Tu kʼiinil domingo 20 tiʼ noviembre tiʼ 2022, u nuuktakiloʼob le Naciones Unidasoʼ tu chʼaʼajoʼob junpʼéel acuerdo utiaʼal u yáantaʼal le kaajoʼob tuʼux ku yúuchul nukuch loobiloʼoboʼ (Conferencia beetaʼab tumen le Naciones Unidas yaan yil yéetel u kanáantaʼal le Luʼumaʼ, COP27, beetaʼab Egipto). Letiʼobeʼ tu creartoʼob junpʼéel fondo utiaʼal u yáantkoʼob u maasil, pero tu yaʼaloʼob xaneʼ lelaʼ maʼ u solución le baʼaxoʼob ku yúuchloʼ.

•   «Yaaske yaan u yantal junpʼéel fondo utiaʼal u yáantaʼal le máaxoʼob ku sufriroʼob yoʼolal junpʼéel nojoch loobiloʼ [...] Toʼoneʼ k-ojel lelaʼ maʼ u solución le problemaoʼ [...]. Le Luʼumaʼ tsʼoʼok u pʼáatal bey jeʼex juntúul máak jach grave yanikeʼ» (António Guterres, secretario general tiʼ le Naciones Unidasoʼ; 19 tiʼ noviembre tiʼ 2022).

•   «Le Luʼumaʼ jach chich u bin u kʼastal» (Mary Robinson, u beetmaj u presidentail tu kaajil Irlanda yéetel yanchajaʼan xan tiʼ junpʼéel nojoch puesto ichil le Derechos Humanos yaan tiʼ le ONUoʼ; 20 tiʼ noviembre tiʼ 2022).

 Bejlaʼeʼ maases letiʼe táankelem paalaloʼob jach ku preocuparkubaʼob yoʼolal le bix u bin u kʼaskúuntaʼal le Luʼumaʼ. ¿Yaan wa u kʼuchul u kʼiinil u múul meyaj le nukuch naciónoʼob utiaʼal maʼ u seguer u kʼaskúuntaʼal le Luʼumaʼ? ¿Baʼax ku yaʼalik le Biblia yoʼolal leloʼ?

 Kex jeʼel bukaʼaj meyaj ka u beet juntúul utsul máak utiaʼal ka u yutskíint le Luʼumaʼ, le Bibliaoʼ ku yaʼalik baʼaxten maʼ kun tsaʼayal u beete. Ilawil kaʼapʼéel baʼax oʼolal:

•   «Le baʼax loocholoʼ maʼ tu páajtal u tojkíintaʼal» (Eclesiastés 1:15).

   Baʼax u kʼáat u yaʼale: Kex jeʼel bukaʼaj ka u yóot le naciónoʼoboʼ mix bikʼin u yutskíintikoʼob le baʼax tsʼoʼok u kʼastaloʼ tumen wíinikeʼ maʼ beetaʼab utiaʼal u gobernarkuba mix u gobernart u maasiliʼ (Jeremías 10:23). Tak wa ka kʼuchuk u kʼiinil u múul meyaj le naciónoʼoboʼ maʼ kun béeytal u yutskíintikoʼob le baʼax ku yúuchloʼ tumen maʼ tu kʼaboʼob yaniʼ.

•   «Le máakoʼoboʼ yaan u kaxtikoʼob chéen u yutsiloʼob, yaan u yaabiltikoʼob taakʼin [...] junpuliʼ maʼ ken u yóotoʼob u tsʼáaubaʼob de acuerdoil» (2 Timoteo 3:2, 3).

   Baʼax u kʼáat u yaʼale: Jeʼex u yaʼalmil le Bibliaoʼ le máakoʼob teʼ kʼiinoʼobaʼ chéen u yutsil ku kaxtikoʼob yéetel maʼ tu yóotkoʼob múul meyaj utiaʼal u kaxtikoʼob u yutsil u maasil.

 Dioseʼ tsʼoʼok u tsʼáaik Jesucristo utiaʼal ka u yutskíint le baʼaxoʼob tsʼoʼok u kʼaskúuntaʼal way Luʼumoʼ tumen chéen wíinikeʼ maʼ tu páajtal u beetik. Le Bibliaoʼ ku yaʼalik tu yoʼolal:

•   «Le gobernaciónoʼ yaan u pʼaʼatal tu kʼab. Yaan u yaʼalaʼaltiʼ, jach Maʼalob Consejero, Dios yaan u poder, Taatatsil utiaʼal kʼiinoʼob minaʼan u xuul, u Príncipeil Jeetsʼelil» (Isaías 9:6).

 Jesús kun gobernar tu Reino Dios, le gobiernoaʼ tiaʼan teʼ kaʼanoʼ (Mateo 6:10). Letiʼeʼ tsʼaʼan poder tiʼ yéetel jach maʼalob bix kun gobernar, tsʼoʼoleʼ jach ku tsʼíiboltik u kanáantik tubeel le Luʼumaʼ bey xan le máaxoʼob kun kajtaloʼoboʼ (Salmo 72:12, 16). Le kéen káajak u gobernareʼ yaan u xuʼulsik «tiʼ le máaxoʼob táan u kʼaskúuntikoʼob le luʼumoʼ» yéetel yaan u yutskíintik le baʼaxoʼob tsʼoʼok u kʼaskúuntaʼaloʼ (Apocalipsis 11:18; Isaías 35:1, 7).

 Utiaʼal a wojéeltik u maasil yoʼolal le bix kun utskíintbil le Luʼumaʼ ilawil le xook ich español «¿Qué dice la Biblia sobre el cambio climático y nuestro futuro?».