1 Juan 2:1-29
2 In mejen paalaleʼex, táan in tsʼíibtikteʼex le baʼaloʼobaʼ utiaʼal maʼ a kʼebantaleʼex. Chéen baʼaleʼ wa yaan máax ku kʼebantaleʼ, tu yiknal le Taataoʼ yaan juntúul máax áantkoʼon, Jesucristo,+ juntúul máax beetik baʼax toj.+
2 Letiʼeʼ kíim utiaʼal u tsʼáaik tuʼux u perdonartaʼal+ k-kʼebanoʼob,+ chéen baʼaleʼ maʼ chéen k-kʼebanoʼobiʼ, tak u kʼeban tuláakal yóokʼol kaab.+
3 Wa maʼ tu xuʼulul k-tsʼoʼokbesik baʼax ku yaʼalikeʼ tiʼ túun ken k-tsʼáa cuenta tsʼoʼok k-kʼuchul kʼaj óoltiʼ.
4 Le máax ku yaʼalik: «Tsʼoʼok in kʼuchul in kʼaj óolte», chéen baʼaleʼ maʼ tu tsʼoʼokbesik le baʼax u yaʼalmaj ka beetaʼakoʼ, chéen táan u tuus yéetel minaʼan u jaajil tiʼ.
5 Chéen baʼaleʼ jeʼel máaxak ka u tsʼoʼokbes le baʼax u yaʼalmaj ka beetaʼakoʼ yaan u yeʼesik jach tu jaajil u yaabiltmaj Dios.+ Le kéen k-beet beyoʼ k-eʼesik junmúuchʼ yaniloʼon tu yéetel.+
6 Le máax ku yaʼalik láayliʼ junmúuchʼ yanil tu yéeteleʼ, kʼaʼabéet u xíimbal xan jeʼex úuchik u xíimbal Jesúseʼ.+
7 In yaabilaj sukuʼuneʼex, maʼ táan in tsʼíibtikteʼex junpʼéel túumben mandamientoiʼ, baʼaxeʼ láayliʼ letiʼe úuchben mandamiento yaanteʼex desde tu káajbaloʼ.+ Le úuchben mandamientoaʼ letiʼe baʼax tsʼoʼok a yáax uʼuyikeʼexoʼ.
8 Kex beyoʼ le baʼax táan in tsʼíibtikteʼexaʼ junpʼéel túumben mandamiento. Lelaʼ tsʼoʼokbesaʼab tumen Jesús, yéetel letiʼe baʼax ta tsʼoʼokbeseʼex xanoʼ. Beoraaʼ le éeʼjochʼeʼeniloʼ táan u bin u saʼatal, le u jaajil sáasil túunoʼ tsʼoʼok u káajal u juul.+
9 Le máax ku yaʼalik tiaʼan ich sáasil, chéen baʼaleʼ ku pʼektik u sukuʼuneʼ,+ láayliʼ tiaʼan ich éeʼjochʼeʼenileʼ.+
10 Le máax u yaabiltmaj u sukuʼuneʼ ku pʼáatal ich sáasilil,+ tsʼoʼoleʼ mix baʼal beetik u tʼóochpajal.
11 Chéen baʼaleʼ le máax u pʼekmaj u sukuʼuneʼ tiaʼan ich éeʼjochʼeʼenileʼ yéetel ich éeʼjochʼeʼenil ku máan.+ Letiʼeʼ maʼ u yojel tuʼux ku biniʼ+ tumen tsʼoʼok u chʼóopkintaʼal tumen le éeʼjochʼeʼeniloʼ.
12 In mejen paalaleʼex, táan in tsʼíibtikteʼex lelaʼ tumen tu yoʼolal u kʼaabaʼ Jesúseʼ tsʼoʼok u perdonartaʼal a kʼebaneʼex.+
13 Taatatsileʼex, táan in tsʼíibtikteʼex lelaʼ tumen teʼexeʼ tsʼoʼok a kʼaj óoltikeʼex Jesús le máax yaan desde tu káajbaloʼ. Táankelem xiʼipalaleʼex, táan in tsʼíibtikteʼex lelaʼ tumen teʼexeʼ tsʼoʼok a tsʼáanchaʼatikeʼex le Kʼaasilbaʼaloʼ.*+ Mejen paalaleʼex, táan in tsʼíibtikteʼex lelaʼ tumen teʼexeʼ tsʼoʼok a kʼaj óoltikeʼex le Taataoʼ.+
14 Taatatsileʼex, kin tsʼíibtikteʼex lelaʼ tumen teʼexeʼ tsʼoʼok a kʼaj óoltikeʼex Jesús le máax yaan desde tu káajbaloʼ. Táankelem xiʼipalaleʼex, táan in tsʼíibtikteʼex lelaʼ tumen muʼukʼaʼaneʼex,+ yéetel u tʼaan Dioseʼ pʼaatal ichil a puksiʼikʼaleʼex,+ tsʼoʼoleʼ tsʼoʼok a tsʼáanchaʼatikeʼex le Kʼaasilbaʼaloʼ.*+
15 Maʼ a yaabiltikeʼex le yóokʼol kaaboʼ mix le baʼaloʼob yaan tu yóokʼoloʼ.+ Wa yaan máax ku yaabiltik le yóokʼol kaaboʼ maʼ u yaabiltmaj le Taataoʼ.+
16 Tuláakal le baʼax yaan teʼ yóokʼol kaabaʼ —u tsʼíibolal u bakʼel máak,+ u tsʼíibolal le ichoʼ+ bey xan u taaskuba máak nojbaʼalil tu yoʼolal le baʼaxoʼob yaantiʼoʼ— maʼ tiʼ le Taata u taaloʼ, baʼaxeʼ tiʼ le yóokʼol kaabaʼ.
