Tsʼoʼok diez años káajak u meyajtoʼon le carritoʼoboʼ. Le carritoʼobaʼ maʼ tu pʼáatal maʼ u yilaʼaloʼob, tumen tiaʼanoʼob tuláakal tuʼux tiʼ tuláakal yóokʼol kaabeʼ. Chéen u paktaʼal le carritoʼoboʼ le máakoʼoboʼ u yojloʼob máaxoʼoniʼ yéetel baʼax táan k-beetik. Le carritoʼoboʼ jach jatsʼutstakoʼob yéetel fácil u usartaʼaloʼob. Juntúul kiik kajaʼan Polonia ku kʼaabaʼtik Asenataeʼ ku yaʼalik: «Le carritoʼoboʼ jach fácil u usartaʼaloʼob tumen jeʼel u páajtal u bisaʼaloʼob jeʼel tuʼuxakeʼ».

 ¿Bix wal ta tʼaan beetaʼabik le carritoʼoboʼ yéetel bix u kʼuchul tuláakʼ tuʼuxoʼob?

 Tu añoil 2001, le Cuerpo Gobernanteoʼ tu yaʼalaj tiʼ le sukuʼunoʼob kajaʼanoʼob Franciaoʼ jeʼel u páajtal u meyajtiʼob uláakʼ baʼaloʼob utiaʼal u tsikbaltikoʼob u tʼaan Dios teʼ tuʼux yaʼab u máan máakoʼ. Ichil le baʼaxoʼob meyajnajtiʼoboʼ tiaʼan le carritoʼoboʼ, maletaʼob yaan u ruedailoʼob yéetel carritoʼob jeʼex le ku meyaj utiaʼal u bin máak maanoʼ. Ka máan kʼiineʼ le sucursaloʼ tu yéeyaj junpʼéel tiʼ le baʼaxoʼob tu probartoʼob utiaʼal ka meyajnaktiʼoboʼ. Le sukuʼunoʼoboʼ máan años táan u predicaroʼob yéetel le carritoʼoboʼ.

 Jach maʼalob binik tiʼ le sukuʼunoʼob yéetel le prueba tu beetoʼob tu luʼumil Franciaoʼ. Yoʼolal leloʼ tu añoil 2011, le Cuerpo Gobernanteoʼ tu yaʼalaj jeʼel u béeytal u yúuchul predicar yéetel le carritoʼoboʼ bey xan yéetel mesaʼob teʼ tuʼux yaʼab u máan máak tu kaajil Nueva Yorkoʼ (Estados Unidos). Le precursoroʼob táakpajoʼoboʼ tu tsʼáajoʼob cuentaeʼ maʼalob bix beetaʼanik le carritoʼoboʼ tsʼoʼoleʼ jach séeb jeʼel u bisaʼaloʼob wa tuʼuxeʼ. Pero tu yaʼaloʼob xan baʼaxoʼob jeʼel u maas maʼalobkíintaʼaleʼ. Le carritoʼob yáax beetaʼaboʼoboʼ de cheʼ, leloʼ ku beetik u difíciltal u naʼaksaʼal wa u yéemsaʼal tiʼ escaleras. Le oʼolal maas maʼalobkíintaʼaboʼob utiaʼal u fáciltal u bisaʼaloʼob jeʼel tuʼuxakeʼ yéetel utiaʼal maʼ u jáan puʼulul tumen iikʼ. U ruedailoʼobeʼ maas nuuktak úuchik u beetaʼaloʼob utiaʼal maʼ u jach kʼoʼokʼolkubaʼob bey xan utiaʼal u béeytal u bisaʼal teʼ tuʼux maʼ jach maʼalob le bejoʼoboʼ. Tsʼaʼab xan uláakʼ u chan cajail utiaʼal u tsʼaʼabal u maasil publicaciónoʼob.

 Jach maʼalob bix binik tiʼ le sukuʼunoʼob yéetel le túumben forma bix u yúuchul predicaroʼ. Le oʼolal tu añoil 2012, le Cuerpo Gobernanteoʼ tu yaʼalaj jeʼel páajtal u meyaj carritoʼob utiaʼal u yúuchul predicar tiʼ tuláakal yóokʼol kaabeʼ. Chʼaʼab xan junpʼéel acuerdo yéetel juntúul máak utiaʼal ka u beet yaʼab carritoʼob yéetel materialoʼob maʼ jach aaltakoʼobiʼ tsʼoʼoleʼ maʼ tu séeb kʼastaloʼob.

 Jeʼex u máan le tiempooʼ tsʼoʼok u maas maʼalobkíintaʼal bix u beetaʼal le carritoʼoboʼ. Jeʼex tu añoil 2015, joʼopʼ u beetaʼal u funda de plástico utiaʼal maʼ u jáan chʼuʼulul. Juntúul kiik ku kʼaabaʼtik Dina kajaʼan Georgiaeʼ ku yaʼalik: «Yoʼolal u fundail le carritoʼoboʼ maʼ tu chʼuʼulul le publicaciónoʼoboʼ». Tu añoil 2017, tiʼ jujunpʼéel idiomaʼobeʼ káaj u meyaj le carteloʼob de imánoʼ. Tomasz juntúul sukuʼun káajaʼan Poloniaeʼ ku yaʼalik: «Jach istikyaj kaʼach u kʼeʼexel u cartelil le carritoʼobo. Pero le de imánoʼoboʼ jach chéen chʼaʼabil». Utiaʼal maʼ u séeb kʼastal le carritoʼoboʼ tu añoil 2019, kʼeʼex u materialil yéetel bix u beetaʼaloʼob.

