Éxodo 23:1-33
23 Maʼ unaj a máan a waʼal junpʼéel baʼal maʼ jaajiʼ.+ Maʼ a waʼalik junpʼéel baʼal maʼ jaaj chéen utiaʼal a wáantik juntúul kʼasaʼan máakiʼ.+
2 Maʼ unaj a beetik baʼaloʼob kʼaastak chéen tumen bey u beetik u maasil máakoʼoboʼ. Le kéen a beet a testigoileʼ maʼ unaj a waʼalik junpʼéel baʼal maʼ jaaj chéen utiaʼal a lúubul utsil tiʼ u maasiliʼ,* tumen wa ka beetkeʼ yaan a causartik maʼ u beetaʼal justicia.
3 Le kéen juzgartaʼak juntúul máax óotsileʼ maʼ unaj a tsʼáaikaba tu favor chéen tumen óotsiliʼ.+
4 Wa ka wilik saatal u yalakʼ wakax wa u yalakʼ burro le máax pʼekmilechoʼ unaj a bisik a suttiʼ.+
5 Wa ka wilik u yalakʼ burro a enemigo lubaʼan paʼteʼ yéetel u kuucheʼ maʼ unaj a pʼatik chéen beyoʼ, baʼaxeʼ unaj a wáantik a enemigo utiaʼal ka u líiʼs u yalakʼ baʼalcheʼoʼ.+
6 Le kéen a juzgart le máax óotsil kajakbal teʼ tuʼux yanechoʼ unaj a beetik yéetel justicia.+
7 Maʼ unaj a apoyartik junpʼéel baʼal maʼ jaaj ku yaʼalaʼal tu contra wa máaxiʼ mix unaj a apoyartik ka kíimsaʼak juntúul máak inocenteiʼ mix juntúul máak beetik baʼax maʼalobiʼ. Tumen teneʼ maʼ ken in waʼal wa justo juntúul máak kʼasaʼan.*+
8 Maʼ unaj a chaʼik a maʼanliʼ, tumen le máax ku chaʼik u maʼanloʼ maʼ tu juzgar maʼalob, yéetel le máaxoʼob justoʼob ku chaʼik u maʼanloʼoboʼ ku kʼastal baʼax ku yaʼalikoʼob tu yorail le juiciooʼ.+
9 Maʼ unaj a beetkeʼex a kʼasaʼanileʼex tiʼ juntúul j-táanxel luʼumiliʼ. Teʼexeʼ a wojleʼex bix u yuʼubikuba juntúul j-táanxel luʼumil,* tumen bey yanileʼex kaʼach tu luʼumil Egiptooʼ.+
10 Durante seis añoseʼ+ yaan a meyajtik le luʼumoʼ yéetel yaan a cosechartik le baʼax ken u tsʼáaoʼ.
11 Chéen baʼaleʼ tu siete añoseʼ maʼ ken a pakʼ le luʼumoʼ, chéen yaan a pʼatik listoil. Beyoʼ le baʼax kun jóokʼol tu juunal teʼ luʼumoʼ letiʼe baʼax ken u chʼaʼ u jaant le óotsiloʼob kajakbaloʼob teʼ tuʼux yanechoʼ, yéetel le baʼax ken u pʼatoʼoboʼ letiʼe baʼax ken u jaant u baʼalcheʼiloʼob kʼáaxoʼ. Lelaʼ bey unaj a beetik teʼ tuʼux ka pakʼik uvaoʼ bey xan teʼ tuʼux ka pakʼik olivooʼ.
