¡MAʼ U NÁAYAL A WÓOLEʼEX!
¿Máax ken a yéey utiaʼal ka u gobernartech? | ¿Baʼax ku yaʼalik le Biblia yoʼolal leloʼ?
Ichil wa jaypʼéel semanaʼobeʼ tiʼ jejeláas luʼumiloʼobeʼ yaan u yéeyaʼal túumben gobiernoʼob wa autoridadoʼob. Yaʼab máakoʼobeʼ yaan u chʼaʼikoʼob junpʼéel nojoch decisión tumen yaan u yéeyikoʼob juntúul gobernante.
¿Baʼax ku yaʼalik le Biblia yoʼolal leloʼ?
Yaʼab baʼax maʼ tu páajtal u beetkoʼob
Le Bibliaoʼ ku yaʼalikeʼ le máaxoʼob ku gobernaroʼoboʼ yaan baʼaxoʼob maʼ tu páajtal u beetkoʼob.
«Maʼ a kʼubik a wóoleʼex tiʼ príncipeʼob, mix tiʼ uláakʼ j-kʼeban máakoʼob tumen maʼ tu páajtal u salvarkoʼob máak. Tumen le kéen xuʼuluk u chʼaʼik u yiikʼoʼobeʼ ku suutoʼob teʼ luʼumoʼ. Ku pʼáatal maʼ tu páajtal u béeykuntkoʼob le baʼax u tukultmoʼoboʼ» (Salmo 146:3, 4).
Tak le máax maas maʼalob u gobernaroʼ ku kʼuchul u kʼiinil u kíimil. Tsʼoʼoleʼ kex ka u prometert yaan u beetaʼal baʼax maʼalobeʼ kéen kíimeʼ maʼ u yojel wa yaan u seguertaʼaliʼ (Eclesiastés 2:18, 19).
Le Bibliaoʼ ku yaʼalikeʼ wíinikeʼ maʼ tu páajtal u gobernarkuba tu juunaliʼ mix tu páajtal u gobernartik u yéet wíinikiʼ.
«Máakeʼ maʼ tu páajtal mix tak u yéeyik tuʼux kun xíimbal» (Jeremías 10:23).
¿Yaan wa ta tʼaan juntúul máax jach maʼalob u gobernar teʼ kʼiinoʼobaʼ?
Juntúul gobernante tsʼaʼan tumen Dios
Le Bibliaoʼ ku yaʼalikeʼ Dioseʼ tsʼoʼok u tsʼáaik juntúul jach maʼalob gobernante jeʼel u páajtal u confiar máak tiʼ letiʼeʼ, le gobernanteaʼ: Jesucristo (Salmo 2:6). Jesúseʼ u Reyil u Reino Dios yéetel táan u gobernar desde teʼ kaʼanoʼ (Mateo 6:10).
Techeʼ baʼax ken a beete, ¿yaan wa a yéeyik Jesús bey a gobernanteeʼ? Le Bibliaoʼ ku yaʼalik baʼaxten kʼaʼabéet k-yéeyik Jesús utiaʼal u gobernarkoʼon:
«Kʼameʼex [Jesucristo,] u hijo Dios, wa maʼeʼ Dioseʼ yaan u pʼuʼujul yéetel yaan u xuʼulsikteʼex, letiʼeʼ ku kʼuchul u kʼiinil u pʼuʼujul. Kiʼimak u yóol tuláakal le máaxoʼob ku natsʼkubaʼob tu yiknal utiaʼal u kanáantaʼaloʼoboʼ» (Salmo 2:12).
Bejlaʼeʼ u kʼiinil a chʼaʼtuklik máax ken u gobernartech. Le Bibliaoʼ chíikaʼan u yeʼesikeʼ Jesúseʼ káaj u gobernar tu añoil 1914 yéetel maʼ kun xáantaleʼ u Reino Dioseʼ yaan u láaj xuʼulsik tiʼ tuláakal le gobiernoʼob yanoʼob teʼ yóokʼol kaabaʼ (Daniel 2:44).
Utiaʼal a wilik uláakʼ baʼax oʼolal unaj a yéeyik Jesús bey a gobernanteeʼ, ilawil le xook «¿Baʼaxten unaj k-tsʼáaikba yáanal u Reino Dios?».
Maʼ xaaneʼ jeʼel u yutstal xan ta wicheʼ
LE MÁAX KU KANANOʼ
¿Máax u Reyil le Reinooʼ?
Yaʼab tiʼ le máaxoʼob tsʼíibt le Bibliaoʼ tu yaʼaloʼob bix kun ilbil máax u Reyil u Reino Dios. Tiʼ Jesucristo láaj béeychaj le baʼaxoʼob tu yaʼaloʼoboʼ.
BAʼALOʼOB UNAJ A KANIK
¿Baʼax u Reino Dios?
Ka taal Jesús way Luʼumeʼ maases kaʼansajnaj yoʼolal u Reino Dios. Úuch joʼopʼok u kʼáataʼal ka taalak u Reino Dios.
BAʼALOʼOB KU NÚUKAʼAL TEʼ BIBLIAOʼ
¿Baʼax ken u beet u Reino Dios?
Ilawil baʼax ken u beet u Reino Dios kéen gobernarnak way Luʼumeʼ.
TEKSTOʼOB KU MAAS TSOʼOLOL
Mateo 6:33 | «Yáax táanileʼ kaxteʼex u [Reino] Jajal Dios»
¿Táan wa kaʼach u yaʼalik Jesús máaxoʼob meyajtik Dioseʼ maʼ kʼaʼabéet u meyajoʼobiʼ?
KʼAJ ÓOLTOʼONIʼ
Kʼáat ka kaʼansaʼakech yéetel le Bibliaoʼ
Wa yaan baʼax taak a wojéeltik yoʼolal le Bibliaoʼ kʼáat ka áantaʼakech tumen juntúul u testigo Jéeoba wa kʼáat ka tsʼaʼabaktech xook.
