʼel u béeytal a wilik túumben noticiaʼob yoʼolal le sukuʼunoʼob yanoʼob tiʼ tuláakal yóokʼol kaaboʼ. Teʼeloʼ ku tsʼaʼabal ojéeltbil le tuʼux ku yúuchul junpʼéel nojoch loob, bix u yáantaʼal le sukuʼunoʼoboʼ, bix u prohibirtaʼal le predicación tumen le autoridadoʼoboʼ, bix u kʼaʼalal cárcel le sukuʼunoʼoboʼ yéetel uláakʼ baʼaloʼob ku yúuchloʼob. Por ejemplo tu kʼiinil 21 tiʼ marzo tiʼ 2017, tsʼaʼab u yojéelt tuláakal u testigoʼob Jéeobaeʼ tsʼoʼok u prohibirtaʼal u adorartaʼal Dios tu luʼumil Rusia. Tsʼoʼoleʼ invitartaʼaboʼob xan u tsʼíibtoʼob cartaʼob tiʼ le máaxoʼob ku meyajoʼob ichil u Gobiernoil Rusiaoʼ.

U notificaciónil junpʼéel túumben noticia: Tu mesil julio tiʼ 2017 ka yáax chíikpaj u notificaciónil junpʼéel túumben noticia teʼ sitio jw.org. Le notificaciónoʼobaʼ ku meyaj utiaʼal u yaʼalaʼal tiʼ le sukuʼunoʼob le baʼaxoʼob ku yúuchul tiʼ tuláakal yóokʼol kaaboʼ, beyoʼ maʼ tsaaj u yokloʼob teʼ jaats «Noticiaʼob yoʼolal u testigoʼob Jéeoba». Por ejemploeʼ kéen jáalkʼabtaʼak juntúul sukuʼun kʼalaʼan cárceleʼ ku chíikpajal junpʼéel notificación. Lelaʼ bey úuchik tu kʼiinil 31 tiʼ diciembre tiʼ 2020 le ka jáalkʼabtaʼab sukuʼun Félix Majamadíyev tiʼ junpʼéel cárcel yaan Rusiaoʼ, yoʼolal lelaʼ béeychaj u kaʼa antal yéetel Yevguenia, u yatan. Le táan le pandemiaoʼ le notificaciónoʼobaʼ meyajnaj utiaʼal u tsʼaʼabal ojéeltbil tsʼoʼok u naʼaksaʼal teʼ sitio jw.org le jaatsoʼob tiʼ le asamblea regionaloʼ. Meyajnaj xan utiaʼal u tsʼaʼabal ojéeltbil le ka tu yaʼalaj le Cuerpo Gobernante tiʼ u testigoʼob Jéeoba yaan u káajal k-kaʼa k-muchʼikba, k-predicar joonaj joonajil bey xan yéetel le carritoʼoboʼ. Yaʼab tiʼ le notificaciónoʼobaʼ chíikpajoʼob teʼ kʼiin ka úuchoʼ. Por ejemplo tu mesil junio tiʼ 2018, séeb úuchik u tsʼaʼabal ojéeltbil le baʼax tu chʼaʼtuklaj le Tribunal Constitucional yaan Corea del Suroʼ. Tu yaʼaleʼ tsʼoʼok u chʼaʼtuklaʼal junpʼéel baʼal mix máak páaʼtik, aʼalaʼabeʼ minaʼan mix junpʼéel ley aʼalik wa maʼ tu páajtal u beetik máak yaanal meyaj tu lugar u beetik u servicio militar.

U informe le Cuerpo Gobernanteoʼ: Tu kʼiinil 18 tiʼ marzo tiʼ 2020, naʼaksaʼab u yáax informe le Cuerpo Gobernante teʼ sitio jw.org. Le informeaʼ beetaʼab utiaʼal u líiʼsaʼal u yóol le sukuʼunoʼob le táan le pandemia yoʼolal le COVID-19. Yaʼab tiʼ toʼoneʼ k-uʼuyikba jeʼex le kiikaʼ, letiʼeʼ tu yaʼalaj: «Kéen in wuʼuy le informeoʼ bey ka yanak tin wéetel juntúul jach maʼalob amigo utiaʼal u kanáantkeneʼ. Wa maʼ úuchik u tsʼaʼabaltoʼon le áantajaʼ maʼ xaaneʼ bejlaʼa minaʼanen wayeʼ. Jach tu yorail úuchik u kʼuchultoʼon le informeʼoboʼ». Tak bejlaʼeʼ tsʼoʼok u jóoʼsaʼal 28 u pʼéelal informeʼob, leloʼobaʼ tsʼoʼok u jóoʼsaʼaloʼob jach teʼ súutuk kʼaʼabéetoʼ.

Bejlaʼeʼ le yóokʼol kaabaʼ táan u maas kʼastal, le oʼolal láalaj hora ku kʼuchultoʼon noticiaʼob tuʼux ku yúuchul baʼaloʼob kʼaastak. Yoʼolal leloʼ istikyaj u kaxtik máak noticiaʼob tuʼux ku yaʼalaʼal u jaajil. Pero jach kiʼimak k-óol tumen teʼ sitio jw.org, le sukuʼunoʼoboʼ jeʼel u páajtal u yilkoʼob noticiaʼob tuʼux ku yaʼalaʼal u jaajileʼ. Leloʼ ku yáantkoʼon utiaʼal ka pʼáatkoʼon tranquiloil yéetel utiaʼal k-eʼesik k-kʼubmaj k-óol tiʼ Jéeoba Dios (Isaías 30:15).

• Videoʼob ku descargartaʼal cada mes

• Jaytúul máakoʼob ku yookloʼob sáamsamal teʼ sitio ichil junpʼéel mesoʼ

• Marzo tiʼ 2017, ku invitartaʼal le sukuʼunoʼob u tsʼíibtoʼob cartaʼob tiʼ u Gobiernoil Rusia

• Marzo tiʼ 2020, ku naʼaksaʼal u yáax informe le Cuerpo Gobernanteoʼ

• Marzo tiʼ 2022, aʼalaʼab yaan u káajal k-kaʼa muchʼikba teʼ salónoʼoboʼ

• Junio tiʼ 2022, aʼalaʼab yaan u káajal k-kʼaʼaytaj yéetel le carritoʼoboʼ

• Junio tak agosto tiʼ 2022, ku naʼaksaʼal teʼ sitio tuláakal le jaatsoʼob tiʼ le asamblea regionaloʼ