12 Chéen seis días unaj a meyaj, chéen baʼaleʼ teʼ día sieteoʼ, unaj a jeʼelel, utiaʼal beyoʼ ka jeʼelek xan a walakʼ toro, a walakʼ burro bey xan u hijo a esclava yéetel le j-táanxel luʼumiloʼoboʼ.+
13 Unaj a wilik a beetkeʼex tuláakal le baʼax tsʼoʼok in waʼalikteʼexaʼ.+ Maʼ unaj a waʼalikeʼex u kʼaabaʼ uláakʼ diosoʼobiʼ, mix unaj u jóokʼol ta chiʼex u kʼaabaʼobiʼ.+
14 Cada añoeʼ óoxpʼéel fiesta unaj a beetikten.+
15 Unaj a beetik u Fiestail le Waaj Minaʼan u Levadurailoʼ.*+ Teʼ fiestaaʼ unaj a jaantik waaj minaʼan u levadurail durante siete días jeʼel bix in waʼalmiltech ka a beetoʼ. Le waaj beyaʼ unaj a jaantik tu mesil Abib,*+ teʼ día in waʼalmoʼ, tumen letiʼe kʼiin ka tin jóoʼsech tiʼ u luʼumil Egiptooʼ. Jeʼel máaxak ka taalak tin táaneʼ maʼ unaj u pʼáatal maʼ u taasikten mix baʼaliʼ.+
16 Le kéen a cosechart xan u yáax ich le baʼaxoʼob a pakʼmoʼ+ unaj a beetik u Fiestail le Cosechaoʼ.* Yéetel le kéen a cosechart u yich a paakʼal tu jóokʼbal le añooʼ+ unaj xan a beetik u Fiestail le Tsʼook Cosechaoʼ.*
17 Óoxtéen tiʼ junpʼéel añoeʼ tuláakal le xiiboʼoboʼ unaj u binoʼob tu táan Yuumtsil Jéeoba.+
18 Maʼ unaj a kʼubkeʼex u kʼiʼikʼel juntúul baʼalcheʼ paʼteʼ yéetel baʼax yaan u levadurailiʼ. U tsaatsel xan le baʼalcheʼob ku kʼuʼubulten teʼ fiestaʼoboʼ maʼ unaj u pʼáatloʼob bul áakʼabiʼ, baʼaxeʼ unaj u luʼsaʼaloʼob antes u sáastal.
19 Tuláakal u maas maʼalobil tiʼ u yáax ich a paakʼaleʼ unaj a taasik tin wotoch, teen Jéeoba a Dios aʼalik.+
Maʼ unaj a chakik juntúul chan chivo ichil u leche u maamaiʼ.+
20 Táan in túuxtik juntúul ángel táanil tiʼ teech+ utiaʼal ka u kanáantech teʼ bejoʼ yéetel utiaʼal ka u yoksech teʼ lugar in prepararmaj utiaʼal a wantaloʼ.+
21 Kanáant baʼax ken a beet tu táan yéetel beet baʼax ku yaʼalik. Maʼ a tsʼáaikaba tu contra tumen letiʼeʼ maʼ ken u perdonarteʼex wa ka beetkeʼex baʼaloʼob kʼaastak,+ tumen letiʼ representarken.
22 Chéen baʼaleʼ wa ka beetkeʼex tuláakal baʼax ken u yaʼalteʼex bey xan tuláakal baʼax ken in waʼalteʼexeʼ, teneʼ yaan in tsʼáaikinba tu contra a enemigoʼex yéetel yaan in tsʼáaikinba tu contra le máaxoʼob ken u tsʼáaubaʼob ta contraʼexoʼ.
