2 Samuel 11:1-27
11 Tu káajbal le añooʼ,* teʼ kʼiinoʼob tuʼux suuk u jóokʼol le reyoʼob utiaʼal u baʼateloʼoboʼ, Davideʼ tu túuxtaj Joab, le máaxoʼob meyajtikoʼ bey xan tuláakal u soldadoiloʼob Israel utiaʼal ka xiʼikoʼob u xuʼulsoʼob tiʼ le ammonitaʼoboʼ. Letiʼob túuneʼ binoʼobeʼ ka tu baʼpachtoʼob u kaajil Rabá,+ chéen baʼaleʼ Davideʼ pʼáat Jerusalén.+
2 Junpʼéel kʼiin le tsʼoʼok u yéeʼsameʼentaloʼ, Davideʼ líikʼ tu camaeʼ ka joʼopʼ u xíimbal tu techoil u yotoch.* Desde teʼeloʼ tu yilaj juntúul koʼolel táan u yichkíil, le koʼoleloʼ jach kiʼichpan.
3 Davideʼ tu túuxtaj juntúul máak utiaʼal u kʼáatik máax le koʼoleloʼ. Le máak túunoʼ tu yaʼalaj: «U kʼaabaʼeʼ Bat-seba.*+ Le koʼoleloʼ u hija Eliam+ yéetel u yatan Urías+ le ititaoʼ».+
4 Davideʼ tu túuxtaj máakoʼob utiaʼal ka xiʼik chʼaʼabil.+ Le koʼolel túunoʼ ook tak teʼ tuʼux yanoʼ, yéetel Davideʼ chilaj tu yéetel.+ (Lelaʼ úuch teʼ kʼiinoʼob táan u pʼáatal limpiail le koʼoleloʼ).*+ Le ka tsʼoʼokeʼ Bat-sebaeʼ suunaj tu yotoch.
5 Le koʼoleloʼ pʼáat embarazadail, ka tu túuxtaj aʼalbil tiʼ David: «Embarazadaen».
6 Tu yoʼolal leloʼ Davideʼ tu túuxtaj aʼalbil tiʼ Joab: «Aʼal tiʼ Urías le itita ka taalak wayeʼ». Joab túuneʼ tu túuxtaj Urías tak teʼ tuʼux yaan Davidoʼ.
7 Le ka kʼuch Urías tu yiknaleʼ Davideʼ tu kʼáatajtiʼ bix u bin tiʼ Joab, bix u bin tiʼ le soldadoʼoboʼ yéetel bix u bin le baʼateloʼ.
8 David túuneʼ tu yaʼalaj tiʼ Urías: «Xeen ta wotoch, xeen a jáan jeʼelsaba».* Le ka jóokʼ Urías tu yotoch le reyoʼ, paachil tiʼeʼ tiʼ xan ku bisaʼal junpʼéel regalo ku túuxtaʼaltiʼ tumen le reyoʼ.*
9 Chéen baʼaleʼ Uríaseʼ maʼ bin tu yotochiʼ, pʼáat wenel tu yookbal u yotoch le rey yéetel le u maasil máakoʼob ku meyajtikoʼob le reyoʼ.
10 Aʼalaʼab túun tiʼ David: «Uríaseʼ maʼ bin tu yotochiʼ». Le ka tu yuʼubaj leloʼ Davideʼ tu yaʼalaj tiʼ Urías: «¿Maʼ wa táant a suut viajeiʼ? ¿Baʼaxten túun maʼ binech ta wotochiʼ?».
11 Uríaseʼ tu núukaj tiʼ David: «U cajail u pacto Dios+ bey xan u soldadoiloʼob Israel yéetel Judáeʼ tiaʼanoʼob chéen tiʼ najoʼob beetaʼanoʼob yéetel nookʼ, tsʼoʼoleʼ in tsʼuul Joab bey xan le u maasil máakoʼob meyajtikechoʼ táan u jeʼeleloʼob chéen tuʼux jáanpikʼeʼen. Le beetkeʼ, ¿unaj wa túun in wokol tin wotoch utiaʼal in janal, in wukʼik vino yéetel in chital yéetel in watan?+ ¡Kin jurartiktecheʼ* maʼ ken in beet le jeʼeloʼ in rey!».
12 David túuneʼ tu yaʼalaj tiʼ Urías: «Pʼáaten way bejlaʼeʼ, sáamaleʼ ka bin». Le oʼolal Uríaseʼ pʼáat Jerusalén teʼ kʼiin jeʼeloʼ bey xan le uláakʼ kʼiinoʼ.
13 David túuneʼ tu túuxtaj chʼaʼabil utiaʼal ka taalak janal bey xan utiaʼal ka u yukʼ vino tu yéetel, letiʼ túuneʼ tu beetaj u káaltal. Chéen baʼaleʼ le ka éeʼsameʼenchajeʼ Uríaseʼ maʼ bin tu yotochiʼ, jóokʼeʼ ka pʼáat wenel yéetel le u maasil máakoʼob ku meyajtikoʼob le reyoʼ.
