1 Corintios 6:1-20
6 Le kéen yanakteʼex problema yéetel juntúul sukuʼuneʼ,+ ¿baʼaxten ka bin a quejartabaʼex tu táan juezoʼob maʼatech u meyajtikoʼob Dios? ¿Baʼaxten maʼ ta bineʼex tu táan le máaxoʼob santoʼoboʼ?
2 ¿Maʼ wa a wojleʼexeʼ le máaxoʼob santoʼoboʼ yaan u juzgarkoʼob le yóokʼol kaaboʼ?+ Wa yaan a juzgarkeʼex le yóokʼol kaaboʼ, ¿maʼ wa túun tu páajtal a juzgarkeʼex le problemas mejentak ku yantal ichileʼexoʼ?
3 ¿Maʼ wa a wojleʼex yaan k-juzgartik ángeloʼobiʼ?+ Jeʼeloʼ ¿baʼaxten túun maʼ t-juzgartik le problemas ku yantaltoʼon teʼ kʼiinoʼobaʼ?
4 Le oʼolaleʼ wa yaanteʼex problemas kʼaʼabéet u yutskíintaʼaleʼ,+ ¿yaan wa a yéeyikeʼex ka juzgartaʼakeʼex tumen máakoʼob maʼatech u confiar le múuchʼulil tiʼ letiʼoboʼ?
5 Táan in tʼaan utiaʼal in suʼlakkúuntkeʼex. ¿Minaʼan wa ichileʼex juntúul máak yaan u naʼat jeʼel u páajtal u juzgartik le problemas ku yantalteʼexoʼ?
6 Tu lugar a beetkeʼex leloʼ, teʼexeʼ ka biskeʼex a sukuʼuneʼex tu táan juezoʼob maʼatech u meyajtikoʼob Dios.
7 U jaajileʼ ka pajik a suʼtaleʼex le kéen baʼatelnakeʼex ta baatsileʼex tu táan le juezoʼoboʼ. ¿Baʼaxten maʼ táan u chúukpajal a wóoleʼex a muʼyajteʼex le baʼaloʼob kʼaastak ku beetaʼalteʼexoʼ?+ ¿Baʼaxten maʼ táan u chúukpajal a wóoleʼex muʼyaj le kéen luʼsaʼakteʼex le baʼaxoʼob yaanteʼexoʼ?
8 Tu lugar a beetkeʼex lelaʼ, ka beetkeʼex a kʼasaʼanileʼex tiʼ a sukuʼuneʼex yéetel ka tuskeʼexoʼob.
9 ¿Maʼ wa a wojleʼexeʼ le máaxoʼob ku beetkoʼob baʼaloʼob kʼaastakoʼ maʼ ken u tiaʼalintoʼob u Reino Dios?+ Maʼ a tuskabaʼex. Tumen le máaxoʼob ku núupkʼebantaloʼoboʼ,*+ le ku adorarkoʼob imagenoʼoboʼ,+ le ku tusik u núupoʼoboʼ,*+ le xiiboʼob ku núupchitaloʼob yéetel u yéet xiibiloʼoboʼ,+
10 le ku yookoloʼoboʼ, le ku píitmáan u tsʼíiboltkoʼob wa baʼaxoʼ,+ le ku káaltaloʼoboʼ,+ le ku poochʼiloʼoboʼ bey xan le máaxoʼob ku tokikoʼob le baʼax yaan tiʼ uláakʼ máakoʼ, mix juntúul tiʼ letiʼob ken u tiaʼalintoʼob u Reino Diosiʼ.+
11 Chéen baʼaleʼ jujuntúul tiʼ teʼexeʼ beyeʼex kaʼachoʼ. Pero tsʼoʼok a pʼoʼobleʼex,+ tsʼoʼok a santificartaʼaleʼex,+ tsʼoʼok u yaʼalaʼal toj a kuxtaleʼex+ tu kʼaabaʼ k-Yuumtsil Jesucristo bey xan tu yoʼolal u espíritu santo k-Diosoʼ.
12 Tuláakal baʼal jeʼel u páajtal in beetkeʼ,* chéen baʼaleʼ maʼ tuláakal baʼal ku taasik utsiliʼ.+ Tuláakal baʼal jeʼel u páajtal in beetkeʼ, chéen baʼaleʼ maʼ ken in chaʼa tiʼ mix baʼal ka u esclavizarten.
13 Le janaloʼ utiaʼal le nakʼoʼ yéetel le nakʼoʼ utiaʼal le janaloʼ, chéen baʼaleʼ Dioseʼ yaan u xuʼulsik tiʼ tu kaʼapʼéelal.+ Le wíinkliloʼ maʼ utiaʼal u núupkʼebantal máakiʼ, baʼaxeʼ utiaʼal Yuumtsil,+ yéetel Yuumtsileʼ utiaʼal le wíinkliloʼ.
14 Tsʼoʼoleʼ jeʼex Dios tu líiʼsaj Yuumtsileʼ,+ Dioseʼ yaan xan u líiʼskoʼon tiʼ le kíimil+ tu yoʼolal u páajtaliloʼ.+
15 ¿Maʼ wa a wojleʼexeʼ a wíinklileʼexeʼ táakaʼan tiʼ u wíinklil Cristo?+ ¿Yaan wa túun in chʼaʼik junpʼéel baʼax táakaʼan tiʼ u wíinklil Cristo utiaʼal in nupik tiʼ u wíinklil juntúul koʼolel chéen bey u máanoʼ? ¡Jach junpuliʼ maʼ!
16 ¿Maʼ wa a wojleʼexeʼ le máax ku nupkuba yéetel juntúul koʼolel chéen bey u máanoʼ ku pʼáatal junpʼéeliliʼ wíinklil tu yéetel? Tumen Dioseʼ ku yaʼalik: «Tu kaʼatúulaloʼobeʼ yaan u suutoʼob junpʼéeliliʼ wíinklil».*+
17 Chéen baʼaleʼ le máax ku nupkuba tiʼ Yuumtsileʼ ku yantaltiʼ junpʼéeliliʼ tuukul tu yéetel.+
18 Púutsʼeneʼex tiʼ le núupkʼebanoʼ.+ Tuláakal u maasil kʼeban ku beetik máakeʼ minaʼan mix baʼal u yil yéetel le wíinkliloʼ, chéen baʼaleʼ le máax ku núupkʼebantaleʼ ku kʼebantal tu contra u wíinklil.+
19 ¿Maʼ wa a wojleʼexeʼ le a wíinklileʼexoʼ letiʼ u templo+ le espíritu santo tsʼaʼanteʼex tumen Diosoʼ?+ Tsʼoʼoleʼ teʼexeʼ yaan a yuumileʼex+
20 tumen koʼoj úuchik a maʼanleʼex.+ Bey túunoʼ alabarteʼex Dios+ yéetel a wíinklileʼex.+
Notas
^ Ilawil página 2573.
^ Lelaʼ u kʼáat u yaʼal u yantal baʼax u yil juntúul íichamtsil wa juntúul atantsil yéetel máax maʼ u núupiʼ.
^ Wa «Tuláakal baʼal ku chaʼabal in beetik tumen le leyoʼ».
^ Ich griegoeʼ ku yaʼalaʼal kaʼach «junpʼéeliliʼ bakʼ».