23 Tumen in ángeleʼ yaan u bin táanil tiʼ teech yéetel yaan u biskech tuʼux yaan le amorreoʼoboʼ, le ititaʼoboʼ, le perizitaʼoboʼ, le cananeoʼoboʼ, le eveoʼoboʼ yéetel le jebuseoʼoboʼ. Teen túuneʼ yaan in xuʼulsiktiʼob.+
24 Maʼ unaj a chintal tu táan u diosoʼobiʼ, maʼ unaj a chaʼik ka oksaʼak ta pool ka a adorart u diosoʼobiʼ mix unaj a beetik le baʼaloʼob kʼaastak ku beetkoʼoboʼ.+ Baʼaxeʼ unaj a jutik yéetel a xiixkúuntik le columnaʼob ku adorarkoʼoboʼ.+
25 Teʼexeʼ unaj a adorarkeʼex Jéeoba a Dioseʼex,+ letiʼ túuneʼ yaan u bendecirtik le baʼax ka jaantikeʼex yéetel ka wukʼikeʼexoʼ.+ Teneʼ yaan in náachkuntik le kʼojaʼaniloʼob tiʼ teʼexoʼ.+
26 Le koʼoleloʼob kajakbal ichileʼexoʼ maʼ kun abortaroʼob mix kun pʼáatal maʼ tu páajtal u yantal u chaambaloʼob.+ Teneʼ yaan in beetik ka kuxlakeʼex yaʼab kʼiinoʼob.
27 Tak antes tiʼ a kʼuchleʼex tu yiknal le kaajoʼoboʼ yaan in beetik ka u chʼaʼob saajkil tiʼ teen.+ Yaan in beetik ka saʼatak u yóol le kaajoʼob teʼ tuʼux kan máaneʼexoʼ yéetel yaan in beetik ka púutsʼkoʼob ta táaneʼex.+
28 Yaan in beetik ka lúubuk u yóol*+ le eveoʼoboʼ, le cananeoʼoboʼ yéetel le ititaʼoboʼ. Tumen jach yaan u sajaktaloʼobeʼ hasta yaan u púutsʼloʼob ta táaneʼex.+
29 Maʼ ken in tojolchʼintoʼob ta táaneʼex chéen tiʼ junpʼéel año. Beyoʼ maʼ kun kʼastal le luʼumoʼ mix kun yaʼabtal le tsʼíitsʼik baʼalcheʼob jeʼel u beetkoʼobteʼex looboʼ.+
30 Jujunpʼíitil ken in tojolchʼintoʼob ta táaneʼex hasta ken yaʼabchajkeʼex yéetel ken a tiaʼalinteʼex le luʼumoʼ.+
31 U límiteil le luʼum tuʼux kan kajtaleʼexoʼ yaan u náakal desde teʼ Mar Rojooʼ tak tu jáal le kʼáaʼnáab tuʼux yaan le filisteoʼoboʼ, desde tuʼux yaan le desiertooʼ tak teʼ Río Éufratesoʼ.+ Tumen teneʼ yaan in beetik ka a ganart le máakoʼoboʼ bey xan ka a tojolchʼintoʼob.+
32 Maʼ unaj a beetik mix junpʼéel pacto tu yéeteloʼob mix yéetel u diosoʼobiʼ.+
33 Letiʼobeʼ maʼ unaj u pʼáatloʼob kajtal teʼ luʼum ta wéeteleʼexoʼ utiaʼal maʼ u beetkoʼob a kʼebantaleʼex tin contra.+ Wa ka adorarkeʼex u diosoʼobeʼ yaan u binteʼex kʼaasil».
Notas
^ Wa «chéen tumen bey u yaʼalik u maasil máakoʼoboʼ».
^ Wa «maʼ ken in pʼat x-maʼ castigoil juntúul maak kʼasaʼan».
^ Wa «bix u kuxtal juntúul j-táanxel luʼumil».
^ Ilawil «U Fiestail le Waaj Minaʼan u Levadurailoʼ», página 2584.
^ Ilawil página 2554.
^ Kʼaj óolaʼan xan bey u Fiestail le Paseloʼoboʼ (u Fiestail le Tabernáculoʼoboʼ).
^ Le fiestaaʼ kʼaj óolaʼan xan bey u Fiestail le Semanaʼoboʼ wa Pentecostés. Ilawil «Pentecostés», página 2575.
^ Uláakʼ bix u traducirtaʼaleʼ «ka sen sajakchajak; u kikilankil».