17 Tsʼoʼoleʼ le yóokʼol kaabaʼ táan u bin u xuʼulultiʼ bey xan tiʼ u tsʼíibolaloʼob,+ chéen baʼaleʼ le máax ku beetik baʼax u kʼáat Dioseʼ yaan u pʼáatal utiaʼal mantatsʼ.+
18 Mejen paalaleʼex, chéen junpʼíit kʼiin pʼaatal. Jeʼex a wuʼuymileʼexoʼ yaan u taal le anticristooʼ,*+ chéen baʼaleʼ beoraaʼ yaʼab anticristoʼob tsʼoʼok u chíikpajloʼob.+ Tu yoʼolal lelaʼ k-ojel chéen junpʼíit kʼiin pʼaatal.
19 Le máakoʼobaʼ náachchajoʼob tiʼ toʼon, letiʼobeʼ maʼ beyoʼob jeʼex toʼoneʼ.+ Tumen wa beyoʼob jeʼex toʼoneʼ jeʼel kaʼach u pʼáatloʼob t-éeteleʼ. Chéen baʼaleʼ náachchajoʼob, bey túunoʼ chíikpaj maʼ tuláakloʼob beyoʼob jeʼex toʼoneʼ.+
20 Pero teʼexeʼ yéeyaʼaneʼex tumen le Máax Santooʼ,+ yéetel tuláakleʼexeʼ a kʼaj óoleʼex u jaajil.
21 Kin tsʼíibtikteʼex lelaʼ, maʼ tumen wa maʼ a kʼaj óoleʼex le jaajoʼ,+ baʼaxeʼ tumen a kʼaj óoleʼex, yéetel tumen ichil le jaajoʼ mix junpʼéel tuus ku páajtal u jóokʼoliʼ.+
22 ¿Máax le ku tuus wa maʼ letiʼe máax ku yaʼalik de ke Jesúseʼ maʼ letiʼe Cristooʼ?+ Lelaʼ letiʼe anticristoaʼ:+ le máax u pʼekmaj le Taataoʼ bey xan le Paaloʼ.
23 Tuláakal máax u pʼekmaj le Paaloʼ kʼaas yanil tu táan le Taataoʼ.+ Le máax ku yaʼalik yaan u fe tiʼ le Paaloʼ+ maʼalob yanil tu táan le Taataoʼ.+
24 Tiʼ teʼexeʼ unaj u pʼáatal ta puksiʼikʼaleʼex le baʼax ta wuʼuyeʼex desde tu káajbaloʼ.+ Wa ku pʼáatal ichil a puksiʼikʼaleʼexeʼ yaan a pʼáatleʼex junmúuchʼ yéetel le Paaloʼ bey xan yéetel le Taataoʼ.
25 Lelaʼ letiʼe baʼax tu yaʼalaj u tsʼáaiktoʼonaʼ: kuxtal minaʼan u xuul.+
26 Lelaʼ letiʼe baʼaxoʼob kin tsʼíibtikteʼex yoʼolal le máaxoʼob táan u yilkoʼob u kʼaskúuntik a tuukuleʼexoʼ.
27 Ta wóokʼoleʼexeʼ láayliʼ tiʼ yaan le espíritu santo* meyajnaj utiaʼal a yéeyaʼaleʼex tumen Diosoʼ,+ le oʼolal maʼ kʼaʼabéet a kaʼansaʼaleʼex tumen mix máakiʼ. Le espíritu santo maʼatech u tuusoʼ, le baʼax meyajnaj utiaʼal a yéeyaʼaleʼexoʼ, letiʼ kaʼansikteʼex tuláakal baʼal,+ le baʼax ku kaʼansikoʼ jach jaaj. Jeʼex tsʼoʼok u kaʼansikteʼexeʼ pʼáateneʼex junmúuchʼ tu yéetel.+
28 Le oʼolaleʼ, in mejen paalaleʼex, pʼáateneʼex junmúuchʼ tu yéetel, utiaʼal beyoʼ le kéen chíikbesaʼakeʼ ka béeyak k-tʼaan yéetel u jaajil k-óol.+ Bey túunoʼ teʼ kʼiinoʼob way yanoʼ maʼ ken k-náachtal tiʼ letiʼ yéetel maʼ ken k-suʼlaktal.
29 Wa a wojleʼex toj tuláakal baʼax ku beetik Jesúseʼ ojéelteʼex xaneʼ tuláakal máax ku bisik junpʼéel toj kuxtaleʼ tiʼ Dios u taal.+
Notas
^ Ich griegoeʼ ku yaʼalaʼal kaʼach «le j-Kʼasaʼanoʼ».
^ Ich griegoeʼ ku yaʼalaʼal kaʼach «le j-Kʼasaʼanoʼ».
^ Wa «le máax yaan tu contra Cristooʼ». Ilawil «Anticristo», página 2555.
^ Ilawil «Espíritu santo», página 2562.