14 Le ka sáaschajeʼ Davideʼ tu tsʼíibtaj junpʼéel carta tiʼ Joab ka tu tsʼáaj tiʼ Urías utiaʼal ka u bistiʼ.
15 Teʼ cartaoʼ tu tsʼíibtaj: «Tsʼáaʼex Urías tu tséel le soldadoʼob yanoʼob táaniloʼ, teʼ tuʼux maas kʼaas yanil le baʼateloʼ. Le kéen tsʼoʼokkeʼ náachkuntabaʼex tiʼ letiʼ utiaʼal ka kíimsaʼak».+
16 Le táan kaʼach u baʼpachtik Joab le kaaj utiaʼal u chʼaʼikoʼ, tu tsʼáaj Urías tuʼux u yojel yaan u baʼateʼel tu contra soldadoʼob jach u yojloʼob baʼateʼel.
17 Le ka jóokʼ u soldadoiloʼob le kaaj utiaʼal u baʼateloʼob tu contra Joabeʼ, tu kíimsoʼob jujuntúul tiʼ u soldadoʼob David. Ichil le máaxoʼob kíimsaʼaboʼoboʼ tiaʼan kaʼach Urías le ititaoʼ.+
18 Joab túuneʼ tu túuxtaj aʼalbil tiʼ David tuláakal le baʼax tsʼoʼok u yúuchul teʼ baʼateloʼ.
19 Tu yaʼalaj tiʼ le máax tu túuxtoʼ: «Le kéen tsʼoʼokok a waʼalik tiʼ le rey tuláakal le baʼax úuch teʼ baʼateloʼ,
20 le reyoʼ maʼ xaaneʼ yaan u tsʼíikil yéetel yaan u yaʼaliktech: ‹¿Baʼaxten jach náatsʼeʼex tiʼ le kaaj utiaʼal a baʼateleʼex tu contraoʼ? ¿Maʼ wa a wojleʼex de ke yaan a atacartaʼaleʼex desde tu kaʼanal pakʼiloʼob le kaajoʼ?
21 ¿Máax kíims Abimélek+ u hijo Jerubéset?+ ¿Maʼ wa juntúul koʼolel ku taal tiʼ u kaajil Tebez yaan kaʼach yóokʼol junpʼéel kaʼanal pakʼiʼ? Le koʼoleloʼ, ¿maʼ wa tu kíimsaj Abimélek úuchik u pulik junpʼéel u tuunichil juuchʼ tu yóokʼol u pooliʼ? ¿Baʼaxten túun jach náatsʼeʼex tiʼ u kaʼanal pakʼiloʼob le kaajoʼ?›. Teech túuneʼ aʼaltiʼ lelaʼ: ‹Urías le itita, le máax meyajtikechoʼ, kíim xan›».
22 Le máak túuxtaʼab tumen Joaboʼ, bineʼ ka tu yaʼalaj tiʼ David tuláakal le baʼax kʼubéentaʼabtiʼ ka u yaʼaloʼ.
23 Le máakoʼ tu yaʼalaj tiʼ David: «K-enemigoʼobeʼ joʼopʼ u ganarkoʼonoʼob yéetel jóokʼoʼob teʼ tuʼux jáanpikʼeʼen utiaʼal u baʼateloʼob t-contraoʼ. Chéen baʼaleʼ toʼoneʼ t-beetaj u suutoʼob paachil, tak tu joonajil le kaajoʼ.
24 Chéen baʼaleʼ le soldadoʼob yaan u arcoʼoboʼ joʼopʼ u chʼinkoʼonoʼob yéetel u flechaʼob desde teʼ tu kaʼanlil le pakʼoʼoboʼ ka tu kíimsoʼob jujuntúul tiʼ le máaxoʼob meyajtikechoʼ. Tak Urías le itita kíimoʼ».+
25 Le ka tu yuʼubaj leloʼ Davideʼ tu yaʼalaj tiʼ le máak túuxtaʼanoʼ: «Aʼal tiʼ Joab: ‹Maʼ a chiʼichnaktal yoʼolal lelaʼ, tiʼ junpʼéel baʼateleʼ deporsi yaan kun kíimloʼobiʼ. Baʼaxeʼ maas tsʼáa a wóol baʼateʼel tu contra le kaajoʼ ka a beet u lúubul ta kʼab›.+ Tsʼoʼoleʼ líiʼs xan u yóol Joab».
26 Le ka tu yojéeltaj u yatan Urías de ke tsʼoʼok u kíimil u yíichameʼ, joʼopʼ u yoʼtik.
27 Chéen pʼelak tsʼoʼokik u máan u kʼiiniloʼob u yoʼtik u yíichameʼ, Davideʼ tu túuxtaj chʼaʼabileʼ ka tu beetaj u taasaʼal tu yotoch. Letiʼ túuneʼ kʼuch u beetuba u yatan David,+ ka tsʼoʼokeʼ síij u chaambal. Chéen baʼaleʼ le baʼax tu beetaj Davidaʼ jach kʼaas úuchik u yilaʼal tumen Jéeoba.+
Notas
^ Lelaʼ tu káajbal yáaxkʼiin. Óoliʼ tu mesil abril. Ilawil página 2692.
^ Wa «u palacio».
^ Wa «Betsabé».
^ Maʼ xaaneʼ táan u pʼáatal limpiail tumen tsʼoʼok u kʼiiniloʼob u menstruación.
^ Ich hebreoeʼ ku yaʼalaʼal kaʼach «xeen a pʼoʼ a wook».
^ Lelaʼ letiʼe baʼax ku túuxtik juntúul máak tiʼ juntúul u yuʼulab jach importanteoʼ.
^ Ich hebreoeʼ ku yaʼalaʼal kaʼach «Jeʼex jach tu jaajil kuxaʼanecheʼ».
