Le terrorismooʼ, ¿yaan wa u xuʼulul?
Le kéen beetaʼak loob wa le kéen kíimik wa máax tu yoʼolal le terrorismooʼ maʼ xaaneʼ jeʼel k-tuklik lelaʼ: ¿Ku yilik wa Dios le baʼaxoʼob ku yúuchloʼoboʼ? ¿Baʼaxten ku yúuchul le baʼaloʼobaʼ? ¿Yaan wa u xuʼulul le terrorismooʼ? a ¿Baʼax jeʼel u yáantkoʼon utiaʼal maʼ k-sen sajaktal tu yoʼolal le baʼaloʼobaʼ? Le Bibliaoʼ ku núukik le preguntaʼobaʼ.
¿Bix u yilik Dios le terrorismooʼ?
Dioseʼ u pʼekmaj u beetaʼal loob bey xan le terrorismooʼ (Salmo 11:5; Proverbios 6:16, 17). Jesúseʼ tu yeʼesaj baʼax ku tuklik Dios le ka tu yaʼalaj tiʼ u discípuloʼob baʼaxten maʼ unaj u beetkoʼob loob tiʼ u yéet máakiloʼobiʼ (Mateo 26:50-52). Jujuntúul máakoʼob ku beetkoʼob baʼaloʼob kʼaastakeʼ ku yaʼalikoʼobeʼ táan u beetkoʼob tu kʼaabaʼ Dios. Chéen baʼaleʼ Dioseʼ jach junpuliʼ maʼ tu kʼamik le baʼax ku beetkoʼoboʼ. Letiʼeʼ hasta maʼ tu yuʼubik u oraciónoʼob (Isaías 1:15).
Dioseʼ jach ku preocuparkuba tu yoʼolal le máaxoʼob táan muʼyajoʼoboʼ bey xan tu yoʼolal le máaxoʼob ku atacartaʼaloʼob tumen le terroristaʼoboʼ (Salmo 31:7; 1 Pedro 5:7). Le oʼolaleʼ le Bibliaoʼ ku yaʼalikeʼ Dioseʼ yaan u xuʼulsik le kʼasaʼaniloʼ (Isaías 60:18).
Baʼax beetik u yantal le terrorismooʼ
Le Bibliaoʼ ku tsolik baʼax beetik u yantal le terrorismooʼ, ku yaʼalik: «Máakeʼ mantatsʼ ku pechʼ óoltik u yéet máakil utiaʼal u beetik kʼaas tiʼ» (Eclesiastés 8:9). Desde úuchjeakileʼ le máakoʼob yaan páajtalil tiʼoboʼ kéen u yiloʼob sajak u maasileʼ ku aprovecharkoʼob utiaʼal u beetkoʼob u maas muʼyajoʼob. Tu yoʼolal lelaʼ jujuntúuloʼobeʼ tsʼoʼok u sutkoʼob u jeel le baʼax ku beetaʼaltiʼoboʼ (Eclesiastés 7:7).
Bix kun xuʼulsbil le terrorismooʼ
Dioseʼ ku prometertik yaan u xuʼulul u chʼaʼabal saajkilil, u beetaʼal loob yéetel yaan u taasik jeetsʼelil way Luʼumeʼ (Isaías 32:18; Miqueas 4:3, 4). Ilawil jujunpʼéel baʼaxoʼob ken u beete:
Yaan u xuʼulsik le terrorismooʼ. Dioseʼ yaan u luʼsik u gobierno wíinik utiaʼal u jeelintik yéetel u gobierno. Jesús le máax nuʼuktik le gobiernoaʼ igual ken u tratartil tuláakal máak, yaan u xuʼulsik tiʼ le máaxoʼob beetik loob tiʼ u maasiloʼ yéetel yaan u luʼsik le muʼyajiloʼ (Salmo 72:2, 14). Le kéen úuchuk lelaʼ maʼ kun kaʼa antal terrorismo. Tuláakal máak ‹jach yaan u kiʼimaktal u yóol tumen mix baʼal kun beetik u chiʼichnaktal› (Salmo 37:10, 11).
Yaan u yutskíintik tuláakal le baʼaxoʼob tsʼoʼok u kʼastal yoʼolal le terrorismooʼ. Dioseʼ yaan u beetik u láaj utstal tuláakal baʼal yéetel yaan u beetik u tuʼubul tiʼ máak le baʼaloʼob maʼ maʼalobtak tsʼoʼok u yúuchloʼob yoʼolal le terrorismooʼ (Isaías 65:17; Apocalipsis 21:3, 4). Tsʼoʼoleʼ maʼ chéen leloʼ, Dioseʼ ku prometertik yaan u kaʼa kuxkíintik le máaxoʼob tsʼoʼok u kíimloʼoboʼ. Yaan u kaʼa kuxkíintaʼaloʼob tiʼ junpʼéel yokʼol kaab tuʼux chéen jeetsʼelil yaniʼ (Juan 5:28, 29).
Le Bibliaoʼ ku tsʼáaiktoʼon yaʼab pruebaʼob de ke Dioseʼ maʼ túun xáantal ken u beet le baʼax u prometermoʼ. Chéen baʼaleʼ maʼ xaaneʼ techeʼ ka tuklik: «¿Baʼaxten túun Dioseʼ maʼ u xuʼuls tiʼ le terrorismooʼ?». Wa a kʼáat a wojéelt u núukileʼ chaʼant le video: ¿Baʼaxten ku chaʼik Dios u yantal muʼyajil?
a U suukileʼ kéen tʼaanak máak tiʼ le «terrorismooʼ» maases táan u tʼaan tiʼ le loob wa tiʼ u amenazartaʼal le máakoʼob utiaʼal u chʼaʼikoʼob saajkil wa utiaʼal u apoyarkoʼob wa baʼax gobiernoil, religión wa uláakʼ baʼal. Chéen baʼaleʼ jeʼel u yilaʼal bey terrorismo uláakʼ baʼaloʼob kʼaastak ku yúuchloʼobeʼ.
Maʼ xaaneʼ jeʼel u yutstal xan ta wicheʼ
BAʼALOʼOB KU NÚUKAʼAL TEʼ BIBLIAOʼ
¿Baʼax u Reino Dios?
Ilawil baʼaxten maas maʼalob u Reino Dios tiʼ jeʼel baʼalak gobiernoil yaan way Luʼumeʼ.
LE MÁAX KU KANANOʼ
¿Baʼax ken u beet u Reino Dios yoʼolal wíinik?
Jesúseʼ u yojel kaʼacheʼ chéen u Reino Dios jeʼel u yutskíintik le problemaʼob yaan way Luʼumeʼ. ¿Baʼaxten k-ojel jaaj le baʼax tu yaʼaloʼ?
BAʼALOʼOB UNAJ A KANIK
¿Baʼaxten ku chaʼik Dios u yantal muʼyajil?
Yaʼab máakeʼ u kʼáat u yojéelt baʼaxten jach yaan pʼektajil yéetel muʼyajil way yóokʼol kaabeʼ. Le Bibliaoʼ ku yaʼalik baʼaxten yéetel ku yaʼalik baʼax ken u beet Dios.
