Tiʼ jujunpʼéel lugaroʼob yanoʼob Ucraniaeʼ yoʼolal le yaʼabkach bombaʼob ku waʼakʼaloʼ tsʼoʼok u kʼaskúuntaʼal le carreterraʼoboʼ, le puenteʼoboʼ yéetel le tuʼuxoʼob ku chʼaʼabal corrienteoʼ. Kex beyoʼ le sukuʼunoʼoboʼ maʼ xuʼuluk u muchʼkubaʼob mix u predicaroʼobiʼ.

Anastasia yéetel Déboraeʼ, kaʼatúul precursoraʼob kajaʼanoʼob tu kaajil Kiev, ku yaʼalikoʼobeʼ yaan kʼiineʼ 12 horas minaʼantiʼob corriente. Le oʼolal chéen pʼel u suut le corrienteoʼ ku cargarkoʼob le baʼaxoʼob ku meyajtiʼob utiaʼal u yilkoʼob le reuniónoʼ. Tsʼoʼoleʼ maases ku conectarkubaʼob yéetel u datosoʼob, yaan horaeʼ jach chéen pʼel u tsʼoʼokol le reuniónoʼ ku xuʼupul u datosoʼob.

Uláakʼ baʼal jach istikyaj u yilik le sukuʼunoʼoboʼ letiʼe u pʼáatal minaʼantiʼob calefacción le kéen xiʼik le corrienteoʼ. Jujuntúul sukuʼunoʼobeʼ yaantiʼob u plantail luz yéetel letiʼe ku meyajtiʼob utiaʼal le calefacciónoʼ. Uláakʼoʼob xaneʼ ku binoʼob yiknal u láakʼtsiloʼob tumen tiʼ letiʼobeʼ yaan calefacción. Pero yaan uláakʼ sukuʼunoʼobeʼ ku muʼyajtikoʼob le keʼeloʼ. Yaaske u maas yaʼabil le sukuʼunoʼoboʼ de gas u calefacciónoʼob, le oʼolal maʼatech u jach muʼyajtikoʼob le keʼeloʼ.

Irina, juntúul precursora yaan Ivano-Frankivskeʼ ku yilik maʼ u sen lúubul u yóol yoʼolal le baʼaxoʼob ku yúuchloʼ. Letiʼeʼ ku yaʼalik: «Yaan baʼaxoʼob maʼ tu páajtal in controlartik, le oʼolal kin tratartik maʼ in chiʼichnaktal tu yoʼolaloʼob. Teneʼ uts tin tʼaan in tuukul chéen tiʼ le baʼaxoʼob tiaʼan tin kʼab in beetkoʼ. Por ejemploeʼ kin tuklik bey baʼax jeʼel u páajtal in beetik le kéen xiʼik le corrienteoʼ yéetel kin wilik in láaj descargartik le publicaciónoʼob ku meyajtenoʼ».

Kex yaʼab baʼaxoʼob táan u aktáantik le sukuʼunoʼob yanoʼob Ucraniaoʼ láayliʼ u tsʼaamaj u yóoloʼob u meyajtoʼob Jéeobaeʼ. K-ojleʼ yaan u seguer u bendecirtaʼaloʼob tumen letiʼobeʼ maʼ tu xuʼulul u beetkoʼob «baʼax maʼalob» (Gálatas 6:9).

Tak tu kʼiinil 6 tiʼ diciembre tiʼ 2022, tsʼaʼab junpʼéel informe yoʼolal le baʼax táan u yúuchul Ucraniaoʼ. Le informeaʼ tsʼaʼab tumen le sukuʼunoʼob yanoʼob teʼeloʼ, chéen baʼaleʼ como istikyaj u comunicarkubaʼob yéetel u maasil sukuʼunoʼobeʼ maʼ xaaneʼ maas yaʼab le sukuʼunoʼob tsʼoʼok u afectartaʼaloʼoboʼ.

• 47 u túulal u testigoʼob Jéeoba tsʼoʼok u kíimloʼob.

• 97 u túulal Testigoʼob úuch wa baʼax loobil tiʼob.

• 11.537 Testigoʼobeʼ kex maʼ tu pʼatoʼob u luʼumoʼobeʼ tu kaxtoʼob tuʼux u binoʼob utiaʼal u taʼakikubaʼob.

• 590 najoʼob jach júutoʼob.

• 645 najoʼob jach kʼaschajoʼob.

• 1.722 najoʼob yaan baʼax kʼaskúuntaʼab tiʼob.

• Siete salónoʼob jach kʼaschajoʼob.

• 19 salónoʼob jach júutoʼob.

• 68 salónoʼob yaan baʼax kʼaschaj tiʼob.

• 27 Comitéʼob tiʼ Socorro táan u yáantajoʼob tu luʼumil Ucrania.

• 54.212 u testigoʼob Jéeoba tsʼoʼok u yáantaʼaloʼob tumen le comitéʼob utiaʼal u kaxtikoʼob tuʼux u pʼáatloʼoboʼ.

• 26.811 Testigoʼob tsʼoʼok u binoʼob táanxel luʼumil yéetel táan u yáantaʼaloʼob tumen u maasil sukuʼunoʼob.