1 Samuel 5:1-12
5 Le ka tu chʼaʼaj le filisteoʼob u cajail u pacto+ le u jaajil Diosoʼ tu luʼsoʼob desde Ebenézereʼ ka tu bisoʼob tak Asdod.
2 Le filisteoʼoboʼ tu chʼaʼajoʼob u cajail u pacto u jaajil Dioseʼ, tu yoksoʼob tu templo Dagóneʼ ka tu tsʼáajoʼob tu tséel Dagón.+
3 Le ka sáaschaj tuláakʼ kʼiineʼ, le asdoditaʼoboʼ líikʼoʼob jach tempranoeʼ ka tu yiloʼobeʼ tiʼ pekekbal kaʼach Dagón teʼ luʼumoʼ, nonokaʼan yanil aktáan tiʼ u cajail u pacto Jéeoba.+ Letiʼob túuneʼ tu chʼaʼajoʼobeʼ ka tu kaʼa tsʼáajoʼob tu lugar.+
4 Le ka sáaschaj tuláakʼ kʼiineʼ, líikʼoʼob jach tempranoeʼ ka tu yiloʼobeʼ tiʼ pekekbal kaʼach Dagón teʼ luʼumoʼ, nonokaʼan yanil aktáan tiʼ u cajail u pacto Jéeoba. Xotʼaʼan u pool bey xan u kʼaboʼob, yéetel tiʼ pekekbaloʼob tu joonajil* le templooʼ. Chéen tiʼ le parte tiʼ u wíinklil chíikaʼan tiʼ juntúul kay* maʼ úuch mix baʼal tiʼoʼ.
5 Le oʼolal tak bejlaʼeʼ u sacerdoteʼob Dagón bey xan tuláakal le máaxoʼob ku yookloʼob tu templo Dagón yaan tu kaajil Asdodoʼ maʼatech u peʼechaʼtikoʼob jach le tuʼux yaan u joonajiloʼ.
6 Jéeobaeʼ tu castigartaj le asdoditaʼoboʼ, tu beetaj u muʼyajoʼob, tu beetaj u tsaʼayal hemorroides+ tiʼ le máaxoʼob kajaʼanoʼob Asdodoʼ bey xan tiʼ le máaxoʼob yanoʼob tu territorioʼoboʼ.
7 Le ka tu yilaj u kajnáaliloʼob Asdod baʼax táan u yúuchleʼ, tu yaʼaloʼob: «Maʼ unaj u pʼáatal t-éetel u cajail u pacto u Dios u kaajil Israeliʼ, tumen letiʼeʼ tsʼoʼok u castigarkoʼon yéetel tsʼoʼok u castigartik k-dios Dagón».
8 Letiʼob túuneʼ tu túuxtoʼob aʼalbil tiʼ tuláakal u nuuktakil le filisteoʼob ka u muchʼubaʼoboʼ, ka tu kʼáatoʼobtiʼob: «¿Baʼax unaj k-beetik yéetel u cajail u pacto u Dios le israelitaʼoboʼ?». Letiʼobeʼ tu núukoʼob: «Bisaʼak tu kaajil Gat+ u cajail u pacto u Dios le israelitaʼoboʼ». Letiʼob túuneʼ tu bisoʼobiʼ.
9 Le ka tsʼoʼok u biskoʼob teʼeloʼ, Jéeobaeʼ joʼopʼ u castigartik le kaajoʼ, tu beetaj u sen sajaktal u kajnáaliloʼob. Tu beetaj u jóokʼol hemorroides tiʼ le xiiboʼob+ yanoʼob teʼ kaajoʼ, desde tiʼ u maas chichnil tak tiʼ u maas nojchil.
10 Letiʼob túuneʼ tu beetoʼob u bisaʼal u cajail u pacto le u jaajil Dios tak tu kaajil Ecrónoʼ.+ Chéen pʼelak oksaʼabik teʼ kaajoʼ, le ecronitaʼoboʼ joʼopʼ u yawtikoʼob: «¡Letiʼobeʼ tsʼoʼok u taaskoʼobtoʼon u cajail u pacto u Dios le israelitaʼoboʼ! ¡Tsʼoʼok u taaskoʼobtoʼon utiaʼal ka kíimkoʼon yéetel utiaʼal ka kíimik k-kaajal!».+
11 Letiʼob túuneʼ tu túuxtoʼob aʼalbil tiʼ tuláakal u nuuktakil le filisteoʼob ka u muchʼubaʼoboʼ, ka tu yaʼaloʼobtiʼob: «Biseʼex le u cajail u pacto u Dios le israelitaʼoboʼ, suteʼex teʼ tuʼux yaan kaʼachoʼ, utiaʼal beyoʼ maʼ k-kíimil toʼon mix k-kaajal». Tuláakal le máaxoʼob kajaʼanoʼob teʼ kaajoʼ jach saajkoʼob kaʼach u kíimloʼob, tumen tsʼoʼok kaʼach u sen castigartaʼaloʼob+ tumen le u jaajil Diosoʼ.
12 Le xiiboʼob maʼ kíimoʼoboʼ tsaʼaytiʼob hemorroides. Tuláakal le máaxoʼob yanoʼob teʼ kaajoʼ jach kʼaʼam úuchik u yawatoʼob, tak teʼ kaʼan uʼuyaʼaboʼ.
