1 Crónicas 13:1-14
13 David túuneʼ tsikbalnaj yéetel u nuuktakil le grupoʼob de 1,000 máakoʼoboʼ bey xan yéetel u nuuktakil le grupoʼob de 100 máakoʼoboʼ, tsikbalnaj xan yéetel tuláakal le uláakʼ líderoʼoboʼ.+
2 David túuneʼ tu yaʼalaj tiʼ tuláakal u kaajil Israel: «Wa maʼalob a wilkeʼex yéetel maʼalob xan tu táan Jéeoba k-Dioseʼ, koʼoneʼex túuxtik aʼalbil tiʼ u maasil k-sukuʼunoʼob ka taalak u muchʼubaʼob t-éetel. Aʼalaʼak tiʼ tuláakal k-sukuʼunoʼob yanoʼob tu luʼumil Israeloʼ bey xan tiʼ le sacerdoteʼob yéetel tiʼ le levitaʼob yanoʼob tu kaajaloʼoboʼ,*+
3 utiaʼal ka k-taaseʼex tu kaʼatéen u cajail u pacto+ k-Diosoʼ». Davideʼ bey úuchik u yaʼalikoʼ tumen letiʼobeʼ maʼ tu kanáantoʼob u cajail le pacto tu kʼiiniloʼob Saúloʼ.+
4 Tuláakal le máakoʼob muchʼukbaloʼob túunoʼ tu yaʼaloʼob bey ken u beetiloʼoboʼ, tumen le baʼax aʼalaʼaboʼ maʼalob tu yilil le kaajoʼ.
5 David túuneʼ tu muchʼaj tuláakal u kaajil Israel utiaʼal u taasik u cajail u pacto le u jaajil Dios desde Kiriat-jearimoʼ.+ Tu muchʼaj tuláakal le israelitaʼoboʼ, desde le máaxoʼob kajaʼanoʼob tu ríoil Egiptooʼ* tak le máaxoʼob kajaʼanoʼob Lebo-amatoʼ.*+
6 David yéetel tuláakal le israelitaʼob túunoʼ binoʼob tu kaajil Baalá+ wa Kiriat-jearim, junpʼéel kaaj yaan tu luʼumil Judá. Letiʼobeʼ bin u chʼaʼob u cajail u pacto Jéeoba, le u jaajil Dios ku kutal tu trono yaan tu yóokʼol* le querubínoʼoboʼ,*+ teʼ tuʼux ku tʼaʼanal u kʼaabaʼoʼ.
7 Chéen baʼaleʼ letiʼobeʼ tu chʼaʼajoʼob u cajail u pacto le u jaajil Diosoʼ ka tu naʼaksoʼob yóokʼol junpʼéel túumben carreta.+ Le carretaaʼ letiʼe meyajnaj utiaʼal u taasaʼal desde tu yotoch Abinadaboʼ. Uzaj yéetel Ayóeʼ letiʼob bisik kaʼach le carretaoʼ.+
8 David yéetel tuláakal u kaajil Israeleʼ jach kiʼimak u yóoloʼob táan u festejaroʼob tu táan le u jaajil Dios ikil u biskoʼob u cajail le pactooʼ. Letiʼobeʼ táan kaʼach u kʼaayoʼob, táan kaʼach u paxkoʼob arpaʼob, panderetaʼob,+ címbaloʼob,*+ trompetaʼob+ bey xan uláakʼ u nuʼukuliloʼob paax yaan u cuerdailoʼob.
9 Chéen baʼaleʼ le ka kʼuchoʼob teʼ táax luʼum kʼaj óolaʼan bey Kidónoʼ,* le wakaxoʼob jíitik le carretaoʼ óolak u beetoʼob u lúubul u cajail u pacto le u jaajil Diosoʼ, Uzaj túuneʼ tu tichʼaj u kʼabeʼ ka tu machaj le Cajaoʼ.
10 Teʼ súutuk jeʼeloʼ Jéeobaeʼ jach pʼuʼuj tu contra Uzajeʼ ka tu kíimsaj, tumen Uzajeʼ tu machaj u cajail le pactooʼ.+ Letiʼ túuneʼ kíim tu táan Dios.+
11 Chéen baʼaleʼ Davideʼ pʼuʼuji tumen Jéeobaeʼ ichil u pʼujaʼanileʼ tu kíimsaj Uzaj. Le oʼolal tak bejlaʼeʼ le lugar jeʼeloʼ ku yaʼalaʼaltiʼ Pérez-uzaj.
12 Teʼ kʼiin jeʼeloʼ Davideʼ jach sajakchaj tiʼ le u jaajil Diosoʼ, le oʼolal tu yaʼalaj: «¿Bix ken in bis u cajail u pacto u jaajil Dios teʼ tuʼux kajaʼanenoʼ?».+
13 Davideʼ maʼ tu bisaj u cajail le pacto teʼ tuʼux kajaʼanoʼ, maʼ tu bisaj tak teʼ kaaj ku kʼaabaʼtik u Kaajal Davidoʼ. Baʼaxeʼ tu beetaj u bisaʼal tu yotoch Obed-edom, le guititaoʼ.
14 U cajail u pacto le u jaajil Diosoʼ pʼáat tu yiknal u familia Obed-edom, tres meses pʼáat tu yotochoʼob, yéetel Jéeobaeʼ seguernaj u bendecirtik u familia Obed-edom bey xan tuláakal baʼax yaantiʼ.+
Notas
^ Ich hebreoeʼ ku yaʼalaʼal kaʼach «kaajoʼob yéetel luʼumoʼob tuʼux yaan suʼuk utiaʼal u janal baʼalcheʼob».
^ Wa «desde Sior le yaan tu luʼumil Egiptooʼ».
^ Wa «tu yookbal Amatoʼ».
^ Uláakʼ bix u traducirtaʼaleʼ «chúumuk tiʼ».
^ Ilawil página 2577.
^ Lelaʼ junpʼéel u nuʼukulil paax bey jeʼex le platillos ku meyaj bejlaʼa utiaʼal u yúuchul paaxoʼ.
^ Teʼ táax luʼumaʼ tiʼ ku jóoʼsaʼal kaʼach u neekʼ cebada wa trigoiʼ.