 Juntúuliliʼ máak beetik le carritoʼob ku meyaj tiʼ tuláakal yóokʼol kaaboʼ. Cada junpʼéel tiʼ le carritoʼoboʼ ku tojoltik kex 800 pesos, baʼaleʼ junpáay u tojol u bisaʼaloʼob yéetel ku yantal xan uláakʼ gastoʼob. Tak bejlaʼeʼ tsʼoʼok u túuxtaʼal máas tiʼ 420,000 carritoʼob tiʼ tuláakal le múuchʼuliloʼob yaan teʼ yóokʼol kaabaʼ, tsʼoʼok xan u xuʼupul máas tiʼ 270 millones taakʼin utiaʼal u maʼanloʼob.

 Utiaʼal maʼ u jóokʼol jach koʼojileʼ ku wóol mantaʼal yaʼab carritoʼob beyoʼ ku kanáantaʼal le donaciónoʼoboʼ. Tsʼoʼoleʼ bejlaʼeʼ le múuchʼuliloʼoboʼ en vez u manikoʼob junpʼéel túumben carritoeʼ ku mankoʼob chéen le piezaʼob ku kʼastal tiʼoʼ.

 Le sukuʼunoʼoboʼ jach uts tu yichoʼob u predicaroʼob yéetel le carritoʼoboʼ. Martina kajaʼan Ghanaeʼ ku yaʼalik: «U suukileʼ kéen jóokʼkoʼon predicareʼ toʼon kaxtik le máakoʼoboʼ. Pero baʼax máas jatsʼuts in wilik le kéen jóokʼkoʼon predicar yéetel le carritoʼoboʼ letiʼe máakoʼob ku náatsʼloʼob t-iknaloʼ. Tsʼoʼoleʼ tak chéen u yilkoʼob le carritoʼoboʼ tsʼoʼok k-predicartiʼob».

 Tiʼ uláakʼ junpʼéel u luʼumil Áfricaeʼ, juntúul máakeʼ náatsʼ yiknal le carritooʼ ka tu bisaj jejeláas publicaciónoʼob ichil u idioma. Ka máan junpʼéel semanaeʼ le máakeʼ suunajiʼ ka tu yaʼalaj tiʼ le sukuʼunoʼoboʼ: «Tsʼoʼok in láaj xokik le publicaciónoʼoboʼ, le baʼax ku yaʼalikoʼ jach jaaj. Yaan xan in bisik tin kaajal utiaʼal ka u xok in familia». U familia le máakaʼ kex 500 kilómetros (311 millas) tuʼux kajaʼanoʼob, ka máan dos meseseʼ le máakaʼ suunaj tuʼux yaan le carritooʼ ka tu yaʼalaj: «Tin kaajaleʼ tsʼoʼok u láaj xoʼokol le publicaciónoʼoboʼ, jach utschaj tu yichoʼob le baʼax ku yaʼalikoʼ, tsʼoʼok u chʼaʼtuklikoʼob u beetkubaʼob u testigo Jéeoba. Pero yaʼab preguntaʼob yaantiʼob. Jeʼex por ejemploeʼ u yojloʼobeʼ utiaʼal u yokjaʼ máakeʼ kʼaʼabéet u tʼuʼubul tuláakal u wíinklil ichil le jaʼoʼ, chéen baʼaleʼ le tuʼux kajaʼanoʼonoʼ minaʼan ríoʼobiʼ. ¿Kʼaʼabéet wa túun u taaloʼob tak way utiaʼal u yokjaʼobeʼ?». Le sukuʼunoʼoboʼ tu kaxtoʼob juntúul precursor tʼanik u idioma le máakaʼ utiaʼal ka seguernak u yáantaʼal. Desde le jeʼeloʼ maʼ xuʼuluk u xook tu yéeteliʼ.

 Jach jatsʼuts bix táan u meyaj le carritoʼob utiaʼal u tsʼaʼabal ojéeltbil u tʼaan Dios tiʼ tuláakal yóokʼol kaab «¡utiaʼal ka ojéeltaʼak tumen u kajnáaliloʼob tuláakal kaajoʼob, le kéen tsʼoʼokkeʼ ku taal u xuul!» (Mateo 24:14). Le carritoʼob ku meyajtoʼonoʼ ku béeytal u maʼanal chéen yoʼolal le donaciónoʼoboʼ, yaʼab tiʼ lelaʼ ku túuxtaʼal tiʼ donate.dan124.com. ¡Jach diosboʼotik yoʼolal le donaciónoʼob ka tsʼáaikeʼexoʼ!